記得我大約係小學一年班嘅時候學踩單車﹐當時係有個叔叔見我自己喺度亂咁舞架單車﹐頭搖又尾擺咁﹐成日都界乎係跌同唔跌之間﹐於是好心教我學﹐結過學咗一陣就搞掂咗。我細個好百厭﹐成日都會PK﹐一對膝頭哥係無忽好肉嘅﹐佈滿藍藥水嗰隻。(唔知家下重興唔興用藍/紅藥水架呢﹖)個膽都唔細﹐所以唔怕踩單車會PK﹐還掂成對腳都係藍藥水同疤痕﹐多一達「喇」唔多﹐無乜所謂。(大個先知咁樣係著唔到短裙/褲﹐嗚~~~~)
口水禧踩輔助輪單車已經有一段頗長嘅日子﹐一直都諗住要等佢自己覺得OK嘅時候先會比佢學踩兩輪。我覺得同學游水一樣﹐我唔同意用夾硬掉個細路落水然後有得佢自己浮浮沉沉搞掂佢﹐雖然聽過有D人話咁樣個細路會學識游﹐之但係個膽都嚇破咗喇﹗我都聽過好多夾硬掉人落水﹐結果被掉落水嗰個不單止學唔識﹐重好怕水添。其實睇個小朋友想點喇﹐佢自己要學﹐自己跳落去游咪無問題囉﹐但佢唔自願而大人夾硬迫就……
幾個禮拜前嘅某一日﹐有人好有決心咁話要學踩單車﹐決意要同對輔助輪講再見。見佢自己話學架咋﹐唔係我哋迫架﹐咁就更係要成全佢喇﹐話實帶住個踩輔助輪嘅去踩都幾辛苦﹐佢架野好慢﹐我哋跟喺後面踩真係剎制多過呼吸咁濟﹐加上踩單車要好慢咁踩﹐慢到龜都行得快過我﹐其實都好高難度架﹐唔信嘅話﹐大家下次去踩單車嘅時候不防試下用慢過老人家行路嘅速度去踩吖﹐你唔跌落嚟我話你好野﹗基本上你對腳係全程都放喺地下行住咁推郁架車﹐因為你踩一腳都嫌太快﹗所以你話喇﹐有乜趣味可言呢﹐我寧願行路好過喇。
對腳放喺地下係點踩單車﹖睇下條片就知
我哋有心理準備條友可能有跌就會話唔學架喇﹐因為佢好怕血﹐如果仆到流血嘅話﹐佢覺得自己就快釘﹐所以會爆喊。成個身可以包嘅地方都包晒﹐無乜期望會好快學識﹐呢D野急唔嚟﹐慢慢學囉﹐家陣又唔係要訓練佢踩單車去送石油氣﹐係咪﹖
禧爸之前特登帶口水禧去買一套佢近期愛到發顛嘅McQueen
(Cars 2) 手套﹑護踭同護膝﹐因為CARS 2 ﹐口水禧日日都夢想自己係架賽車﹐坐車就學我哋揸車嘅手勢﹑踩單車又和要我哋賽車﹑食飯又賽﹑睇電視又賽﹐總之已經上晒腦喇。
兩個教車師傅中就只有我教過一個小朋友踩單車﹐禧爸係無教過人踩嘅﹐佢個仔有幸成為禧爸嘅白老鼠﹐實在係超級榮幸喇(扶得實嘅話……)
睇下﹖第一日返工嘅教車師傅係扶住人條頸嚟教車嘅﹐我都係第一次見咋﹗
走咗一轉之後﹐禧爸已經索晒氣﹐於是我就接力。未開始踩﹐當然要先試下仆喇﹐唔係嘅話﹐到真係仆嗰陣邊識伸腳出嚟頂住架車呢﹗比佢試仆﹐可以比個心理準備佢一陣真係仆嘅話會點樣﹐應該做乜野反影先唔會仆得甘過甘大支﹗
拿﹐咁咪幾好囉﹗個呀媽好似個仔有菌咁盡量唔掂佢﹗未開始踩﹐有把聲喺我哋身後爆出一句「小心呀﹐仔﹐你呀媽好狠架﹗」
(有無律師﹖我要告佢誹謗﹗)
大家睇下喇﹐我邊有狠呢﹖只係放手之後睇住佢就嚟跌嗰陣特登唔扶佢有佢仆之嘛﹗
其實真係無辦法下下都扶住唔比佢跌﹐一來咁樣佢會依賴扶嗰個人﹐自己唔曉平衡﹔二來﹐唉﹗三張幾野嘅腰骨同膝頭哥真唔多聽洗﹐跑兩跑就痛﹐氣又喘﹐上氣唔接下氣﹗加上你睇下﹐個衰仔完全唔理我哋感受﹐一路踩一路加速﹐直頭當佢老豆呀媽對腳係上摩打咁﹐大佬呀﹐我哋唔係馬呀﹐來來回回咁幾百米咁跑﹐真係會卒C架﹗
踩嗰個永遠都好爽﹐扶嗰個就……喺禧爸強裝歡顏嘅背後﹐我敢肯定佢係CHOK……緊條氣嘅﹗
經過一輪嘅肺容量測試之後﹐禧爸已經加入咗我嘅特登唔扶團隊﹐有得條友仔跌飽佢﹐還掂兩邊都係草地﹐跌都跌唔傷嘅﹐只不過係草地上有……狗屎啫﹗咁重好﹐加強口水禧嘅自我保護意識﹐唔想瞓落D狗屎度﹐就唔該醒定D唔好跌﹐跌都要記得用腳撐住架車﹐如果唔係就S。H。I。T﹗
終於﹐有人可以自己踩一陣唔洗扶喇。
一陣嘅開心過後﹐又到PK之時。準備……
練好身手嘅口水禧已經識得跳車﹐即係有得架車瞓屎﹐自己最多係踩屎啫。
嗰日第一次學踩時影嘅video
跌低﹐起身﹐再嚟過。細路﹐人就係咁架喇﹐跌低唔洗喊﹐起身又係一條好漢。跌多幾次自然會識﹐只要你唔好放棄。
練咗幾個週末﹐尋日﹐有人已經可以踩住單車上落少少微斜﹐識避開路上嘅人﹐識得唔洗跳車式停車﹐可以自己踩好遠。
