車呔禧動物園自由行

話說有個週末約咗呔家去動物園﹐兩家七口去自由行喇喂﹗獅子老虎﹐有三件快餐﹑特餐同下午茶餐嚟探你哋﹐係咪零舍興奮呢﹖但係事實唔係喎﹐獅子熱到去咗樹底下抖涼﹑老虎喺好遠處攤C﹑鱷魚潛晒水(真係潛咗喺水裡面唔出嚟)﹐真係嘥料﹐唔洗問梗係食濟咗喇﹗

我哋中午時份入園﹐本來泊開嗰個停車場已經滿座﹐職員點咗我哋去平時愛嚟野餐嘅草原上面泊﹐兩架車「凳下凳下」(因地面唔平)咁揾到位泊低之後﹐我哋三個就先嚟觀賞下呔家落車前嘅準備過程。呔爸話﹕「我哋習慣咗架喇﹐次次一停低車﹐個個朋友就企喺我哋架車側邊圍觀等我哋成家落車。」我明我明﹐個個有細路嘅都經歷過呢個階段架喇﹐我哋不知圍觀得幾開心﹐完全唔介意等兩位哥哥仔準備好先落車喎﹗

只見一瞬間﹐呔爸喺車尾搬呀搬﹐行好咗車呔嘅改裝車﹑隨身嘅物件包括特大背囊一個﹑飲品﹑零食﹑車呔嘅行裝﹐連水都派咗兩支比我哋﹐佢架車成架百寶車咁﹐真係要乜有乜咁濟﹗我明我明﹐有小朋友嘅車係隨時都有呢D日用品﹑必需品﹑食品﹑飲品……

因為到步嘅時候呔哥重同周公傾緊大茶飯﹐細佬一馬當先變咗身之後就落咗車﹐稍移玉步去咗佢同哥哥架戰車度。點解要變咗身先落車﹖因為佢著咗好多衫﹐但動物園嗰區又見熱熱哋﹐於是先嚟個大變身﹐然後先落車囉。

變好晒身﹐我哋就一行七人向住動物園其中一個入口進發。首先嚟個斜路先﹐呔媽有隻手因為之前太操勞﹐結果整傷咗要包住護腕﹐即獨臂刀。咁相對嚟講﹐我比較健全嘅﹐無理由唔幫手推車架﹗嘩﹐原來推孖仔車上斜係咁地獄式減肥架喎﹐唔怪之得佢兩公婆咁fit喇大佬﹗雖然我哋以龜速嘅速度上斜﹐但都照樣索索哋氣﹐內裡都feel到有D扯蝦﹐好不容易終於到頂喇﹗

好奇怪點解唔見咗呔爸呀呢﹖哈哈﹐佢重慘﹗初初開始上斜之時突然發現漏咗銀包喺車﹐於要要走返去攞。嗰度已經有成百米咁遠。我哋繼續上﹐上到頂嘅時候﹐喺門口等呔爸﹐佢身水身汗上到嚟先發現原來張入場卷漏咗喺車>>>>(sorry﹐我係黑心咗少少﹐但真係忍唔到笑咗出嚟﹗)幾乎想當眾高歌一曲「補氣力﹐壯膽色﹐表現好身手﹐飲至寶三鞭酒﹗」同佢打氣﹗

於是鐵人呔爸又再次出征跑佢嘅鐵人耐力賽o勒。

我哋幾條友就喺門口等佢﹐此時有兩件蛋散食起零食上嚟﹐一個話﹕「勁辣﹗以前返學成日食﹗」另一個抵擋唔住又學人食﹐食完話﹕「嘩﹗係喎﹐真係好辣喎﹗嘩﹗辣到去喉龍喎﹗」跟手就即刻要飲水解辣。

喺呢個時候﹐戰車上嘅車呔兄弟亦都不甘示弱﹐強烈要求跳車﹐見佢哋個鐵人老豆無咁快上得返嚟﹐怕且兩兄弟就嚟嗌救命驚動四方人馬﹐於是唯有暫時放咗兩個「人質」﹐比佢哋周圍走動下先喇。其實我哋喺嗰度玩一日唔入場都得架﹗事關D細路求其有地方比佢喪跑就得架喇嘛。

過咗一陣﹐見到鐵人老豆終於跑完馬拉松上返嚟﹐此時嘅佢已經成個出水小芙蓉咁款﹐要佢老婆呀獨臂刀幫佢抹汗。鐵漢加獨臂刀﹐真係有如一套好勁嘅武俠片﹗

一入園﹐原來就係羊同豬竇嘅位置﹐我哋首先睇咗豬先﹐呔仔車仔好開心﹐細佬重會猛咁講「豬豬﹗豬豬﹗」嗰個口水禧吖﹐有真豬唔睇﹐走去睇人哋整嘅豬模型﹐重要猛問點解隻豬唔同佢講野喎﹗

