新blog試用 – 開學一個月後

自從禧爸唔再有home office之後﹐每日朝早淨返我同口水禧單打獨鬥﹐催佢快D食早餐﹑快D刷牙﹑快D換衫﹑快D出門口去返學。而家嘅下晝班返12﹕15﹐要co-op嘅話返12﹕00﹐我哋朝早大約九點就要起身開工。通常佢醒咗就會自動波著好睡袍﹑除尿片﹑熄放濕機同空氣淨化機﹐然後九秒九跑去sunroom玩玩具。我恨咗呢日唔知幾耐﹐唔雖要再喺佢起身嘅一刻即刻都要彈起﹐可以懶下床先。

食早餐嘅時候又係佢「進修」英文嘅時候喇﹐點「進修」﹖之唔係睇卡通電影囉﹗有時佢會一路睇一路學人哋D對白自言自語﹐有歌舞嘅話重會跟住一齊唱添。接近五歲嘅口水禧食飯已經唔再係令人頭痛嘅事﹐當然﹐又唔好話諗住佢會以餓搶X嘅速度完成一餐﹐有時食咗D餸就話飽﹔有時食晒D菜淨返少少肉又話飽咁囉。我唔會迫佢食晒全部野﹐費事一陣又嘔到一床都係喇。但大多嘅情況之下佢係唔需要再好似以前細個咁要威迫利誘先肯食一羹。想知道佢食得飽唔飽﹐睇下佢食完飯之後有無嗌餓同埋想食零食就知喇﹐如果無嘅話﹐咁就真係飽。飯後嘅水果其實都質得佢幾飽下﹐所以我對佢呢方面總算OK喇﹐無得迫嘅……(呀婆﹐唔好又講你嗰幾句口頭蟬﹐好似講到我唔識湊仔咁﹗)

食完早餐就要梳洗換衫出門口﹐嘩﹗唔好講笑﹐自從返咗下晝班之後﹐我哋好少遲到喎﹐重多數都早少少就返到學校添﹐問你怕未﹗

如果我周圍有鄰居要揾學校﹐我一定推薦學校﹐就因為老師對小朋友嘅細心觀察令我覺得呢間野唔係為賺錢而辦教育﹐佢係真心想為小朋友有個讀preschool嘅機會而辦。記得口水禧舊年開學前嘅老師家訪﹐老師當時話口水禧返咗學之後嘅嗰一年只會處於學習英文嘅階段﹐極其量都係識講幾粒字或一句野架啫。到第二年就會開始嚟料﹐開始會同其他人有交流﹐亦都會真正投入學校嘅生活。當時我聽咗之後有少少懷疑﹐因為無數嘅人都同我講佢哋嘅小朋友返咗一個禮拜就即爆英文﹐重要係全英文添﹗所以我諗住老師嘅講法可能係非常保守地安撫住家長先﹐免得一陣你個仔返咗學成個月都爆唔出一句英文﹐到時個家長又話去投訴。

觀察咗口水禧一年﹐覺得老師嘅講法中咗一半﹐舊年返學嗰陣﹐口水禧喺circle time多數發呆﹔surprise can去到學期好後先敢舉手答﹔老師講故事時間口水禧擔天望地﹔其他家長同佢講野﹐口水禧唔睬人﹐再唔係就轉身即閃﹗同同學零交流﹐即使同學主動撲埋嚟﹐口水禧會推開人然後走佬﹔極其量係人哋問佢飲唔飲水嗰D﹐條友仔先係咁二點下頭或搖下頭就算。

但今年返咗一個月學﹐我開始留意到佢嘅轉變﹐亦都印證埋老師所講嘅另一半。口水禧講多咗英文唔在講﹐重會主動撩D同學或者家長﹐對住人哋話”hi, my name is bird. I am a blue bird. I can fly.”返學見到老師或者同學會主動打招呼﹔circle time投入情度同其他同學無異﹐有時比佢哋更多野講﹔好鍾意參與活動﹐尤其係circle time出嚟對住大家講野嘅嗰D活動﹐ 例如畫劇。佢會自己同老師講”I am the cat. My mom co-op. I am the cat!” (家長co-op嘅話﹐嗰日佢嘅小朋友就可以做畫劇)等等。呢D變化全部喺九月學咗學到而家短短一個月內發生﹐時間好似好短﹐但其實係經過舊年一年嘅收集期到而家先開始發放返學咗乜野。

所以﹐嗰D話返咗一個禮拜就突然由全母語變全英嘅﹐直頭連母語都唔記得晒嘅﹐有乜可能呀﹖好似誇咗D呀嘩﹖莫講話細路﹐大人都唔得喇﹐係咪先﹗

個畫劇我都係第一次睇﹐完全唔知口水禧要講乜野對白﹐但佢自己搞掂咗。雖然句野非常短﹐只係幾隻字﹐但對於唔係英文做母語嘅佢嚟講﹐都叫咗OK喇。

所以我覺得呢度嘅老師會真正了解每一個學生﹐佢哋絕對唔會為咗收多D學生﹐就亂咁大吹大擂乜野D學生一返學就識英文﹑一返學就唔會喊(有個同學今年都重喊緊﹗)﹑識乜識物。無心﹐講乜都係假。

而家呢班嘅活動多咗﹐好多時送佢返學嗰陣老師都有野比我做﹐因為我係staff assistant﹐所以班中嘅大小事情都要幫手。剪野﹑影印﹑買野(尋日買咗三個羊心臟)﹑預約參觀消防局﹑收回條等等都係我嘅工作﹐所以有時放咗學要颷去買野或影印﹐好彩D地方都唔算隔得遠﹐而且自己揸車時間好預D﹐不過係跟住我四圍撲嗰件個樣少不免有D似長期比僱主虐待嘅傭工咁囉﹗hey,瞓個覺又係一條好漢﹗係咪﹖無計喇﹐鬼叫呀媽得一對手同兩條波枱腳咩﹐係咁架喇﹗

今日送堅成返屋企途中﹐聽到佢哋兩個交談﹐聽到口水禧唔再淨係答yes yes yes﹐而係比較長少少但無文法嘅句子﹐見堅成都聽得好滿意﹐重猛問口水禧食唔食佢D 茶點添﹐感覺有人好快會講英文嘅日子已經唔遠。

其實唔係擔心佢唔識講﹐只係為佢而家學識投入同小朋友有交流而開心。今日老師喺circle time點人數﹐平時D細路個個都會即刻趴喺地﹐等老師掂下佢哋個頭之後﹐D細路就會彈起身。以前口水禧完全無反應﹐唔會跟D小朋友咁做。但今日我第一次見佢都學其他人咁趴喺地下等老師掂佢。睇見呢幕﹐重開心過聽見佢識英文。佢嘅世界而家唔再係只得爸爸媽媽同mimi/winnie﹐重多咗佢嘅朋友。

睇住小朋友呢D好微乎其微嘅轉變﹐一小步一小步會變成一大步﹐不禁諗起學校門口嗰句野小朋友成長都有佢哋嘅時間表﹐時間到﹐佢哋自然會成長﹐唔洗迫。