本來應該出咗最後一日返學嗰個blog先嘅(本來本來﹐大把blog本來應該要出都未出﹐射咗去外太空喇﹗
)……
我消失咗幾個禮拜﹐天下太平﹐市容回復一片繁榮……又係時候出嚟搞事呀喂﹗
自從口水禧放暑假開始﹐我重多野做過平時﹐真係百思不得其解。呢篇blog﹐唔好講笑﹐寫咗幾個禮拜﹐間唔中加下又save﹐一直到家陣先搞掂。太多野﹐都唔知由邊樹講起好﹐唯有精神暫時錯亂一下﹐東一忽西一忽咁講下喇。跟到我個beat就跟﹐跟唔到就……(熄機或者轉去睇其他野喇梗係﹗
)
最新鮮滾熱辣就梗係本人嘅30+6喇﹐唔係上圍唔係坐圍腰圍喎。平平穩穩又一年﹐好難想象重有幾年就4張野。唔知到時個樣係點﹐早幾日見到個鄰居﹐佢一見到我(當時我著住件外套)﹐即刻指住本人嘅腹部大叫︰「大肚﹖」我>>>>>
嗚~~~~~嗚~~~~~個豬腩真係咁大獲呀﹖
好﹐我決定多D做sit up減腩大行動﹗ 如果唔係﹐到咗40嗰陣﹐人哋以為我老蚌生珠呀﹗
今年嘅生日一如以往﹐買咗紮我嘅飛佛返屋企插﹐真係無得頂咁靚。(紮花﹗唔係講我﹗放心﹗)
不主張大事慶祝型嘅人﹐喺屋企都一樣可以有個快樂生辰。有呢幾條友加連續兩日從遠方致電祝賀嘅禧公公同肥玲﹐每日都係生日吖。
(睇下我幾叻擦鞋﹗
)
日日都係咁嘅顛頭出街﹗算喇﹐呀媽個頭都唔好得去邊﹐個仔都係咁上下喇……(個老豆重……)
口水禧每一日都會咁樣冤主mimi猛咁講野﹐通常mimi都當聽唔到借視線望第二度。但佢對眼珠出賣咗佢﹐因為mimi成日都係咁﹐個頭向一個方向﹐但就「射lay」眼珠﹗
有無覺得呢兩張好似人哋影婚紗相咁款呢﹖睇下新娘嘅腰力幾勁﹗R晒腰﹐回晒頭咁望實個新郎哥……驚佢從後中自己一野吖嘛﹗
上一篇blog有人串我話「下篇blog要等口水禧小學畢業先寫」﹐邊個邊個﹐邊個咁串﹐下﹖企出嚟呀你﹗咩﹖係呀﹐講緊你呀﹐出嚟﹗
知我者莫若你囉﹗衰鬼﹗咪咁樣篤爆我先得架﹗我嘅目標本來係等口水禧大學畢業嗰陣先寫下篇blog架﹗
請你用眼食件蛋糕喇﹐飲杯﹗
好喇﹐重未轉臺嘅朋友﹐生日嘅事告一段落喇。下面嘅事開始精神分裂喇我……
如果無記錯﹐我喺blog講過當日同口水禧揾preschool嘅時候﹐曾經去過另外一間學校﹐但後來覺得有D唔對路﹐所以最後去咗雞雞學校。對於幫個仔揾咗雞雞學校﹐我個人係覺得非常滿意兼有少少自豪(可能會有人覺得我戇居﹐揾間咁嘅野搞到自己去co-op做餐死﹗
)。但結果睇到﹐雞雞學校係非常成功地令到口水禧對返學唔抗拒﹐從來無一日扭過計話唔想去返學﹐我要求甚低﹐呢隻返學嘅態度我已經收貨。我唔想做個日日要喺學校門口同個仔糾纏﹐大吵大鬧摔角兩母子散打王咁迫個仔去返學呀﹗如是者過咗兩年﹐口水禧嘅preschool同pre-kindergarten生涯﹐我哋兩母子都過得好開心。唔好講笑﹐最後一日返學﹐我想喊多過佢想喊﹗
