純粹交貨

由於早前個memory card reader壞咗﹐積積埋埋唔知N咁多張唔記得幾時影嘅相喺相機裡面﹐今日先有機會爆D出嚟﹐肥玲﹐唔洗再追我寫blog喇﹐下面大把相﹐食得就食喇你﹗

唔係人嘅我﹐前一篇blog成堆回應未回﹐皆因放咗三日假期﹐其實無乜點去過邊﹐不過硬係揾唔到時間update個blog。但我會回架﹐再等下添喇。

朋友早前比咗張足球機口水禧。口水禧欣喜若狂﹐一搬返屋企即嗌話要玩。最佳嘅陪玩人選梗係佢老豆喇﹗事關一眼望落去已經覺得有D眼花﹐莫講話要我一個控制幾支野﹐每支上面重有幾個人仔添﹗大佬﹐我手腳唔協調架嘛﹗口水禧都唔醒目嘅﹐猛叫我陪佢玩﹐大哥呀﹐你呀媽雖則有對甲組腳﹐但不代表你呀媽真係踢過甲組架嘛老細﹐呢D咁粗重嘅野揾你老豆陪你玩喇﹐我都係企埋一邊觀戰好D﹗

只見兩仔爺夜媽媽叫到鬼殺咁嘈﹐好彩唔係住喺香港咋﹐實比鄰居投訴喇﹗

毫無技術可言嘅口水禧完全唔知自己應該要做乜﹐所以個波入咗佢個籠門都唔驚佢又輸到入廁所喊﹗見佢有時自己入自己個籠門重鬼咁開心﹐咁就知佢完全係「踢波不是求分數」嗰個境界喇﹗

尋日有哥哥姐姐嚟同佢玩呢部野﹐佢都係搞搞震無幫襯﹐人哋用手轉嗰D鐵棒﹐口水禧直頭自己落場用手踢波﹐完全無視犯規嘅問題﹐總之佢有佢落場﹐哥哥姐姐唯有任得呢個蛋散喺樹用足球機嚟玩手球﹗

****************************************

有一日見佢悶悶地﹐於是邀請佢擔任我嘅助手入廚房幫手做甜品食。其實比小朋友入我哋一家之煮嘅基地都真係要經得起考驗先得﹐如果唔係好易會爆血管﹗

預咗會可能要抹地抹到PK﹑預咗整一大輪最後係無得食﹑預咗D麵粉明明磅好晒但最後會少咗一半等等……

呢個野佢恨玩咗好耐﹐我點知﹖

睇下佢個嘴微微向上﹐陰陰嘴笑就知喇﹗我平時搞嗰陣唔會咁嘅表情囉﹗

係咪好囂張呢個樣﹖

叫佢篩麵粉﹐佢真係想篩走晒所有粉﹐篩到個兜入面一粒不留咁濟﹗

一邊好唔專心咁做野又一邊望住第二度……

係﹗佢個髮型幾爆的。唔出街唔返學﹐我兩母子唔梳頭的。

好彩磅多少少粉﹐唔驚你篩走我D粉﹗

搽牛油搽到周街都係﹗可能係個肚腩遮住咗D視線……

最後係有整到個甜品出嚟嘅﹐不過就麻麻哋好食﹐相都費事影。

********************************

曾經我試過喺屋企整過prime rib﹐即你喺出面食自助餐嗰陣﹐有一張枱有個師傅長時間企喺度﹐面前有一look牛肉﹐你要嘅話﹐佢先片一塊薄薄哋嘅比你﹐跟住你再喺上面淋少少汁嗰款野食。

話說﹐我喺超市買一舊返嚟諗住自己整﹐結果梗係領咗野喇。熟得濟﹐又乾又硬過乜咁﹗之後唔敢再整喇﹐費事嘥料﹗

上個禮拜身痕﹐想再試多次﹐查實朋友嚟食飯﹐我整嚟整去都係嗰幾個餸架咋﹐第一次食嘅以為我好似好識煮﹐其實我空有任何技術可言﹐咁多年都係嗰幾樣餸攞出嚟見人架咋﹗

於是的起心肝﹐喺邊度跌就要喺邊度起返身吖嘛﹐好﹗呀姐唔信整唔掂你個prime rib﹗哼﹗走去買多次﹐開口同人講要a chunck of prime rib﹐人哋R晒頭唔知我想點。我都唔知自己想點﹐成個肉枱嘅師傅走嚟研究究竟面前個瘋婦想買咩呢﹖最後都比我買到我想買嘅野﹐其實我上次都係咁叫個師傅比舊肉我架喇﹐上次一D問題都無架喎﹗算喇﹐總之我買到我想要嘅野就算喇﹐睇下個貼紙﹐原來叫Roast Beef Ribs﹖﹖﹖ (shit…又唔記得咗個名添﹗)總之要有個Roast字佢哋先知要一大舊而唔係一塊喇。