幾日唔見咗影﹐可能會有人以為我帶咗口水禧去做激光磨皮﹐整返滑塊面呀呢﹖(傻喇﹐邊有咁多閒錢吖﹗況且﹐麻甩仔塊面洗鬼咁滑咩﹗有錢都比個呀媽去磨咗皮﹑抽咗脂先喇﹐係咪先﹗
)
非常感動同埋多謝各位留言安慰爛面禧﹐佢個傷口已經結完焦兼甩埋焦﹐而家每日都有同佢搽去疤膏﹐睇下佢個疤痕退得幾多係幾多。感激俠醫由香港火速將去疤膏寄過嚟比口水禧急用﹐本來有個周身疤嘅中女諗住黐D嚟搽睇下可唔可以去咗多年積落嘅PK疤﹑刮損疤﹑肚紋皺紋﹐乜鬼紋都想去﹐點知俠醫話咁Q耐嘅疤係唔可以靠佢嗰支野嘅﹐嗚~~~唉﹐咁算喇﹐反正我都豁咗出去﹐攬住我D疤痕過世把喇。
我D疤痕不值一提喇。我只想多謝咁多位嘅關心﹐咁多嘅留言﹐我唔Q知何年何月先覆得晒呀﹗嗚~~~~
好喇﹐其他野唔講住﹐先比大家睇下口水禧嘅康復情況先。
近睇﹐都重係好明顯睇到D疤痕。凹凹凸凸……
講開太陽﹐我哋呢邊總算叫做有少少夏天嘅跡象喇……終於﹗早排不停落雨﹐氣溫又低﹐室外活動完全無辦法進行。呢期嘅天氣好咗好多﹐間唔中先落一兩日雨﹐但晴天嘅日子都唔少。自從上次同口水禧試過喺後園做功課之後﹐我哋愛上咗去後園食野﹐坐下傾下計飲下茶咁。其實口水禧一直都好鍾意喺後園玩架喇﹐不過係個呀媽唔鍾意出去之嘛。可能真係年紀大﹐開始鍾意呢D靜態活動﹐坐喺太陽底下聽下雀仔聲﹐吹下微風﹐聞下花香﹐呢D咁嘅野我以前根本覺得係悶﹐但家下竟然會覺得係爽﹐真係想唔認自己成熟咗都唔得﹗
呢度屋企有花園嘅人都鍾意整返套餐枱﹐放假約下朋友親戚嚟燒下野食玩下﹐所以一到夏天就係買呢D室外傢俱嘅好季節。我哋呢套野係買二手嘅﹐上手人家要搬去第二個州﹐所以將呢套野平讓出嚟﹐盛惠USD150 (枱同餐椅) 。雖然用咗五年﹐不過由於上手個後園好細﹐而且將餐枱有瓦遮頭﹐所以成套野都幾新淨下﹐出去買套新嘅﹐大約要幾百蚊美金。其實得個夏天可以用下﹐真係唔洗買咁貴嘅返屋企(發咗達嘅人另計)
。
一邊食一邊有人幫你燒埋﹐何其嘆呀﹗
最開心莫過於呢條細路﹐因為喺出邊食野﹐佢有大條道理周圍走﹐個屁股唔洗長時間黐住張凳。呢D環境我有得佢行開行埋食野﹐事實上人人燒野食都無話要黐住張枱食架喇﹐所以我哋都無規定佢唔准行開。但喺屋裡邊飯枱上就要坐定食完先准走﹐呢D基本嘅餐桌禮儀係時候要佢學下。
除咗口水禧自己周圍走動之外﹐佢兩父子重可以踢下波聯誼下﹐上次我同婆婆喺度老恰口水禧﹐踢完佢個波又踢佢對拖鞋﹐佢顧得個波嚟又顧唔到著拖鞋﹐鬼殺咁嘈﹐笑到我同呀婆腰都彎埋﹗
呢個週末天氣好好﹐星期六出去散步﹐行咗成粒鐘先返嚟燒野食。呀婆今日驗血度血糖﹐效果非常好﹗所以呀婆而家每日有時間都會出去散步行半粒至一粒鍾﹐希望佢堅持落去﹐控制好佢嘅糖尿病同血壓就好喇。
今日成家人無出街﹐下晝有人羅友痕焗咗曲奇餅﹐(明顯係乘機想出去用下張新枱喇﹗)迫咗成棚人出去坐。
曲奇餅呢D甜品係口水禧嘅「飛佛」﹐絕對唔似食其他嘅野時坐唔定。食呢D「飛佛野」時﹐口水禧個屁股係永不離座﹐食夠先走。
能夠令到口水禧乖乖哋密密食嘅皇牌
坐坐下發現把遮都係遮唔得晒D西斜太陽﹐於是禧婆婆提議搬竇﹐去咗草地上打躉。
係咪覺得好似有四件seafood鬼喺度扮晒野呢﹖
比面你D餅先坐耐少少架咋呀媽﹗
以後影相要影呢邊面喇﹐知無﹖
