知識 – 口水禧日記

有無聽過「讀千卷書不如行萬里路」﹖睇報紙成日見到某女星被人話一日到黑都帶住個仔去拍戲﹐搞到個仔無書讀。實則情況我唔了解﹐無謂批評人哋呀媽嘅做法。但在我嚟講﹐我覺得除咗個小朋友會因為四圍去而無咗同同學之間嘅社交機會之外﹐我又真係唔覺帶住讀緊幼稚園嘅細路四圍去有乜唔妥喎。

下年口水禧就會入公立幼稚園讀書﹐朋友話嗰陣就唔可以帶口水禧返香港過年喇﹐因為學生缺一日課﹐學校就收少一日政府對嗰個學生撥出嘅資助﹐變相即係學校少咗收入﹐所以學校唔鍾意學生無特別原因而請假。但暑假去香港又太熱﹐聖誕D機票又太貴﹐真係R爆頭 (at wits' end)

﹗ 最好就係香港嘅家人過嚟探我哋喇﹗ (devil)

體諒學校﹐唯有度過D期先。不過都係下年嘅事﹐下年先算。 (I don't want to see)

但我仍然覺得知識唔一定要喺學校先有﹐其實周街都係﹐只係睇個小朋友有幾多觀察能力架啫。

早排circle time嘅時候﹐有個同學帶咗個cable car嚟比同學仔估﹐同學嘅提示係﹕一)行路軌﹔二)車頂有電
線﹔三)三藩市先至有。口水禧舉手答Train﹐因為佢唔係講中個名Cable Car﹐所以同學話佢估錯。突然醒起又真係無帶過佢去坐cable car喎﹐唔怪之得佢望住同學架cable car發呆﹐一頭霧水﹐明明眼前嗰架野成架火車咁樣﹐但又唔係叫train而係叫car架呢﹖諗諗下﹐佢何止未搭過cable car﹐就連呢邊嘅地鐵都無坐過﹗成個大鄉里咁款﹗ (laughing)

諗落又真係唔掂喎﹐第時人哋講開搭地鐵﹐呢條茂利好似外星人嚟探親咁乜都唔識﹐容乜易比人笑﹗於是揾咗一晚帶佢搭地鐵出街﹐其實只係搭幾個站﹐然後就轉搭禧爸車再過city食飯。講真﹐莫講話口水禧無搭過地鐵﹐連我嚟咗咁耐﹐搭地鐵嘅次數真係一隻手都數得晒。唔係我巴閉﹐而係我住嘅呢度交通非常唔方便﹐唔似三藩市咁多交通工具﹐搭完地鐵可以隨時轉其他車。我呢度落咗地鐵之後﹐隨咗巴士之外﹐完全無其他工具。巴士亦未必停喺近屋企附近嘅站﹐可能落咗車重要行一獲甘先返到屋企﹗所以真係好少用交通工具代步。

因為經驗少﹐所以出門前上地鐵公司個網址做定功課﹐搭去邊度﹑搭邊條線﹑幾多錢﹑架車泊邊層停車場唔洗比錢等等資料搜集好先出門﹐唔洗到時企喺個車站大堂發呆。

五點幾出發﹐預D時間泊車。幾年前試過去機場接禧爸﹐懶叻學人搭地鐵﹐揸咗架車去地鐵站泊車﹐點知比人抄咗牌。原來我泊嗰度係專用月租車位﹐嗰張牛肉乾食咗我USD40﹗ (crying) 所以今次唔可以再犯同樣嘅錯﹐打C都揾下邊層泊車唔洗錢。

即使事前上網查咗﹐但泊咗都硬係有D驚驚哋﹗望到呢個牌都重係半信半疑……有個女人問我係咪真係唔洗錢架﹐我話張告示就話星期一至五上晝四點至下晝三點要比USD1。咁無講話之後要比錢﹐我當佢唔洗比囉。重話埋佢知如果抄牌嘅話﹐大約係幾錢﹐因為我抄過。嗰個女人笑。

呢架購票機﹐我次次嚟都要玩一輪先知點用。因為好多選擇兼好多制你按﹐實在係要研究下先知發生緊咩事。當日亦不出我所料﹐一埋去入咗信用卡﹐螢幕就顯示準備收我USD20。明明之前睇咗搭幾個站只係收三個幾咋喎﹐無喇喇變咗廿蚊﹖原來有個制比你係咁按﹐每按一次就減USD1或USD 0.25﹐總之你自己加加減減到你要比嘅車費﹐然後叫部機印車票就得。口水禧唔洗錢。口水禧見我係咁噤D制都好緊張﹐可能係驚個呀媽累佢無車搭。

呼﹗一額汗﹗ (whew!) 成功買到車飛﹗

2011-11-22_17-46-11_444

口水禧知道去呢D地方要跟實我﹐所以佢無亂咁四圍走。但佢有時企得出咗少少﹐比我拉返過嚟﹐因為我驚會突然有顛佬/婆推佢落路軌。洗唔洗咁驚﹖驚呀﹐呢D危險意識點都要有少少﹐尤其是帶住個細路﹐其實亦都應該要教佢要小心保護自己﹐街上未必個個都係壞人﹐不過撞著一個就大獲﹗

上咗車之後﹐口水禧四圍咁望﹐人哋見我哋兩母子重以為我哋係遊客第一次搭美國嘅地鐵。

呢邊嘅地鐵好殘舊﹐所有凳都係布座位﹐不過幾多萬年無洗無消毒就……成架車廂有「浸」味﹐開咗暖氣好焗﹐有鼻敏感嘅人士(如我)係好難呼吸暢順嘅。唔知嗰日係未撞得好正放工時間抑或我哋搭嗰幾個站唔係人哋返工嘅旺站﹐所以都唔見有人車門一開就衝上嚟即刻去霸位。其他站有無就真係唔知。所以喺香港嘅時候﹐我一定唔會帶住口水禧喺返放工時間去挑戰搭地鐵﹐費事阻人又驚人哋撞到口水禧。試過一次朝早要去中環陪婆婆搞visa﹐帶住當時只有兩歲嘅口水禧搭地鐵﹐佢塊面不下數十次比人哋D LV﹑gucci﹑channel片到眼都開唔到。單手抱起佢﹐跟住架車左搖右搖好牙煙﹐所以帶住佢搭地鐵要揀啱時間。