自從對上嗰次堅成嚟過我哋屋企玩咗兩個鐘頭之後﹐每次禮拜二送佢返屋企嗰陣﹐佢就會問「今日係咪去你屋企玩呀﹖」或者係「Colin可以去我屋企玩下喎。」但返學嘅日子放學後嘅時間實在緊迫﹐唔係咁容易撥到時間出嚟招呼兩位人兄將我間屋爆破咁玩﹐所以一直都想揾個得閒D嘅日子先請佢嚟playdate﹐既唔洗送咗佢返屋企之後我同口水禧趕到X淋X賴咁撲返屋企沖涼煮飯執野﹐又可以真正比佢哋玩晒想玩嘅野﹐幾咁好呢你話﹗
於是﹐上個星期就約好咗今個禮拜整日playdate喇﹐揀嚟揀去﹐一於就星期五喇﹐還掂唔洗返學。
口水禧尋日就已經非常興奮﹐禧婆婆打電話嚟嗰陣就已經四處張揚堅成今日嚟玩嘅事。夜晚叫佢瞓覺都唔洗角力﹐就咁講話「第二朝人哋嚟到你重瞓緊覺﹐咁人哋就返屋企唔同你playdate架喇」﹐條友仔哈作非常﹐乖乖哋就範去見周公。堅成嘅魅力真係無野好講喇﹗
約好咗堅成媽感朝十一點左右送堅成嚟我哋度﹐為免口水禧龜速進食阻礙個playdate﹐我臨瞓前較好鬧鐘﹐今朝八點幾就起身整早餐比大少食﹐等佢hea都有兩粒幾鐘hea﹐應該唔會人哋嚟到佢重食緊早餐啩。一早起身﹐見口水禧按耐不住嘅興奮神情﹐真係唔整蠱下佢都唔得喇﹐係咪先﹗於是喺佢手舞足蹈嘅時候﹐我向佢爆咗句﹕「艾呀﹐堅成個媽媽頭先打比我話今日堅成唔嚟喇﹗」頓時只見本來重嘴角重係向上揚﹐大聲高歌緊嘅禧歌突然呆咗
﹐聲量變細﹐有D難以置信嘅表情﹐窒窒下咁問﹕「呀……點解呀﹖咁聽日嚟唔嚟呀﹖」真係未瞓醒都即時比佢笑醒喇﹗
話佢知我整蠱佢咋﹐個懵佬又即刻變臉繼續高歌﹐嘩﹗D荷爾蒙無事吖嘛﹗
原來我哋瞓醒之前﹐堅成媽已經打過電話嚟(咁早嘅﹖)但我部電話較咗無聲所以接唔到佢電話﹐其實都有少少以為佢哋真係唔嚟。不過後尾再打多次嚟話淨係想確實今日可以過嚟啫。
搞呢搞路﹐食完早餐執好間房都未見堅成嘅蹤影。口水禧隔幾分鐘就問一次「點解堅成重未嚟嘅﹖」
我點知喎大佬﹗終於都等到堅成嚟到我哋屋企喇﹐一開門﹐口水禧即刻高歌一曲﹐然後兩條友喺一秒之內已經忘記咗自己呀媽嘅存在﹐堅成媽同堅成講bye bye嗰陣﹐堅成頭也不回咁就朝住我屋企入面行入去﹐完全無理佢呀媽嘅感受。不過咪以為堅成媽會唔開心喎﹐佢嘅眼神直頭係有如釋重負嘅訊號唔小心發放咗比我﹐feel到喇﹐難得可以撇甩個仔幾粒鐘確係爽嘅﹐我明﹐不過我未有機會試。
人地一入嚟﹐口水禧急不及待就開始補英文﹐第一句係指住部放濕機問堅成What is this?幾咁有「內涵」嘅開場白﹗只見呀堅成望咗兩眼﹐R爆頭咁話um…a smoke detector(煙霧探測器)?口水禧自己都唔知部野英文叫咩喇﹐佢淨係對住堅成﹐然後指住部機放出嚟嘅蒸汽話”psst!”跟手重要扮發射飛彈咁「笨蕉笨蕉磅」﹗堅成就好似部放濕機咁~一頭霧水﹐唔知咩叫「笨蕉磅」﹗
每當堅成唔知口水禧講咩嘅時候都會即刻向我報以求救嘅神情﹐狀似「我唔知你個仔講乜野外星話呀﹐大姐﹗」喺呢個時候﹐我呢部人肉字典機就要出動喇。話時話﹐以前讀完翻譯都唔知究竟有乜好做﹐家下簡直係學以致用得好緊要喇﹗重係即時傳譯嗰隻喎﹗
