恭喜發財﹗祝大家龍年萬事如意﹐身體健康﹗
農曆新年﹐又係一對貪錢嘅母子發新年財之時﹐唔記得年廿幾嘅時候﹐個呀媽已經執好發財行裝﹐準備同個仔嚟發財。
一如既往﹐D行李多到有如人哋移民上太空咁﹐四個寄倉﹐兩個手提﹐再加兩個袋咁喇。對於十四粒鐘嘅航行時間已經麻木嘅我哋﹐一係就睇戲﹐一係就瞓覺。口水禧手長腳長﹐已經唔可以再伸直腳咁瞓﹐好彩坐隔離個外國人好好人﹐見到口水禧屈埋對腳瞓﹐主動話唔介意比口水禧伸對腳去佢度﹐當然﹐我都唔會咁做喇﹐始終都唔好意思嘅大佬﹐人哋肯﹐自己都唔好咁過份吖﹗
臨行前一晚﹐叫口水禧執好自己個手提行李﹐叫佢唔好執太多重野入去﹐佢就同我執咗成箱玩具車﹐慌C個呀媽太多力托行李咁﹐嘩﹐呀大哥﹐你呀媽唔係玩開挺舉架喎﹐呢箱鐵請問叫我點樣托上去飛機座位上嘅行李倉呢﹖
帶個細仔去發財之前﹐當然要照顧下個「大仔」先喇﹐野食喺早幾日已經整好雪咗去冰格﹐夠佢兩個禮拜有多。早前講過﹐「家有一佬﹐要戴冷帽」大行動亦都搞掂﹐呢頂野唔戴得出街﹐不過戴住瞓覺就夠晒暖。手工係咁上下﹐靠睇youtube嚟織嘅係咁嘅質素﹐至少都叫封到個頂算係咁喇。
聽講我哋兩母子一走﹐三藩市就暖返少少﹐但香港就開始凍。咁樣招呼我哋﹐幾好吖﹗真係你精我都唔笨﹐晨早就估到會凍架喇﹐所以我帶咗條雪褲返嚟以備不時之需﹐問你服未﹗凍吖拿﹗
年廿八﹐禧嫲嫲生日﹐有得食大餐﹗好耐無食過大茶飯﹐加上口水禧成日話要去嫲嫲屋企睇貓﹐所以嗰日早少少入到去﹐點知兩隻貓貓匿埋咗唔肯出嚟﹐口水禧只好失望而回﹐寄望下次可以同D咪咪見面。
早輪當我對手重有傷口未拆線之前﹐有一日﹐口水禧坐喺我大脾上﹐突然扯住我件衫向前衝﹐搞到我同佢一齊失平衡向前仆落地﹐佢自己就當自己係少林十八銅人﹐竟然用自己排牙嚟頂住自己著地﹐結果對門牙撞親﹐而家對牙變咗色﹐牙醫話因為撞傷咗﹐所以就好似人哋撞瘀手腳咁會變色﹐弊在變咗色係唔會變返白﹐所以喺佢換恆齒之前﹐佢一E起排牙就會露出一對灰灰黑黑嘅門牙﹐樣衰非常﹗唉﹗激C人﹐枉呀媽同佢保住棚牙﹐保到家陣一隻蛀牙都無﹐棚牙本來白雪雪﹐而家就同我喺中間整對灰黑色嘅﹐真係嘥心機﹗
自知自己一笑就露灰牙﹐有人而家識得笑嗰陣要用手遮嘴。幾咁嫵媚﹗
一唔記得遮就會見到佢對牙。唔知咩事嘅重以為佢蛀牙蛀成咁﹗
肥龍與旺禧﹐返嚟首個節目就係剪頭髮喇。
食完飯﹐嫲嫲每人派咗封利是﹐口水禧見到利是封上有隻鹿以為係聖誕鹿﹐隔離嗰個有白鬚嘅﹐口水禧竟然話係聖誕老人﹐真係比佢笑C ﹗乜聖誕老人都有唐裝衫架咩﹖
今年新年嘅天氣又凍又落雨﹐好難有室外活動。但日日困喺屋企又唔得﹐去商場迫就更加唔好喇﹐唯有天陰又去公園﹐連落雨都照去公園﹐最多比件透明雨褸佢著住嚟sir滑梯。
呢條滑梯上面有少少水﹐原本都唔想比佢玩﹐但成個公園就係得嗰一個滑梯﹑一個馬騮架﹑兩個搖搖架﹐唔玩滑梯就真係無乜野好玩架喇喎﹗算喇﹐最多玩完即刻返屋企沖涼洗衫架啫﹐所以佢嗰日將條滑梯抹得非常乾淨。其他嚟玩嘅小朋友﹐唔洗多謝我﹐多謝口水禧喇﹐佢抹乾淨晒條滑梯等你哋去玩得開心D。
近鏡睇下佢一對灰牙﹐唉﹗頂佢﹗真係越睇越傷心﹗
都係合埋個口好D ﹗
你話咁樣過度活躍法﹐點可以困佢喺屋企呢﹖
落雨都去公園﹐全香港嗰日除咗我哋之外﹐重有一班外傭陪口水禧喺雨中狂歡﹗口水禧喪玩﹐外傭成班播住音樂喪跳﹗大家都咁happy!
雨中又係另一番風味﹗不過係著住件雨褸有D論盡﹐件野喺7-11買﹐大人size ﹐口水禧一著啱啱好長到落腳踭對上。本來著住去sir滑梯可以包到大半條褲﹐點知上樓梯就容易踩到件雨褸而PK ﹐於是都係要同佢整短件野﹐結果都係sir到成條褲濕晒﹐連底橫都濕咗少少。
至於在旁觀看嘅我哋就邊睇邊雪雪凍。咁嘅節目﹐問你服未﹗
