car總站上車。由於而家冬天早咗好多開始天黑﹐基本上下晝三點幾四點﹐太陽一開始收工就會即刻變得好凍﹐所以室外節目最好喺重有太陽嘅時候進行。於是為咗盡量喺和暖嘅溫度中渡過星期六﹐我哋三件嗰朝係要特登較鬧鐘﹐朝早八點就要起身食野然後出門趕船喇。有咗細路仔之後﹐本來一粒鐘嘅事﹐最好預多一粒鐘﹐即我哋如果十點半出門﹐最好兩粒鐘前就要起身。當然﹐如果唔食早餐就出門嘅話﹐可以遲一粒鐘先起床都得喇。不過我哋慣咗要食早餐﹐所以想偷懶都唔得。
不過嗰日天色麻麻﹐外面陰陰沉沉﹐大霧到唔見咗對面屋個鄰居。溫度大約係攝氏三﹑四度﹐三條友跳上車嗰陣都幾雪雪凍﹗當然喇﹐某人出門見世面嘅嗰團火又點會因為呢D濕碎野而被影響到呢﹗細路仔有得出街玩﹐話之你凍到零度喇﹐照玩可也﹗
十點幾泊好車喺碼頭附近嘅停車場﹐三條友行過對面揾船搭。經過馬路嘅時候﹐咁啱有架火車經過﹐響安響到耳聾咁濟﹐真係唔知附近民居嘅人夜晚點瞓覺﹗只喺Thomas卡通見過火車經過﹐馬路會落閘欄住車輛嘅情境﹐口水禧嗰日親眼目睹﹐非常興奮﹗耳仔都唔記得蓋住﹐淨係識牛咁眼望住架火車經過。網上睇過架野可以去火車博物館﹐揾日都諗住帶隻蛙去坐下。
成條街鬼影都無﹐碼頭就更加唔洗講喇﹐如果個天再黑D ﹐就真係幾似D人趕住去碼頭等船走佬架喇。不過個碼頭幾靚﹐佈置咗聖誕裝飾﹐乾淨又無垃圾﹐最緊要係靜。放假嘅時候好怕去人多嘅地方﹐呢兩個月﹐所有鋪頭或商場都同淪陷差唔多﹐好似所有野都唔洗錢任攞咁款﹐我實在無能力去同人搶野(無體力無眼力﹐最緊要係……無財力) 所以最好嘅節目都係去D戶外無乜人爭住迫嘅地方好D。
喺呢個碼頭搭船過三藩市大約要四十五分鐘。船費係USD6.X。小童五歲以下免費。有好多人揸車嚟呢度再轉船過三藩市返工。我哋泊嘅嗰個碼頭﹐如果搭客來回兩程都搭船﹐停車場有12小時免費。咁即係返工淨係比搭船嘅錢就得喇。買月票嘅重再平D添。唔想迫地鐵嘅話﹐搭船其實都幾舒服。不過視乎過咗海之後﹐返工嗰度離碼頭有幾遠﹐因為之後重要再轉車。不過好似我哋咁諗住喺碼頭轉cable
car嘅話就好方便。
莫講話口水禧係隻蛙﹐其實佢老豆呀媽都唔好得幾多。第一次搭船﹐嚟到個碼頭﹐我哋四圍咁揾邊度買飛。荒原幾廿里都唔覺有售票嘅物體﹐正想話係咪又賴咗野去錯碼頭或者人哋嗰日唔開工之時﹐有兩個人行過嚟又係搭船﹐我同禧爸成個遊客咁款走去問人喺邊度買飛﹐人哋話上咗船先買飛架。啊﹐原來係咁嘅﹗
我身後間野好似好辦工大樓咁款﹐重以為係喺嗰度買飛添﹗點知喺玻璃望入去﹐裡面係無野嘅﹐唔單止係無人﹐直情連枱凳都無嘅嗰種無野。你話如果唔係撞正嗰兩個都係搭船嘅人﹐我哋真係R爆頭都唔知去邊度買飛好。
