嘩﹗發mo blog發到無晒影﹐係咪以為我收咗山﹐絕咗跡呢﹖咪開心住﹐我未收山架﹐大家重有排見到我篤眼篤鼻架﹗無計架喇﹐快D去打小人喇唯有﹗
當大家見到呢篇野嘅時候﹐相信我已經去咗一個好遠嘅地方……之唔係C返嚟美國囉﹗其實已返咗一段時間﹐連時差都無埋喇﹐你話返咗幾耐呢﹗咁點解咁耐都無浦頭呢﹖都係嗰D「因為同所以」囉。(再講都驚會口臭﹗)
實情係煩鎖嘅野太多﹐多到而家都未解決晒﹐根本都唔知寫乜出嚟呀……(懶就懶喇~~~)
重有一個超重要嘅原因就係~~~登登登鄧﹗﹗﹗﹗
籌備多年嘅禧婆婆Mission
Impossible X終告~~拍唔成。無錯﹐呀婆今次終於戰勝美國領事館﹐一洗多年嘅冤屈攞返個簽證喇喂﹗諗起呢件事真係到家陣都「心中激盪﹐這陷阱偏我遇上﹗」(我唔係佢歌迷﹐sorry!)
由09年頭開始成日因為呢件事無覺好瞓﹐尤其係每次返香港同埋喺香港嘅期間﹐每晚都因為擔心呀婆攞唔到簽證而瞓唔著兼喺佢去攞之前嗰個禮拜係開唔到大嘅﹗(好彩未中毒身亡咋﹗)一次又一次咁攞唔到真係有D想寄屎蜢嘅衝動﹐大鬧領事館我都試過﹐但嗰陣係為咗我自己個簽證﹐乜都豁出去就同佢哋嘈。今次係自己呀媽個簽證﹐就算再谷氣都唔敢嘈喇。搞咗咁多年﹐終於喺舊年失敗之後比個領事一言驚醒﹐我哋戚起條筋決定喺美國揾律師幫手﹐因為實在唔知可以再做D乜野先可以令到呀婆攞返個簽證﹐唯有要求助於專業人士。
禧婆婆唔係恐怖分子﹐亦都唔係偷渡或過期居留而無咗個簽證﹐只係因為一D人為嘅錯失搞到失望咗咁多次﹐而嗰個人為嘅錯失正是佢個低B女﹐我。
所以呀婆喺領事館出嚟一刻﹐我都唔敢望佢﹐係禧爸大叫話「得咗喇﹗攞到喇﹗」我先敢抬高頭咋。幾驚又衰呀﹗頓時覺得「三年零八個月」嘅黑暗終於過去﹐我唔洗再睇住呀婆攞唔到簽證個樣﹐唔洗再睇呀婆唔捨得我哋走個樣喇。箇中嘅感受﹐未試過嘅人係唔會明白架喇。
次次香港返嚟之後都要寫呢句野﹐我真係覺得好抱歉。朋友們﹐希望你哋可以體諒我嘅情況﹐呢幾年返嚟香港﹐我最多都只係打過下電話﹐甚至有D直情電話都無打過﹐真係「悄悄的來」然後又「悄悄的走」。我真係唔係扮晒野呀﹐只係每次都覺得呀婆又會攞唔到簽證﹐所以我唔想出街﹐希望留晒D時間比呀媽﹐等佢唔洗到我哋返去美國時又喊到豬頭咁款。
我唔敢再開空頭支票喇﹐不過我相信有緣千里能想見……(「去死喇你﹐PK ﹗」我諗呢個應該正是我D朋友此時嘅心聲﹐收到晒﹗
)
有見呀婆成功簽到證﹐實行買個蛋糕沖喜下喇係咪先﹗
某人見蛋糕雙眼發光﹐一個飛身撲過嚟話要幫手放D粒粒上個蛋糕度﹐懶係熟手。實情係一邊放一邊食。放一粒食三粒﹐咁細個就穿櫃桶﹖
今年唔洗再見呀婆個「馬尿樣」真係皆大歡喜﹗
家陣已經被我地脅持過咗嚟嘅呀婆每日都要進行好多體力勞動﹐喺香港幾嘆呢﹐有人服侍﹔嚟呢度變咗要服侍人﹐重要做幾陪小姐﹐呢頭踩完單車﹐嗰頭又話要陪踢波﹐一陣又話要去學校幫手﹐呀婆呢期真係慘過勞改﹐日日做到無停手。等佢重話喺香港好悶﹐家陣真係想悶都難﹗
。
