感恩節後咪就等如我哋過咗年之後年初四咁嘅境況囉
。返工嘅要返工﹐返學嘅要返學﹐至於我哋你隻大打雜呢﹐就無話假唔假期架喇﹐不過佢哋D老爺大少放假喇喎﹐我哋D打雜咪唔洗咁趕頭趕命而已。我嘅債臺已經由呢個blog發展到多咗幾範﹐爭學校N樣野﹑屋企野﹑自己野等等。利搭利原來真係好乸利﹐真係還極都還唔完架﹗嗚~~~算喇﹐無謂提。快D完成呢個新鮮滾熱辣嘅blog之後再博殺過。
感恩節前奏
一連四日嘅感恩節假期(其實有D公司淨係放24號星期四一日架啫)﹐不過禧爸公司連星期五都放埋﹐加埋星期六日﹐所以就有一連四日假咁多﹐係全年最長嘅公眾假期嚟架喇。每年嘅感恩節正日都會同winnie一家過。今年我拍心口話整prime ribs roast﹐即早前出過blog嘅嗰舊大磒石。因為次次都拿捏得個時間唔準﹐所以時得時唔得。為咗唔好喺感恩節食大餐嗰日累街坊﹐上個禮拜見costco有得賣﹐買咗一舊嚟預習﹐夾埋winnie一家做白老鼠試食。但嗰日因為先喺屋企焗到某個溫度﹐然後在攞去winnie屋企繼續﹐所以個溫度有D失準﹐焗出嚟紅咗D。不過生好過熟過頭﹐因為生嘅話都重可以焗多陣﹐但熟得制嘅話就無得救﹐除非即席喺我大脾割舊肥豬肉出嚟當叉燒咁焗多次喇。(但D肉可能又太un……
)正日之前一日其實超緊張﹐因為prime嘅牛肉數量有限﹐加上costco比出面超市買平好多﹐即係如果costco買唔到﹐我就真係要切自己大脾或者出去買貴野返嚟蹧蹋。所以嗰日懷住人擋殺人﹐佛擋殺佛嘅表情加心理裝況出擊﹐一入咗costco直衝去肉櫃﹐嘩﹗嚇得我吖﹐得返三包prime。好彩比我揾到一舊好多雪花嘅﹐其他嗰兩舊已經好似被人蹂躪過一樣﹗
呀﹗抹一把汗﹐唔會太熟又唔會太生﹐啱啱好﹗
車呔家到此一遊
話說約咗星期六車呔家嚟開餐﹐諗住呔爸嗰日唔洗返工﹐點知原來佢嗰日要返工﹐重要係朝早07嗰隻添。又諗住佢星期日放假喇﹐點知原來都係要返工﹐又係朝早07﹐無計喇﹐後生仔吖嘛﹗ (順帶一提﹐今日正是呔爸正式踏入三張野行列﹐以後一齊做中年人喇喂﹗
)
於是我試下將個爐加熱到三佰幾度睇下舊肉會唔會過一陣有翻D溫度先。(全部華氏溫度)
加熱咗個爐的確聽到入面D油炸嚟炸去嘅聲﹐但望一望個探熱針都重係零度﹐真係想喊﹗心諗﹐博一鋪都要喇﹐再加熱到四佰幾度睇下得唔得。其實平時D食譜係教用四佰嘅度開始焗﹐然後再落返去三佰幾度焗到得為止。但咁樣焗嘅話﹐舊肉就會得好少部份係有粉紅色(即啱啱四五成熟)﹐而大部份會熟得制(即七成以上)。所以要所有人都有得食到粉紅色嘅話就要用二佰度嚟焗﹐一直到家探熱針見125度華氏先攞舊野出嚟用鍚紙包二十分鐘或見個溫度上到135度華氏就可以切。太早切嘅話﹐D汁會漏晒出嚟﹐咁就前工盡廢。所以試諗下由零度颷上125度起碼要幾耐呢﹖但我D客人已經出咗門口嚟緊喇喎﹗
好彩﹐焗咗一陣﹐終於見到舊肉嘅溫度上升喇﹗真係嚇到賴咁濟﹗舊肉真係好靚仔下架﹐被我蹧蹋嘅話實在係浪費﹗最後都總算成功出爐﹐不過係搞呢搞路搞其他野﹐食嗰陣已經凍咗。唉﹗下次要焗熱D碟先上菜﹗
講返呔家﹐好似係五點幾到啩(我當時喺廚房賴緊X﹐都唔知佢哋幾點到﹗)。開頭係呔媽抱住細佬入嚟﹐呔哥同老豆喺車度探緊周公。細佬好明顯都係啱啱瞓醒喇﹐眼矇矇面鬆鬆﹐媽媽抱住佢入嚟打招呼。對上一次見佢哋係去動物園﹐之後都未再見﹐唔知細佬重記唔記得眼前嘅呀嬸係邊位﹐都唔敢太熱情飛撲出去嚇親佢。呢個時候﹐口水禧亦喺房大叫媽媽﹐以示佢都瞓醒晏覺要破繭而出喇﹐實情聽佢把聲好似無瞓喎﹐皆因佢衝出嚟嗰陣好似食咗電芯一樣﹐渾身是勁﹐一D都唔似瞓醒覺﹗同細佬瞓醒個樣簡直就無得比﹐所以我覺得口水禧係無瞓過嘅。傾咗一陣﹐細佬完全熱好身﹐跟咗口水禧去玩玩具。口水禧四圍揾野咁嘅款﹐原來係揾緊呔仔嘅蹤影﹐無計喇﹐呔仔重叉緊電﹐唯有先向細佬落手喇。
