潛水艇蛟龍號繼續潛﹐「口水號」呢隻潛艇又係時候浮返上水面喇。
唔知其他人有無同樣嘅問題﹐D細路越大就越會叫你陪佢玩呢樣嗰樣﹐再唔係就不停咁同你講野﹐叫你讀書比佢聽﹐問各樣問題﹐
大部份重要係為問野而問野﹐即「點解我係人嚟嘅﹖點解貓係貓呀﹖」呢隻明玩野問題。) 得﹐唔洗再講「不如生多一個喇」呢類野喇﹐若然有第二個的話﹐呢個blog即摺。(其實都有D摺摺哋嘅feel喇,家陣隔咁Q耐先寫﹗)實不相瞞﹐呢篇野寫咗兩個禮拜。所以非常脫期。
父親節當日我哋嘅節目係去搭船﹑搭cable car﹑食pancake等等﹐總括嚟講係三藩市downtown一日遊囉。聽落唔似父親節節目﹐反而係似兒童節嘅節目多。
難得無人反對嘛﹐咁咪順便當係帶婆婆去坐下呢度嘅渡海輪囉。
嗰日去到碼頭已經排咗人籠喺度﹐照規舉﹐隻船例牌遲到﹐而D等緊船嘅乘客亦都例牌有D R底﹐四圍問人隻船係咪例遲。經過上次嘅經驗﹐嗰日我哋化身變咗船公司嘅代表﹐D人隻船幾時到﹑邊度比錢﹑邊度同點樣扣返泊停車場嘅錢都由我哋呢兩個八公八婆代答。唔知嘅話可能以為我哋兩個日日都坐船過海返工﹐其實我哋都係搭過一次咁大把架咋﹗
嗰日大風﹐所以個個都想坐室內。我屋企嘅「外星人」最鍾意食風﹐無懼吹落海吹甩假髮都要坐出面。咁粗重嘅野﹐當然比D「無負擔」嘅人去負責喇﹐乜野人無負擔﹖咪就係唔怕比風吹亂髮型嘅禧爸囉﹗(係咪先﹖係咪先﹖佢一D負擔都無架嘛﹗
)我同禧婆婆太有負擔喇﹐梗係坐返入面喇。
食到咁上下終於肯入返嚟坐﹐差唔多要用鎖鎖佢入嚟先肯坐低。呀婆即刻奉上茶水餅乾﹐睇下呀婆個造型係咪好一個跟班或者丫環咁款呢﹖呀婆始終都未完全接受西方教育要D細路自己照顧自己嘅一套﹐呀婆覺得五歲幾重係好細個架咋﹗
(呢句野日日聽九萬幾次﹗
)
到咗碼頭落船後步行去搭cable car﹐都係等咗一輪先有車上。今次唔係去cable car嘅博物館﹐而係去咗揾食。
>>>
越大越唔似我個仔嘅仔。
先生﹐請問你係邊位呀﹖
三藩市絕對唔啱戴假髮而又戴得唔緊嘅人住。重有就係有頭髮而又無隻摩打手秒秒都撥住頭髮嘅人都唔啱住嗰度。我叫做撥過下個頭先影架喇﹐都係亂﹗睇嚟婆婆呢招頭箍係最無敵嘅。當然﹐殿堂級嗰隻無敵就梗係無人能及嘅禧爸喇﹐風都無佢乎嗰隻
﹐問你怕未﹗一陣又話我網上欺凌佢﹐遲早炸咗我部電腦。
搭車又搭船一輪之後終於都到咗我哋嗰日嘅目的地﹐Sears Fine Food ﹐間野已經有七十幾年歷史。朋友介紹話D pancake好食﹐我哋係pancake迷﹐梗係要去試下喇。
呢間嘅特色係將D pancake煎到細細塊﹐然後疊成一幢咁比你食。每塊都好薄(真係薄過我D姨媽巾﹗)﹐咪睇佢幢幢都細細塊以為好少﹐其實食晒咁多幢都真係會飽到上心口。不過就係因為佢細塊﹐唔覺唔覺你就會食晒成碟﹐莫講話係我呢D「大肚婆替身」嘅身型可以鯨吞成碟﹐就連口水禧都可以食大半碟喇。相信朝早空肚食早餐嘅話﹐佢係可以食晒成碟的。
)食完野唔知點打發時間﹐雖然嚟到遊客購物區union square﹐不過唔係遊客嘅我哋完全無shopping嘅意欲﹐頓時無晒方向﹐於是就去咗探個喺嗰度附近做野嘅鄰居﹐繼而比佢點醒咗我「身懷絕技」嘅事實。
最後我哋四條友蕩咗去飲咖啡﹐然後再返去碼頭等船。
碼頭超大風﹐氣溫又凍。好難相信當我哋屋企嗰頭係華氏90度嘅時候﹐三藩市竟然係華氏50幾度。隻船例遲﹐但我哋要排隊等船嚟﹐如果唔排隊最後先上船就只會淨返企位﹐我企得呀婆同口水禧都唔企得喇咁危險﹗於是眾人喺凜然冷風吹到縮下縮下嘅情況下邊食風邊等﹐排我哋後面嗰兩位身型比我更加闊嘅西人直頭凍到「C
C 殊殊」打冷震打到有聲添﹗
