話說上個星期六﹐口水禧個夢中情人K小姐請咗我哋去佢個生日會﹐之前幾日已經買好咗禮物比人﹐今次我呢個做呀媽嘅醒咗少少喇﹐買埋花紙同卡﹐唔洗好似上次咁樣﹐淨係同份禮物包咗花紙﹐點知未去到個主角拆禮物環節﹐我哋送比堅成份野已經比其他小朋友拆咗出嚟玩喇﹐我諗堅成到家陣都唔知嗰架野係邊個送嘅﹗所以呢次包好咗重用個袋裝好佢﹐加埋張卡﹐咁就唔怕比人拆或者主角收咗都唔知邊個送喇。點解要人哋知道係我哋送﹖因為呢度嘅小朋友開完生日派對會之後送返張卡比參加過生日會嘅小朋友﹐多謝佢哋去參加個生日會之餘﹐重多謝埋人哋送咗咩禮物﹐所以喺份禮上面寫清楚送禮個人名﹐方便人哋寫卡吖嘛。
個生日會喺公園裡面舉行﹐出門口前先包人哋份野。
K小姐嘅媽咪話K小姐鍾意玩barbie﹑毛公仔……(唔記得重有乜野喇)﹐於是我哋嗰日去買禮物之前已經鎖定目標要買barbie嘅野。本來想買個barbie公仔﹐但諗諗下分分鍾人哋屋企都成籮barbie﹐多一個唔多﹐少一個唔少喇﹐咁買嚟都無意義。於是﹐我呢個超齡嘅大朋友就將自己當做K小姐嘅年紀﹐諗下如果我生日﹐最想收barbie嘅乜野呢﹐答案就係衫褲鞋襪囉﹗玩barbie最好玩就係同佢係咁換衫換鞋換型象吖嘛﹐送多個barbie比我但唔夠衫比D barbie分﹐咁就唔好玩喇﹐係咪﹖拿﹐呢個係一個三十幾扮六歲嘅人嘅諗法﹐可能家陣嘅小朋友覺得最好送部iphone我喇﹗
去到家場地﹐一望之下傻咗﹐嘩﹗個公園唔計個足球場都差唔多有成個足球場咁大喎﹐成個公園裡面﹐淨係眼望到搞緊party嘅都有四個單位﹐無banner無指示﹐我哋三條友完全係盲摸摸咁逐個撞下。(係﹐我無帶人哋呀媽個電話號碼。抵我周街行﹗
)去咗第一個發現D人嘅樣無個識之時﹐突然眼角飄入三母子﹐見對方個女手上揸住份禮物﹐禧爸問人係咪去K小姐嘅生日會﹐對方都好茫然咁望住我哋點下頭﹐於是我哋由本來嘅三條盲毛﹐變咗一行六件盲毛周個公園係咁揾K小姐個場。(拿﹗人哋都無帶K小姐呀媽個電話喇﹗)行咗一百米有多之後又去到第二個場﹐見全部人圍住唱緊生日歌﹐我哋快步上面諗住扮晒「遲唔會遲早唔會早﹐時間啱啱好」嘅時候﹐突然聽到”happy birthday to JAMIE”﹐下﹖Jamie?邊個嚟架﹖
於是六件盲毛又急急腳走人。
終於喺步近第三個場地嘅時候﹐嗰個媽媽見到佢女嘅同學仔﹐喺呢個時候禧爸亦好眼利咁見到口水禧個同學喎﹐於是我哋就好安心咁上前去揾主人家喇。
K小姐今年已經去咗幼稚園喇﹐不過佢呀媽都有請埋我哋呢班preschool識嘅同學一齊參加生日會。除咗見到好耐無見嘅K小姐之外﹐重撞到一個今年無讀嘅另外一個女同學﹐佢媽咪生咗BB﹐所以嚟唔到co-op﹐唯有將個女轉去唔洗co-op嘅學校讀。
每次我哋喺口水禧面前提起K小姐﹐口水禧就會好開心但又好怕醜樣衰衰咁陰陰嘴笑﹐重會面紅添﹗然後就會一輪情緒高漲繼而失控咁周屋大叫大笑﹗其實覺得幾過癮架﹗嗰日之前重話又唔覺K小姐靚喇喎﹐又話第二個女同學靚﹐點知一同K小姐見面﹐有人又禁不住內心嘅喜悅﹐猛咁追住人﹐又扮晒野同人講英文﹐但K小姐係唔知佢o翁乜Q嘅﹗
為咗顯示自己嘅食力﹐口水禧不辭勞苦﹐擒上擒落﹐蛤mo功呀﹑飛簷走壁﹑上刀山落油鑊在所不惜﹗
(右邊三個女仔中間嗰個係K小姐)
搞搞下越走越多靚女過嚟﹐而口水禧除咗無得同K小姐單獨咁玩之外﹐佢對腳重係繼續離地嘅﹗
咁吊腳法﹐真係唔腳痺就假﹗
聽禧爸講返﹐原來玩完呢個野之後﹐cheap人口水禧重跟住K小姐周圍去﹐人哋行埋去屋企人側邊講野﹐口水禧就企喺附近扮睇天睇樹﹐間唔中偷望下K小姐有無望過嚟。人哋行開咗﹐口水禧又即刻吊住人哋尾跟出跟入﹐有時又特登行向另一個方向﹐再回頭睇下K小姐有無跟住佢﹐見人哋無理佢﹐口水禧又CC地氣走返去跟住人。
你個衰仔吖﹐唔怪之得成個下晝我企喺附近同D家長吹水都唔見你埋嚟揾下呀媽喇﹐原來係去咗做觀音兵﹗
壽星女拆禮物﹐口水禧望到實﹐好似佢有份收禮咁﹗