著草嘅裝束﹗唉﹗真係好怕同佢買褲﹐呢條係六歲嘅褲﹐早兩個月買嘅﹐洗完著嗰陣都係啱啱好﹐而家直頭超級吊腳。但唔著又好嘥﹐吊腳就吊腳喇﹐當四角骨著囉﹗哈哈﹗OK喇﹐夠暖嘅話﹐話之佢喇﹐係咪先﹗
我哋十一點已經企喺度等船﹐但一直等到十一點五個字都未見隻船出現﹐好彩當時已經有十數人喺度一齊等﹐如果唔係嘅話﹐我哋重以為無船會嚟接我哋架喇。船未嚟﹐咁就不如行行企企影下相喇。見唔見某人期待又興奮但又有D茫然嘅神情﹐不斷咁問﹕「點解隻船重未嚟嘅﹖」似乎都好驚比人放飛機喎﹐呀﹐唔係放飛機﹐應該係放船先啱。
無帶腳架﹐好難影全家幅﹐唯有分開影。
呢排又同佢剪過下前面嘅頭髮嚟﹐奇怪喇﹐明明剪嗰陣前面D陰係齊架喎﹐點解而家會變咗打斜架呢﹖唔緊要喇﹐家下興咁樣呀嘛﹐可能人哋重以為佢去在度剪架呢﹗耳仔兩邊無剪﹐天氣凍﹐留嚟遮耳保暖。後面亦都無剪﹐都係同一功效。唔知呢個髮型可以留到幾多歲佢先會嫌棄﹐暫時佢都好鍾意自己呢個髮型。喺香港一定喺街又比人以為係女仔﹐真係唔明﹐有無真係咁難分辨呀大佬﹖
全日唯一一張全家幅
差唔多就嚟十一點半﹐隻船無端端唔知喺邊度貢咗出嚟﹗大家排隊上船﹐我哋三個茂利排下又影下相﹐突然隻船響號﹐頂佢呀﹗大聲到幾乎嚇到我相機都飛落地咁濟﹐以為係我哋三個行得慢又影相﹐所以個船長催我哋快D上船﹐但望下後面重有有嚟緊喎﹐咁響乜鬼野號呀大佬﹗嚇C人咩﹗真係耳屎都比佢震出嚟喇﹗
果然一上船就見到個收銀處﹐人人都要去排隊買飛﹐重可以碌卡添。係呢度﹐話之你碌兩蚊都好﹐無人會黑你面(除咗亞洲人鋪頭會要求客人買夠幾多錢先可以碌或者直情唔收卡要收現金) 。
成架船分三層﹐最底嗰層只有室內雅座﹐重要有卡位添﹐成個茶餐廳咁款。二樓有一半係室內﹐一半室外﹐三樓係完全室外。無食早餐可以去室外食風。有三個食咗早餐嘅都去咗食風﹐因為有件鄉下仔想出去睇下野﹐結果兩個老野陪佢一齊食風。好飽﹗
經過貨櫃碼頭﹐口水禧叫嗰兩架白色吊機做cranky ﹐聽過好似話係香港人設計﹐有無人知係咪真﹖
好有晨運呀佰feel嘅幟哥睇緊邊度有海鮮呀﹖後面嗰位小朋友坐定定望海﹐同晨運呀佰好似互相唔識得咁嘅款﹗
口水禧自細就好鍾意比風吹﹐一有風吹佢個頭佢就會大叫大笑。
真係比面你係我個仔咋﹐如果唔係﹐叫我上嚟同你食風食到假髮都幾乎吹走髻又甩﹐我真係睬你都傻呀大佬﹗真係好大風呀﹗隻手唔噤住D頭髮嘅話係無可能見到我塊面嘅﹐成個頭好似比隻墨魚用D鬚啜實個頭同塊面咁﹐眼耳口鼻都唔見晒﹗所以口水禧見到我咁嘅樣招駕唔住﹐佢非常開心。(衰得佢吖﹗)
