上個星期六係學校嘅Saturday School﹐又係比D平時無乜機會嚟co-op或睇小朋友上堂嘅家長/親朋戚友嚟八下呢班豆丁喺學校嘅情況嘅好機會。是日嘅主題係即將嚟臨嘅Halloween﹐所以老師嘅衣著都叫做悉心打扮過下﹐著晒D南瓜上身咁囉。
其他野就同平時差唔多﹐一樣係有咁多張賭枱﹐呀﹐係活動枱先啱﹗但真係好似個迷你賭場咁﹐張張枱都做唔同嘅野﹐真係想賭大細又得﹐玩百家樂又得﹗
基本上從未co-op過嘅禧爸﹐呢D場合都會嚟參與下﹐關心下口水禧喺學校究竟做D乜。所以當日都係得我哋一家都到齊﹐有佢陪口水禧﹐我就放心去履行我嘅工作﹐周圍同D細路同埋佢哋嘅家人影下相﹐用嚟入落佢哋嘅回憶冊。話時話﹐嗰日我唔帶相機嘅話﹐就真係無人影相﹐全日嘅境象就會變成大家腦入面嘅片段而已。但我想影低小朋友喺每一個特別日子嘅情境﹐因為你會睇到佢哋不停咁蛻變緊。唔影低﹐一轉眼就過﹐過咗都唔知﹐然後突然有一日你先發覺時光過得太快﹐點解個仔一轉眼就咁大個﹐大得咁快嘅﹖咁係因為你唔得閒﹑你無留意﹑你唔知道﹑你已經錯過咗佢哋蛻變中好多精彩嘅一幕幕。
)﹐然後已經無咩學校活動比我去參加睇佢喇﹐所以而家有得去好去多D喇﹐呢D機會走咗唔會返轉頭。再大D都嫌呀媽喺學校出現令到佢覺得瘀比同學笑喇。或許口水禧自己都唔知道﹐有爸爸媽媽一齊陪佢參加學校活動係好幸福嘅事﹐佢照樣都係咁喺學校走嚟走去﹐玩呢樣搞嗰樣。但﹐唔係個個小朋友都有呢個爸媽同場嘅機會﹐如我之前講過﹐班中有好幾個同學嘅父母係離咗婚嘅﹐通常學校嘅活動只有是但一方嘅家長嚟睇個細路架啫。我唔能夠講呢D同學就係唔幸福﹐但應該無人會反對有爸媽一齊嚟會更好啩﹖
通常呢D情況之下﹐個個都會話梗係因為係獨生子女﹐所以先會咁樣。我則唔完全認同呢個睇法﹐我反而覺得係年齡﹑性格同父母點教有關。大把有兄弟姐妹嘅細路一樣會搶玩具﹑霸道﹑打人鬧人乜都有。其實呢個年紀﹐對於一件物件是否個人擁有或共同擁有都未有概念﹐啱啱先開始學習同其他小朋友有交流﹐未必咁快就諗到有D野係共同擁有﹐所以通常喺學校比人搶咗玩具﹐D細路都會話「佢搶咗我件玩具」而唔係「佢搶咗我玩緊嘅玩具」。所以呢個時候唔應該更正小朋友唔肯share玩具﹐而係先更正佢覺得件野係佢嘅呢個諗法。老師通常都會先話「呢件玩具係學校嘅﹐所以係大家都可以玩嘅﹐但係﹐大家要輪流玩﹐唔可以霸住玩或者搶嚟玩。要玩人哋玩緊嘅玩具要先問下人哋肯唔肯比你玩﹐人哋唔肯﹐咁就要排隊。玩得太耐﹐咁我哋就要計時﹐夠鐘就要讓比下一個人玩架喇。」
有D人見小朋友因為搶玩具而打交會覺得大人唔洗理佢哋﹐由得佢哋搞掂。但如果頭幾次無人教佢哋點樣搞掂件事﹐咁D細路咪淨係識邊個好揪D嚟爭到件玩具囉。如果一開始就教佢哋點樣排解呢D紛爭﹐咁之後再有爭玩具嘅情況出現﹐D細路就會用之前教佢哋嘅方法搞掂件事。當然﹐有D細路教幾次就識﹐有D教極都重係打人﹐但試多幾次﹐見人哋個個都唔打交﹐識得輪流玩嘅時候﹐嗰個「技安」自然就知道要守規則先有得玩﹐佢自然就唔會再出手打人。呢D情況﹐舊年preschool嘅時候日日都發生﹐今年班細路好咗好多﹐打人嘅場面已經少之有少﹐有好幾個舊年直頭係「打手」﹐專門打人搶野﹐有幾個就專門喊到爆喉嚟達到目的嘅﹐今年已經識得點樣用老師教嘅方法拆掂爭玩具嘅場面。
