踏入五月真係令人又興奮又感嘆﹐內分泌失調﹗興奮嘅原因係口水禧返埋呢個月就正式畢業離開雞雞學校﹐告別preschool生涯﹐九月就會去幼稚園返學﹐正正式式成為一個幼稚園生喇。時間真係過得好快﹐嗰個日日要呀媽陪返學嘅蛋散﹐一轉眼已經話咁快就畢業﹐伴讀生涯仿彿好似啱啱尋日嘅事……合起雙眼﹐總會飄過當初同佢一齊返學放學嘅片段﹑課室裡面有人大叫媽媽﹑由一舊飯完全唔知人哋講乜去參加circle time到家下可以對答下吹下水咁﹐所有都只待成追憶﹐原來每次小朋友嘅蛻變﹐最唔想變嘅係我﹐唔係佢。
感嘆咁快就要離開一間咁好嘅學校﹐一班咁搞野嘅細路﹐當然重有老師。如果話我呢世人除咗父母﹑提攜過我嘅上司長輩我要對佢哋感恩之外﹐雞雞學校嘅老師絕對係我要特別感激嘅人﹗如果遇唔到佢哋﹐我好肯定口水禧家陣一定日日都唔肯去返學﹑放學唔肯做功課﹑我兩母子日日家嘈屋閉兼且我大有機會去學校用麻包袋笠人個仔拉去廁所打獲以示幫我個仔出氣報仇(話咗我唔係好人架喇﹗)等等﹐而我最終嘅成就就係洗定個羅友去痞監。
有無咁誇﹖梗係唔誇喇﹐兩年嘅co-op生涯教曉咗我好多好多有關兒童教育嘅知識﹐從前我以為教細路勁柄咪得囉﹐車﹐我哋嗰輩件件都係咁樣出嚟架喇﹗但﹐原來想教育小朋友嘅同時又可以拉近彼此嘅距離係完全唔可以用勁柄呢個方法架﹗原來小朋友喺大人耐性嘅教育之下會進步兼且最重要係開心快樂。世界冷漠﹐但我仍然相信教出有愛有快樂嘅人﹐終有一日可以感染世界﹗如果話我諗得太天真(即低能喇) ﹐咁為何虎媽式育兒(XX家長) 呢種方法而家又可以咁大行其道架呢﹖潮流興﹐人人跟﹐遲早有一日總有人會跟雞雞學校咁樣教仔﹐邊個敢話肯定唔會有呢一日﹖
本來前幾個月我哋會去參觀一個小型機場﹐點知天公不造美﹐嗰日因為落雨﹐所以學校取消咗個旅行。你話六合彩唔見我中﹐日日鬼咁猛太陽﹐偏偏就揀中第二次嘅郊遊嗰日落雨﹐好﹐你有你玩野﹐我哋有我哋改期﹐改遲一個星期後嘅同一日﹐無咁喬喇啩﹖都咪話唔邪﹐真係日日都出太陽﹐淨係我哋改期嗰日又落雨﹐頂﹗唔理咁多喇﹐照去﹗(服咗老師嘅勇氣﹗)
其實睇見咁嘅天氣﹐我真係有少少無心機去行。明明之前一日重熱到呀媽都唔認得﹐等我哋放學走去買太陽油﹑水﹑乾糧同急救藥物﹐出發嗰日出門之前重搽晒防曬﹐夠膽真係喺我哋一上車踩油去緊學校嘅路上(不過係幾分鐘嘅路程) ﹐呀老天爺就開始落雨﹐成車都重浮住我哋身上嘅太陽油味﹐喺嗰一刻真係唔爆粗都表達唔到我心裡面嘅唔平衡﹗點知去到學校﹐大家話照去﹐頓時又覺得落雨帶班細路去行山好似有D難度﹐點都好喇﹐我唯有帶住一身嘅太陽油味喺雨中執好架車準備車埋另外一個家長同佢個小朋友﹐突然覺得自己一身嘅油味真係超「火羅」﹐頂﹗
最「火羅」係﹐太陽油一事都未「火羅」夠﹐後面繼續「火羅」﹗點解上天要咁對我呢﹖唉﹗
大家可能都諗到﹐既然出得太陽油呢招﹐就梗係會懶醒以為天氣熱﹐自然就著少D薄D喇。自己衰都算﹐重要累埋個呀媽同個仔﹗出門口前見禧婆婆著咗件抓毛上衫﹐我重笑佢話一陣熱到生臭狐﹐呀婆比我拋一拋都有D窒﹐即刻換咗件夏天衫。而我個仔喇喎﹐揀得我做佢呀媽就梗係唔少得預咗要比我「羨」架喇﹐著咗一件短袖T ﹐外面就一件薄過姨媽巾嘅風褸。我﹖短袖一件就行﹐好彩帶咗件背心外套。
帶住一身嘅油味去到﹐落車開門嗰下一陣寒風加毛毛細雨﹐不禁心裡千萬句sh*t﹗其他人個個都著曬抓毛外套﹐我哋三件真係薄到比C襪厚少少﹐我就邊行邊散發住油味﹐頓時真係好想「look」落山崖或者仰天長嘆﹗
一睇大家嘅裝束就知我哋三件大鄉里平時完全係無行山嘅經驗﹐你哋睇下其他人著到﹖見唔見有人戴冷帽呀﹖同我哋三個沙漠look對比幾咁強烈﹖好明顯我哋三個個額頭鑿住「火羅爆同賴野」幾個字喇﹗