仍然記得N年前第一次嚟三藩市玩嗰陣同禧爸羅友痕走去搭船圍繞漁人碼頭對開個島﹐更加羅友痕係兩條友又係走去室外食風﹐完全係講唔到野嘅﹐因為塊面比D頭髮打到好似不停比人煎緊塊面咁﹐連件風褸都吹到脹晒﹐好似人哋跳降落傘咁款。自嗰次之後完全理解三藩市風勢嘅威力﹐所以初初嚟到好怕去三藩市嗰邊﹐就係因為怕大風吹散我個髮型。(係﹐為咗個頭唔去咁多三藩市幾低能﹗) 。而家人老株黃﹐乜野髮型面型身型嘅野都豁晒出去lu﹐話之佢吹甩髻喇﹐反正點都似顛婆遊街架喇。
貼個頭咁埋個仔度博人哋以為你有頭髮呀﹖
我哋隻船經過D貨輪﹐嘩﹐人哋大架到呢﹗我哋嗰架即刻變咗隻艇咋﹗
跟住重見到有人爬艇仔﹐爬得咁埋D大船唔驚架咩﹖
隻船先喺唔記得邊個碼頭落咗部份客先﹐然後先再去尾站pier41。喺呢個時候﹐三個塊面已被吹到僵硬嘅茂利頂唔順﹐落咗一層有瓦遮頭但仍然係室外嘅二樓避一避。如果再吹落去﹐恐防落船嗰陣五官僵硬到眼都「斬」唔到﹗人哋重以為我哋一家都打咗過量BOTOX打到塊面僵晒郁唔到﹐成個面抽筋咁款﹗
落咗船即刻去醫肚打個底先。點解啱啱食完早餐又再要打底﹖因為我哋估計一陣需要好多體力勞動﹐唔食飽個肚嘅話都唔知有無力落返嚟。
禧爸話有間野都OK ﹐原來係呢間叫BOUDIN嘅餐廳。出名食周打魚湯﹐我哋食開嗰間野嘅周打魚有如打瀉鹽咁鹹﹐呢間無咁鹹都算OK ﹐其實可以再淡少少。
間野樓上係正正統統嘅餐廳﹐樓下係麵包鋪同賣D「林審」廚具﹑食品﹑快餐。自己排隊買自己揾位坐﹐無人招呼你﹐但有鋼琴伴奏﹑聖誕老人陪影相。人來人往超多人﹐不過還可以接受﹐因為唔會有人爭呢爭路大聲講野。
即場有人做麵包﹐天花有條路軌吊住D籃載住麵包或公仔兜嚟兜去。
巨型麵包周打魚湯﹐盛惠USD7.xx。包你夠食(如果食埋個包嘅話) 。有D人食唔晒個包就咁飲咗D湯就算﹐成個包唔食就掉﹐可能個皮硬得濟﹐我食咗個「蓋」﹐刮咗麵包兜裡面D麵包﹐個外殼好似無食﹐其實都幾浪費。如果係喺屋企食﹐之後唔係趕住有野做﹐應該會食埋個包。
口水禧見親聖誕老人都硬晒呔﹐人哋問佢乜﹐佢都搭YES。見唔見到佢兩隻手﹖呢個手勢通常係佢好緊張嘅時候先會出現﹐如果兩隻手不停同時相反左右搖晃﹐即代表佢又驚又緊張﹐多數係比我大剷或者好緊張地同人講野嗰陣就會有咁嘅動作。
前幾日食緊飯嗰陣問口水禧諗咗要乜野聖誕禮物未﹐佢話想要聖誕老人隻聖誕鹿﹗聖誕老人隻鹿你都要﹐咁人哋坐咩嚟派禮物呀大哥﹗真係比佢笑C﹗呢期真係好迷聖誕鹿﹐見到聖誕鹿嘅公仔都要整返隻返屋企。有次揸緊車﹐路旁有隻野鹿﹐口水禧即可問我嗰隻係唔係聖誕鹿喎﹗對佢嚟講﹐聖誕鹿係鹿嘅其中一種品種﹐專喺聖誕節先出嚟行嘅。
