自私﹖

可惜﹐小朋友乖﹐大人就……

今年我哋一個禮拜要返四日學﹐一個星期需要22個家長嚟co-op﹐但我哋班只有15個學生﹐其中有四個家庭話明一個禮拜只可以嚟co-op一次﹐有D因為要返工﹐一個禮拜唔可以請兩日假嚟co-op﹔有D因為屋企重有個BB要湊﹐個爸爸/媽媽要留喺屋企湊BB﹐另外一半就要返工﹐淨係可以嚟一日。就係咁﹐淨返嘅11個家庭就要填滿淨低嘅18個co-op﹐10個煲得9個蓋﹐少不免梗要有人co-op多一日﹐咁負責編co-op時間表嗰位家長自然就會將唔洗返工又無BB要湊嘅媽媽編多一日比我哋co-op。

對於我嚟講﹐我絕對無所謂﹐出發點唔單止係為自己嘅小朋友好﹐亦都係為咗其他小朋友同老師好啫。試想下﹐十幾個小朋友﹐同時間可能有D喺室外玩沙池﹑打韆鞦﹑踩單車﹑爬樹﹑睇動物等等﹐亦會有D小朋友喺課室入面畫緊畫﹑玩玩具﹐間學校話大唔大﹐話細都唔細﹐如果唔夠大人睇住嘅話﹐萬一有意外就真係大獲喇﹗

但係﹐未開學之前已經有個家長開聲話個co-op時間編得唔夠公平﹐佢話點解有D家庭會co-op得少過其他人﹐而佢就要co-op兩日咁多。編時間表個家長已經解釋咗個原因﹐重解釋話如過一定要嗰四個家庭嘅家長嚟多一日﹐佢哋就會因為無辦法配合而將個小朋友退學﹐咁最後盞令到剩餘嘅家長因為人數又少咗而要再co-op多D。

糾纏一輪﹐尋日co-op完﹐老師同co-op嘅家長總結尋日嘅工作項目時﹐嗰個投訴時間表嘅家長又再次攞呢個話題嚟討論﹐我真係想講﹐多鬼餘﹐再傾都無用架喇頂﹗人係得咁多﹐咁去邊度變多幾個人出嚟啫﹖再講﹐呢個女人有一對龍鳳胎喺我哋班入面﹐計人頭嘅話﹐佢要co-op兩日有何不妥﹖頂﹗我得一個仔去讀﹐我都要co-op兩日喇大姐﹗真係唔知佢有乜好投訴﹖佢個仔重要係麻煩嗰隻﹐郁D就大喊大叫﹐完全無守秩序嘅表現但個孖妹好OK架喎﹗ OK﹐小朋友無辜嘅﹐唔好拉佢哋落水﹐呀哥嘅問題我哋可以慢慢教。但個呀媽就真係……

呢個都唔係最我失望嘅重點。最失望係竟然有其他家長都覺得要佢哋co-op兩日係唔啱嘅做法﹐佢哋唔想co-op咁多。嗰對龍鳳胎個呀媽重問老師可唔可以減一個活動﹐咁就唔洗要咁多家長幫手。但老師話學校一路嘅理念係要小朋友平衡各方面嘅發展﹐每日上堂要有美術﹑數學﹑語言﹑科學同埋體育咁多範圍﹐減咗是但一樣就違背咗學校嘅理念。聽到呢度﹐揸住地拖嘅我真係想一個地拖塞入個八婆呀媽把口裡面﹐好想問佢點可以咁自私架﹖為咗自己唔洗嚟co-op多一日﹐竟然要老師減活動﹖變相唔止剝奪佢對仔女接觸唔同事物嘅機會﹐亦都令到其他小朋友無機會學多D野吖嘛﹐頂﹗你點可以代表埋我哋其他自願嚟幫手嘅家長嘅意願呀八婆﹗頂﹗邊個頂唔順咪出去揾第二間學校囉﹐你肯交多七倍學費﹐你以後都唔洗再煩去學校幫手嘅問題喇﹐到時你咪大把時間去挫指甲﹑去gym﹑去shopping囉大姐﹗嘈嘈嘈﹐嘈乜Q野啫﹖你嚟得呢度就預咗要幫手架喇﹐唔係你送對仔女嚟做乜﹖點解唔去其他學校啫﹖嚟co-op多一次﹐都係用你兩個半鐘時間﹐當計埋揸車嚟﹐來來回回﹐最多用你四個鐘頭時間﹐四個鐘頭換你嘅仔女所得嘅野知唔知有幾咁多呀﹐你挫唔挫到四個鐘指甲咁多呀﹖一個禮拜用你八粒鐘就嘈到乜咁﹐頂﹗咁點解要生仔呢﹖唔做呀媽咪無呢D煩腦囉﹗