睇完豬﹐我哋走去睇羊咩咩﹐亦都係三個小朋友浦得最耐嘅地方﹐因為有得模羊吖嘛﹗車呔兩兄弟都好鍾意模羊咩咩﹐有隻肥羊攤咗喺地下任摸﹐佢直頭係懶得郁嗰隻﹐你有你摸﹐我有我攤。呔仔同口水禧都相繼同羊咩咩梳過毛﹐而細佬就周圍走﹐見到羊就係咁指住叫「豬豬﹗豬豬﹗」﹐任憑你點矯正佢話﹕「細佬﹐呢隻唔係豬豬呀﹐係羊呀﹗」細佬都會跟手即刻講﹕「豬豬﹗豬豬﹗」好喇好喇﹐你鍾意叫佢哋做豬豬就豬豬喇﹐或者呢個係細佬同羊咩咩之間嘅暱稱而我哋唔知架呢﹗君不見D老公成日都叫個老婆做「豬豬」架咩﹖個老婆明明係人﹐點解要叫佢做「豬豬」呢﹖都係同一個道理啫﹐係咪呀細佬﹖

中間呔爸唔知喺邊度揾嚟幾條草比D細路餵羊。我好似聽到呔媽話細佬唔小心條草隊咗落隻羊隻眼度。但隻羊都重係攤喺度無郁過喎﹐你話佢係咪懶到出汁呢﹗去到呢度﹐呔爸已經有如人哋洗咗頭一樣﹐額頭出水﹐因為佢著咗件黑色同深灰色嘅長袖衫。我屋企嘅老爺就著住長牛仔褲﹐不過口水禧因為大個D﹐唔洗野野追住佢﹔但呔爸要追仔﹐所以體力勞動得勁D﹐繼頭先鐵人賽減咗兩磅之後﹐呢野焗桑拿又減多兩磅﹗

睇完羊﹐拿拿臨用清潔用品同對幾對手仔消下毒先。跟住就去睇其他動物。

經過蝙蝠館﹐幾條友入去抖下涼﹐雖則入面一滴冷氣都無﹐完全係自然風嗰隻﹐但已經好過之前睇羊嗰度烈日當空之下滴汗﹐我著短袖短褲﹐難為嗰兩個老豆咋﹐真係隔肋底都溶咁濟﹗

三個小朋友都無一個對蝙蝠有興趣﹐枉隻蝙蝠重無偷懶﹐熱情表演倒吊向左走向右走﹐又張開對翼拍幾下過我哋睇﹐可惜三位少爺對真嘅無乜興趣﹐反而係鍾意喺嗰度跑跑跳跳多﹐隻蝙蝠真係比佢哋吹到睥一聲﹗細佬好鍾意跟住D哥哥走嚟走去﹐呔仔做乜﹐細佬就做乜。間唔中口水禧做乜﹐呔仔又會跟住做乜﹐然後就到細佬。其實已經見過好多次﹐但口水禧同呔仔都係無乜交談過﹐因為口水禧入場之前已經掛住想去玩D機動遊戲﹐入咗場之後提完又提﹐真係煩到無人有﹗拿﹗呢個不得不承認係獨生子嘅行為﹐平時習慣我同佢老豆跟住佢嘅喜好而喺場內活動﹐所以口水禧完全唔識當有其他小朋友同我哋一齊去玩嘅時候就唔應該只顧自己嘅喜好而懶理人哋想點。所以﹐我哋梗係無專登就佢一個人而要成棚人由山腳走上山頂陪佢去玩機動遊戲喇喂﹗但我答應佢我一定會帶佢去玩﹐不過唔係即刻囉。雖則係咁﹐佢仍然係佢有佢提﹐我有我拒絕。真係比佢激C﹗

入場前獨臂刀已經請求我哋幫手睇仔﹐絕對明白呢個要求﹐因為上次同口水禧兩個同學嚟玩已經體驗過向左走向右走嘅威力﹐所以今次都要mark實呢三件無off制嘅機械人﹐走失一個都大X獲﹗所以影相嘅重任當然又係交比鐵人老豆負責喇﹐我幫手睇仔吖嘛﹗禧爸﹖佢幫手睇我個仔吖嘛﹗

