多謝大家對爛面禧嘅慰問﹐不過我知大家係想安慰我多過佢﹐因為條友仔完全係乜都唔知架﹗哈哈﹗
其實當日發生嘅經過係咁嘅﹐話說口水禧同佢老豆去踩單車﹐我就喺屋企吸緊塵﹐婆婆就去咗散步。過咗一輪﹐禧爸打返嚟屋企叫我去車佢哋返屋企﹐因為口水禧撲咗街整損咗塊面。叫得我去車﹐我都心知不妙﹐不過一路去緊嘅時候我都盡量提醒自己千其唔好好大反應﹐更加唔可以鬧口水禧點解咁唔小心整到塊面咁喇。呢個真係我哋做父母常犯嘅通病﹐細路一跌﹐我哋就即刻撲埋去鬧﹕
「係咪呢係咪呢﹖都話咗你架喇﹗你又唔聽﹐睇下﹐而家咪跌囉﹗」
「抵你跌架﹐跌死你﹗話咗你又唔聽﹗」
「斷架喇隻腳/手﹐你死梗架喇﹗一陣去醫院叫醫生同你切咗隻腳/手﹐流血流死你﹗」
「跌到變白痴呀你﹗」
「行路都唔帶眼架你﹗」
以上呢D說話﹐我諗應該唔係淨係我一個人講過啩﹖(唔好嚇我呀﹗
)
我哋嘅上一代好多都會犯呢個問題。我以前喺口水禧細個嘅時候都會有呢個壞習慣﹐但自從聽過禧爸講過佢嘅經歷之後﹐我決定一定要改咗呢個毛病﹐第時口水禧整親﹐我第一個反應應該係先關心佢有無整親邊度先﹐繼而先同佢講返點解佢會整親。
禧爸嘅故事係咁嘅﹐佢細個嘅時候有一次PK跌親右手嘅手踭﹐損晒流晒血咁款。由於佢怕比媽媽鬧﹐於是偷偷哋搽咗藥水就算﹐無話比媽媽知。幾廿年後﹐佢開始發現隻右手手踭好痛﹐嚴重嘅時候連去完大解都自己清潔唔到嗰隻。(死喇﹐我老公睇完一定會殺咗我﹗)慢慢隻手直頭用唔到力﹐所以佢以家隻右手係無力嘅﹐同佢一齊抬野真係好大鑊﹗後來去照X光先發現原來隻右手手踭「較」位變咗形﹐成隻手生到扭曲咗。
因為咁樣﹐禧爸永遠都唔會喺口水禧整親嘅時候鬧咗佢先﹐反而係先安慰咗佢同埋檢查口水禧整親邊度。久而久之﹐我都開始察覺到我平時先鬧後嚇真係好唔啱﹐諗返我細個嘅時候成日撲街﹐撲完之後禧婆婆第一件事就梗係先丙︰「活該﹗摔死你﹗」(我媽係講國語嘅)
。前幾日口水禧撲完街未喺禧婆婆面前出現之前﹐我已經同呀婆做咗功課先﹐叫佢千期唔好太大反應。(當然喇﹐呀婆係唔會鬧口水禧架喇﹗不過我驚佢「唉吔」嗌得太大聲嚇親口水禧) 。好彩呀婆都控制到﹐不過轉頭就丙獲我太早比口水禧踩兩輪單車咁啫﹗(又關我事﹖我吸緊塵咋喎﹗
)
去到目的地嘅時候﹐見到目無表情嘅口水禧﹐頭上重戴住個頭盔﹐面上有一達血積﹐當然唔少得重有眼淚喺度流緊喇。原來條友仔踩緊單車嘅時候掛住回頭望佢老豆﹐點知架車失控就炒咗車﹐又唔知點解對手撐唔切個地就塊面落地先兼「磨咗薑」﹐搞到損晒﹗返到屋企拿拿林同佢洗傷口搽藥貼膠布。一路搞緊嘅時候佢重一路流緊馬尿﹐搞到我抹完又抹﹐個傷口係咁比佢D眼淚洗完又洗。後來終於諗到辦法制止咗佢D眼淚﹐就係問佢想唔想塊紗布剪成一隻貓頭嘅形狀﹐聽見D新奇野﹐有人即刻忘咗形﹐投入地睇我剪紗布﹐重喺側邊比佢D專業意見教我點剪添﹗
貼好晒野﹐有人重話要再出去玩滑梯﹐臨行前重叫佢老豆影低佢塊面隻MIMI。真吹脹﹗
睇完醫生﹐四圍去揾佢講嗰種膠布﹐點知太晏﹐D賣醫療產品嘅鋪頭閂晒門。藥房直情無得賣添﹗唯有暫時用住D普通膠布。
暫時個傷口都係咁﹐有時會有D「水」喺表面。塊面已經無咁腫。都唔知係行衰運定好運﹐咁啱上個禮拜口水禧又中耳炎﹑鼻竇炎加肺有痰﹐醫生比咗抗生素佢食﹐而家再加埋爛面﹐嗰罇抗生素真係抵到爛呀﹗唉﹗
當醫生話口水禧塊面會有痕時﹐呀婆即刻睥爆我﹐當然更加要鬧多次話咁早就比佢踩兩輪單車。但呢個係口水禧自己話要學架喎﹐我無迫過佢學喎大佬﹗呀婆嗰日忍得住﹐嗰日喺診所就忍唔到﹐重施固技﹐D傳統中國人教育又嚟喇﹐除咗話口水禧以後塊面唔靚喇﹐有痕喇﹐醜樣呀嗰D之外﹐重話以後都唔准再踩單車﹗好彩喺呢個時候﹐醫生出聲話呀婆﹐叫佢要比口水禧建立信心﹐好返可以繼續踩單車﹐不過就要小心D囉。呀婆即刻無聲出﹗
後來呀婆去咗廁所﹐醫生出咗去攞D洗傷口嘅藥水時﹐我見口水禧個樣好唔開心﹐於是我安慰佢叫佢唔洗擔心﹐保持個傷口乾淨同埋唔好曬太陽住﹐應該條痕唔會好深色嘅。叫佢以後要小心D踩單車囉。講完之後﹐口水禧好似好DD ﹐無咁愁爆。呀婆出嚟之後﹐我都提咗呀婆唔好再嚇口水禧﹐呀婆見粒孫都愁愁哋咁嘅樣﹐識做哋講返兩句好話等口水禧無咁驚。
呀婆都叫做好偉大架喇﹐為咗口水禧甘願去改過以前舊式教育嘅一D陋習﹐同我好合作。其實唔係好多老人家肯接受新思想作出改變﹗可能係睇到雞雞學校老師同小朋友嘅互動之後發現教育小朋友唔係一定要用靠嚇先行得通嘅﹐用愛教出嚟嘅小朋友開心好多﹗
暫時傷勢報告係得咁多喇。喂﹗我明日要CO OP ﹐未有時間覆留言住﹐但我有睇晒架﹗