天下無不散之延蓆﹐已達五歲五個月高齡嘅禧哥都不得不同雞雞學校講聲goodbye﹐九月正式去幼稚園報到。
2003年當我同禧爸搬入呢個區嘅時候﹐係咁E問過下個經紀呢區嘅學校點樣﹐當時無細路(直情都無諗過會生細路)嘅我哋聽咗個經紀講邊間好﹐聽完就算﹐淨係記得個學校名﹐其他嘅就一無所知﹐甚至連間學校名點串都唔識。(早幾日先識串咋﹗我係咪應該去撼頭埋牆呢﹖)聽講區內有間野好多人報讀﹐人數太多搞到要抽籤收生。當時個經紀自己個仔都排咗幾年後補名單重未入到﹐所以個經紀叫我哋將來有小朋友嘅話﹐到個細路三歲就好去排定隊﹐重要每年打個電話去話比人知自己重等緊架﹐因為學校見你唔打去嘅話就會當你唔Q等落去﹐自動會將小朋友個名係個後補名單刪走。
於是當口水禧三歲嘅時候我哋帶過佢去﹐當時間學校話佢哋轉咗制度喇﹐叫我哋第二年12月帶口水禧去報名抽籤。口水禧係1月出世﹐本來12月係未夠資格去抽要等多年嘅﹐不過個老師話見佢爭幾個禮拜﹐就比佢抽埋。好﹐等咗一年﹐第二年嘅12月又帶口水禧去報名﹐點知學校話11月已經抽咗﹐當下覺得間學校係咪玩野﹖名名喺學校個網址重寫住話12月先抽籤架喎﹐點解會11月已經抽咗架大佬﹖但老師話係教育局改制(又改﹖﹖﹖﹖)想提早要學校收生﹐唔想D學生年齡差距太大。往時好多學校係12月收生﹐而家慢慢會改早到9月就收人報名。
帶住運吉嘅心情﹐我哋一家三口運住三盆大吉又離開學校。心諗係咪第二年要去學校門口紮營先捕到幾時收人報名呀﹖﹖﹖﹖
又過咗一年(係﹐我不停咁搞到口水禧虛耗光陰﹗)﹐舊年我哋又去報名﹐數口精嘅唔該幫我計下我哋去咗幾多次報名同運咗幾多盆吉返屋企喇。嗰次終於都報到名喇﹗
有錢的話﹐我應該為呢項壯舉擺咗幾圍慶祝同登咗報紙喇﹗(就係無錢﹐所以無人知我哋報到名一事。)年頭報名﹐學校話年尾抽籤﹐中嘅話會電話或書信通知。年中要打電話去向學校表白下我哋仍然等緊。呢度有D人做野係絕對唔可以令人放心嘅﹐所以我一共打過三次電話去﹐打第二次嘅時候我慶幸我有打第二次﹐因為接聽嗰個人嘅語氣完全令我覺得我之前打嘅嗰次應該係無紀錄到嘅。到打第三次嗰次﹐對方確應口水禧個名已經係個後補名單﹐準備會去抽籤喇。
睇到呢度﹐大家可能有個疑問﹐就係點解一路以嚟淨係猛追殺呢間野而唔試下其他學校呢﹖難道區內得一間學校咁大把﹖坦白講吖﹐我都同大家有住同一個疑問﹐係囉﹖點解我無去揾下其他學校架呢﹖我自己都好想知喎﹗
其實係咁嘅﹐最大原因係我都唔Q知呢度嘅入學制度係點﹐問過其他人﹐多數都係話揾返屋企附近嗰間﹐鍾意可以跨區﹐但跨區有個麻煩就係學位首先會比咗嗰區嘅細路﹐有淨先比跨區嘅小朋友。今年讀呢間﹐下年無位的話就會分你去第二間學校﹐所以諗起呢樣﹐我已經打退堂鼓。加上唔想嘥時間喺交通上﹐把心一橫﹐揾返屋企附近嘅就算。
