放咗成個禮拜嘅spring break(作死我呀﹐放成個禮拜假淨係寫過一篇新blog﹐難道其他時間攞去「捕蛋」呀﹖)﹐集中火力~~~~~嘆﹗有乜好嘆﹖嘆下唔洗「倒瀉X」嘅日子﹔嘆下下晝口水禧瞓咗晏覺後嘅寧靜﹔嘆下夜晚上網唔洗擔心第二朝起唔切身跟住又「倒瀉X」送人去返學。何其爽﹗加上多咗個「全職呀婆」幫手﹐每日我起身嘅時候﹐呀婆已經用光速嘅時間洗咗衫﹑淋埋花﹑整早餐過口水禧食﹐我嘅存在實在係有D「多舊魚」嘅﹐咁我唯有就係嘆把喇﹗
呀婆過咗嚟之後﹐我嘅前後園嘅三年零八個月就此告別﹐即時變身做咗有名有實嘅花園。
最近禧爸幫口水禧「置咗搭樓」﹐咁巴閉﹖咁細個就有層樓揸手﹖此樓乃係一間塑膠屋﹐好似係八尺乘七尺咁上下﹐有天窗有氣窗﹐附近有流水聲﹐屋前有一大草園﹐長年都與松鼠浣熊做鄰居﹐聽落非常咁organic「有機」。
口水禧望住「層樓」﹐呆咗。
(你兩個老野有咁好C ﹖
)
「層樓」借嚟擺下雜物先﹐第時娶咗老婆還返比你呀﹗
返嚟咁耐就差唔多個個禮拜落雨或者陰天。最正就係平時返學陰天﹐一到週末就落雨﹐你話個天係幾咁詼諧呢﹖難得上個星期六有太陽﹐加上舊年入會嘅動物園會籍重有一個月就夠期﹐再再加上有人特別要求話要帶呀婆婆去睇動物(係呀﹐呀婆除咗呀公之外﹐咁大個女都未見過動物﹐洗你條豆o靚帶佢出去見識呀呵﹗
)你話如果逆佢意﹐我自己都諗唔到有乜好做﹐所以就決定全部去動物園喇。
婆婆成日投訴﹐個個都鼻敏感﹐點解屋企重要養動物﹖好喇﹐今晚一於煲咗隻貓補下身喇﹗口水禧應該會第一個同我斷絕關係﹗上一代﹐或者應該話有D人唔明白﹐即使我屋企無動物﹐仍然唔代表個個就會即刻無鼻敏感。有呢個病嘅人往往都唔會只對一樣野敏感﹐咁即係就算無隻貓都好﹐我仍然係會有敏感症。對我嚟講﹐鼻敏感真係好辛苦﹐個鼻係咁長流不息﹐嗰隻想打乞黐同打唔出之間嘅曖昧真係成日都令你對眼充滿淚水﹐成日都處於半開合嘅狀態中﹐真係感性得嚟又性感﹗但係呢D有藥食有針打﹐效果可以好顯著。我希歡小朋友自細同小動物一齊成長﹐培養佢哋嘅耐性同愛心﹐珍惜生命﹐亦都希望除咗爸爸媽媽﹐動物都可以成為小朋友可依靠嘅心靈朋友。口水禧學校裡面嘅動物係最好嘅證明﹐小朋友初初返學唔適應同爸媽分離喊爆﹐老師帶佢哋去睇下動物﹐餵下動物﹐小朋友有寄托﹐眼淚自然收制。我想強調嘅係開心地收眼淚而唔係無可奈何喊到疲累而妥協嗰隻收制。小朋友對動物有興趣﹐觀察動物身上嘅特徵﹑喜好﹑生長模式﹐甚至口水禧第一課生老病死都係喺動物身上學返嚟﹐唔洗喺街市睇人殺咗隻雞或者生剝田雞皮先知個死字點寫。
