上一篇嘅「給禧兒書 V」整喊咗咁多位真係唔好意思﹐本人純粹係諗住有咁感動寫咁感動﹐等我第時老咗﹐個衰仔比家用嗰陣會鬆手D咁啫﹐絕對無心幫大家通淚線嘅﹐所以你哋~~可以慳返D眼淚
~~﹐無謂為咗一個貪錢嘅呀媽而流馬尿喇﹗有見咁多位留咗言祝個茂利生日快樂﹐我呢個做呀媽嘅唔知點答謝大家(已經用龜速回緊留言架喇﹐慢慢等喇﹗)﹐唯有出賣我一家﹐一陣比D野各位笑下我哋喇。咁大嘅犧牲﹐我個人認為應該收返D利是嘅
……
直至而家五歲﹐口水禧都未開過生日派對﹐最大嘅原因係佢呀媽無精神搞呢D咁盛大嘅活動﹗係呀﹐多過三個人對我嚟講就叫盛大架喇﹗(咁都得﹐問你服未﹗
)我照顧唔到一個幾廿人有大有細又食又玩又傾嘅場面﹐之後收拾殘局嘅工作量實在令我卻步
﹐所以唔好意思喇仔﹐呀媽要再訓練多幾年先有心理準備做呢樣壯舉呀﹗
不過﹐唔開生日會唔等如無做野嘅﹐三個人慶祝都一樣可以好開心架啫﹗星期四放咗學去攞完訂好咗嘅蛋糕﹐我哋放返屋企之後就搭咗地鐵出去匯合禧爸。嗚~~~有人大個仔喇﹐要比錢搭車喇﹗
重要大人同小童同價添呀﹗
一如上次咁樣泊好車就去買飛搭車﹐當然都係玩咗一輪部機先買到飛喇﹐不過今次叫做快過上次﹐有進步﹗上到月台等咗一陣就有車﹐口水禧非常興奮﹐牛咁眼四圍望﹐繼續以大鄉里出城嘅眼神去檢閱每一位搭客。
去到目的地後﹐又要教一次某人點樣入車飛出閘﹐上次佢唔洗買飛同我一齊出閘嗰陣﹐突然衝閘﹐搞到佢過咗個閘但個呀媽就比度閘閘住咗出唔到閘﹐面懵懵走去同個叔叔叫人開閘放我出去。今次我醒喇﹐C人都唔入自己張飛先﹐叫佢入咗自己嗰張先﹐果然不出我所料﹐佢入咗飛之後係唔知應該出邊部機嘅﹐走咗嚟我面前想出我嗰部﹐好彩我無入飛﹐如果唔係又要去叫人開閘﹐人哋以為我哋兩母子專門搭霸王車﹗
其實嗰日人哋老豆一早就諗好咗要請個仔去Banana Leaf食馬來西亞/星加坡餐。當然喇﹐佢自己想食亦都係去嗰度慶祝嘅主要原因喇﹗睇下佢夾舊雞個樣幾咁認真就知喇﹗
而嗰日返完學直落去玩嘅口水禧喺餐廳有D疲態﹐疲態唔淨止係指面部表情方面﹐亦都包括行為方面喇。而家五歲識講得多野﹐駁嘴方面亦都特飛猛進﹐簡直係好似有人同我對對咁﹐正所謂「對穿牆對唐佰虎」咁
– X家剷泥齊種樹﹐汝家池塘多X魚﹔魚肥果熟嫲X飯﹐你XX兮親下廚<<哈哈﹗咁細隻字呀婆睇唔到喇啩﹗就算睇到﹐唔關我事架﹐我抄人哋套戲D對白架咋﹐唔係我作架﹗如果其他人都唔知我發緊咩o翁風嘅話﹐去睇下唐佰父點秋香就知架喇。總之口水禧同我對對嘅程度足以叫我嘔十九幾両血﹐解救方案之後有時間再談。
仔﹐你老豆呀媽都算係咁喇﹐返到屋企熄咗燈捧住個蛋糕一邊行一邊唱生日歌~~都無PK跌咗個蛋糕落地﹐你話係咪好抵讚呢﹗
口水禧見兩個傻佬傻婆突然黑猛猛嘅環境之下捧住D野鬼咁嘅樣行出嚟﹐第一下佢面上嘅神情係有D愕然﹐直頭係「你兩件搞乜野呀﹖」後來先識笑﹐重要係陰陰嘴笑﹐開心得嚟又扮晒cool咁﹐喂﹐大佬﹐笑就笑﹐唔笑就唔笑﹐咪咁嘅樣喇好無呀﹐一陣呀媽掛住笑你笑到手震跌咗個蛋糕落地﹐我睇你重識唔識笑﹗