睇完蝙蝠﹐行經一部壓輔幣嘅機﹐嘩﹗真係唔見由自可﹐比三個少爺見到佢﹐我哋喺部機前面哺咗最少幾個字﹐壓咗三個幣﹐連隔離輪廁所嘅人都轉咗幾勻﹐我哋重喺度壓緊錢幣﹗廁所裡面如廁嘅人應該一路排毒一路聽住喺出面傳嚟幾把男女老嫩鬼揸大嗌嘅聲﹐好似部機會跌金幣落嚟咁興奮﹗其實本來原意係排隊去廁所﹐不過排咗好耐正想放棄之際見到部機﹐於是走去玩機玩咗好耐﹐連廁所外嘅人籠都散晒﹐我哋重未捨得走﹐搞搞下隊都唔洗排就有得去廁所﹐一舉幾得﹐滿足晒幾個願望嗰隻﹗

我哋每行經一個景點都要時間先集齊返D人再前行。追仔嘅追仔﹑睇仔嘅睇仔﹑追完再睇﹐睇睇下又變咗追﹐帶細路去動物園就係咁先好玩吖嘛﹐一舊化石咁跟住我哋行即係對周圍嘅野都無興趣喇﹐係咪﹖

其實我已經唔記得睇咗幾多動物﹐不過印象最深係去睇長頸鹿﹐因為嗰日呔仔手上有隻塑膠嘅長頸鹿公仔﹐所以當佢見到真嘅長頸鹿﹐佢好開心﹐挨住欄竿睇咗一陣。口水禧就猛話D動物唔同佢講野﹐我諗呔家可能以為口水禧黐咗線﹐成日要D動物同佢講野。係呀﹐因為我喺屋企成日扮動物同佢講野﹐所以佢會成日都問點解長頸鹿唔同佢講野﹐點解隻老虎唔同佢講野。

睇完長頸鹿﹐行下行下﹐見鐵人老豆同獨臂刀個樣有D疲態﹐於是決定醫肚先﹐都行咗兩粒鐘﹐呔媽重要之前淨係食咗個包同少少零食﹐再唔坐低食D野抖下﹐我驚一陣要倒返轉叫佢哋兩個仔推返坐住孖車嘅老豆呀媽落山﹗求其喺小食部外出揾咗張長凳坐低﹐佢哋就去咗買野食﹐我喺度睇下仔。好彩呢個時候佢哋無表演向左走向右走咋﹐如果唔係﹐我要識分身術先得喇﹗

基本上﹐細佬係跟呔仔﹐呔仔做乜﹐細路就做乜。所以睇實呔仔就等如睇住細佬。而口水禧平時比我嚇得多﹐叫佢出街一定要跟實媽媽﹐唔好自己走咗去﹐一陣比壞人捉咗我都救佢唔到﹐我都唔想咁嚇法﹐但萬一真係比人老笠咗就真係……不過好彩三個都唔敢走得太遠﹐多數都喺視線範圍內活動﹐所以睇一陣都無問題。

兩個哥哥就好喇﹐食完就可以去玩機動遊戲﹐細佬就得個望字﹐一唔係就玩下地下嘅樹枝或者佢架車仔﹐無扭過計話要跟上去玩﹐真係乖仔﹗本來呔媽想比呔仔試下玩小童過山車﹐不過我上次坐過﹐其實都幾刺激﹐所以最後呔媽放棄﹐如果唔係﹐佢嗰晚就唔洗瞓都似﹗唯有得口水禧同佢老豆上去玩喇。

本來諗住坐火車睇動物﹐喺排緊隊嘅時候﹐口水禧又話要去玩唔知咩車﹐見條火車籠都幾長﹐於是就叫禧爸同呔媽呔仔去玩住其他野先﹐我同呔爸排火車﹐排到咁上下先返嚟喇。呔爸將手上嘅細佬交比我﹐佢去手推車上攞返呔媽個銀包。返嚟嘅時候﹐呔爸張開手想抱返細佬﹐點知……點知…..哎呀﹗有人唔要老豆呀﹗搖搖頭﹐推開老豆﹗但最最最奇特係……個老豆嘅面上竟然露出一絲開心嘅表情﹐樣衰衰陰陰嘴笑喎﹗ 佢話﹕「哈﹗慳返唔洗抱﹐你慢慢抱喇﹗」講完重將已經周公急call嘅細佬個頭挨落我膊頭度等佢瞓覺添﹗呢個老豆﹐真係……真係…….有無咁醒呀﹗就係咁﹐細佬就比一個金魚婆抱咗去﹐個金魚婆重加多兩錢un身un勢﹐呢鋪重唔送呀細佬去覆call﹖瞓到佢吖﹐轉手比佢老豆擺佢落BB車都唔知﹐一路瞓到去食晚飯嗰度再瞓多陣先起身﹐問你怕未﹗

