Over, over! 
我哋返回地球喇喂﹗下個星期終於可以放聖誕假喇﹐兩個禮拜「黃金週」呀大佬﹗重矜貴過黃金呀真係﹗
開學後﹐又唔知幾時可以再有時間update個blog喇。
明晚重要去學校做口水禧嘅”my book”(類似紀念冊嘅物體﹐內有口水禧返學以嚟喺學校同屋企做過嘅功課同相)﹐呢D粗重野梗係我哋D呀媽做喇﹐幾時會見D老豆嚟搞吖﹗即使佢哋話嚟做﹐我哋都唔敢喇﹐有時老豆嘅眼光同品味真係……(除咗揀老婆嗰陣正常返之外﹗
)所以明晚﹐禧爸就會同口水禧去撐枱腳﹐希望佢兩個飲飽食醉之後返到屋企自律D沖涼瞓覺喇﹗我喺出面拋頭露面都好辛苦架嘛﹗哈哈﹗
相機張記憶卡已經就嚟爆滿﹐好多相已經唔記得幾時影低。再唔寫低﹐好快就會直頭無咗件事架喇。
我哋平時喺屋企真係做盡唔少無聊嘅事。淨係互扯大家公嘴都可以玩一餐。當然﹐呢D咁man嘅行為﹐留返比兩個毀咗容破咗相都無相干嘅茂利做喇﹐我塊面唔可以咁樣比佢哋蹧蹋架嘛﹗你話如果無間道個劇照﹐梁朝偉唔係揸槍指住劉華﹐而係扯住佢個嘴﹐即刻就變咗套笑片喇﹐係咪先﹗新年就可以多部笑片睇勒﹗
完全唔記得點解佢哋會互扯對方個嘴﹐但肯定係口水禧出手先喇。而家佢超多手﹐成日抓老豆副超﹑扯甩我條辮﹑篤/吹我塊面。因為我嚴厲地喝斥過佢唔准掂我個頭以及面部嘅任何一個地方﹐所以佢一想出手﹐見我厲住佢嘅話﹐佢都會即刻停。但佢老豆就無咁好彩喇﹐次次都比個仔先下手為強﹐然後我就會不時聽到有人奪命驚呼「搞錯呀﹗﹗﹗﹗」無嘅﹐時玩時唔玩﹐個仔梗係當你流喇。要好似我咁﹐嚴重警告佢媽媽超級憎人搞佢塊面同個頭﹐用口吹氣都唔得﹐再加個殺人咁兇嘅眼神﹐包佢唔敢亂嚟。可能就係咁﹐唯有向老豆發洩。但我哋叫佢喺學校千其唔可以咁樣整同學﹐因為驚佢哋無情力﹐你叉我時我又插你眼﹐一陣插盲咗人對眼或者比人叉爆個鼻哥窿就大件事﹗
咩人嚟架﹖比人咁樣夾住個嘴都重咁開心﹗嘴痕咪出聲囉﹐實大把人爭住星你幾野止痕架喎﹗
痕認真情度有誰可比﹖特登嘟長個嘴嚟方便你夾﹐你話喇﹐今時今日咁嘅態度係咪真係抵佢比人夾嘴先﹖
嘩﹗仔﹐你親生老豆嚟架﹐唔洗起勢咁鉗喎﹗但望下個老豆﹐好似又幾享受咁嘅樣﹐早講吖嘛老公﹐原來你鍾意比人夾嘴﹐我D手指好有力架﹐夾到你個嘴擘唔返開都得﹗
早前某位女藝人比人鹹豬手後﹐本雜誌又即刻登晒其他當晚案發嘅相出嚟﹐於是女藝人就比人話佢好似欲拒還迎﹐無即時拒絕嗰兩位男藝人嘅鹹豬手行為。係咪真有其事我就唔知﹐等口水禧示範一次欲拒還迎係點架喇。
首先﹐笑笑口望住人。然後一隻手頂開人﹐但另一隻手又要好似攬住人哋隻手。