唔知係乜野心態﹐影相要揾兩架車仔插眼嘅﹖
呢D親子活動﹐我實跟嘅﹐係嘩﹗幾咁詼諧﹗
嗰五支蠟燭係返屋企前去超市買﹐壽星仔自己揀嘅﹐用完洗乾淨個尾嘅忌廉﹐留返下次。咩呀﹖用咗少少架咋﹐就咁就掉﹐嘥咗D嘩﹗呢張咁正經嘅相﹐不知氹咗幾耐人哋先肯唔自插雙眼影一張正常少少嘅相呀﹗
第二招~~~~無風起浪﹗
呀呼~~~~~
結果係……吹咗兩支
﹐其他吹極都唔熄﹐唯有加埋老豆呀媽幫口。
出力咁食﹐點解呀仔你個食相咁猙獰架呢﹖
呢張友善好多﹗(似返平時個茂樣﹗)
無生日會嘅原因係有人寧棄生日會嚟換取滑雪呢個節目。記得舊年我哋都係帶咗佢去玩雪嚟慶祝生日﹐所以今年佢食過翻尋味﹐要去多次滑雪喎。其實根本就唔係滑雪喇上次﹐係咁以玩下之嘛﹐不過佢當自己滑咗架喇。
可惜今年唔知做乜無乜雪落喎﹐好多滑雪場都要自己用噴雪機做人造雪嚟比人滑﹐於是想好似舊年咁求鬼其將車停埋路邊玩雪嘅縮骨主意今年唔可以安歌﹐今次要比錢入場玩人造雪喇﹗
呢個兜盛惠USD10 ﹐任你由朝滑到人哋收檔(如果你有咁嘅力由朝玩到晚嘅話)
呢條友仔﹐第一次sir都無有怕﹐鬼咁開心﹐睇嚟下年都走唔甩架喇﹗
禧爸真係……睇下其他人滑到幾遠﹗而禧爸隻艇幾咁乏力﹗
話咗要出賣我一家嚟補償大家嘅眼淚架嘛﹐我記得﹐放心﹗拿﹗睇下﹐我先帶頭出賣自己。話說兩仔爺先試玩﹐我呢D跟班梗係從旁觀察下先喇。見佢哋sir得咁過癮﹐我唔執輸一於試下喇。
點知﹐一sir落嚟嗰下唔識控制隻兜﹐又唔識就力﹐又揀咗凹凸不平嗰忽嚟sir﹐結果就係喺眾目睽睽之下一個「豬愚反身」(唔係鯉魚反身)加反艇﹐成個人喺個兜裡面碌咗出嚟﹐再喺雪地上反轉再反轉﹐有如雪地保齡球咁碌落山﹐無敵風火輪都無我咁勁﹗最慘就係碌又碌唔晒成個滑道﹐係要碌到正中間就停鬼咗﹐慌C人哋睇唔清楚我「火羅」爆個樣咁﹐要自己爬返起身死死地氣行埋淨返嗰段落嚟﹐又唔可以叫禧爸嚟扶﹐因為有其他人喺度隨時衝緊落嚟。
而嗰個出賣我嘅死人衰兜已經晨咁早自己滑咗去遠處等待我去執返佢。
落返嚟當然少不免要比禧爸笑喇﹐但係正所謂有風唔好使盡利﹐話口未完﹐有兩件蛋散重「火羅」過我頭先嘅無敵風火輪﹐連人帶艇飛越圍欄炒埋一碟﹗
經過我努力不懈嘅嘗試﹐碌多幾次之後﹐我終於都成功唔反艇滑到喇﹗
玩到下晝四點左右﹐人哋都要收檔﹐有人想磨爛蓆唔走﹐但當然唔走唔得喇﹐老豆呀媽重要揸三粒幾鐘車返屋企架大哥﹗之前一晚有人半夜無端端有少少燒﹐諗住改期唔去滑雪﹐點知嗰個人唔制喎﹐係都要去滑﹐無計喇﹐著好晒滑雪褲先嚟話唔去又真係幾掃興嘅﹐見佢又好似無乜野事喎﹐於是都照去咗。但個呀媽只瞓咗三個鐘頭﹐所以唔洗揸車嗰陣真係瞓到口擘擘入咗蟲都唔知咁濟﹗所以趁天未黑齊﹐三條友拿拿臨鬆人返屋企。就係咁樣過咗一個星期六﹐亦都同口水禧慶祝咗生日喇。