上次返HK之前又打電話去嗰間野問抽籤結果﹐費時一陣吼我哋唔喺度先嚟打電話比我哋(萬一抽中的話)。聽講間野試過串到打比人嗰陣叫人三十分鐘之內答覆讀定唔讀添﹗ 嗰日打去﹐學校話已經開始緊打電話去比「中獎」名單嘅人﹐有D可能係上年中咗獎但當時又唔想比個小朋友讀住﹐於是就留咗一年位﹔有D係已經有兄弟姐妹讀緊嘅小朋友睇下佢哋會唔會入讀。打晒呢D有優先權嘅小朋友之後有淨位先開始call 新報名而中獎嘅人。當時學校話打緊比排四十幾嘅人﹐而口水禧抽到五十四號﹐學校話要到八月先會打比我哋。(打十個電話要大半年﹖﹖﹖﹖﹗﹗﹗﹗﹗
)返嚟之後一直都無任何音訊﹐當佢係未打到嚟又好﹐收夠人唔收口水禧又好﹐我哋已經打消入嗰間野嘅念頭。走咗去屋企後面條街嗰間neighbor school 報名。間學校離我哋屋企只係行路十分鐘就到。各樣我哋都覺得OK﹐雖然個公開試分數唔算好高﹐10分滿分﹐佢係7-8分。但我都講過喇﹐最緊要係間學校唔迫細路讀書﹐比佢哋自由發展。試過填鴨式教育嘅我真係非常討厭再比人迫去讀呢樣嗰樣。迫人讀書都算﹐我最怕係嗰D讀得上你就係寶﹐讀唔上你就變草﹐自生自滅喇﹐ bye bye!
後來口水禧比分咗去晏D上堂嗰班﹐所有野都已經準備好﹐營新日﹑學校開放日﹑驗TB等等都做好晒。突然……
上個星期初帶口水禧去睇醫生﹐醫生話口水禧有口吃嘅問題﹐要去見語言治療師。唉﹗
好彩學校有語言治療中心﹐醫生話叫我哋去排定隊先﹐睇下點樣安排口水禧接受治療。同口水禧雞雞學校嘅老師傾過﹐佢認為先寫信去教育局要求佢哋安排口水禧去見治療師。(其實舊年已經去過信﹐但當時教育局話口水禧讀緊私立preschool﹐所以唔可以去政府嘅治療中心。後來口水禧個醫生話等口水禧五歲半先再決定洗唔洗去見治療師。)
其實早喺佢兩﹑三歲嘅時候我已經覺得佢有D口吃﹐但嗰時以為係啱啱學講野所以先會咁樣﹐醫生當時話五歲半都係咁先要去睇醫生。於是我只有繼續喺網上揾資料(所以當時寫咗一篇關於左撇子嘅blog)同埋留意下口水禧D同學有無相同嘅情況喇。
而家已經證實口水禧有口吃﹐我希望有奇跡出現﹐治療師會話比我知係一場誤會﹐其實口水禧唔係口吃……見過一次語言治療師﹐而家重未知道可以點樣幫口水禧﹐因為有人去做測試嘅時候可能知道咗自己點解要去所以唔多肯講野。另外因為係語言嘅關係﹐治療師唔識廣東話﹐唔知點樣搞好。我知道咁嘅情況﹐係時候由我幫忙了。呢排我咪就係喺度趕緊書囉﹗唔係趕住出書嗰隻趕書呀﹐係趕住睇晒本書嗰D趕書呀﹗N年前讀過下皮毛的語言學﹐真係皮毛到得一個單元係學有關小朋友語言障礙嘅野咁大把﹐另外一個單元係講解每個聲母(定係韻母呢﹖sh*t!還返晒比老師﹗