繼而當人哋個鹹豬嘴啜埋嚟嘅時候就要一手頂﹐但塊面就要失守被啜。你以為口水禧蝕晒底呀呢﹖咪咁快下定論先……
睇下﹗一個擒拿手鉗爆個鹹豬嘴﹐呢個真係唔講得笑架﹗母指食指要微曲內彎﹐整成一個鈎咁出力鈎住對方個嘴﹐然後渾氣出力扯到個嘴變形﹐你睇你睇﹐指甲內嘅粉紅色即時變白﹐即係手指已經出盡力咁鉗﹐就算手指甲顏色睇唔出有幾有力﹐齋睇個鹹豬嘴比人扯到變形﹐對方塊面皮不似人形﹐眼袋都幾乎落埋嚟﹐打幾廿支botox都醫唔返﹐就知度力係幾咁強勁喇﹗你話勒﹐如果女士用呢招對付D鹹豬嘴係咪包保唔會再比人亂啜先﹗就嚟聖誕喇﹐派對上大把鹹豬嘴﹐快D學呢招可防狼﹗
一手鉗緊人哋個嘴﹐另一方面幾咁鬆容地笑住影相﹗唔識詠春都要定要學呢招﹗
由於係示範架啫﹐所以口水禧只係用咗四成功力﹐佢老豆個嘴先得以保住﹐玩完鉗嘴重可以讀下書仔比個仔聽。
口水禧鍾意聽我哋讀書比佢聽﹐然後又學我哋講完次。不過呢個讀書時間機會唔多。真係要老豆或呀媽好得閒先有。希望放假呢兩個禮拜我可以做多D呢樣功課﹐如果唔係﹐下次去完香港之後又要由零開始﹐九月入幼稚園聽唔明人哋講乜。而家嘅佢﹐自己玩玩具嘅時候﹐多數都係用英文自言自語。當然﹐當中夾雜睇卡通學嘅對白同埋自創嘅外星人英文。真係幾得意﹐我都唔明點解佢玩玩具嘅時候會轉咗英文台﹐印象中好似無聽過佢用廣東話玩玩具。以前細個玩嘅時候係唔講野﹐到開始會自言自語玩嘅時候已經轉咗台。
無論英文中文都好﹐最緊要係講嘅時候要有自信。我無嗰種驚佢會第時唔識講中文嘅憂慮﹐一來只要我哋繼續有同佢講中文﹐佢應該無咁易唔記得﹔二來﹐如果佢真係唔記得嘅話﹐咁咪即係佢嘅語言能力真係無咁勁囉﹐咁呢個世界又唔係個個人都擁有強勁嘅語言能力﹐無得勉強架喎。
今日喺學校做咗畫劇﹐其實佢係完全唔知個故事講乜﹐所以佢行嚟行去跟唔到人哋個進度﹐戇居到爆。返到屋企唯有將個故事講一次過佢聽﹐佢個樣好似恍然大悟﹐食晚飯嗰陣要求再講多一次。唔知將來間幼稚園會唔會比家長去幫手做野﹐我唔係要做怪獸家長﹐我只希望口水禧唔會因為唔知人哋講乜而對返學失去興趣或者怕咗返學。所以揀學校好重要﹐揀著一間淨係掛住猛篤學生交分數嘅就慘喇。屋企附近嗰間學校聽講都幾好﹐唔係篤分數嗰類。所以我唔會同口水禧去揾隔離區分數高D嘅學校喇﹐快樂嘅校園生活比分數重要得多。
早排嘅睡衣日﹐個個細路著晒睡衣返學﹐真係好喇﹐我哋D呀媽嗰日就篤少樣野﹐食完野就拿拿臨出門返學﹐唔洗換衫。口水禧個look幾咁後現代﹐集睡衣同運動於一身﹗
連老師都著睡衣﹐問你服未﹗
服放學返嚟佢話佢隻腳趾出咗嚟﹐一望之下……
赤貧兒童﹐苦學生﹐連襪都無錢買呀﹗陰公﹗嗚~~~~
報告完畢
呀公呀婆﹐攞去攝住牙嚹先喇﹗
