新年過後

發mo blog開市喇喂﹗唔好以為我係因為發咗好多新年財所以搞到個blog發晒mo都唔理﹐實則係日日都要湊仔陪屋企人同打下機咁喇﹐原來喺香港都可以好忙的。(作C呀﹐打機﹖

) 唔試都唔知原來一開始咗打就停唔到手嗰隻﹐唔怪之得喺地鐵或者喺街都見到咁多人耷低頭係咁篤篤下喇﹗不過我淨係喺屋企得閒先篤架咋﹐我喺街無篤架﹗

成個新年都係食食食﹐家陣真係望見年糕嗰D都有D打冷震﹗一獲過食咗一年嘅份量﹐真係步步高升喇﹐咁食法﹗

新年同摯愛親朋食大餐﹐完全同我哋喺美國嘅生活非常唔同。各有各好。

呢盆野據講價值萬萬聲一盆﹐喺朋友屋企見到。(我屋企邊有咁富貴整盆咁貴嘅野返嚟吖﹗)

有朋友屋企養咗狗狗﹐口水禧無mimi或winnie喺身邊都一樣咁爽﹐好彩自細慣咗有動物喺身邊﹐呢條友仔喺街見到動物完全無自我保護意識﹐唔叫住佢嘅話﹐佢飛撲埋去伸手就嚟摸人……隻狗﹐然後都係嗰句﹕「狗狗﹐你今晚同我瞓﹗」 (hypnotized)

(下﹖呀仔﹐乜你個人咁隨便嘅﹖)所以去到人哋屋企一開門有三隻狗衝出嚟歡迎佢都不知幾開心﹗(係D狗見到口水禧會好頭痕啫﹗ (devil)

)

博愛嘅口水禧又點止鍾意狗或貓咁呢﹖上至飛嘅﹐地上爬/行嘅﹐水裡游嘅都啱架﹗於是有日帶咗佢去志蓮淨苑睇魚。嗰日公公同婆婆先出門口去還神﹐然後我同口水禧再出去揾埋呀公呀婆去睇魚。人哋去睇園景﹐有人就為咗魚而去。當然喇﹐嗰句「你今晚同我瞓」嘅口頭蟬嗰日出現咗無數次喇﹗(救命﹐我要間幾多間房先夠你招呼晒你朋友返嚟瞓呀大哥﹗ (nail biting)

)

唔洗一秒就比人叫呀公放返個孫落地﹐驚佢跌咗個孫落水。

其實唔洗抱起佢喇﹐成塊玻璃夠晒你睇喇﹗

睇完魚就四圍走﹐走都唔夠﹐直情喺地下爬。睇得旁邊個警衛嬸嬸嘩嘩聲。呢D情景(小朋友周地滾)喺外國時時有﹐但喺香港唔係咁多﹐所以街上嘅人睇見口水禧喺地下「碌」﹐第一秒會「嘩」﹐跟住會O嘴﹐繼而就係「地下好污糟架﹐你件衫抹乾淨晒個地下喇﹗起身喇﹗」其實﹐如果地下唔係有篤C﹑尿﹑痰或濕嘅話﹐我唔抗拒佢「碌」地﹐只要唔阻街就得。呢D年紀﹐仿彿個身係唔識停﹐對任何事都好奇﹐企喺度同趴喺度睇野﹐角度唔同﹐感受亦唔同。我係大人唔會明﹐但唔明唔等如唔好玩﹐所以假如有日有個細路喺街「碌」地﹐嗰個可能係我個「乞E仔」嚟﹗

細個傻傻戇戇任你舞﹐家下大咗有自己意願﹐叫佢影張相都要玩下野。呀公叫佢放低個貓袋﹐有人唔哈作﹐係都要遮住塊面。好﹐你有你遮﹐我有我照影。 (devil)

繼續玩野……

唉﹗無面見人﹗

唔遮面﹐但係玩眼珠﹐左左右右﹐但就硬係唔喺中間﹗ (rolling eyes)

嘩﹐呢張影完真係要封返利是比……揸機嗰個喇﹐捉咗咁多張﹐終於捉到一張對眼珠喺中間﹗問你怕未﹐人哋影相係講影得清唔清﹐我影相係講捉唔捉到人哋眼……珠﹗ (thumbs up)

有日﹐我問佢﹕「喂﹐媽媽﹑肥玲﹑大姨媽同舅父(口水禧好驚舅父)﹐邊個最惡﹖」諗住佢會答舅父﹐點知佢話﹕「你。」唔怪之得呢張呀媽自己揸機同佢影合照﹐佢合作地收起佢個貓樣同左騰右騰嘅眼珠喇﹗啱嘅﹐起碼都叫有個人治到佢。 (devil)