口水禧呢個遲來的「搶玩具候群症」今年先開始嚴重咗﹐舊年比人搶﹐佢會走人。今年變咗佢去搶人野﹐多數都係唔知個「C」字點寫地去搶D「技安」玩緊嘅玩具﹐下場多數係比人打到甩皮﹗我唔會鬧佢﹐只會好言相勸。唔係縱佢﹐只係唔想火上加油﹐潑行佢度火無乜好處。冷靜落嚟再涉而不捨咁哦呀哦﹐「Use your word!老師唔係咁教咩﹖你想玩都要問下人哋肯唔肯讓比你玩架﹐人哋唔想你都唔可以夾硬搶架﹐等佢玩完你咪可以玩囉。」革命尚未成功﹐佢仍然偶然會賴野比人打。得到教訓之後我再教﹐總有一日佢會學精D﹐知道何謂「精人出口﹐笨人出手」。你問就唔會比人打﹔你搶就實賴野收場。咁都唔明﹐抵打﹗
令小朋友狂性大發無晒儀態嘅flubber
今年開始逢星期四會有烹飪﹐超辛苦嘅一張枱﹗事關平時喺屋企廚房係禁地﹐嚟到學校見到有得搞下D廚房野﹐又係狂性大發之時。我試過一次教佢哋整曲奇餅﹐完事後我成將枱同附近三尺範圍有如淪陷一樣﹐抹到我PK﹗
然後整出嚟嘅餅……真係粉餅到呢﹗﹗﹗﹗﹗﹗
是日整pizza﹐其實都係用D english muffin扮pizza﹐上面鋪D芝士﹑salami同意粉醬然後攞去焗﹐個場面控制得幾好﹐無我上次咁淪陷﹗
肢解再合體﹐有D將個頭黐喺個隔肋底﹐相當有創意﹗
個樣洗唔洗咁嘆呀﹗咪晒眼﹐好似好滋味咁﹐不外乎都係一杯橙汁啫﹐老細﹗(又偷揸眼睫毛液﹗
)
食飽又係釋放力量嘅時間﹐擒高擒低﹐熟手技工。
諗野嘅樣
第時真係創業賣雪糕﹐記得比個折頭我呀﹗
uh-oh﹐交通事故﹐有人反咗車﹗好出力咁救緊車喎﹗ 佢日日都話佢喺學校賽車﹐逢星期一﹑二﹑三﹑四都賽。呢架車勝在夠環保﹐全人力﹐係個C機技術差D啫﹗
早兩日﹐如去參觀南瓜場。今年唔再拉車仔﹐個個都咁大件﹐坐得落我哋班家長都拉唔郁喇﹗大家齊齊行去個場地好過喇。
行咗十五分鐘就到。沿路上班友仔都算係咁﹐無話衝出馬路或者搞搞震。好守規矩咁一個拖住一個咁行。口水禧第一次主動拖住……女同學。拖呀媽﹖
個南瓜……其實都揀得幾好﹐雖然未切﹐淨攞上手都覺得唔錯﹗所以﹐媽媽永遠都信你眼光架﹐仔﹗就睇你咁識揀呀媽嚟投胎就知你識野喇﹐呢樣最似你老豆架喇﹗
任務完成之後梗係奔放地咁脫下韁﹐四圍野喇。
已經揀咗就咪三心兩意四圍望喇﹐你揀嗰個夠大架喇﹐再大D嘅話﹐想切C我咩﹗
南瓜園巡場(自己都同D南瓜一樣色……)
完全唔明整個咁嘅野想點呢﹖
搞到呢班野捐晒入去﹐爬出爬入
你第時記得咁樣點你外母呀﹗(都話咗我唔係好人架喇﹗)
兩件南瓜
喂﹐有個南瓜走佬呀﹗
呢排嘅氣溫玩野﹐日頭熱到標汗﹐夜晚同一早又凍到得十度以下﹐D衫已經著到亂晒籠﹗
回程中途帶班友去行超市
後面嗰個係真嘅南瓜嚟架﹐呢度年年都有南瓜鬥大比賽。
呢舊唔係隕石﹐係一舊叫做Owl pallet嘅野