家陣一個星期練四日水嘅口水禧曬到一身古銅色﹐越嚟越似偷渡客﹗
落船後喺碼頭附近揾咗間野食飯﹐口水禧未試過坐榻榻米﹐爬嚟爬去。叫佢影張相﹐一面猙獰﹐佢話佢係angry bird。
以水代酒﹐老豆飲杯﹗
乾﹗(睇清楚呀﹐此「乾」不同彼「幹」﹗我無講粗口呀﹗)
自從開始訓練口水禧自己照顧自己之後﹐條友仔而家自己斟水比自己飲﹐因為呢期鍾意玩斟水﹐所以有時會一獲過飲晒成杯水。出街用人哋餐廳嘅水杯重顛﹐吼我哋大人講野之際﹐佢會掛住飲水飲到肚脹食唔落飯。真係你比個桶佢嘅話﹐佢都會飲到肚爆先停。
呢D咁冤氣嘅場面真係睇見都有D飽飽哋。
五歲半嘅口水禧﹐唔係講笑﹐真係時時都好似上咗電咁無時停。我哋兩母子嘅體能係反比的﹐佢越嚟越強﹔我就越嚟越唔夠佢嚟喇大佬﹗尤其是把口﹐雖然有口吃﹐但佢照樣可以一日到黑都唔停咁講野講野﹐自言自語都照殺。真係佢把口唔講到抽筋﹐我對耳都聽到有D耳鳴。唔計佢一日到黑喺你身邊不停咁郁﹐一人一頭梳化都會覺得好似地震一樣。咩人嚟架﹖咁多能量嘅﹖
餐廳內四圍咁爬(唔爬就同自己灌水囉﹗)﹐唔過份我都有得佢﹐不時要提醒佢唔好騷擾到其他人就得喇。事關真係無可能要佢一舊飯咁坐喺度唔郁架﹗佢而家呢個年紀D幻想力無窮無盡﹐手揸幾件玩具都可以炸嚟炸去﹐玩到宇宙大爆炸一樣﹗好彩佢唔會攞枱上面D杯嚟玩﹐如果唔係佢老豆淨係賠錢都賠到破產破咗幾次。
無咗個冬菰頭之後更加顯得佢有D似蠻牛。
最近呢條友唔知諗乜﹐突然鐘意著幾對襪出街。有時左兩對右兩對﹔有時淨係某一邊腳著兩對﹐另一邊著一對。有時誇到著兩條底橫出街﹗
夜晚著幾件睡衣同睡褲瞓。總之將全部佢嘅飛佛著晒上身﹐要非禮佢都幾煩﹗要剝晒佢身上嘅衫褲鞋襪﹐怕且都要半粒鐘﹗瞓覺呢﹐我就唔比佢著咁多喇﹐黐鬼線咩著咁多﹗但平時去街嗰D就有鬼得佢﹐反正唔影響到任何人。而家洗完衫摺好要佢自己負責擺放自己嗰堆衫﹐正好就係比佢自己自作自受﹐著得多﹐洗得多﹐咁咪大把衫佢擺囉。
五歲半﹐婆婆口中嘅「重細」。對我嚟講﹐唔大又唔細。有D家務開始要佢幫手做。只怪以前無堅持要佢做﹐而家想佢自動自覺好難。叫親佢幫手﹐佢重聲大夾惡問點解要佢做咁多野﹐點解唔係淨係玩喎﹗真係火滾﹗再加埋婆婆做「嫁梁」﹐口水禧駁嘴嘅能力更加之高。當自己係大少嘅諗法更加之理所當然。有時愛佢定害佢﹐係一念之差﹐有D態度係從小開始培養﹐到牛龜咁大嗰陣先嚟要佢改﹐佢真係睬我都有味。
送佢去泳隊真係一個非常好嘅決定。一個星期游四﹑五次﹐不但對身體好﹐而且可以磨練佢嘅意志。婆婆時時都驚佢冷親或熱親﹐呵護備至。但教練唔會同你錫住個細路﹐凍都要落水﹔有風都要上水吹住風咁聽講﹔驚都要跳落水游﹐疲倦都要繼續﹐包尾都要游埋落去。尋日嘅籌款活動﹐小朋友每游50公尺﹐捐款人就要捐一個數目(例如每50公尺就USD1 ﹐5或10) 。口水禧呢件蛋散完全唔知自己喺度做緊生財工具﹐但佢不停來來回回游下彈下跳下﹐總之一頭去到一尾又返轉頭不停來來回回﹐最後一共游咗1900公尺(來回38次) 。呀婆猛喺岸邊叫住「唉呀﹗陰公囉﹗抖下先喇﹗下﹖又游過﹖停下抖下先喇。」其實而家嘅細路﹐個個都大少爺大小姐咁﹐你估佢哋唔想游嘅話﹐有人可以迫到佢游咩﹖佢自己覺得游到嘅我就有得佢自己決定。我盡量唔幫佢做決定﹐等佢學下自己作決定同承受後果。呢樣係同我哋童年父母教育好唔同嘅方法。我哋細個﹐往往係父母話我哋凍叫我哋著衫﹔父母話我哋熱叫我哋著少件衫﹔父母話我哋餓叫我哋食野。有感而發﹐覺得大個咗之後個人真係無乜獨立思想﹐唔敢自己做決定﹐船頭驚鬼船尾又驚賊。
比佢自己做決定﹐係我對佢嘅一份信任。尤其是男仔﹐唔識自己做決定﹐第時點擔大旗﹖
唔掂喇﹐要收工喇﹐口水禧又嚟叫我讀書喇。
