還債

呀婆有幸見識下我哋學校嘅教育特色﹐就係落雨都照放細路出去淋。當然﹐呀婆睇到O晒嘴﹐猛話有無搞錯呀﹐放D細路出去淋雨﹐一陣肺炎咪C ﹖

呢個就係我覺得自己無揀錯學校嘅其中一個原因囉。呀婆話我黐線。

呢排個衰仔反叛咗好多﹐亦都係我少咗寫blog嘅其中一個原因。駁嘴駁舌﹑無禮貌﹑大支野乜都齊。好多因素影響到佢有呢個變化﹐最主要都係心智上介乎未成熟同覺得自己好熟嘅階段﹐所以開始唔多聽洗﹐分唔清駁嘴同發表意見嘅分別﹐變咗做係又駁唔係又駁。適逢個呀媽親戚到﹐所以早個禮拜不停同個少爺開大片﹐片到呀婆都驚咗我哋﹐避走花園﹐以免央及池魚。在此不得不讚呀婆一句﹐講得出做得到﹐話說喺香港已講好咗叫呀婆唔好插手我教仔﹐呀婆嚟到之後果然一見我片口水禧﹐佢即刻幫口片﹐見勢色唔對就即閃﹐等我好好招呼口水禧。連呀婆都要幫手﹐你話嗰條友仔係咪已經有D離譜呢﹖

曾幾何時﹐我開始對自己嘅方法有D懷疑領咗野﹐所以心情唔好﹐blog都費事寫。因為已經唔知再可以講D乜好﹐唔通日日些自己點片個仔﹐個仔點喊咩﹗頂唔Q順走返學校篤佢背脊﹐發現原來幾個男同學都有同樣情況﹐老師同其他D呀媽教咗我點樣「招呼」發緊顛嘅細路﹐總好過日日片到而家連聲都沙咗未好返。

其實口水禧嘅轉變﹐根據書上所講應該係六歲先會出現﹐五歲呢個階段應該係好乖先至啱﹐因為呢個年齡會好鍾意討好大人﹐所以會乖D。但橫睇掂睇都睇唔到佢有五歲嘅特質(返香港前曾經出現過一排) ﹐反而六歲嘅顛野全部有齊。所以書上有講有D特質無話一定喺邊一個年齡一定會出現﹐有D人早有D人遲﹐有D人甚至唔會出現。

做呀媽嘅梗係唔想日日時時刻刻都同個仔女起晒鋼咁你片我時我又片返你﹐有邊個唔想成日都攬住仔女好好哋相處﹖但有時D細路真係激到你C都滾嗰陣又真係好難禁住D火﹐但無論點嬲爆都好﹐體罰係我永遠都唔想發生嘅事。有好幾次幾乎想抽佢羅友﹐好彩都忍得住無郁手﹐過後都不禁覺得自己嗰刻嘅忍耐力有D驚人。因為以我嘅脾氣﹐應該一早抽到佢羅友開咗花﹐但佢個屁股至今都重幸保不失﹐未試過皮肉之苦﹐我都算係咁喇。對我嚟講﹐體罰係破壞父母同子女嘅信任嘅導火線﹐將心比己﹐我細個比呀婆抽嗰陣都會諗過點解呀媽又話錫我但又會落手打獲我架呢﹖唔通。。。。。。我唔係親生嘅﹖細個唔明大人嘅苦處﹐自必然會覺得比人抽係因為打人嗰個人已經唔再愛自己。所以﹐我唔希望重蹈覆轍體罰我嘅子女﹔當然其實好似早排咁開片法其實都唔應該﹐嗌破我喉嚨﹐震碎佢耳膜又如何﹖唔洗五分鐘又嚟過﹐我識獅吼功都唔掂喇大佬﹗