兩隻野圍住部機都玩咗幾分鐘﹐口水禧好似當人喺第二個星球落嚟探親咁﹐呢樣電器又問人叫乜﹐嗰樣物品又問人係乜﹐總之堅成入嚟之後已經比佢問咗幾廿條常識題﹐辛苦晒你呀﹐堅成﹗
為咗唔好再比口水禧繼續跳線咁問落去﹐堅成拿拿林話想玩部足球機﹐此時洩而不捨努力發問嘅口水禧仍然重問緊一大堆家居常識題。
不過好快口水禧就比人轉移咗視線投入玩足球機喇。不過兩條友仔都唔係路﹐成日以為個波入咗就有分﹐所以佢哋不停咁將個足球射入自己個龍門之後都大叫yeah! 然後好開心咁幫自己加分。
口水禧個樣好似想將個波踢向堅成個頭多過人哋個龍門﹗
玩咗一陣足球機﹐可能堅成對於呢個「自己射自己龍門」嘅遊戲實在感到厭倦﹐於是提議玩其他玩具。入屋爆格大行動正式揭幕﹗
唔好以為男仔淨係玩車仔機械人﹐呢兩條友仔一入到sunroom﹐第一件玩嘅就係煮飯仔喇。玩玩下﹐口水禧又突然高歌﹐呢期佢唔知係咪睇得超級巨聲多﹐成日話想去參加超級巨聲﹐講完通常跟手就嚟首自創擘盡喉嚨嚟唱嘅歌﹐坐佢隔嚟真係遲早失聰﹗堅成見口水禧唱得咁開心﹐於是連佢自己都忍唔住要露兩手﹐一路唱﹐一路露出佢兩隻手……睇下嗰個口水禧幾咁唔尊重人﹐淨係掛住手上嘅雞脾﹗
堅成話好鍾玩推住手推車去shopping喎。(隔離嗰個茂利仍然係脾不離手……)
頂唔順喇﹐要咬返啖先﹗
後來我出咗去客廳坐﹐費鬼事「得」喺兩個細路前面阻住晒喇。坐喺梳化上面剪緊老師叫我幫手準備嘅教材﹐另一邊聽住嗰兩條友仔嘅對話都幾搞笑﹗多數係聽到堅成大叫Colin! Stop!I said No!估都估到係口水禧整散咗人哋砌好嘅野喇。條友仔真係吖﹐無朋友嚟又話想揾人嚟﹐到人哋嚟咗喇﹐佢又鍾意搞破壞。唔知係興奮得際忘咗形定係咩原因﹐總之就係搞破壞。我估佢係唔知堅成講乜﹐然後當堅成講No嘅時候﹐佢就特登要同人搞對抗嗰隻。於是我叫咗佢出廳﹐細細聲話佢知如果同學仔玩得唔開心﹐咁人哋以後就唔再同佢玩﹐唔再約playdate架喇。咁樣講一講﹐稍為好少少﹐不過都係繼續聽到堅成頻頻嗌No或stop。但我無入去干涉佢哋喇﹐有得佢哋溝通下喇﹐溝唔掂﹐自然會有一個走出嚟揾我架喇﹐所以我唔洗下下走去睇實佢哋嘅。慢慢熱咗身之後又好似好D喇喎兩個﹐重識點我入去同佢哋砌火車軌添。
當我喺度埋頭苦砌D路軌嘅時候﹐兩條友重一齊玩個tablet遊戲機﹐都無乜爭野玩﹐可能有返咁大個﹐而且又經過年幾喺學校老師嘅調教﹐兩個都總算OK。尤其係堅成﹐好多時比口水禧老笠咗玩具都唔會還手搶野﹐最多都係叫No﹐通常我聽到嘅話﹐如果見口水禧無比返人﹐我都會出聲叫佢比返堅成﹐口水禧比返之後﹐堅成都會講thank you﹐然後又一齊玩過。所以口水禧話堅成而家係佢最好嘅朋友喎。
玩玩下﹐堅成話想食提子﹐嘩﹐真係咁啱我有買提子咋﹐唔通我個樣似喺果欄托生果個果欄強﹖點解堅成會知我屋企有提子架呢﹖呢度唔係茶餐廳喎老細﹗
佢重話要幫我手洗提子﹐兩條友仔迫晒入嚟廚房﹗我話要浸下D提子先﹐叫佢哋出返去玩住先﹐洗好會叫佢哋食。如事者玩咗一陣﹐堅成醒起未食提子﹐於是再問多次D提子得未﹐洗做咗之後比咗佢﹐條友全部食晒﹗問佢係咪肚餓﹐佢又話唔係。不過我都預咗要整午餐佢兩個食架喇。