 

排排下﹐呔哥同禧哥都話唔想坐火車喇喎﹐咁我哋呢D做「細」嘅﹐梗係承全佢哋喇……眼望前面重有兩打人喺度排緊﹐嗰度起碼都要排多半粒鐘先到我哋上車﹐就算我哋有耐性排﹐怕且嗰兩件主角都無咁好氣慢慢等。加上都玩咗大半日﹐又無瞓晏覺﹐無謂夾硬等落去﹐挑戰兩個o靚仔嘅忍耐力﹐於是我哋決定走人﹐去食晚飯。

 

一行幾件蛋散就浩浩蕩蕩咁向山下走人。嗰陣已經開始涼風陣陣﹐所以話我哋呢度一日嘅溫差真係可以玩C人﹐入園嘅時候就熱到你標汗﹐走嘅時候就沾寒沾凍咁﹐口水禧細個嗰陣﹐我哋車入面成日都會有幾件唔同嘅外套﹑長褲短褲﹑被都有﹗禧爸話我好似帶咗個衣櫃上車喎﹗計我話﹐何止成個衣櫃呀﹐直情係成個屋企食得同用得嘅都會喺架車出現﹐問你怕未﹗

 

前往食飯嘅途中﹐所有少爺都閉目養神叉下電先﹐呢個係所有想食啖安樂茶飯嘅父母皆知嘅道理。結果去到目的地先六點好似都未夠﹐D少爺重叉緊電﹐於是D老豆呀媽都一於喺車裡面等。上網嘅上網﹐唔上網嘅咪坐住等囉。

 

無幾耐﹐少爺們陸續「返來囉」﹐D呀四咪開始搬凳﹑攞袋﹑抱仔拖仔入餐廳放飯。

 

口水禧大咗﹐食野容易過以前。而家佢食就食﹐唔食就無得再食。通常佢都深明呢個大義﹐食得落就食﹐食唔落﹐我哋都唔敢迫佢﹐費時一陣又嘔﹐我哋盞賴野。細佬可能見肚餓﹐除咗食媽媽幫佢同哥哥order嘅湯粉之外﹐食完重「喉」住佢老豆碗野﹐結果同佢老豆分甘同味﹐老豆一啖﹐細佬一啖。呔哥呢…….開頭有少少玩佢老豆呀媽﹐猛話要出去餐廳外行﹐呀媽啖飯都未送入口﹐呔哥企喺媽媽身邊拉呀媽隻手要出去﹐唔肯妥協食完野先去玩呢個deal﹐亦都唔願意跟金魚叔叔出去﹐係都要呀媽陪佢出去﹐呔老豆心痛個老婆無啖好食﹐「定眼」望咗呔哥幾野>>>>> (我淨係想揀個最接近嘅樣﹐但都有D出入﹐呔爸對眼係大D嘅﹐同埋佢D手指無咁樣嘅)唔好意思呀weak 7﹐坐喺你對面嘅我忍住笑忍到咬爛嘴咁濟……我知我知﹐我無同情心﹐我認﹐我唔係人……

 

後來﹐禧爸抱咗細佬﹐呔仔走過嚟口水禧張凳同禧禧哥哥玩車仔﹐喺呢個時候﹐只見遠處有個女子見機不可失﹐一個飛身攞住個碗仔同羹攝過嚟﹐趁住呔仔玩車玩到老豆姓乜都唔記得嘅時候質咗啖飯入呔哥個口度﹐呔哥亦不為意已經墮入圈套﹐非常合作地一啖一啖咁食晒碗野﹗就係咁﹐呔仔就喺唔知自己中咗招嘅情況之下比佢呀媽成功隊咗碗野佢食晒喇。好野﹗呀媽好野﹗果然係熟手技工﹐呢條「襯佢玩餵佢飯」嘅橋都諗到﹐掂﹗

 

重有一樣野呀﹐呢兩公婆真係唔係天生一對就假﹐食完飯﹐禧爸重抱住細佬﹐有人又重施故技﹐用一招「襯你抱仔﹐偷偷埋單」呢招埋咗張單﹗快到我連佢哋幾時埋咗單我同禧爸都懵然不知﹐你兩個D身手係咪喺羅湖火車站出面練返嚟架﹖咁快嘅﹖﹖﹖﹖﹖ 我哋已經不下幾次衰喺佢哋手上﹐真係無面見人。人老咗﹐D反應真係……唉﹗