上咗preK班之後﹐無論上課形式或者上課嘅活動的內容都同preschool嘅時候大大不同。呢一年﹐老師所設計嘅課程﹐除咗要繼續配合小朋友呢個階段身心發展嘅變化之外﹐重會為佢哋適應下年上幼稚園嘅課程做準備﹐希望到時小朋友去到幼稚園嗰陣唔需要重新適應太多野﹐等佢哋快D融入幼稚園嘅生活﹐真真正正開始體驗嚟緊十幾廿年嘅讀書生涯。
所以而家上堂會開始訓練小朋友嘅服從性﹑時間管理﹑完成老師吩咐嘅工作等等。當然﹐體能方面亦唔會缺少﹐一樣會比佢哋出去後園喪跑﹑喪玩﹑喪爬…
至於攞返屋企做嘅功課﹐除咗surprise can同帶呀Max返屋企作故仔之外﹐今年重加多一樣﹐就係叫Scissor suitcase﹐即係比小朋友用手撕圖畫紙﹐撕成碎紙之後再貼喺另一張畫好嘅圖型內。目的係想小朋友用唔同嘅手法同力度嘗試撕開張紙﹐唔記得咗係訓練佢哋嘅手指定肌肉喇。
我試過跟住指示嚟撕﹐唔好睇撕紙咁小嘅事﹐原來當中兩隻手點擺同點樣撕都有箇中道理﹐力度同動作唔啱嘅話就唔會撕到預期嘅效果架喇。
口水禧開頭撕極都撕唔開﹐原來係兩隻手太遠。當兩隻手同時向左右齒嘅時候﹐齒極都齒唔開。
兩隻手擺近D先撕就會可以將張紙撕開兩邊。
撕呀撕﹐睇佢撕得幾爽﹗
喪撕中……
跟住落嚟就係嘗試一隻手揸住張紙﹐另一隻手向住自己撕張紙。呢個應該容易過上面嗰個﹐有無留意平時我哋撕野都係咁樣撕﹖
撕好晒之後﹐就要逐張[貼喺另外一張畫有一棵樹嘅紙上﹐砌返棵樹出嚟。
呢棵就係口水禧棵樹﹐佢有黃葉﹑綠葉﹑同埋紅葉。
撕完貼完都唔夠喉﹐有人話要畫兩手喎。
畫咪畫囉﹐洗唔洗蘭花手呀老細﹖
呢個好似話係毛毛蟲……
夜晚﹐有人突然忽發雅興﹐攞出廢紙一堆﹐自己喺度練字。
一路寫一路自言自語﹕「A~~~哈哈﹗B……個肚向右嘅…..C for colin……D says “da”……」
八啩嘅呀媽伸個頭埋去睇下佢做緊乜﹐驚覺條茂李喺度寫緊ABC。畫咗好多張﹐我喺廚房洗碗無理佢﹐佢就係咁自己同自己談笑風生咁得咗喺飯枱度畫咗成粒幾鐘ABC。
開咗學成個月﹐係咪想知道口水禧嘅英文能力去到咩境界呢﹖而家除咗co-op嗰兩日之外﹐我通常係送咗口水禧入課室就閃人返屋企﹐佢自己喺學校渡過兩個幾鐘。可能係同D同學仔熟咗﹑個人大個咗﹑老師家長都熟口熟面﹐而家嘅佢喺學校已經無咁鵪鶉﹐會主動撩老師講野﹐猛咁對住人哋指住自己話”I am a pig! This is a pig!”或者主動同老師打招呼﹐不過可能唔識good afternoon﹐所以返下晝班都照同老師講good morning!另外一個老師個姓都幾難讀﹐但口水禧叫老師嘅時候都叫得幾準。做晒D活動之後識得自己同老師講“I am four table.”雖然用錯字﹐不過佢講得好有自信﹐當然老師亦都使出精湛嘅演技讚到口水禧上天咁濟﹐所以某人家下覺得自己D英文已經’lark lark 聲’﹐當自己識晒架喇。
雖然佢而家嘅程度重係好初哥﹐不過我估計年底嘅時候應該可以講到少少句子。而家逢星期二要幫手送堅成返屋企﹐呀堅成一上車就猛同口水禧講野﹐簡直係地獄式同口水禧補習英文(莫講話口水禧補英文﹐連埋我都補埋一份喇﹐口水禧唔答﹐堅成就會即刻問我﹐要我答。
)有時見口水禧喺學校都會同同學或者有D家長豬o翁﹐有時見佢都嘔到幾隻字出嚟而人哋又明。circle time亦都好主動舉手答問題﹐有D字唔知佢喺邊度學嘅添。試過早幾日有兩個同名嘅同學﹐其中一個無返學。老師話A同學無返﹐口水禧突然指住另一個同名嘅同學同老師話’Tyler is there!’真係嚇咗我一跳﹐無諗過佢會搭嗲﹐更無諗過佢講到完整句子。
近排睇卡通開始會學人哋D對白﹐甚至可以聽到成句。有一日﹐我哋趕住出門口﹐口水禧催我快D行﹐佢話’come on, it’s time to move!’去到門口﹐佢開唔到門﹐佢話’it’s lock.’原來條友仔唔止聽得明﹐重開始識得幾時用添。
我諗我唔需要再理佢D英文喇﹐而家反而係要留意佢幾時開始唔再講中文就真。
************************
幾個禮拜前又試多次整燒肉﹐唉﹗ 又衰咗呀~~~~
塊皮硬到鋼牙先咬得開﹐點解會咁架﹖我明明出盡力喪插塊皮架喇﹐真係當正仇人咁插架喇喎﹐都唔脆嘅﹖﹖﹖
