我鐘意影細路仔嘅手﹐
因為又細又有肉。
關節位無咁起角﹐
尤其用嚟數「一月大二月小」嗰八粒骨。
小朋友嗰八粒野零舍可愛﹗
我唔係專業攝影師﹐光暗對比我唔識。
齋鍾意D手仔而已。
唔止鍾意影﹐重好愛聞口水禧對手。
專揀佢瞓到比人剝光豬都唔知嘅時候落手﹐
又暖又軟又滑﹐重有BB香味。
係﹐我係變態嘅媽媽﹐我認。
另外一樣鍾意影嘅就係佢哋嘅近鏡。
因為貪佢哋塊面夠天真﹐
重未有大人嘅滄桑。
小朋友個鼻哥扁扁哋﹐
個嘴又o都o都哋﹐
面珠嗰兩團肉脹脹哋﹐
好似麵包超人。
口水禧鍾意我叫佢嗰兩團肉做「臭肉」﹐
坐車嘅時候﹐望住窗偷偷哋笑嘅佢好奇怪點解我會知佢笑緊﹐
我話「因為你面上嗰兩舊臭肉會縮起﹐我咪知你笑囉﹗」
暫時對於被稱呼為臭人嘅佢非常以此為榮﹗
所以佢嘅野前面但凡加個「臭」字﹐
佢就會好開心﹗
臭肉﹑臭狐﹑臭老婆﹑臭被﹑臭房……
佢都視為正野﹐
所以要同爸媽分享。
喺街上﹐佢會突然大聲講﹕
「媽媽﹐你有臭狐呀﹗」(頂﹗點解要教佢呢個名詞呢﹖)
喺超市﹐坐喺購物車上大叫﹕
「媽媽﹐你好臭呀﹗」
講完隨即>>>
﹗
我呢﹖>>>>(好想用絲襪笠頭﹗)
**********************************
有日同口水禧去Target﹐喺門口個特賣場有好多USD1嘅文具﹑玩具﹑用具擺賣。我最鐘意「貢」去嗰度執垃圾。呢期因為臨近開學﹐有好多開學文具同練習簿賣﹐我當然都要發揮下港媽嘅精神﹐瘋狂咁買練習簿返屋企強迫口水禧通宵達旦咁做晒佢喇﹗
而家佢已經識晒成本牛津英漢字典嘅生字同發音﹑辭海入面所有嘅中文生字兼詞語﹑唐詩三百首﹑詩書五經bla bla bla﹑數學已經計緊四式混算文字題﹑物理化學生物全部大學程度都背晒﹑琴棋書畫六國語言梗係唔少得喇﹐下個禮拜可以去返工做美國總統架喇﹗下年諗住做埋宇宙最強統領埋ET同埋異形呀﹑iron man嗰幾件蛋散﹐再喺黑洞起間大屋塞呀媽入去住﹐搞掂食碗麵。
講下笑啫﹐唔好笑咩﹖我自己笑囉咁。
USD1本喎﹐梗係有買喇我﹗不外乎填下顏色﹑剪剪貼貼﹑連下線嘅手工仔﹐暑假無野做﹐要揾野打發下時間吖嘛。加上之前個summer school上完之後發現條友仔有D野未識做﹐所以比佢試下﹐等佢開學嗰陣無咁戇居囉。試D咩﹖咪就係叫佢試下油顏色可唔可以唔出界囉。
記得上次做評估嘅時候都有問呢樣野﹐當時照直答話佢無試過﹐所以應該係會油出界嘅。結果﹐梗係油出界喇﹐可以用爆炸嚟形容佢嘅畫工﹗玩咗幾次﹐家下終於有D眉目﹐開始控制到佢隻手同成日想油出界亂叉咁畫嘅欲望﹐相入面隻貓頭鷹都總算有少少外形咁喇﹗
電動鉛筆刨都係玩具嘅其中一種。開頭唔多鍾意用木顏色﹐因為要好大力先會深色。懶人就梗係鍾意用粉彩喇﹐捽兩捽就鬼咁深色﹐線又粗﹐畫兩野就油完成幅圖。木顏色係耐性嘅訓練﹐油極都好似未食奶咁無力﹐又要油鬼死咁多下先油完﹐唔好玩嘅。
電動鉛筆刨一出場﹐媽媽煩腦盡消。有人自動用木顏色油呀油﹐落力非常﹗梗係喇﹐落力D﹐支筆好快就倔喇嘛﹐咁咪有藉口刨筆玩個鉛筆刨囉。
媽媽的另外一個煩腦 – 好快又要買過排木顏色囉﹖
你睇佢刨完支筆幾開心﹗手舞足蹈﹐第時有排你刨呀傻仔﹗
你叫佢做幾個表情嚟睇睇﹐佢好樂意奉陪…..
一號表情
三號表情﹐喺街執到錢
四號表情﹐西瓜刨
五號表情﹐見到呀媽
六號表情﹐做咗衰野
七號表情﹐呀媽老咗個樣
八號表情﹐擘大口食烏蠅
九號表情﹐低能
十號表情﹐抽筋
十一號表情﹐十個老婆嗌緊交
十二號表情﹐賣牙膏廣告……
你贏晒喇﹐有D表情我都做唔到﹐邊夠你嚟呀禧哥﹗