食完野去埋交水費就要行去cable car總站搭cable car。咁啱見到有人調車頭﹐口水禧呆望都唔知D人做乜。其實地下有個轉﹐架車行去個圈裡面﹐工作人員就會推住佢轉嚟調頭。話咁快就搞掂。
嘩﹐唔知平日係點﹐嗰日就好多人排隊等坐﹐條隊都幾長。開頭有三架車﹐但我哋都上唔到。等車途中﹐側邊有人賣唱耍雜技乜鬼都有﹐等你班友一邊等車一邊焗住欣賞佢哋嘅表演﹐然後贈返一個幾毫咁喇。有個呀佰夾硬又彈電子結他又唱歌搞咗好耐﹐唔係好多人比錢﹐佢就一時又話唔唱要走一時又繼續唱。其實係有D嘈﹐不過人哋要揾食﹐無法喇。
點解無喇喇有警察企喺度眼望望呢﹖
因為突然有兩條友仔﹐造型詼諧帶住聖誕帽﹐一個將另一個用鐵鏈綁喺棵樹度﹐重要佢著住一件兩隻手長到可以將對手綁住喺背脊嘅衫。望落好似虐待咁款﹐所以D警察注足睇咗一輪﹐嗰個鎖鏈銀就嘻皮笑臉咁左郁右郁﹐磨下棵樹﹐擰嚟擰去﹐唔洗一分鐘就解咗自己出嚟。重攞埋個袋嚟叫我哋比錢添。見唔見隔嚟揸住支結他個呀佰望住佢哋﹖咁樣郁身郁勢幾下就可以賺錢﹐呀佰可能心諗﹕咁我洗鬼博命咁彈﹐嗌到破喉嚨咁嚟虐待自己呢﹖
其實我覺得咁樣企﹐凸咗個身出去都幾牙煙﹐事關側邊都會有其他車輛喺你身邊行緊﹐萬一唔覺意甩咗手﹐或者人哋收制不及炒埋嚟都幾大獲。加上架車停嗰陣都幾CHOK
﹐所以唔扶實就真係實飛出街都似﹗
臨近聖誕﹐乜都要裝飾下﹐cable car亦唔例外﹗
實在好多人呀﹗D車嘅班次又疏﹐企咗超過半粒鐘都未有車﹐口水禧都企到呆咗。喺香港企半粒鐘等巴士可能係平常事﹔但對於我哋呢D平時坐多過行﹐行多過企嘅就懶蟲就真係有D攞命﹗加上住嘅地方公共交通唔發達﹐出入都係坐自己車嘅人嚟講就更加少有機會企一大輪嚟等車。口水禧全程都係企喺我哋身邊都算係咁。有幾個外國人小朋友﹐個呀媽一邊排隊﹐佢三個豆丁就四圍走﹐爬燈柱﹐跳高痞地乜都齊。無辦法﹐小朋友邊肯同你企定定吖﹐我諗口水禧係眼瞓﹐等得太耐有D呆﹐如果唔係都應該會好似嗰D小朋友咁樣。我重未可以喺人多嘅地方都有得佢四圍走﹐因為擔心有顛佬顛婆走出嚟推人出馬路或者攞武器傷人等等。呢個就係外國人同我哋中國人媽媽嘅分別。外國人乜野環境都有得D細路四圍走﹐但中國人嘅小朋友永遠都係企喺父母側邊唔敢郁﹐究竟係好事定壞事呢﹖
等到真係瞓著咁濟﹐對耳亦都比嗰個搖滾結他呀佰炸聾咁濟﹐終於都到我哋上車喇大佬﹗本來想坐對街外企位對住嘅坐位﹐但覺得人哋一企埋嚟就遮晒所有視線﹐淨係望住人哋個褲浪架啫﹗於是揀咗有車廂包住嘅坐位﹐即有玻璃窗嗰D地方﹐都好彩係揀咗嗰度﹐原來架車行緊嘅時候D風吹埋嚟都幾寒﹗