呀婆肯定想追斬我九條街﹐皆因佢成日話我而家同佢秋後算帳﹐挖佢舊史﹐再將之四圍咁唱。唉﹐但係咁喎呀婆婆﹐而家已經唔係只有依從舊時嗰套先行得通﹐有D係我細個經歷過而唔想下一代重蹈覆轍﹔有D係我認為一試無妨﹐出發點都係為個仔著想架咋。(呀婆呢期唔會有時間睇我個blog
﹐我可以風流快活咁喺度同佢唱反調喇﹗)
睇下隻羊幾咁友善好笑容﹐係咪好想摸下佢呢﹖
睇睇下張相﹐E﹖點解個龜殼裡面有對手﹐後面又有對腳架呢﹖
知道佢嘅嗜好係多手多腳﹐怕佢有日喺學校或者公園見到青蛙就摸﹐早D話佢知有D青蛙係有毒唔摸得﹐費事佢手多多走去捉跟住賴野。口水禧好多同學都知道乜野蜘蛛有毒﹐咩黑寡婦呀﹑紅色嘅唔知乜名(係我唔記得啫) 唔可以掂﹐但通常我屋企係一見就唔理有毒無毒﹐拍瓜佢有殺錯無放過。嗰日老師教D細路話有D蜘蛛其實都唔係害蟲﹐佢哋會幫手食晒其他昆蟲。D同學個個都話「係呀﹗蜘蛛好好架﹐食晒我屋企D蚊滋」……而我個仔就一見到屋企有蜘蛛就大叫：「有蜘蛛呀﹐快D攞個電拍嚟電佢喇。」唉﹗我係失敗﹐我認。
好﹐唔好一尾唱呀婆﹐都要表揚下佢架﹐我唔想三十幾歲人重要食騰條炆豬肉呀﹗
話說嚟到呢個令我腳軟﹐下半身可謂又麻又痺嘅玩意﹐「勁孝順」嘅口水禧明知呀媽畏高﹐佢一於你有你驚﹐我有我要。我呀媽一馬當先同我頂咗佢﹐自告奮勇話要陪佢個孫去坐。既然係咁﹐我承全佢兩婆孫上去享受15分鐘嘅二人世界﹐我同禧爸係地面都係二人世界﹐但我好忙咁左閃右避﹐唔係避我老公﹐佢無咁猖狂﹐我避嘅係成日好鍾意追住我嘅蜜蜂呀﹗頂﹐我係咪有臭狐呀﹖做乜成日都淨係追住我啫﹖
「兄弟﹐拍硬檔﹐一陣最好好似香港個360咁停返個幾兩粒鐘﹐等我兩婆孫嘅二人世界套餐有咁耐得咁耐﹗最緊要係等我個衰女包比蜜蜂有咁耐追咁耐﹐唱我吖拿﹗」
口水禧﹕「嘩﹗我一陣要乖D ﹐如果唔係呀婆實踢我落去餵獅子﹗」
婆婆﹕「醒定D呀細路﹐你知我幾猛料架喇﹗」
如果手上有丫叉同馬紙﹐我想射佢哋腳板底﹗
角度問題﹐我條頸好似有大頸泡咁﹐就嚟由個嘴直接連住條頸﹐無咗個下巴﹗
一個星期過去﹐休養生息後﹐今日有人話要去沙灘。對上一次帶佢去美國嘅沙灘係N年前嘅LA之旅。三藩市嘅沙灘未去過。禧爸揀咗個又遠又大風又唔似沙灘嘅沙灘﹐真係……超大浪﹐勁大風﹐我哋坐嗰個位應該朝早潮脹嘅時候係遮晒成片沙灘嘅﹐因為沙上殘餘好多木條樹枝﹐應該係海水沖上嚟﹐潮退之後又沖唔返落海留咗喺沙灘度。
一早就知有人實要換衫換褲換底橫﹐帶好晒佢D裝備﹐諗住自己唔會掂水就梗係唔會帶任何野替換﹐點知呢D叫凡事都唔好咁老定﹐呢個世界有一樣野叫意外。最終﹐我係帶住一著著咗襪同鞋嘅腳﹐以及一隻無鞋無襪嘅腳返屋企。事關嗰隻鞋同襪就喺我同緊佢哋影相﹐觀察後十分老定嗰個位唔會有水嘅時候﹐一個巨浪沖埋嚟﹐D水急湧到我隻腳浸過我隻鞋﹐我顧得隻右腳﹐忘記咗原來自己重有另外一隻腳