回味中
拿﹗都話咗架喇﹐你哋睇下﹐有人按奈不住嚟料喇﹗
如果嗰一刻你叫佢剝晒衫呢……佢會架﹗
應該攞晒D沖涼梘液洗頭水出嚟比佢順便沖埋涼喇﹗
成個人乾淨晒﹗
知唔知佢做乜咁嘅面口﹖
屎急定便秘﹖
生痔瘡﹖
事緣係某日我co-op完等緊老師「賽後檢討」﹐口水禧同D同學一齊玩。後來有兩個同學嘅媽咪比咗部電話個仔玩﹐口水禧見人玩angry
bird ﹐於是返屋企叫老豆星期六帶佢去電器鋪用人哋D陳列品玩angry
bird(唔知點解聽落覺得好搞笑﹗)﹐我哋叫佢扮隻嚟睇下﹐佢就整咗個咁嘅樣。
五歲幾嘅口水禧再唔係呀媽講咩做咩嘅小朋友﹐而家喺學校會跟住同學仔做呢樣嗰樣﹐當然包括埋攪破壞喇﹗見到同學打手機遊戲佢都心郁郁想玩﹐我哋大人都會咁樣﹐所以小朋友有呢D表現都唔出奇。我覺得最緊要係口水禧知道幾時玩幾時識停﹐話咗玩五分鐘就玩五分鐘﹐唔可以街市講價夠鐘都唔肯停。唔好睇幾歲嘅細路好似唔識野﹐其實佢哋已經明白雙方協議咗嘅承諾一定要履行﹐如果邊個唔兌現自己嘅承諾﹐就等如放棄下一次同父母或者其他人商議嘅權利(無口齒嘅人﹐揾鬼信你咩﹗)
有人會成日話呢套同細路協議嘅方法等如將父母嘅威嚴抹去﹐搞到D細路下下都要比意見呢樣嗰樣﹐其實真正嘅原理唔係咁樣﹐應該係比個細路有權商議時亦都要佢哋知道大人係最終嘅話事人﹐小朋友始終都要尊重大人﹐因為咁樣﹐小朋友先可以得到大人尊重佢哋嘅諗法同感受。
將時間全部投放喺打機上梗係唔好﹐不過適可而止對我嚟講係OK嘅。如果唔想個細路沉迷喺打機上﹐咁我咪比多D其他嘅活動口水禧做囉﹐例如出去花園玩﹑去公園﹑踩單車﹑游水﹑畫畫﹑剪下紙﹑讀下圖書﹑整下野食等等﹐其實機打得多係人都會悶﹐只要小朋友知道佢哋有多D選擇嘅時候﹐我諗佢哋都唔會一尾淨係打機啩﹖至少我肯定口水禧唔會喇。(係咪有人心裡面諗緊﹕遲D你就知死﹗)
呢期超鍾意剪野﹐正在展示緊比MIMI睇佢嘅成品。
畫人就得幾條線﹐成隻外星人咁﹔畫貓就有紋有路﹐雖然都係好詼諧﹗
好明顯口水禧嘅獨家模特兒唔係好望佢喇﹗
信不信由你﹐我哋學校有個項目叫做”write without tears”教小朋友學寫字。呢兩隻字係口水禧自己自學拼音﹑平時睇書或出街觀察﹑發問(問下D字點串) 而學識嘅。好耐之前﹐佢重自己嘗試拼bears ﹐不過當時重未係好識拼﹐所以佢拼咗byrs ﹐其實都有D近似。對我同老師嚟講﹐目前嘅階段﹐串唔串識粒字唔係最重要﹐最緊要係佢自己有興趣學﹐自己學唔係我迫佢學(講過喇﹐我第時唔想理佢D功課呀嘛﹗係人唔係呀我﹗)
早前老師教緊各行各業嘅時候﹐有一日叫D細路模擬喺餐廳做伺應生﹐重將課室扮到成間餐廳咁款添。
製作認真重有埋餐牌同銀紙。
水吧同收銀機
成舊飯咁樣嘅伺應
與唔洗食都o答晒糖嘅客人。
一人企一張枱
本人係帶位媽媽伺應生
唔願上鏡嘅客人
呢班友仔落完單之後就去廚房執野食喇﹐點知邊執邊食嘅又有﹐邊行邊食客人碟野嘅都有﹐問你怕未﹗最後我哋發現﹐佢哋原來好鍾意斟野飲﹐個個唔偷野食嗰陣都會圍喺個水吧度爭住斟野飲。當然﹐我哋側邊D呀媽同老師成為咗佢哋灌水嘅對象﹐我飲咗N杯lemonade﹐真係飲到爭D胃酸倒流咁濟﹗
呢個禮拜co-op三日﹐寫住咁多先。開皮﹗
