做咗三十幾年人﹐我做得最多嘅事就係「火羅」爆事。上次學校旅行嗰篇各位已經見識過我嘅成就喇﹐之不過﹐正所謂「火羅」開有條路﹐我總係獲獲「火羅」爆獲獲瘀皮。天呀﹐可唔可以比我做返個正常人呀﹖嗚~~~~~
話說星期五﹐我哋幾個坐喺客廳﹐無喇喇我唔知發咩神經﹐突然諗起嚟緊嘅星期日係母親節﹐於是就屈咗禧爸星期六請晒我哋去刷一餐。星期六提早去到餐廳﹐因為齊唔齊人嘅問題同個帶位姐姐搞到慶慶哋﹐禧爸重話要同個經理講。後來我哋坐低咗之後諗諗下﹐算喇﹐人哋都係打份工啫﹐加上大家係一心諗住去食飯慶祝母親節架嘛﹐無謂搞到慶過火屎影響心情喇。於是大家一聲(其實係禧婆婆帶頭先) 舉杯祝我同禧婆婆母親節快樂﹐然後就好開心地食野。到咗星期日我重開玩笑問禧爸點解半紮花都無架﹗跟手重打電話諗住去問肥玲點解無打嚟同呀媽講聲母親節快樂。
肥玲一聽電話﹐我重要用英文整蠱肥玲話 “du you撈 tuday is媽打’s
day? Why dun’t you call your媽打呢?” 點知﹐肥玲答我﹕「我哋呢度重未母親節喎﹗」
下﹖下﹖下﹖下﹖
乜今日唔係母親節咩﹖
嗰個「今日」係上個禮拜﹐五月六號。
唉﹗又「火羅」咗添。
突然諗起﹐好彩嗰日喺餐廳歡呼嗰句母親節快樂係用廣東話講架啫﹐隔離枱西人應該唔知我哋講乜嘅﹗
今日﹐真係母親節喇。好彩口水禧重未識好多英文﹐如果唔係﹐佢實返咗學校周圍唱比同學同家長聽我哋上個禮拜慶祝咗母親節喇﹗
呢期呀婆好勤力咁美化個花園﹐呢度嘅天氣最啱就係種玫瑰﹐而家我哋有好多唔同顏色嘅玫瑰﹐今日重可以剪D攞入屋插下﹐唔洗去買出面嗰D
﹐慳唔少﹗
除咗母親節慳一筆之外﹐早前嘅Teacher
Appreciation Day (敬師日) ﹐我哋班小朋友一人帶一支花返學校送比老師﹐湊湊埋埋湊到兩個花樽﹐又香又靚﹗
呢排口水禧接二連三咁接受考驗﹐首先係我哋呢區嘅泳隊招募新人﹐舊年帶過口水禧去試﹐嗰陣佢都未識游水﹐試水嗰陣箝到個教練條頸甩皮咁濟﹐又箝實人哋條腰﹐教練支持口水禧嘅拉皮神功唔住(幾乎比佢扯到後生咗30年﹗)﹐送返口水禧上水後就話語言不通﹐暫時唔收得佢住。
經過年幾嘅時間訓練﹐今年口水禧又再去試水﹐睇下人哋收唔收佢入泳隊。點知人哋招生嘅時候碰啱口水禧炒車事件唔落得水﹐於是錯過咗人哋個試水機會。好彩可以補試﹐上個禮拜放學後拿拿聲就去補試﹐一去到現場見到有十幾廿個小朋友﹐我哋重諗乜有咁多人補試嘅﹖等咗一輪都唔知究竟幾時先落水﹐後來有個姐姐叫人落水﹐咁啱嗰下隔離個家長鬼咁大聲講野﹐我哋聽唔到個姐姐講乜﹐但見其他小朋友都衝落水﹐口水禧都唔執輸一齊落埋去。教練開始叫D小朋友做各樣嘅動作游水﹐見口水禧都跟到﹐我哋就坐埋一邊睇佢試水。但過咗差唔多20分鐘都重試緊﹐隔離又有幾個小朋友同幾個教練一對一咁游﹐望望下覺得呢幾個先似試水喎﹐口水禧好似博大霧走咗去跟人哋上堂喎﹗驚佢唔知跟咗邊個泳班上堂而唔係試水﹐於是我又走去面懵懵同人講話比人知自己個仔好似跟咗人哋上游水堂而唔係試水咁喎﹗個姐姐跟我出去一見口水禧就話我知其實口水禧係跟緊泳隊練緊水而唔係試水呀﹗oh 咁既然都跟到泳隊練咗咁耐水都無比教練踢返出嚟﹐算唔算已經通過咗呢﹖
結果姐姐問過教練之後﹐教練原來都唔知口水禧係嚟試水﹐以為佢係泳隊成員添﹗哈哈﹗口水禧呢隻博懵試水成功被取錄嘅C橋又真係幾洗得喎﹗
其實重要過埋個暑假先至再選人入加入代表成個區嘅泳隊。所以口水禧嚟緊呢個月每個禮拜要游兩日﹐到六月就一個禮拜游四日﹐直至八月底再睇下夠唔夠料入泳隊。
其實希望比佢游多幾日鍛練身體﹐我見過好多身體唔好嘅小朋友入咗泳隊後身體都好咗好多﹐所以希望口水禧可以醫好個敏感症﹐唔洗日日再食敏感藥或間唔中要聞氣喇。
