啱啱過去嘅星期一係美國嘅小朋友大日子萬聖節﹐嗰日D細路真係「人擋殺人﹐佛擋殺佛」咁嘅情緒﹐邊個阻佢哋去逗糖嘅話﹐怕且嗰晚都要喺一片哭聲中渡過都似﹗
等咗成年都係為咗呢日特赦﹐可以博老命攞糖﹐成年就係呢日嚟儲糧架喇﹗你話對於佢哋嚟講係咪老豆呀媽都要行埋一二邊呢﹗
托住嗰個兜行成個幾鐘﹐如果返到屋企對手重用得嘅話﹐我真係同佢「挽鞋」呀﹗
老師之前個禮拜已經講咗星期一返學可以比班友仔變身﹐於是禧哥就以呢一身嘅打扮﹐喺circle time眾目睽睽之下現身地球裡面嘅雞雞學校喇。嗰日唔知趕D乜(日日都趕架喇其實……)﹐總之人哋已經開始緊circle time圍晒圈之時﹐呀中國巴C光年先生就CC然咁步入個圈之中﹐以高居林下嘅眼神揾到個靚位坐低﹐邊坐低邊聽住同學嘅驚嘆”Oh! Here comes Colin! Buzz Lightyear! Wow!”大概無人見過黑頭髮嘅巴C光年啩﹐所以同學們都望咗口水禧一輪﹐而口水禧係一貫咁嘅作風 – 無表情但內心有D飄飄然。
記得細個參加學校聖誕聯歡會嗰陣都好期待著條靚裙返去學校﹐雖則唔會有人望﹐但著咗成年校服﹐突然有一日唔洗著而可以著自己嘅衫去返學都幾過癮﹗所以呢度雖然返學唔洗著校服﹐但小朋友一樣都好期待萬聖節嗰陣以乜野造型現身﹐攞下注意力咁喇。讚多兩句﹐佢哋就鬆毛鬆翼﹐猛咁向你介紹佢扮嗰個人物嘅來頭﹐自己又有乜乜乜玩具係呢個人物嘅等等﹐滔滔不絕﹐講極都重有野講。
只可惜通常我哋呢D呀媽最只係識自己個仔鍾意嘅嗰D卡通人物而已﹐你話D女仔卡通人物﹐我真係一個都唔識﹐事關我屋企嗰個唔睇公主卡通﹐所以我同D小妹妹暫時係搭唔到嘴嘅。
無計﹐巴C光年出去拯救地球嘅時候難免要喺地下滾嚟滾去﹐滾到周身沙泥都係在所難免嘅……最多夜晚去tick or treat嗰陣以一身污糟嘅巴C光年出發去揾食架啫﹐無野嘅。
呀spider man﹐你咁樣點喺D大廈之間飛嚟飛去呀﹐會撼親個頭架喎﹗
呢個小朋友自製咗個造型﹐但嗰日無機會問佢究竟扮緊乜。只見佢人人circle time坐喺度而佢就要全程企喺樹……事關佢坐唔到呀﹗
呢個嘅造型係棒球手﹐戴咗個頭盔之後又係睇唔到路﹐但個頭就西瓜咁大﹗
呢期口水禧超著迷嘅Cars 2電影卡通﹐口水禧未睇套野就已經摸熟咗幾個角色嘅名。呢個係肌肉Mcmisisle。
平時又唔會攞嚟著嘅。
除咗上面嘅造型﹐重有警察呀﹑神仙呀﹑工程人員等等。兩個老師一個扮埃及妖后(我估架咋﹗)﹐另一個扮白雪公主……四張幾嗰陣時嘅樣!
排隊等住出去「遊街示眾」喇﹗
未出去之前﹐不如我哋鬥快揾spider man對眼吖﹗
紙皮小朋友已經企到無晒表情喇﹗佢可能心諗﹕「呀媽﹐你真係大整蠱呀﹐點解唔提醒我話我知笠咗個盒係坐唔到架呢﹖」
嗰班跟住老師跳住咁颷出去示眾﹐明顯今年呢班仔開始要顧形象喇﹐跳住遊街唔型吖嘛﹐要好cool咁行先至有型﹗口水禧家下日日返學或者出街都要著襯好顏
色嘅衫褲鞋襪﹐最正係佢所謂嘅襯色﹐即係要同色嘅衫褲鞋襪咁解﹐即係會著藍衫﹑藍褲﹑藍襪﹑藍鞋咁樣成隻藍無著衫嘅藍精靈先覺得呢D叫襯得靚﹗有時佢重
要襯埋佢條底橫…….邊隻色添﹗著喺裡面無人見到都要襯色﹖有無誇D呀你﹐大哥﹗