口水禧之前一日收咗winnie老豆送嘅Mcqueen遙控車﹐處於痴迷狀態﹐所以懶理細佬其實細佢三年﹐一樣照殺﹐要表演點玩遙控車比細佬睇。我喺廚房只見細佬非常頻能地走嚟走去﹐嗰個口水禧哥哥就揸住架車周圍飛﹐細佬撲咗一輪都係得個「追」字﹐望住眼前個大牛龜咁忙趴喺地下都唔知佢做乜。於是我哋叫口水禧唔好淨係玩遙控車喇﹐想悶C細佬咩﹐快D攞D玩具出嚟招呼下細佬玩下喇﹐都唔醒目嘅﹗
邊煮邊傾﹐呔媽話家陣兩個仔大咗開始有D勞氣(E~~~我係咪唔應該爆車呔兩兄弟D野出嚟呢﹖﹖﹖)﹐呔哥同細佬會爭玩具﹐有時細佬會撩哥哥﹐結果激嬲哥哥換嚟比片嘅收場。有時係哥哥特登片細佬但細佬又無野喎喺度笑﹐如果爸爸話唔准郁手郁腳﹐呔仔會用個肚腩去撞跌細佬。
口水禧喺sunroom同細佬bi li ba la唔知講咗一輪嘴野﹐只見細佬都好留心望住眼前嘅大牛龜哥哥發表偉論﹐完全無爭野嘅場面喎。梗係喇﹐口水禧大咁多﹐細佬醒目呀﹐幾大都唔同佢爭野喇﹐技安喎﹐係咪先﹗
差唔多食飯嘅時候﹐呔爸同呔仔入嚟﹐呔仔都要少少時間熱下身。不過好快就已經被眼前嘅玩具同佢熱好身出擊喇。由於兩個小朋友實在太耐無嚟﹐好明顯我整嘅野食都不及眼前嘅玩具吸引。今次佢哋老豆呀媽醒呀﹐自己食咗先一人招呼一個﹐等佢哋玩飽先然後再食飽個肚﹐大家happy。
舊prime rib凍咗……唉﹗失策﹗應該整熱D碟先……其他嘅野都係咁喇。呔媽話食完牛再食沙律﹐好口淡﹗你條友仔吖﹗又話減肥﹖
食到咁上下﹐呔爸媽就開始人釘人戰術﹐一人餵一件﹐車呔仔嘅焦點完全放咗喺玩具度﹐望都無望過老豆呀媽。哈哈﹗有時呔爸大叫﹕「呔仔重喺唔喺呢度呀﹖去咗邊﹖」喺某一個角落會聽到一把完全膚衍兼夾唔多專心嘅聲線﹕「呔仔喺度。」然後一片沉寂﹐任憑個老豆繼續愛的呼喚﹐個仔都係無回音﹐失去聯絡。
食到咁上下﹐諗住準備攞D甜品出嚟﹐細佬不停入廚房「探我」﹐但因為太多刀呀煲呀﹐所以閂咗門唔比佢入嚟。當我埋頭整理下D甜品之時﹐突然耳邊傳嚟一把好真誠嘅聲﹐隔住玻璃叫~
再加細佬嘅招牌笑容>>>
你話喇﹐對一個N年無聽過人叫自己做姐姐嘅中年女子(極其量都只會比人程呼做呀姐)﹐突然聽到有人大叫姐姐(重要係個尾音好輕﹐非常喜悅咁叫)﹐點可以唔即刻去招呼下呢位咁識氹人嘅哥仔呀﹗
好無人性嘅我﹐嗰晚迫咗細佬叫咗我N次姐姐﹐真係越叫越好聽﹗
呔爸媽﹐點解可以教出個仔咁誠實架呢﹖
結果﹐比細佬氹完嘅下場就係……個甜品重手咗囉﹐甜到我覺得有D苦添。唉﹗㗳糖喇㗳糖喇﹐賴野喇。都唔知佢哋點解咁黑仔﹐次次嚟食甜品都賴野。第一次個心太軟就一D都唔夠軟﹐係無野會流出嚟嗰隻﹗第二次個bread pudding就更加唔洗講喇﹐成劈X咁。今次諗住pana cotta應該無意外喇﹐點知又衰咗喺個汁度。E呀﹗細佬呀﹗姐姐比你電完會猛㗳糖猛落糖架﹗甜C人喇﹗
但下次都要繼續咁誠實呀﹐知道嘛﹗乖~~~
(金魚婆婆又想出嚟喇﹗)
好彩﹐個甜品衰咗﹐都重有盒牛油餅﹐雖然唔係我整嘅(亦好彩唔係我整架咋﹗唔係又賴多樣架喇﹗
)﹐都好過無喇。
玩到九點幾十點﹐兩個小朋友要沖涼準備返屋企。唔知係我個廁所整蠱呔爸定係呔爸自己整蠱自己﹐次次都濕身嘅下場。唔係兜頭淋就係花灑淋﹐真係……無計。
除咗細佬叫姐姐呢幕戲肉之外﹐另一個就係呔哥沖完涼竟然唔肯走話要留低喺度瞓。記得上次嚟都想想哋﹐但問多次係咪留低﹐佢又話唔好。但今次好肯定咁話要留﹐重話要同禧禧哥哥瞓添﹐叫佢老豆呀媽同細佬返屋企。
一輪「走喇﹐下次再嚟」VS「唔好」﹐「無帶衫」VS「沖咗涼」﹐最後當然係佢老豆呀媽贏喇。
呔仔﹐你喺度過夜無所謂﹐但姐姐驚你半夜要急call你老豆入嚟車返你返屋企咋﹐你老豆第二日重要07開工架﹗
