第一個屋企playdate

話說口水禧個同學 – 堅成﹐佢個細佬未能因為大佬返下晝班而調節好午睡時間﹐如果堅成媽要去湊堅成放學﹐就一定要焗住整醒熟睡中嘅細佬BB﹐結果會點﹐湊過仔嘅人應該都會非常身同感受﹐唔需要多講呢part喇。

於是﹐堅成媽委託咗三個媽咪幫手輪流湊堅成放學﹐我負責星期二做褓母車姨姨放學送堅成返屋企。每次去到人哋屋企﹐口水禧真係唔同人客氣﹐人哋呀媽一開門﹐口水禧就一支箭咁颷入去人哋屋企度喪玩堅成……細佬(﹗﹗﹗)嘅玩具﹐當然最開心嘅莫過於呀堅成喇﹐有人同佢玩吖嘛﹗而我﹐當然亦都要同堅成媽吹下水喇﹐如果唔係﹐唔通我成舊飯咁企喺人哋間屋裡面唔講野咩﹗

近期嘅口水禧開始想同小朋友玩﹐以前會覺得可能係因為語言嘅關係而令到佢唔多同其他細路溝通﹐你有你玩﹐我有我玩﹐即使同學仔埋嚟同佢講野﹐口水禧都會轉身走咗去﹐好彩同學仔未識攞麻包袋笠人拉去後巷打啫﹐如果唔係﹐口水禧咁串唔睬人﹐實係比人「的」去打嘅目標人物喇﹗後來發現﹐其實同語言都無關係﹐因為喺香港個個講廣東話嘅時候﹐口水禧都唔係太多同小朋友玩﹐反而同大人完全OK﹐去飲嗰陣枱枱都去social﹐識唔識嘅都可以玩一大餐﹗所以我哋覺得佢嗰陣時未開始有同小朋友有社交嘅需要﹐如老師所講﹐有D細路呢方面係會慢D先開始﹐甚至唔會開始﹐一D都唔出奇。

自從開始送堅成返屋企﹑識多咗英文﹑年紀增長咗之後﹐口水禧喺學校開始會同同學玩﹐今日重比我發現有人喺circle time掛住同隔離個同學玩無聽老師講野添﹗而且如前個blog所講﹐佢有時重會撩老師或者其他家長講野﹐當正自己英文好勁。所以佢有時會問幾時可以有playdate呀咁﹐見佢咁渴求一個playdate﹐我就順理承章同堅成媽講今日放咗學不如比堅成留喺我哋屋企玩一陣﹐跟住我再送返堅成返屋企喇。

當然﹐堅成媽開心到想喊咁款﹐因為個BB瞓咗﹐成個下晝﹐個呀媽就可以自由咁做自己野喇嘛﹗有邊個湊仔婆唔恨呢D黃金機會呢﹖

於是放學嗰陣﹐我就車咗堅成嚟我哋屋企。堅成知道有playdate﹐非常興奮﹐大叫wow! This is really really a big surprise!

落力D幫我個仔補英文喇﹗(內心嘅潛台詞﹗)

記得第一次同Clara playdate﹐個衰仔自己有自己玩﹐Clara係咁追住佢﹐猛叫佢Colin, come play with me!但屢次都唔成功﹐結果搞到Clara悶到走去同公園內其他細路玩。之後我都唔敢再約人哋﹐比在我係Clara媽真係眼冤﹐個女係咁追住個男仔通個公園係咁哀求佢同自己玩﹐真係有無再慘情D呀﹗之後約過另外一個同學去公園﹐其實係上個月嘅事﹐嗰陣好少少﹐不過個口水禧都係大多時間唔Q睬人﹐到後尾揾到大家共同目標嗰陣就真係有一齊玩﹐咩野共通目標﹖之唔係人哋掃好晒嘅樹葉囉﹐兩條友仔係咁炒起D葉掉向對方﹐就係咁玩咗最少半粒鐘炒葉。早講吖嘛﹐我屋企前院大把葉﹐炒幾日都大把貨你哋炒呀﹗

一入到屋﹐口水禧急不及待拿拿林……去洗手(非常好嘅習慣﹐即使有friend嚟玩都要洗咗手先)但堅成就唔肯洗﹐算喇﹐無謂第一次嚟就強迫人做佢唔願意嘅野喇。一陣返屋企話比呀媽知口水禧個呀媽唔知迫佢去廁所做乜﹐講又講唔清楚嗰陣﹐我水洗都唔清﹐人哋個老豆重要係警察添﹗

一入客廳就見到部足球機﹐堅成埋去問係咩嚟﹐此時洗完手嘅口水禧即刻飛撲過嚟係咁對住堅成講咗一大輪有D英文有D火星文嘅野﹐但見堅成非常鎮定﹐即刻話要開波玩﹐口水禧有人陪玩呢部野超級開心﹐即刻揾個波出嚟玩下﹐三條友(當然包埋我喇﹐淨係佢兩個玩係完全玩唔到)﹐玩咗一陣﹐堅成可能見口水禧成日入自己個籠門﹐一睇就知呢條友係唔識玩架喇﹐於是堅成要求玩其他野。