喺香港搭巴士最常坐嘅位置 – 頭位。一dude完八達通就頭也不回咁衝上樓上坐第一行。有安全帶嘅話重會自己扣埋添。試過一次中午搭﹐太陽喺正面前兜野曬落嚟曬咗好耐﹐真係唔出黑斑都唔得喇﹗

呢架巴士去邊架﹖
嗰架呢﹖
點解巴士慢過的士﹖
點解巴士個摩打咁嘈﹖
點解有人要落車嘅﹖
點解唔係架架巴士都去呢個站架﹖

巴士公司可以用呢條橋拍廣告﹐最多個廣告橋段版權我收順D喇。

天呀﹐你對黑牙真係……叫咗你唔好食咁多煙架喇﹗ (喂﹐戒煙廣告啱用喎﹗)
呢排呀媽發錢寒﹐周街”were”銀﹗

咩野可以令佢咁順攤﹐霎熟X頭咁呢﹖

梗係去公園喇。香港嘅公園兒童設施好靚﹐七彩顏色﹐玩意又多﹐地下全部都係軟墊。唔講唔知﹐原來呢D軟墊好貴架﹐口水禧學校最近鋪咗一細忽地方﹐聽講都洗咗幾千蚊美金﹗出面嘅公園好少會見到有呢D軟墊(我嗰區喇﹐其他區唔清楚)﹐多數用木碎﹐跌落地下當然無跌落呢D軟墊咁舒服喇。

所以有人乜鬼都爬﹐貪跌落嚟唔C得。

上個禮拜週末帶佢去過﹐嗰日都有咁樣sir。企喺我側邊有個呀嬸同佢身邊嘅女/新抱講﹕「嘩﹗乜咁sir架﹐A呀﹐去第二度玩喇﹐呢度危險。」

BB仔咁sir﹐的確危險。五歲嘅話﹐睇個細路身手同反應囉。唔影響人﹐又有個呀媽同呀婆在旁睇住﹐危險何在﹖驚佢打關斗碌落嚟﹖定係驚sir完會飛落地﹖但個滑梯底部離地最多半尺咋喎﹐加上有軟地墊﹐sir到最底﹐即使跌落地都唔會斷骨架喎。

所謂嘅危險﹐其實就係驚佢自己嘅小朋友有樣學樣。喂﹐小朋友都要學下衡量自己有D乜野做到乜野做唔到﹐唔係下下都淨係受大人制肘﹐自己唔曉判斷架喎。

其他人可以唔認同﹐但我覺得男仔係應該勇於嘗試﹐但亦都要識得量力而為﹐做得到就做﹐做唔到下次先做。最重要係﹐無影響人令人哋唔方便。

細個都好鍾意行上滑梯﹐呢個係一個教識小朋友地深吸力嘅教材。同喺上面sir落嚟唔同﹐著住鞋﹑除咗鞋齋著襪﹑打尺腳都各有不同﹐箇中道理又點止地深吸力咁簡單呢﹖

又比靜電炸頭 (laughing)

新花式﹐玩完上面條鐵先再sir。問佢驚唔驚「凳」親個pat pat﹐佢話唔會。屁股係佢嘅﹐佢話事。

實在唔知呢舊野係點玩嘅﹐等佢自由發揮喇。叫我上去陪佢玩喎﹐唔係啩﹖呀媽又肥肚腩又大腳又短﹐一陣搞到上半身喺一個圈﹐下半身喺另一個圈﹐唔上唔落真係核鬼凸呀﹗

初初「捐」咗第一個圈之後話唔玩﹐因為唔識。我話﹕「媽媽都唔知點玩架喎﹐你想點玩咪點玩囉。」聽完佢話﹕「我咁樣玩架喎。」

無乜所謂喇﹐無一定玩法架啫﹐覺得點樣玩過癮D咪點樣玩囉﹐係咪﹖

用自己嘅方法玩完﹐穿晒咁多個圈之後﹐佢再接再勵﹐玩埋另一段嗰幾個圈﹐玩完好開心去爬繩網。

自從喺呢度睇咗萬寧貓個廣告﹐佢日日話要學mimi去爬山。

感情豐富嘅佢第一次睇個廣告見到棵高山雪蓮比風吹走時﹐mimi流眼淚﹐口水禧都眼濕濕想喊。當日個樣無呢個咁浮誇﹐只係忍唔住泡眼淚但又C忍嗰隻﹐我第一次見佢會睇電視睇到喊。記得飛機上睇卡通會笑﹐大個咗﹐識得隨住個電視嘅劇情表達情感。見到小朋友睇卡通會因為個劇情而笑真係好搞笑﹐好笑嘅地方係唔知佢有乜咁好笑嗰下過癮﹗ (laughing)