午餐比咗mac & cheese(芝士通粉)佢兩條蛋散食﹐重要我開卡通佢哋邊睇邊食。重話要托張矮枱入去對住電視食﹐唔肯坐喺我個飯枱喎。見佢起勢咁搬起兩張凳﹐好喇﹐承全你兩件喇﹐set好張枱(越嚟越覺得我呢度係間餐廳﹗)﹐開好個電視﹐堅成突然和想飲果汁﹐好﹗咁啱我又真係有果汁喺度﹐請你飲喇﹗平時無乜點比街外野飲口水禧﹐所以佢完全係唔知我比咩佢個friend飲。堅成飲咗啖蘋果汁﹐大叫”delicious!”(好味﹗)重諗住對住部電視實有排食喇﹐點知佢兩個唔洗三個字就食晒D通粉喎﹗嘩﹐果然係遇強越強呀下﹐未見過口水禧食得咁快﹗堅成媽重話堅成食野好麻煩又掩尖﹐但我今日又唔覺吖﹗都算係好哈作架喇。
食完飯﹐當然係繼續玩喇。一時就彈琴﹐重要邊彈邊唱嗰隻。堅成好似對玩具以外嘅野通通都有興趣﹐而口水禧去堅成屋企嗰陣就專攻人哋嘅玩具﹐連人哋細佬嘅玩具都唔會放過。
玩玩下殺埋入去口水禧間房﹐兩個爬咗上口水禧張床﹐原來口水禧要介紹黐喺佢床頭嗰幾塊木做嘅公仔。玩完又落地去攞塊神奇畫板出嚟唔知係寫字定畫野﹐佢哋玩咗一輪﹐我喺廳繼續整自己野﹐到佢玩完又走返去sunroom之後﹐我打開房門﹐竟然發現口水禧將肥玲N年前喺香港書展裡面買比佢D字卡攞咗出嚟玩﹐嗰幾盒發咗mo嘅字卡嚟咗幾年都係坐喺個盒裡面﹐間唔中會比口水禧攞出嚟糟質下周地劈(其實齊唔齊我都唔知﹗)﹐今日竟然比口水禧攞出嚟比堅成睇喎……但係﹐嗰盒係中文字嚟架喎﹐堅成﹐我請你嚟係幫我個仔補英文﹐唔係叫你嚟學中文呀大佬﹗況且兩個文盲鬥文盲﹐實在係無咩字會識睇。哈哈﹗嘥氣﹗
差唔多三點﹐堅成媽都嚟緊接返堅成返屋企﹐堅成玩玩下話要去廁所﹐見佢走得好急下﹐衝咗入廁所重擔凳﹐點知嗰張凳好高架﹐係口水禧平時用嚟喺洗手盆刷牙洗面用﹐成尺咁高﹐堅成企咗上去﹐如果咁嘅高度疴尿嘅話﹐就會用佢D尿洗晒我成個坐廁架喇﹐因為個距離差非常之遠﹗於是我叫佢不如坐喺度去喇﹐佢話驚跌落屎坑﹐我話我扶住佢喇﹐佢話唔洗﹐佢自己曉扶。好喇﹐我出返去睇下口水禧做乜﹐隔咗好耐﹐堅成重坐喺個塔度﹐原來爆埋石添﹗諗住要同佢‘敏’C架喇﹐佢話自己嚟﹐但要我比濕紙巾佢﹐嘩﹗自從口水禧脫離咗BB個階段之後已經無用BB濕紙巾喇喎﹐點知又比我揾到唔知幾時買咗無開過嘅BB濕紙巾﹐頓時由之前嘅果欄強變身做雜貨強﹐唔知點解我屋企可以有咁多堅成臨時想用嘅野架呢﹖正當佢搞掂之際﹐我赫然發現洗手盆張臺上有堆白色疑似濕紙巾嘅野﹐心諗﹕「唔係‘敏‘完將舊紙擺喺張臺上面呀嘩﹖」就算係都無計﹐我都預咗要抹多次間屋。後來發現嗰堆係俥未用過嘅廁紙啫。
就喺佢爆完石玩多陣之後﹐堅成媽同堅成爸都嚟咗接仔。因為我趕住帶口水禧去睇醫生﹐所以堅成老豆呀媽拿拿臨dick咗堅成走人。
三點幾去醫生度﹐睇完去買餸﹐再去藥房配藥﹐一直到七點幾先撲返屋企。煮飯﹐家務﹐洗乾淨口水禧﹐地下堆野叫佢搞掂(其實我之前已經出門口前執咗七成)……而家打埋篇blog之後……飲奶嘅力都無晒喇。
