真正母親節

繼上次自創咗個母親節呃咗餐飯之後﹐到咗真正嘅母親節嗰日﹐婆婆話想去行下酒莊Napa
Valley﹐於是食完個早餐之後﹐我哋喺網上揾咗幾個參觀地點之後就出發。其實嚟咗咁多年﹐我都未去過Napa
Valley﹐禧爸好多年前同朋友去過﹐佢話不外乎都係逐間酒莊入去試下酒參觀下咁喇。我唔飲酒﹐所以聽到佢話去嗰度都係試酒架啫﹐無其他野好做﹐咁我連酒都唔飲嘅人去嗰度唔通齋企咩﹗就係咁﹐一直都未去過。車﹐經過一輪網上搜尋之後﹐發現我比人昆咗咁多年真係笨﹗原來嗰度唔淨止得參觀酒莊同試酒咁少野玩﹐其實重有好多野可以做﹐是乎有無時間同金錢而已。(頂﹐又比人呃咗﹗)

好日都唔肚痛﹐都唔知做乜嗰日個肚先嚟玩野﹗出門口之前已經覺得有D唔對路﹐但又趕住出門﹐所以無奈唯有硬住頭皮上車﹐諗住沿路如果要揾廁所都唔難﹐大把百貨公司﹑超市乜乜物物可以借廁所。但我就低估咗喺肚痛嘅情況之下能夠容許我行去揾廁所嘅時間係幾咁少﹐加上喺高速公路行緊都唔係話停就停﹐都要兜返入D小路再兜嚟兜去先去到個廣場停低架車﹐以九秒九嘅速度由停車場颷入個百貨公司再一眼關七咁周圍掃射睇下個廁所喺邊度﹐呢個原來平時睇落係幾咁容易嘅事﹐但當你肚痛嗰陣就變咗一件難事﹐而且係越心急就越急﹗越急又越心急﹐總之個腦淨係得個急急急急急急急急急急﹗好喼呀﹗

當日出發咗唔夠半個鐘我就要禧爸去揾廁所﹐咁啱喺一條高速公路轉咗去另一條高速公路﹐遠處有個廣場裡面有好多藥房﹑百貨公司﹑超市嗰D ﹐但原來眼見就好似好近﹐揸車就要兜唔知幾多個路口先到嗰隻。隔離嗰個又心急揾路但又慢慢揸﹐我X急又想佢快快揸但又怕佢快過龍行錯路又要再兜過﹐唉呀﹗真係內分泌失調﹗

好不容易左兜右兜終於嚟到個廣場﹐我已經幾乎揸到個扶手爛咁濟﹐因為個肚實在太痛﹐差D以為自己作動要生咁款﹗禧爸停低架車﹐我就急急腳衝咗入藥房掃射個廁所位置﹐行晒成間藥房都唔見個廁所喺邊﹐真係想殺人﹗走去問個唯一嘅收銀員﹐佢指指最篤篤個位話廁所喺嗰度﹐於是我又帶住人擋殺人﹐佛擋殺佛咁嘅神情直衝去佢所指嘅方向。一股作氣﹐衝到去個廁所正想推門之際……整佢個制﹗﹗﹗﹗﹗﹗﹗鎖咗﹖﹖﹖﹖嗰刻真係好想一腳伸開度門衝入去呀我﹗﹗﹗救命呀﹗﹗﹗有無人幫我call白車呀﹗有人就嚟賴X喇﹗

想走去揾人攞個密碼鎖嘅密碼﹐成個藥房得個收銀員同一個藥劑師﹐唔係呀嘛﹐咁大間藥房得兩個人﹖正所謂人急生智﹐但X急嘅時候係會無晒智慧嘅﹐好彩禧婆婆喺度﹐佢走去同個藥劑師hello完就叫我問人攞密碼﹐嗰下真係唔顧得咁多有個客人喺度同個藥劑師傾緊野﹐問咗人個密碼我就即刻去爆門入去「大解放」喇。