為咗今次嘅攀山大行動﹐老師前幾日已經開始喺教定D細路去行山要注意嘅事項﹐包括有D地方唔好貼緊路邊D植物行﹐一來驚佢哋跌落山﹐二來係驚佢哋掂到有毒嘅植物會皮膚感染。重有更重要就係提醒小朋友去郊外嘅時候要專重大自然嘅一切﹐唔好摘野﹐唔好搞D動物﹐唔好大叫等等。重教埋如果見到蛇應該點樣反應(我聽完嘅反應就係腳軟見暈囉﹗)。
呢棵野叫poison oak﹐老師以前賴過野﹐掂完周身R﹐沖埋個熱水涼之後惹埋全身﹐結果要去睇醫生。所以老師話去行山要小心D好令嘅植物﹐通常都有「好野招呼」D多手多腳兼大意嘅人﹗
行行下又見到條四腳蛇﹐我已經完全唔記得個名。但好肯定老師唔係叫佢做lizard。
好彩﹐可能係我鋪太陽油味攻鼻攻上天﹐連個天都頂我唔順﹐雨停咗﹐人亦因為行路無咁凍喇。
大家揾咗個地方就蓆地而坐放飯喇。再講多樣火羅野(死未﹖邊個夠我火羅﹖)話說平時我co-op嗰日朝早會食個pancake加麥皮嘅大早餐﹐中午去到學校就一直做野到下晝三點幾﹐通常臨尾都餓到打冷震﹐一離開學校我就要即刻同口水禧去醫肚。佢係唔會肚餓嘅﹐因為有茶點食﹐但我就餓鬼上身咁X唔臭都想擺入口食落肚﹗於是嗰日行山前諗住行山咁體力勞動嘅野﹐單靠我平時嗰份大早餐肯定一係要人抬返我落山或者直情當送我上山擺低我唔洗帶返落山﹐於是﹐我食完個早餐之後﹐竟然聳恿禧婆婆一齊再食埋個飯先好出門﹐重一人煎咗兩隻蛋送飯﹐問你怕未﹗
莫講話行山喇﹐偷渡跑去隔離個州都夠力水喇﹗
所以呢﹐人哋放飯嘅時候﹐我完全無飯癮﹐於是先可以四圍影囉﹗
口水禧第一次行山﹐兼夾第一次同同學去旅行﹐佢內心嘅嗰種澎拜法已經唔係我可以控制嘅程度喇﹐佢完全當無帶呀媽一齊去咁款﹐一條友走到去最前帶頭位﹐若然唔係老師喺度﹐口水禧又點肯屈居第二呢﹖所以離到放飯呢一刻﹐佢都要填下肚先﹐一陣繼續帶頭﹐撇甩呀媽呀婆去獨闖龍潭。
帶得班友出去﹐預咗佢哋會手多。呢劈究竟係泥定係X ﹐我已經唔想深究。
深山同公園裡面跑嘅細路係最吸引鏡頭嘅﹐我指我嘅鏡頭喇。
我鍾意唔扮野做自己嘅小朋友樣﹐加咗大人意見嘅pose同表情﹐就已經唔係小朋友樣了。
相入面嘅小朋友無目的咁四圍爬爬跳跳﹐見佢哋好似好忙但又唔知佢哋忙D乜真係搞笑﹐天真無邪﹐無憂無慮﹐睇幾耐都唔厭。
呢班友令我諗起多年前嘅火車廣告﹐我好鍾意嗰個廣告﹐D細路又係喺樹林玩玩跳跳扮火車。唔知邊個粉皮亂咁唱人個廣告有唔妥﹐搞到本來係個可愛嘅廣告變咗個可怕嘅廣告。
突然諗起佢哋舊年preschool開學嗰陣重好細個﹐一轉眼就過去……
呢個當日開咗學幾個月之後﹐無喇喇日日喊爆唔比呀婆走﹐婆婆走咗﹐佢喺門後苦等﹐隔住欄杆等婆婆返離。我隻電子錶昆佢唔少﹐比我呃返佢入學校。後來先知佢父母分開咗。
幾小無猜你追我﹐我追你﹐唔知若干年後重記唔記得呢一幕﹗
口水禧投入佢嘅校園生活﹐皆因雞雞學校比咗愛佢。唔單止佢﹐重有其他小朋友。
放完飯﹐我哋繼續前進﹐來到一個池塘﹐聽講係柏克萊大學用來養D青蛙同樹蛙做生物研究。
老師帶我哋入去參觀﹐等小朋友喺無玻璃隔住之下睇下青蛙。
派D網比佢哋撈青蛙﹐吩咐我哋家長要小心撈﹐睇完要放返隻青蛙入水。
呢期學緊大自然﹐蝴蝶﹑毛蟲﹑青蛙點樣變身。但呢個季節已經無蝌蚪睇。我孤陋寡聞﹐除咗跟呀媽去街市買田雞之外(重以為嗰D叫做青蛙王子﹗)﹐未見過真青蛙﹗而家跳一隻上我身﹐我諗我會暈﹗但D細路見撈到青蛙個個圍埋去好似有金執咁﹐我只記得青蛙係兩棲類動物﹐其他背過嗰D已經完全唔記得晒喇。
睇完青蛙又圍埋痞晒喺地﹐又有新發現喇﹗
臭蟲一隻。
突然發覺口水禧D同學識好多日常生活見到嘅事物﹐上至天文地理﹐下至吃喝玩樂都傾到幾句﹐唔係怪口水禧唔識野﹐只覺得係我要自我檢討下。偶然聽過一個前輩講過﹐一個人淨係識一樣野﹐就算好精都唔夠﹐太單調﹗應該要廣知天下聞﹐乜都知下識下﹐咁先夠圓滿。「周身刀無張利」同見識廣博係兩回事。
目前為止﹐我發覺我個仔最精就係「攝位」。
三點幾﹐我帶住由始至終喺我身上都發揮唔到功效嘅太陽油落山歸家。