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
尋日帶口水禧去幼稚園做分班面試﹐睇下八月底究竟返7點幾嗰班定係9點幾嗰班。有個雞雞學校嘅舊同學舊年已經去咗嗰間幼稚園﹐前排喺某個同學嘅生日會撞到舊同學嘅家長﹐閒談下得知佢個女都有去考個分班試(初初我以為係評估雙語家庭嘅小朋友語文能力﹐睇下要唔要上暑期班添﹗)同學家長話佢個女面試嗰陣被老師問屋企地址電話﹑形狀﹑顏色等等問題﹐結果去咗7點幾嗰班。呀家長話通常識答多D嘅小朋友會被分去9點幾嗰班﹐呀女唔識屋企地址同電話﹐可能咁樣被人分咗去7點幾嗰班。但邊班都無所謂﹐而家小朋友都追得上而且讀得好開心。所以家長叫我教下口水禧屋企地址同電話先去面試喇。
其實口水禧都知知哋屋企地址嘅﹐原因係……個原因實在太搞笑﹗
話說我哋兩個無聊母子平時無野玩到一日到晚都講「1692 XXXXXX Drive臭狐禧臭到成個 (區名) 個個都知佢有臭狐﹗嘩哈哈哈﹗」講得多﹐口水禧就不知不覺知道自己住喺邊個區﹐門牌同街名等。至於屋企電話就真係有教過佢﹐免得佢萬一走失比警察揾到﹐起碼都知屋企電話幾號﹐打電話返屋企比我吖﹗就係咁﹐口水禧好容易就識講地址同電話喇。
就係咁﹐我以為面試淨係會問呢兩條問題喇﹐見口水禧都識答就算喇。去到學校﹐我坐低填緊表﹐口水禧就跟咗個老師喺我後面幾尺以外開始面試﹐我呢D梗係即刻臥底上身﹐好唔專心咁做緊一樣野﹐但對耳就聽緊另一樣野喇。
但越聽越呆﹐因為老師係完全無問地址電話……
老師叫口水禧由一數到二十
(我聽到口水禧數到15嗰陣講咗five-teen!)
﹐中間窒咗窒﹐老師叫佢數埋落去﹐數到20。
跟住應該係叫佢認字母(呢個完全無問題喇) 。
老師問口水禧有無去讀preschool
﹐口水禧答yes。老師再問口水禧preschool嘅老師叫咩名﹐口水禧諗咗兩秒答Ms
Liza。(仔﹐呢個係呀媽我個名呀﹗)都無所謂﹐還掂老師都唔知口水禧preschool個老師係邊個架喇。
跟住老師問口水禧最鍾意同邊個同學玩﹐口水禧竟然答my teacher。老師話oh, you like your teacher
very much, don’t you? 口水禧答yes。
最後﹐老師考口水禧嘅phonics
(英文字母聲母韻母嗰類野)﹐呢個真係殺我一個措手不及﹐估都估唔到幼稚園面試會考呢D﹐因為應該係入咗幼稚園先教嘅野嚟喎﹗好彩口水禧有個玩具係玩phonics﹐條友仔間唔中都會攞個野嚟玩下﹐所以佢都知老師問緊佢D乜。係唔係答啱晒我就唔知喇。
就咁就面試完畢﹐下星期營新會就會知道返幾點。個老師話睇口水禧個程度應該會去9點幾嗰班﹐不過都重要睇埋其他同學嘅面試情況。其實我心就想佢返7點幾﹐除咗晏晝可以瞓晏覺之外﹐時間好用D。不過唔知我起唔起到身嗰下弊﹗
7點幾去到學校﹐咁咪即係5點幾6點要起身食早餐(如果唔想趕頭趕命的話
) ﹖9點幾嗰班可以少D機會遲到(唉﹗咁嘅原因都得﹗我係人唔係呀﹗
)﹐但要準備帶飯(我最怕﹗)﹐所以……所以……大家睇完都想踢我去填海呀呢﹖
7點幾又好﹐9點幾又好﹐面試掂又好﹐唔掂又好﹐我哋兩老最開心係睇到口水禧原來識聽咁多英文﹐重要無乜口吃﹐即代表佢唔多緊張喇。(口水禧緊張嘅時候會口吃同不停fing手﹐醫生話5歲半都重係咁可能要去做下治療) 每一條問題都答得好清楚大聲﹐一個個字逐個逐個講﹐同雞雞學校嘅老師所講一致﹐口水禧對自己係充滿信心嘅。
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
為咗方便口水禧成日要游水﹐今日我哋大刀闊斧﹐進行除菰大行動……
硬係望極都想……笑﹗
呢個世界﹐唔會有人靚得過我個髮型架喇﹗