當我四圍探測密碼嘅時候﹐有個韓國太太傾住電話跟住我﹐我諗佢都好急﹐不過肯定唔係我嗰個程度或境況下﹐好似我嗰隻嘅話又點會有心情同人傾電話吖﹐直頭痛到唔想做人喇﹗當我攞完密碼衝咗入去廁所之後﹐個韓國太太都衝埋入嚟諗住解放下﹐點知我隔離嗰隔個廁所有問題﹐沖唔到廁。於是個韓國太太不停繼續傾住電話﹐出出入入個廁所﹐諗住等我用完佢再用﹐不過後來等等下佢都被迫放棄走咗人。

擾嚷一大輪﹐終於都解放完畢﹐我帶住驚驚哋一陣唔知又要唔要再揾廁所嘅心情上路﹐當時都有少少晏﹐成點鐘架喇﹐重未去食晏﹐食完重要揸一段路先到﹐唯有拿拿臨去食野。由於之前痛到入心入肺﹐所以我都唔敢食太多野。

食完之後﹐揸咗大約一個鐘頭就到咗第一個目的地 – Old
Faithful Geyser of California。食完之後﹐揸咗大約一個鐘頭就到咗第一個目的地 – Old
Faithful Geyser of California。揸咁耐車嚟睇呢幾舊石﹖唔係啩﹖梗係唔係喇﹐頭先先爆完石﹐洗乜再嚟睇石呀﹐大佬﹗

睇噴水池﹖都唔係啫﹗呢個一柱擎天嘅現象係自然架﹐唔係人手控制嘅。據講噴出嚟嘅係水蒸汽﹐之所以會有煙囉。隔幾個字就喺地下噴出嚟﹐噴大概幾廿秒至一分鐘就就停﹐一陣又再噴過。喺現場聽係好似水滾有煙噴出嚟咁細聲而唔係好似噴水似噴水咁嘅聲。入面有好多礦物質﹐喺呢堆野嘅側邊有個用石頭堆砌嘅池仔﹐係好耐之前D有病嘅人會嚟浸下水﹐等個病快D好返。不過經過咁耐嘅時間﹐個池仔已經無晒水﹐變咗歷史了。

淨係齋睇噴煙又點可以同口水禧交待呢﹖揀得呢個地點﹐梗係重有節目喇。個特備節目咪就係去睇羊囉。(又係睇羊﹐悶爆呀呢﹖)口水禧咁嘅年紀﹐喺呢度係咁上下架喇﹐嚟嚟去去都係玩下動物﹐去下公園架喇。某程度上應該話都幾容易服侍吖﹐求其比幾隻羊佢摸下餵下就消磨成粒鐘時間﹐幾咁盞﹗ (thumbs up)

充滿愛心嘅口水禧自己食飯就誓願咁嘅樣﹐但餵D羊嗰陣就猛質人食﹐真係雙重標準喎﹗

莫講話小朋友﹐連老肥朋友都好愛摸羊架﹗睇見呢個場面﹐我諗起一D電視嘅飲食特輯﹐影住D主持人去到D牧場同D動物例如牛仔﹑羊仔﹑兔仔呀玩下咁﹐但鏡頭一轉就影住開晒壇一碟二碟牛仔﹑羊仔兔仔肉準備整個唔知乜餸物餸﹐主持人重要一邊食一邊話D肉好嫩口﹐因為D牛羊兔全部都係未過X歲嘅BB嚟嘅等等。我問禧婆婆﹐見到D羊埋嚟食你比嘅草﹐比你任摸唔嬲﹐點食得佢落呀﹖ (sick)

純粹係我個人決擇而已﹐好多年前就諗住三十六歲後﹐我想慢慢開始茹素。無興趣聽我發o翁風嘅可以轉去第二度。宗教原因又好﹐愛護動物又好﹐身體健康又好﹐種種嘅理由令我唔多想食肉。不過未必可以一下子即刻戒晒全部肉食﹐唯有逐樣逐樣唔食(所以喺街見到我食肉的話唔洗大叫啊﹗你食肉﹗咁指證我喇﹐我需要時間呀大佬﹗ (rock on!) )﹐直至全素為止。放心﹗我自己唔食啫﹐但我唔會迫屋企嗰兩個唔食肉嘅﹐我會照煮比佢哋食﹐話明係我自己嘅個人決擇﹐其他人有自由繼續食。