有D家長話當初學校D人同佢哋講一個禮拜嚟co-op一次﹐但而家變咗兩次﹐雖然無講出口﹐但我覺得佢哋咁講好似覺得自己比學校昆咗咁。喂﹐我記得學校D資料係話一個月最少要co-op四次﹐但無保證一個禮拜只需co-op一次架喎﹗OK﹐就算真係真係有講過﹐但而家嘅情況唔係昆你嚟做同你哋仔女無關嘅事吖﹐你哋嘅仔女都有份上堂吖﹐你嚟幫下手會死麼﹖你又要貪學費平﹐但又唔願意付出時間﹐有無咁大隻蛤乸呀老細﹖學校講明學費咁平係想多D呢區嘅小朋友有機會嚟讀preschool/pre-kindergarten﹐因為出面嗰D真係貴到嚇C人﹐咁人哋要請校工﹐請職員等等﹔呢間學校咁平學費﹐老師嘅人工少得可憐﹐人哋去第二間教可以多好多人工﹐但佢哋都願意留喺度教﹐(可能人哋成千萬身家唔自在幾多人工)﹐但有一份愛心已值千金喇﹐你班PK攞人著數就得﹐付出少少愛心就鬼「鏈」咁叫﹐都唔知點做人呀媽老豆呀你哋﹖

重有嗰D話要湊BB嗰D﹐其他人都可以帶埋個BB嚟co-op﹐點解你又唔可以呢﹖就算乜都唔做﹐齋坐幫下手睇住D細路都唔得咩﹖唔通會叫你去擔泥咩﹖

嗰日去學校大掃除呀﹐D人又嚟喇﹐講明要做八個鐘頭﹐又有D兩公婆嚟做四粒鐘就當八粒鐘﹐中午就鬆咗人。留下一大堆野比留低嘅人做到死咁濟﹗因為走淨我同另外一個呀媽﹐其他都係老豆﹐所以由我一個人抹晒口水禧而家去嘅嗰個課室嘅野﹐加廁所同個亂過亂葬崗嘅廚房﹗做完重要出去後院掃樹葉曬窗簾﹔嗰個呀媽就抹另外嗰間課室﹔其他嘅老豆全日都喺出面曬足八個鐘太陽(嗰日差唔多四十度﹗)油油﹑鋸木鋸樹﹑整圍欄﹑清雞籠﹑同D木枱凳打磨等等﹐一句辛苦都無怨過﹐成個星期六就咁無咗﹐返到屋企成個人臭到自己都想嘔﹗為咩﹖咪都係為咗小朋友有個乾淨靚靚同安全嘅環境開學。邊個叫你要去呢間學校啫﹖去成千蚊一個月嗰D學校﹐呢D粗重野咪唔洗你做囉。但係大家都願意為學校做野﹐都係出自愛錫自己嘅小朋友嘅心啫(最基本嘅事嚟啩大佬﹗唔愛人哋個仔﹐都愛自己嗰個吖﹐唔係生嚟做咩呢﹖)但都可以有人諗到兩公婆嚟當八粒鐘嘅縮數﹐我之前投訴過﹐但負責人話無辦法迫D家長每人做足咁多粒鐘﹐就算你罰佢錢﹐佢要走數你都吹佢唔脹﹗人渣﹐鬼唔望呢D人日日出街都踩屎﹗

點解我懶偉大咁鬧爆人但自己又唔日日去co-op幫手﹖我有問過老師架﹐但佢唔贊成咁樣做﹐因為咁樣會令到口水禧第時習慣要帶個書童先返到學。所以我唔會強人所難迫老師比我日日去﹐但我唔介意佢需要人幫手嘅時候我留低獻身。其實口水禧家下喺學校係唔記得有個呀媽嘅存在架喇﹐佢有佢自己嘅野玩﹐亦都間唔中會同同學「默劇式」咁玩﹐即人哋猛同佢講野﹐但佢淨係做動作。(望住佢哋都幾搞笑﹗同學個樣有D無奈﹐但都繼續同口水禧玩﹗)

呻完﹐C服晒﹗又係時候準備返學嘅野喇。