「化骨龍」柏克萊探親記

話說某日喺電視廣告見到話UC Berkeley (柏克萊大學)有個恐龍展﹐我屋企條化骨龍口水禧見到佢D親戚上鏡非常興奮﹐於是佢嘅四十八孝雙親就襯住星期六帶呢條化骨龍去探下佢D老友﹐一解佢嘅鄉愁﹗

食咗個巨型早餐+午餐之後﹐我哋就向住UC Berkeley 嘅Lawrence Hall of Science 進發。其實個場館唔係喺Berkeley嘅校園內﹐正確嚟講應該係間大學大到連埋佢後面嘅山上都有校舍﹐所以我哋都係沿住上次去坐火車嘅路線行山路就去到喇。專門行穩陣路線嘅禧爸重上網check埋知道要泊錶位﹐於是連N年都唔洗點用嘅碎銀都帶埋去用嚟入錶。點解無八達通重要入碎銀﹖唉﹗係咁架喇﹐有時都覺得美國其實有D野都幾「咸豐年代」嘅科技﹐無計喇﹐政府無錢換新咪錶吖嘛﹗

好彩揾位都唔算太難﹐可能個展覽都擺咗一段時間﹐暑假亦都差唔多尾聲﹐要睇嘅人應該都嚟過睇咗﹐所以場內都唔算太擠迫﹐無上次去個「太空館」嗰次咁澎拜﹐嗰次個場恐怖到係每一個項目都比一堆人圍住﹐插針都插唔入﹐個個細路霸到個靚位之後就仿彿揸住大藍籌咁諗住「長揸」﹐C都唔肯放手同讓個位比其他人﹗好彩今次唔多呢D場面﹐如果唔係﹐呢次嘅活動又等如同我特訓EQ﹗

既然係嚟探恐龍﹐梗係要著返件恐龍衫應下景喇﹗多得肥玲之前買咗件咁靚嘅T恤﹐等某人入到場內可以同佢D親戚相認吖嘛﹗

呢個就係個展覽館﹐大到嚇C人﹗淨係由路邊行去個入口處都等如行咗大半個足球場一樣﹗遠望成個太空基地咁「圓姑look」﹐真係企喺出面齋睇一日都未必估到入面係咩嚟嘅﹗

我係一個孤陋寡聞嘅蛋散﹐一眼望住呢舊野確實係唔知咩嚟﹐重以為係比小朋友嘅鋼架﹐重想話「呀﹗名大學果然係名大學呀下﹐設計嘅鋼架都寧舍有型有款﹗」當然﹐我心咁諗啫﹐口就梗係唔會講喇﹐唔怕比人笑咩﹗但某人真係當舊野係鋼架咁擒﹐重叫埋呀媽一齊擒﹐研究下係點玩咁喎﹗

衰仔﹗記住第時要讀多D書呀﹗你睇﹗原來人哋呢舊野係DNA嘅解構圖嚟架﹐唔係鋼架呀大佬﹗你擒就無乜野﹐若然呀媽頭先真係聽你講擒上去﹐大人大姐當舊野係玩具就羞家喇﹗

正如舊DNA模型一樣﹐我望見呢條鯨魚又再次R爆頭﹗點解擺個咁嘅模型喺度架呢﹖太空基地﹑DNA﹑鯨魚﹐有咩共通點呀﹖正當我大惑不解之際﹐有條茂利已經有理無理一個飛身爬上條鯨魚尾度再sir返落嚟﹐注意﹐佢係如相中嘅姿勢咁sir﹐即係佢已經用自己件衫抹乾淨咗條魚尾喇﹗企喺遠處嘅我不禁心裡一句「多謝家姐﹗白衫變灰衫﹐唉﹗」但諗住一場嚟到都係為咗比佢睇下野玩下咁﹐野野喝住晒其實係幾無癮嘅﹐所以佢一而再再而三咁喺我眼前重複又重複咁抹咗條魚尾幾次﹗

算﹗大不了返去洗﹐我重頂得住﹗

唔怪知得間學校咁多人鍾意爭崩頭想入喇﹐你睇下佢幾好風水﹗背山面海﹐有靠山時又有水﹐想唔發都難。不過呢間係州立大學﹐唔係私校﹐所以發就無佢份喇﹐係得個名氣勁而已。之前想加學費﹐重比學生示威抗議﹐唔知後來搞成點﹖點解我唔關心時事﹖梗係喇﹐我未有耐要供口水禧讀大學喇﹐況且到時佢讀唔讀得成書有邊個知﹐我洗乜咁快關心要比幾多錢學費喎﹗

不過啱啱抵步嘅時候﹐口水禧話要住喺呢度﹐我同佢講﹕「想住就比心機讀好D書﹐第時考到入嚟嘅話﹐住飽佢喇﹗」口水禧﹕「呀﹐點解要考﹖唔洗考﹗」

梗係唔洗考喇你﹐你四歲幾都識唔到十隻字﹐點夠人哋兩歲半已識逾千字嘅神童比呀傻仔﹗

入場費盛惠USD17(每位大人)+USD11(每位小童)﹐係我喺呢度去過最貴嘅展覽﹗或者係我見識少﹐成日去埋D cheap cheap哋嘅場﹐所以唔係好知價啫﹗

比咗四十幾蚊入場費﹐我預期係要見到真恐龍同我講聲「歡迎光臨」架﹗

但只見入口處附近有幾個攤位擺放咗幾架野喺度比D小朋友玩﹐其實全部都係同科學有關嘅玩意。當然﹐年紀細嘅就當玩具咁玩﹐年紀老嘅(即係我喇)就當玩嘅小朋友如馬騮咁睇﹐因為佢哋真係玩得好投入﹐乜鬼野都玩一餐﹐而且係玩得非常happy添﹗