玩完羊之後﹐我哋轉戰嗰日去Napa
Valley嘅真正目的地 – 酒莊。玩完羊之後﹐我哋轉戰嗰日去Napa
Valley嘅真正目的地 – 酒莊。呢個城堡有120年歷史﹐成個山頭都種滿葡萄樹﹐比咗入場費就可以入去個城堡入面試酒同參觀造酒場等等。不過嗰日太晏去到﹐我哋就無入到去城堡參觀﹐淨係喺外面四圍睇下就算。

可能係要嚟釀紅酒﹐我估D水同泥土都零舍好過人﹐所以棵棵葡萄樹都又大又肥又靚仔﹐完全揾唔到人塊黃葉﹐枯葉就更加唔洗諗喇。相入面嗰D就係啱啱生出嚟嘅葡萄﹐又密又多﹐唔怪之得咁多酒賣喇﹗

成功又揾呀婆擋住我向橫發展嘅身驅

口水禧當然都唔飲得酒喇﹐佢唯有喺個葡萄園裡面跑嚟跑去﹐重忙過喺度做野嘅人。究竟佢忙D乜呢﹖

之唔係見到動物發晒顛囉﹗重要唔知死走去追隻又肥又大嘅公雞﹗(我細個比幾隻雞群起圍剿過﹐所以極度怕識行識走嘅雞。 (nail biting) ) 不過此時此地﹐睇落似乎係隻公雞怕咗口水禧﹐周圍走避煩爆嘅口水禧。

自從除菰行動後﹐呢條友個樣已知似乜水﹖ (confused) (似老咗幾年﹗) (devil)

好彩暫時都未染到隨手拈花野草嘅習慣﹐佢又D同學出去玩會四圍摘人哋D野跟手掉落地﹐唔知係邊鋪癮。不過口水禧就好鍾意行到邊摸到邊﹐見野喺地下都會執嚟玩。

我都係第一次見一座城堡﹐主題公園入面嗰D唔算喇。

口水禧呢排煲緊Shrek﹐所以見到城堡都好興奮。

紅衫間條嗰位仿彿同我哋係唔識嘅一樣﹐純粹搶鏡同無喇喇擺pose! (laughing)

我諗入面唔係開冷氣都涼。

無喇喇喺度會有D比人剃咗毛嘅羊喺度娛賓。

迷angry bird迷到上腦嘅bird迷。不過一早已禁止咗玩呢個遊戲。原因係覺得有人眼中只有angry bird而無他野﹐即係沉迷喇﹐所以要軟禁angry bird﹐等bird迷控制到自己先可以再開放。 (nerd)

個人覺得應該禁止自己出鏡 (thumbs down) 趕客非常﹗ (laughing) 咁就完成咗母親節嘅節目安排﹐係咪好有品味呢﹖(問你嘔C未﹖) (sick)

報告一下近況﹐再唔報下﹐連自己都唔記得。最堅嘅近況就係有無發現有條懶蟲近來無乜點覆留言﹐甚至連blog都脫期呢﹖唉﹗最近睇咗本書關於糖尿病﹐發現自己有D徵兆咁款﹐雖然今年嘅驗血報告顯示我仍然係正常﹐但開始有D小毛病出現﹐例如食完早餐(麥皮﹑pancake ﹑咖啡) 兩個鐘後會餓到標冷汗同手震﹐如果遲咗食野直頭係震到就嚟暈咁款(所以上次同學校去行山食完早餐即刻重要食飯﹗堅無﹖)由於禧婆婆嘅家族有遺傳糖尿病﹐怕且我亦不能倖免﹐及早治療或作出生活上嘅改變﹐好過爆鑊先嚟愁喇﹐係咪﹖至於有乜改變呢﹖咪就係食完晚飯出去散步大約一個鐘頭﹑夜晚早D瞓(所以無寫blog寫咁密囉)
﹑食D維他命﹑鈣片同魚肝油補充下﹐年紀大咗原來真係會隨之而來好多毛病﹐骨痛關節痛缺少好嘅膽固醇等等﹐家下唔補遲D就好麻煩了。