口水禧帶住呆濟嘅神情坐﹐太多人太迫﹐佢都無心機擰轉頭望下窗外嘅街境。其實搭cable car都幾辛苦﹐我第一次搭嗰陣又係呢D時候搭﹐多人到爆﹐無位坐要企不特止﹐架車成日要上斜落斜﹐剎制嘅時候架車超CHOK ﹐真係好易CHOK親條腰﹗唔係為咗口水禧﹐真係坐完嗰次都無諗過呢世人會再坐。
當我哋喺CHOK住上斜落斜﹐被企喺度嘅乘客踩腳嘅時候﹐比我見到有個車房裡面有數架cable car﹐我重同禧爸講﹕「搞錯呀﹐收埋咁多車喺度都唔放D落去車站接客﹐搞到我哋企咗咁耐﹗」原來唔經唔覺我哋嚟咗cable car嘅博物館喎。喺呢個時候﹐我老公先突然話佢之前嗰晚上網揾資料嗰陣都見過呢間野個名。下﹖咁點解無提過話會去睇嘅﹖突然三條友臨急跳車﹐既然一場嚟到﹐齋搭唔參觀下個博物館又真係幾嘥嘅。
拿﹗如果唔係同兩件蛋散嚟嘅話﹐我係絕對有心機睇晒D資料架下﹐只不過有條友仔周圍搞﹐我哋要跟實先無辦法睇晒D展覽圖咋﹗唯有講我睇到幾多得幾多嘅野比大家知喇。可能有D甩漏﹐不過係咁上下喇。
見到相中嘅大車輪嗎﹖呢幾個大車輪就係控制所有cable car嘅電纜喇。我哋睇嘅時候佢哋都郁緊架﹐是但剪一條嘅話﹐就會有架cable car「碌」落山架喇﹗
大至上嘅原理係呢幾個大輪負責拉郁電纜﹐每條行車線嘅地下都鋪晒呢D會郁嘅電纜﹐車底下有個鉗之類嘅野會鉗住地底入面郁緊嘅電纜﹐停車﹑剎制﹑上落都靠佢。所以你會見到D相入面有工人埋D大車輪同電纜落地底。
電纜就係埋喺呢D路軌下面﹐所以企喺度你會聽到地底下傳嚟車輪滾動嘅聲。
話說一八唔知幾年嘅時候重未有汽車﹐嗰陣D人重坐緊馬車代步。三藩市多山﹐D人由山上落去市中心返工唔方便﹐於是就有人將吊車(有D似360咁嘅款嘅吊車)改良咗之後攞嚟做接載由山上落嚟返工嘅人嘅交通工具。嗰陣嘅cable car係用馬拉而唔係用電嘅。後來人口越嚟越多﹐再經過N次改良﹐一卡變兩卡再變幾卡﹐無皮變有皮﹐先至變成今時今日我哋見到嘅cable car。(我係睇到咁多野咋﹐重有興趣就上網查喇﹗)
參觀完博物館之後發生咗一個插曲﹐話說我哋上車之前已買埋回程嘅車飛﹐點知當我哋揾到個車站等緊車嘅時候先發現回程嘅車飛唔見咗。禧爸左揾右揾﹐幾乎想連底橫都剝出嚟揾咁濟都係揾唔到﹐於是唯有諗住上咗車先再買飛囉。等咗一陣﹐見有架車嚟到﹐點知太爆滿上唔到車。望住架野滿到瀉﹐再等下一架都會係同一下場﹐加上班次疏﹐分分鐘企到夜晚都未上到車﹗天又開始暗﹑風又開始大﹑有D凍凍哋咁﹐見重有少少陽光﹐我哋決定膽粗粗﹐挑戰自己嘅腳骨力﹐睇下退化咗嘅腳聽唔聽洗﹐一於行返落去碼頭喇﹗
