另類做功課

尋日開始覺得喉嚨痛﹐到接咗口水禧返屋企之後直頭有D周身骨痛﹐真係比呀婆講中領咗野﹐放學嗰陣去買咗盒感冒沖劑返屋企飲﹐一邊飲一邊睇下口水禧做佢D剪貼功課﹐佢有佢是但剪是但填色﹐見佢都有D疲態﹐糾纏落去都唔係辦法架﹗於是提議不如出去後院做喇﹐外面空曠D﹐空氣清新D﹐加上外面凍D人都醒D喇﹗

預咗放佢出去嗰下佢實一開頭週圍搞野唔做功課住架喇﹐有鬼得佢搞飽佢。玩完一輪佢就開工剪下貼下油下。

喺地下做功課零舍free
﹐反正都係美勞功課﹐自由D靈感都多D喇。

呀婆問點解唔好好喺張枱度做﹖唉﹐就係見佢係屋入面張枱度做到無心機兼眼耷耷﹐所以先放佢出嚟抖下氣囉。第時如果有更多嘅功課﹐可能真係要搬張枱出去做﹐曬下太陽擔天望地伸下懶腰﹐其實都幾醒神架﹗

油油下顏食問我lady bugs係乜野色喎﹐我叫佢自己諗下﹐佢周圍望完一輪突然諗起﹕「呀﹐紅色﹗」證明放佢出去做功課真係有用架﹗

外國讀書真係好爽﹐油到咁嘅款老師都一樣會讚靚﹗

上幼稚園前必須要識揸剪刀﹐所以家下學校係咁訓練佢哋剪野。

唉呀﹐仔呀﹐都話唔好食咁多煙咯﹗

好專注咁搞緊佢D「大茶飯」。

坐喺度剪﹐企喺度剪又好﹐隨佢自己喜好。我一早已經決定唔理佢D功課架喇。呀婆話﹕「唔係呀嘛﹖你做呀媽唔理個仔嘅功課﹖你睇下佢﹐亂咁剪亂咁油﹐點交功課呀﹖」我唯一提醒口水禧嘅就係「記得寫名呀。」

我嘅唔理﹐意思係唔插手佢想點樣做佢嘅功課﹐加咗我哋大人嘅個人意見﹐嗰份就唔係原汁原味嘅口水禧功課了。重有﹐我時時都會同口水禧講﹐我最多提佢三次﹐三次之後執漏野﹑做漏野﹑睇漏野嘅話唔關我事﹐佢閣下自己負責。

以前我都會覺得「嘩﹐有得佢自己做﹐做出嚟個樣真係嚇人架喎﹐點交呀大佬﹖」但後來見其他同學攞功課返嚟都係畫到「我眼中」嘅鬼咁馬六﹐但當老師讚佢嗰陣﹐小朋友面上嘅笑容非常燦爛有自信﹗佢哋會好光榮咁攬住呀媽﹐而個媽咪係咁讚佢﹐成幅圖畫好溫馨﹗

自此我都學其他呀媽咁樣唔插手佢哋D功課﹐為嘅唔止係一幅溫馨嘅畫面﹐而係為建立小朋友嘅自信同培養佢哋嘅創作力。

做到咁嘅款﹐呀婆無眼睇喎。但口水禧覺得好掂﹗要我同佢影張相。

做下玩下﹐我就坐喺隔離曬下太陽飲我杯感冒熱飲﹐兩母子有傾有講﹐氣氛好好多。唔知將來到佢上小學嘅時候﹐我會唔會都有勞氣佢D功課嘅一日﹐但只要今日可以喺和諧嘅氣氛下做功課﹐至少佢唔會由幼稚園學前班就開始討厭做功課啩﹗我都好驚揸住騰條邊「fit」佢邊喊破喉嚨咁陪佢做功課﹐大佬﹗咁樣唔係虐待緊佢﹐而係虐待緊我呀﹗﹗(大家係咪鬧緊﹕「講你就口響﹐第時你就知﹗」﹖)

人字拖加紅襪仔﹐幾有佢嘅style!

飲完杯野﹐曬完太陽﹐吸咗新鮮空氣﹐佢又做完功課﹐C服晒。