至於口水禧呢﹐星期二嗰日去練水﹐比教練揀咗以後跟佢游直池(唔夠50米但多過25米﹐唔知幾多米﹐但比起以家游嘅距離長好多)
。本來條友有D嫌水凍想唔游﹐家下比人焗咗上去想唔游都唔好意思喇。婆婆驚佢辛苦﹐但我堅持要佢去游﹐因為希望可以等佢游多D身體好D ﹐以後唔再需要聞氣﹐第時更加唔好有哮喘病喇大佬﹗講到咁樣﹐呀婆都無計﹐唯有幫手焗佢去游。 (devil)

上星期(嘩﹗乜都係上星期架﹖睇下我係幾咁脫期呢﹗)同班同學嘅呀媽去食晚飯﹐我哋叫mom’s night out ﹐即掉低D細路而解放個呀媽出街。一行七人去到餐廳晚飯﹐話實我真係第一次同個仔D呀媽出街﹐嚟咁耐未試過同「地道」西人思奶出街架大佬﹗傾下食下直到九點幾先散水返屋企﹐都幾過癮。聽下佢哋講佢哋屋企D事﹐離婚呀﹑大肚生仔呀﹑拍拖呀﹑仔女呀等等﹐因為同我嘅成長背境好唔同﹐所以覺得都幾好聽。(最大原因當然係因為我夠八掛喇﹗)返埋下個星期我哋就畢業喇﹐所以我哋搞緊暑假playgroup嘅活動﹐盡力維繫我哋或小朋友之間嘅友誼喇﹐個個住唔同區﹐升去唔同學校之後真係好難再見再一齊玩﹐希望即使大家不能做同學﹐但都可以做朋友吖嘛。

又係上星期嘅事喇﹗話說口水禧一直都想約堅成嚟玩﹐星期六膽粗粗問下人有無節目喇﹐諗住博呀堅成老豆嗰日要返工﹐堅成媽唔會出街吖嘛﹗點知人哋真係無節目重好快覆我話會放個仔嚟我屋企幫我個仔補習 (devil) 添﹗其實對呀堅成媽嚟講不知幾開心有個傻婆幫佢湊成個下晝嘅仔喇﹗點幾鐘就車咗堅成嚟﹐傾咗一陣就撇﹐留下堅成同口水禧繼續補習英文。 (laughing)

口水禧呢期D英文堅咗好多﹐隨咗可以同同學吹水自如之外﹐重開始識睇英文生字﹐有時讀故事書嗰陣﹐我未讀到嗰行﹐佢已經自己讀咗。連學校老師都話口水禧呢期D英文掂咗好多。 (smile)

是日堅成一入嚟﹐口水禧已經追住人係咁呢樣嗰樣﹐雖則文法重未好掂住﹐但已經可以講句子﹐至少堅成聽得明喇。兩條友爆破咗我個sunroom之後﹐轉移陣地去爆埋我個廳﹐再去爆口水禧間房。服侍完兩位大少食茶點﹐執好少少玩具之後﹐重話要開水彩畫野﹐好喇好喇﹐畫喇畫喇﹐如果唔係我都唔知揾咩招呼佢哋﹐事關呢排D花粉顛咗﹐個個都敏感。堅成對眼直情腫到好似喊咗成年咁款﹐睇咗醫生都一樣咁嚴重。所已堅成媽一早已交帶落堅成唔出得室外玩﹐只可以留喺屋入面﹐所以成屋佢兩個玩得嘅野都比佢哋攞晒出嚟玩﹐包括mimi。