根據電話嘅GPS顯示﹐大約要行20分鐘就會到。見還掂係落斜又唔係上斜﹐應該唔會太辛苦嘅。雖側口水禧都玩到有D想見周公咁嘅樣﹐但與其喺度等車食風兼未必上到車﹐倒不如快手行落去重好。還掂我哋打晒底﹐口水禧有羽絨頸巾﹐其實凍就應該唔會凍﹐所以行落去都無問題嘅。其實我哋三個真係好少咁樣散步﹐所以都算多樣節目喇﹐邊行邊傾其實好快就到。口水禧落到嚟碼頭喺街上見到呢架A貨cable car重要求要同佢合照添﹗
本來諗住上到車去到碼頭可以搭3 ﹕30班船﹐但而家搭唔到船﹐唯有坐下食下野休息下等下一班五點幾船喇。
呢個mini donut都幾好食﹐唔知用乜鬼野料整﹐好鬆化喎﹗
口水禧手多已經係事實﹐即使有帶消毒濕紙巾都不能將佢十隻灰色嘅手指抹乾淨﹐好彩有帶餐具﹐可以比佢用叉吉嚟食。點解唔去公廁洗手﹖因為D洗手盤好高﹐條友要洗手嘅話一係就邊洗邊用佢兩隻手袖幫人抹個洗手盤邊﹔一係就叫佢呀媽我發功托起佢成個人嚟洗﹐我自問家下實在無本事舉起佢﹐又唔想佢幫人抹洗手盤﹐唯有用濕紙巾加餐具頂住先﹐揾到個乾淨D嘅洗手間先同佢大洗喇。
懷疑我同禧爸三十幾歲四十先嚟有社交恐懼症﹐我哋嫌個漁人碼頭近大街嗰邊人太多太嘈﹐於是走去後面向海嗰邊坐底食野﹐貪嗰度鬼影都無隻夠靜。
海邊嘅雀都唔多驚人﹐我估係比人餵慣野食。見我哋食緊都飛埋嚟牛咁眼望住你食﹐搞到你唔好意思唔醒D比佢。
無幾耐飛多隻落嚟﹐不過佢唔係想食野﹐係想溝女而已。我知香港又話有H1N1 ﹐嚟緊都無雞食﹐禧婆婆見呢幅相肯定明日又會喺電話裡頭話唔好咁近D雀﹐好污糟有病菌嗰D。但諗深一層﹐如果唔係呢隻雀﹐口水禧都分唔到雞腳同鴨腳﹐因為呢隻雀對腳﹐口水禧知道點解游水有人要著蛙鞋。以後唔再將雞睇成鴨喇。
野生動物係容易有菌﹐但無人叫你走去掂佢吖﹐睇下啫﹐又唔係攬住佢就得喇。
食飽咗D精力又嚟過﹐走嚟走去嚇雀﹐幾衰﹗抹下嘴上面D糖喇﹐核突佬﹗
口水禧手上嗰架當晚就比佢喺餐廳跌斷咗一忽﹐衰仔﹗架野要錢買架﹐錫住嚟玩得唔得呀大佬﹗
又走返去碼頭等五點班船。無做任何手腳﹐五點未夠﹐個天就係咁嘅色架喇。
上到船﹐口水禧已經眼都打唔開﹐人肉攬枕呀媽充當45分鐘嘅搖籃﹐初初重口硬話唔眼瞓﹐一抱住唔洗5分鐘即暈。落船醒咗自己行﹐我哋去攞車唔洗比停車場費。三條友返去屋企附近嘅餐廳醫肚﹐咁就完咗嗰日嘅行程﹐好彩係著波鞋﹐竟然無腳痛﹐掂﹗家陣口水禧大個咗﹐帶佢四圍去無細個咁攞膽﹐下一次嘅行程應該會係火車博物館。