﹐當下即刻涼到入骨﹗D水凍到呀媽都唔認得﹗
左腳﹕「呀媽﹐點解你淨係縮開隻右腳﹐唔記得咗我嘅存在呢﹖你偏心﹗要我沖凍水涼不特止﹐重要我無衫著﹗嗚﹗」
縱使D水凍到雪櫃攞出嚟咁﹐但海中有兩個美少女﹐著住普通嘅夏天一件頭泳衣係度玩撲浪﹐四周亦有D細路有D無上裝玩沙﹐有D著短袖短褲跑跑跳跳﹐喂﹐係我內分泌失調定係你哋失調呀﹖
好彩見到平時怕熱怕到顛嘅禧爸都著住羽絨﹐咁都無咁驚﹗不過諗通咗點解平時禧婆婆猛叫我著多D衫而我答佢我唔凍時﹐佢話凍到爆叫我唔好冷親。年紀大嘅人係怕凍D嘅。而家我明點解D後生女可以著咁少﹐但我就……
口水禧對沙灘情有獨鍾﹐唔知上世係咪游水偷渡過嚟嘅﹗
其實D浪真係幾勁﹐經過上次喺夏威夷嘅蚊形海嘯之後﹐望見個海確實有D驚驚哋。尋晚瞓之前都喺度諗﹐萬一玩玩下有海嘯點算﹖今日去到個場地一望﹐心諗﹐如果真係賴野嘅話﹐其實唔洗走架喇﹐忍著淚說一聲GOODBYE喇﹗因為係無得走嘅。所以坐咁耐都唔係好安樂。我諗我有D災難創傷後遺症(我自己作嘅名)
﹐睇得太多D災難新聞﹐尤其係電視不停播完又播之後﹐我就會不停喺個腦裡面播完又播。911 ﹑菲律賓﹑311等等﹐諗起都驚﹐然後不停視察環境諗逃生路線。
大家唔好比我嘅低能船頭驚鬼船尾驚賊性格嚇埋一份﹐無野嘅無野嘅﹐大自然嘅野﹐好正常不過嘅事。唔好嘥D精神落D唔知會唔會發生嘅事﹐搞到影響咗其他美好嘅事。
正所謂﹐通完你哋淚線﹐我就出賣我一家滑雪嘅瘀野作補償。咁嚇破完你哋個膽喇喎﹐梗係有野補償下喇。準備好未﹖
嘩﹐係咪同o靚模D寫真差唔多呢﹖
睇下﹖咁大浪沖緊埋嚟﹐佢都仍然站穩馬步等濕﹐幾咁豪情壯志﹗
噴鼻~~~~~涕喇啩呢張﹗
佢玩咗一陣就洗出佢嘅「化骨綿掌」﹐個剷斷開兩忽﹗
嫁咗佢咁耐﹐我而家先知原來我老公識紮馬架喎﹗
無論幾時﹐我哋兩母子戴咗黑超之後﹐副超都會自然地走位。
呢排又回返上生完口水禧之後嘅磅數。SH*T ﹗結果影親相都要揾人遮我半邊身先得。
又要揾個靚位攝﹐淨係影我個頭得喇。
好彩唔係假髮﹐如果唔係吹咗出去海度﹐分分鐘你下個月會喺香港海域執到我個假髮﹗
今朝起身諗起去沙灘坐﹐梗係要帶D野去食下飲下喇。焗咗個布朗尼﹐沖咗D茶就起程。不過喺咁Q大風嘅情況之下食野﹐你係好難唔食埋沙嘅。
嘩﹗腎炎呀﹖茶嚟架﹗
婆婆話口水禧胃口好似唔多好﹐成日都好似唔想食野。事實係婆婆當口水禧豬咁養﹐人哋唔知飽博命食﹐口水禧係唔知餓﹐博命唔食。不過﹐有時呢個友仔係選擇性有胃口。布朗尼係佢嘅飛罰﹐飽到要扣喉佢都會照食。
仔﹐你一句想睇浪﹐你個廿四孝老豆就帶你去睇浪﹔下次話你想睇鑽石吖嘛﹗(呀媽今日陪你食咗咁多風﹐當益下呀媽喇﹗)