所以我而家學識咗一個絕招﹐只要某人一駁嘴無禮貌或其他我覺得不能容忍嘅行為出現﹐就即刻罰佢坐凳仔﹐乜都唔准佢做﹐齋坐。坐完再訓話。平心靜氣之下傾比起火遮眼嗰陣亂嗌效果好好多﹐至少唔洗嗌到血壓上升提早「埋單」先喇。
最重要係唔會傷咗大家感情﹐早排柄得多﹐有人見到我當仇人咁款﹐我心中勁嬲﹐但我知道佢咁樣做都有原因。 我唔係買佢怕﹐驚個仔以後唔睬我而就範﹐只係我覺得狂插真係無用﹐反而有損大家感情﹐既然有個唔洗動氣又有效嘅方法﹐點解唔用呢﹖(我肯定呀婆會覺得呢段出自我口嘅野係絕世奇聞﹐因為佢成日都講到我惡到會有一日殺咗個仔咁款﹗)

嘩﹐又離咗題添﹗好繼續呀婆的勞改生活篇先。除咗去學校﹐當然要陪少爺去公園玩喇﹐呀婆有時都仍然停留喺舊時嗰套﹐鍾意乜都幫個孫做﹐所以呢D托大腳嘅情境唔難見到。好彩呢排落雨﹐無乜機會去公園﹐呀婆少咗「挺舉」。

喺學校欣賞口水禧做話劇喺學校欣賞口水禧做話劇。口水禧呢期做咗戲劇發燒友﹐就嚟會演出街坊福利會嘅「雷雨」架喇﹗(唔睇周星馳D戲嘅人會唔會以為我喺度發「口翁」風架呢﹖)迷上咗扮馬騮﹐其實唔洗扮﹐佢直情係真身喇﹗

陪玩JENGA層層疊(坐佢哋隔離真係耳都聾﹐不停跌﹐簡直係豆渣樓﹗)

接送游水班兼做埋啦啦隊員

勞改都要注重營養架﹐但呀婆有糖尿﹐所以呢D咁離譜嘅早餐唔係時時有﹐好耐先一次放肆下咁。(嗰日其實主要係想試下部waffle機而已)

大姨媽唔好柄住﹐樽糖漿唔係真係真係糖漿嚟架﹐成份嗰度係零糖份架﹗

嘩﹗呢個月接咗四個炸蛋﹐個個週末都有生日會要去﹗

陪洗牙

由於成日落雨嘅關係﹐行街都行到悶﹐早幾日揾咗個節目﹐之唔係就係打保齡球囉。話說呢家野我都唔係好得﹐以前無乜打過﹐加上個老公嘅孖手指公打唔到﹐所以咁大個人打過嘅次數三隻手指都數得晒。口水禧就更加唔洗講喇﹐佢淨係玩過冒險樂園嗰D保齡球仔架咋﹗

嗰日我哋幾件鄉下佬走去附近嘅保齡球場﹐呀婆唔玩﹐禧爸唔玩﹐唯有得返我陪口水禧玩囉。其實真係唔知點打﹐換好鞋之後﹐口水禧一馬當先﹐當正自己好勁嗰隻﹐執咗個波就即刻走出去個滑道大展身手表演「四腳朝天碌走波」﹗真係成個訓喺地下嗰隻﹐笑都笑C我哋﹗跟手起身嗰陣有D嬲爆爆﹐正常過嚟揾我哋出氣之時再P多獲K ﹐簡直係神乎奇技﹐連仆兩野﹐完全係控制唔到對鞋咁款﹗(我認我唔係人﹐我有勁笑﹗)不過喺笑完之後先諗起﹐sh*t! 聽講一陣自己都有份出去打﹐如果我都仆嘅話咪重瘀爆﹖(大家睇過滑雪嗰篇都知我成家都撲街嘅DNA架嘛﹗要仆真係話咁易﹗)

於是就係因為驚仆﹐所以行到隻龜咁﹐當然喇﹐咁樣打法D波唔落坑嘅話我跟佢姓「波」﹗好彩因為有口水禧﹐我哋用嗰條滑道兩邊有欄杆擋住D波落坑﹐所以即使係再屎波如我﹐點打都唔會落坑嘅﹐不過係由保齡球變咗打枱波囉﹐個保齡球完全唔識行直線﹐好似飲大咗咁兩邊撞﹐同打枱波有乜分別喇﹖

經過之前一役﹐口水禧提高咗警覺﹐行得小心咗﹐所以都無再仆。

連飲奶嘅力都出埋先抱得郁個波﹐面容都有少少扭曲。(經已係小童波)