)由邊部份嚟發聲之類嘅野。當然﹐跟一個語言治療師相比﹐我係超級門外漢到車邊都追唔上喇。但勝在我對語言比較敏感﹐所以要洞悉口水禧嘅毛病喺邊度應該唔難啩。但始終我需要週邊嘅人同我配合﹐咁先可以幫助口水禧改咗個毛病。所以我仍然需要治療師指導我點樣幫助口水禧﹐至於有無進步呢樣我諗可能就要由我哋屋企人去留意。
喺煩爆嘅時候﹐同一個星期﹐接到嗰間串野嘅電話﹐佢哋收咗口水禧﹐叫我哋去搞入學手續。下下下下﹖﹖﹖ 六合彩唔見我中﹗ 非常心煩﹐所以我做咗一件唔正常嘅人做嘅唔正常嘅事﹐就係無即時答覆學校口水禧去唔去讀。學校叫我哋第二日三點半之前要答覆佢哋。我諗打電話嚟嗰個人可能心諗呢個呀媽黐黐哋線﹐人人都lur飯應﹐但係竟然會有個呀媽咁大支野嘅呢﹖掛咗電話後﹐思前想後﹐我決定放棄比口水禧去讀。事緣係早喺網上睇過一D其他人對嗰間學校嘅評語﹐有D人話間學校太力谷學生成績﹐甚至有人認為間學校有少少放棄成績唔好嘅學生﹐只集中力谷成績好嘅小朋友。睇過呢D評語﹐令我更加唔想比口水禧去讀﹐因為佢嘅口吃問題係唔適合讀D壓力太大嘅學校﹐咁樣會影響佢好返嘅機會。所以我決定放棄間野。等同掉咗張人哋眼中嘅六合彩頭獎落海。
係咪覺得我有D黐咗線呢﹖ 嗰一晚﹐諗呀諗﹐諗爆頭。諗起之前問過口水禧同學嘅家長們﹐佢哋有D細個都讀過嗰間學校﹐但佢哋對間野嘅評語都唔同。有D話好谷成績﹐有D話唔谷。唉﹗點算好呢﹖人人眼中嘅好學校究竟係唔係真係好架﹖ 諗嚟諗去﹐我都覺得如果我單信網上嘅人或者同學家長所講嘅野就做決定好似有D低能﹐自己唔係應該親身去睇下﹐同學校嘅老師接觸下先咩﹖就好似之前喺網上一樣有人覺得雞雞學校唔好﹐但我同口水禧都喺嗰度渡過咗兩年好快樂嘅日子喎。
於是我又改變初衷﹐決定去埋間學校嘅迎新日﹐聽下D老師講野﹐帶口水禧去學校行下﹐然後再決定送口水禧去邊。第二日嘅下午﹐我打去學校表示會接受個學額﹐諗住去咗迎新日先再算。點知一去就無回頭lu。學校問咗之前收咗嗰間攞晒口水禧D資料﹐即係當我哋放棄嗰間學校個位。即係口水禧嚟緊九月要去中獎嗰間返學。
心中盤算一輪﹐如果間學校唔適合口水禧﹐甚至會影響佢嘅口吃問題的話﹐睇下到時重可唔可以返去以前嗰間囉。如果唔可以﹐車﹗大不了我自己home school一年兼送佢去雞雞學校或者同其他home school嘅同學一齊上堂﹐下年小學招生嗰陣再入返附近間小學。只要唔會影響佢嘅口吃同可以盡快醫好佢﹐任何方法都去試﹐任何唔適合佢嘅環境我都唔會比佢去。
係咪複雜到爆呢﹖諗咗咁耐﹐通咗任督二脈﹐其實唔複雜。我有信心搞得掂嘅。
幾乎唔記得一樣野﹐多謝喺上一篇留言祝我生日快樂嘅blog友﹐有心喇﹗收到晒。重有一個同我同一日生日嗰位﹐我都祝你生日快樂﹐身體健康﹐永遠幸福﹗