就係咁﹐兩個就轉戰去咗我個sunroom爆格咁逐個玩具箱咁倒晒D玩具出嚟玩。

我未入去之前已經聽到口水禧猛咁介紹佢D玩具﹐點介紹﹖咪this is helicopter; this is my race car; this is 乜this is 物咁囉。然後堅成就答yes, I see it.可能佢心諗「我夠知係咩喇﹐我又唔係盲嘅﹗」佢對嗰個兔仔燈籠好有興趣﹐因為佢以為係pinata﹐猛問口水禧係咪就嚟生日﹐搞生日會嗰陣比大家打個pinata﹐真係笑爆嘴﹗口水禧猛指住話this is bunny! 九唔搭八﹐非常過癮﹗

後來堅成揾到幾架雙層巴士﹐兩眼發光﹐猛話oh! This is sooooo cool!因為呢度真係無乜幾何有雙層巴士﹐除咗SF downtown遊客區有雙層嘅觀光巴士﹐其他嘅巴士一律都係單層而已。堅成重話小巴都好過癮﹐有紅色又有綠色﹐D門又摺得﹐猛咁揸住嚟研究一輪。

坐坐下﹐我發現每當我坐喺度﹐堅成就會同我講野﹐口水禧就自己玩玩具﹐變咗好似係我個playdate多過係口水禧嘅playdate咁款﹐於是我就轉戰去咗客廳坐﹐有得佢哋兩個單打獨鬥。間唔中都會聽見佢哋講野﹐有時係口水禧講(例牌都係講D堅成用眼都睇見嘅野喇﹗)﹐堅成問口水禧野呢﹐口水禧通常係唔係都答Yes﹐認真搞笑﹗

玩咗一陣﹐堅成要求去口水禧間房睇下﹐口水禧當然非常樂意帶堅成入自己房喇﹐嗰度重有好多玩具吖嘛﹗一入到去﹐例牌又係this is 乜this is 物咁介紹喇﹐堅成已經由最初好興奮答yes, I see it 變咗唔答。(比在係我都唔答。)

介紹緊佢套nemo書入面嘅野 – this is …this is…

玩玩下揾咗個神奇畫板出嚟。口水禧係獨生子﹐又唔多有小朋友嚟一齊玩﹐少不免會成日喺堅成手上攞咗野去自己玩。叫佢比人玩﹐佢有時會話唔好添(幾衰﹗)所以呢個要教好佢﹐如果唔係以後想叫人嚟同佢玩都難喇﹗

玩到差唔多四點幾﹐執返好sunroom嘅野﹐我哋就起程出發去送堅成返屋企﹐事關我應承咗堅成媽五點要送返個仔比佢。我把放工時間塞車遲到﹐於是四點半就出門口。去到堅成屋企本來無諗住入去坐﹐因為無時間食晏﹐嗰陣五點已經超餓﹐想返屋企煮飯﹐點知個口水禧又一支箭標入去人哋屋企﹐結果我都要同堅成媽吹水吹咗大半個鐘﹐餓到我吖﹗

當我同堅成媽傾緊計嘅時候﹐堅成拉咗口水禧上去佢間房參觀﹐兩條友玩咗一陣﹐唔知口水禧有無又攞人野唔比人玩。不過喺樓下嘅我聽到兩個講咗好多野﹐搞咁耐都無話是但一個喊住走落嚟投訴另外一個﹐應該兩個都玩得埋啩﹗之後落返樓重玩到攬埋一舊喺地下碌﹐連埋堅成個BB細佬都玩埋一份﹐跟住兩個哥哥喺度玩呀笑呀﹐相信以後重會有好多playdate嘅。

差唔多六點﹐真係要走人返屋企煮飯﹐如果唔係我驚我會餓到搶堅成個細佬BB嘅奶樽﹗講咗bye bye﹐我同口水禧就返屋企。下個星期二如果再有playdate﹐死人都打定個底﹐食飽咗先湊兩個仔呀大佬﹗

******************************

上個禮拜喺學校埋咗單嘅老母雞﹐喺埋咗單兩日後﹐隔離班有個爸爸幫手掘咗個大窿喺後園﹐因為老師想比小朋友埋咗隻雞﹐然後喺嗰忽泥土上種野﹐等D細路可以明白老師對佢哋講過老母雞喺泥土化成養份孕育另一條新生命嘅情形﹐於是掘好個窿之後﹐老師掉咗隻鹹魚雞落去個窿度之後﹐就比咗剷比D小朋友﹐等佢哋負責埋咗條鹹魚﹐置生死於道外嘅小朋友非常雀躍地係咁剷泥﹐完全無傷感﹐食塵食到顛﹗當我見到呢個情境﹐真係唔好意思﹐我將食緊塵嘅口水禧拉咗出嚟﹐事關一陣氣喘發作嘅話我就大獲﹗我明白係好好玩﹐但真係太多塵喇﹐得架喇﹐剷咗兩野﹐呀鹹魚雞知你有心架喇﹐佢安心上路架喇﹗代佢向大家講句Thank you very much!