上面張相入面見佢喺度推嘅架就係輔助D小朋友打保齡嘅架﹐係個場自己諗出嚟嘅定係個個場都係咁用我就唔知﹐淨係知個架搬到我隻野咁。

暫時係直線嘅~~~

懶係型咁

懵柄﹐因住食波餅呀﹗

打到自己都汗顏﹗

各行各業﹐呢個星期係警察叔叔。同學嘅爸爸係警察﹐有日專誠帶埋架警車嚟比小朋友睇下。講到職業﹐我細個成日聽到人哋話︰「唔讀書﹐第時大個做XX呀﹗」其實我對呢D說話好反感。對我嚟講﹐每個職業都有佢嘅用途﹐貴賤唔到我去評論﹐我淨係知道有D職業如果無人做﹐咁邊個去做呢﹖所以唔應該灌輸邊個行業係唔讀書去做﹐嗰個職業就係唔好﹐低賤。以前講過﹐口水禧話大個要去倒垃圾﹐我同禧爸都無講反對嘅說話﹐因為做父母都應該要尊重子女﹐佢大個做乜野行業都好﹐唔係去搶去偷犯法就得喇。

有日嘅circle
time ﹐大家小朋友講自己嘅爸爸嘅職業﹐有D爸爸係警察﹑有做裝修工程﹑有彫匠﹑有售貨等等。小朋友講爸爸嘅職業嘅時候都覺得好引以為榮﹐覺得自己個爸爸好叻﹐識做咁多野。無一個小朋友會講︰「嘩﹗你老豆做XX架﹖我呀媽話唔讀書先會去做XX架喎﹗」有時﹐我哋大人有D觀念真係唔應該有﹐心諗就算﹐千其唔好灌輸比小朋友。

我哋細個成日聽到D大人話﹕「你唔聽話﹐信唔信我叫警察拉你吖口拿﹗」外國人好少咁樣用警察嚇細路﹐所以個個小朋友見到警察都唔驚﹐唯獨係口水禧就企到僵硬﹐面無表情咁。(係﹐我試過用警察嚇佢) 講比其他嘅呀媽知﹐佢哋笑住話口水禧個樣好Q。其實笑緊個呀媽嘅白痴行為重Q呀﹗唉﹗

有時﹐喺外國生活嘅我哋﹐唔可以唔接受當地嘅生活方式﹐包括教育小朋友嘅方法。舉個例子﹐一直以嚟我每日都會放一隻水煮蛋喺口水禧個食物盒比佢茶點時食。最近我先發現每次到茶點嘅時候﹐口水禧一坐低﹐D同學就散開﹐然後猛話唔坐口水禧隔離﹐因為唔鍾意佢隻蛋D味。有D同學重話隻蛋好臭﹐似屎味添。其實我可以繼續堅持比佢帶蛋去食﹐因為總有營養過D同學食嗰D野。但諗深一層﹐究竟係食蛋重要﹐定係個仔喺學校嘅群體生活重要D先﹖夠晒營養﹐但無晒朋友﹐比人孤立﹐咁樣嘅校園生活叫佢以後點過好呢﹖

所以我都同呀婆講﹐唔好喺學校唔比口水禧呢樣嗰樣﹐因為咁樣會令佢同其他人有異﹐其他人就會覺得佢怪怪哋﹐慢慢可能會排斥佢﹐佢要面對屋企父母同學校嘅人生活上嘅差異﹐其實係好痛苦嘅。而家咁講好似講到懶嚴重﹐但係只要再諗深一層﹐你就會明白有D校園慘劇係點樣發生。

所以去餵雞﹑睇蛇﹑玩泥沙﹑淋雨(有著雨褸同水鞋) ﹑訓地﹐乜都好﹐唔係壞事嘅我都比佢同其他同學做﹐只要老師比就得。

號外﹕

有人頭先爆石嗰陣跌咗個玩具落屎坑(當然已經加咗料喇﹗)﹐求救無門﹐結果焗住要自己申手入去執﹐順便近距離同自己D黃金say hi!