上面嗰部野令我諗起獎門人嘅超級無敵啜兵乓波﹐口水禧就唔知當佢係咩﹐總之有野吹出嚟又將個波吹到好高好好玩喇﹗

呢個野亦係小朋友瘋狂喜愛嘅其中一個玩意。只見佢哋喪拍喪插﹐在場有好多鐵沙掌同如來神掌嘅明日之星﹗

終於有隻恐龍睇下﹐口水禧重有D留戀其他嘅玩具﹐叫佢同恐龍影張相都非常唔專心。呢趟幾廿蚊恐龍團怕且要變成科學館自由行喇。

學校都曾經玩過嘅玩意﹐老師埋咗D骨喺沙裡面﹐比D掃比小朋友﹐叫佢哋揾恐龍骨。因為曾經玩過﹐所以口水禧求其掃兩野就閃咗去第二度玩。

呢個係恐龍放蛋嘅窿﹐佢哋生咗蛋之後就會用樹葉遮住D蛋﹐唔記得咗有無話點孵添。呢個環節令我最驚喜嘅並唔係口水禧有無聽我講野﹐而係佢竟然識得入去之前要除鞋﹗我見到有D小朋友無除﹐咁即係口水禧唔係因為見到人哋除先除﹐係自己主動除咗先跳入去﹐於是其他嘅小朋友都除咗先入去玩。所以我讚咗佢。

呢個係人同恐龍嘅重量磅對比表﹐口水禧家下嘅重量就等如手指指住嗰隻咁上下。但佢呀媽就……

Callovosaurus﹗唔知中文名叫咩﹐不過上網查下原來係食齋嘅。初初重以為係暴龍添﹗我諗起周星馳國產零零柒扮恐龍個樣﹗

呢個係身高比對表﹐口水禧喺恐龍時代應該係其他大恐龍嘅獵物喇﹗不過食咗都未夠喉﹐要食多幾隻先得。食我就唔同呢﹐食完飽到上心口﹐起碼滯喉幾日先要再食過﹗

呢個係話比你知D恐龍BB孵出嚟之後有幾大隻﹐最大都係同隻貓差唔多﹐最細嘅可以係老鼠大少少咁上下。

睇下﹐口水禧嘅size都唔夠人攝牙罅﹗

正所謂﹐比咗四十幾蚊入場如果淨係睇嗰幾張恐龍相﹐我就反轉個場喇﹗所以﹐場館內除咗有恐龍展覽之外﹐重有好多野比小朋友邊玩邊學野。我哋大人眼中覺得理所當然嘅事﹐喺小朋友眼中卻係新奇事﹐其實有時諗深一層﹐有D野你問我點解會咁嘅﹐我都答唔出。例如點解天係藍色﹖點解會有風﹖之前帶口水禧去書局時睇過一本書有講﹐不過間書局執咗笠﹐而家真後悔當時無買本書﹐而家想買但又唔記得書名。

呢個玩意可以被比小朋友揀唔同物質嘅野放入去有風吹嘅管裡面﹐隨住物件嘅重量同小朋友揀嘅風力睇下舊野可以比風吹到幾高﹐有D係可以由底吹到上頂再飛埋出嚟﹐有D就維持喺某個高度不停咁上上落落但又唔會飛出嚟。口水禧對呢個館非常有興趣﹐喺度打咗好耐凳。

放個兵乓波落去﹐個波會沿住個盤沿路打圈一路越轉越落﹐最後跌埋落個窿裡面。點解唔係一放落去就直sir入個窿呢﹖

場內周地一個一個地攤﹐放咗好多雪條棍比小朋友砌模型﹐當然唔止淨係砌野搭高野咁簡單喇﹐當中有好多學問小朋友一邊砌嘅時候可能會有所發現都唔定。

模型車跑道比小朋友自己由零開始﹐揀零件揀車呔﹐砌好架車然後去試跑。口水禧嗰架唔係佢砌嘅﹐係喺地下執嘅。因為太多人﹐我哋無足夠嘅零件自己砌一架。唯有執人哋唔玩嗰D嚟玩。

過山車嘅軌道都係一大學問﹐呢度有兩條軌度﹐黃色嗰個個圓圈係大D嘅﹐藍色嗰個係窄D嘅﹐小朋友放個波落去就會知道邊一條軌道可以行過山車。

結果係藍色個圈窄D嗰條軌道可以keep住個波去到最尾﹔黃色嗰個﹐當個波去到個圓圈嘅中間之時﹐個波突然跌咗落嚟﹐你問我點解﹐我真係唔知呀﹐我嘅科學知識重停留喺中一嗰樹架咋﹗去到中三嘅時候﹐所有理科嘅科目都滿江紅﹐完全無嗰方面嘅頭腦。但係而家同口水禧咁玩呢個模型又覺得好好玩﹐會想知道點解黃色嗰條唔得。但係我已經年紀大機器壞﹐睇完個板寫乜家下都唔記得喇。