八啩雜誌成日講D乜乜風水大師呀猛人呀去邊度邊度吸咩靈氣增強法力﹐令自己延年益壽呀就睇得多﹐屬真屬假無人知﹐不過得閒去下呢D遠離煩囂連電話都收唔到訊號﹐等你無得whatsapp﹐無email﹐無facebook﹐好專心咁睇樹同埋呼吸清新嘅空氣﹐其實真係有益而無害嘅。
講緊嘅地方叫做 Muir Woods National Monument﹐美國好多呢類國家公園係要收入場費嘅﹐而且重有開放同閂門時間添﹐絕對唔係你想半夜或天矇光去吸靈氣就可以去架。不過好似呢個公園咁﹐收銀處同個入口唔係好近﹐如果有人博大霧唔比錢竄咗入去係唔會有人知嘅。嗰日婆婆見到個收銀處之後不禁都問咗一個問題﹐嘩﹗如果有人唔比錢入咗去咁點呀﹖無乜點嘅﹐呢個係佢自己嘅修維問題﹐事實上佢入咗去都係睇樹﹐然後都係樹﹐無乜野可以比佢帶走嘅。所以呢D都係大家自律喇﹐如果你想你嘅子孫以後世世代代的有機會入去公園睇樹﹐咁當然有賴入場費去維持公園嘅運作喇。無喇喇一個荒山野嶺有乜野要運作﹖梗係有喇﹐裡面棵棵樹郁下都呀成幾百幾千年歷史﹐無人打理下﹐整下D小路﹐真係唔知點行入去睇樹。當然重有D牌棟喺D樹前介紹下棵樹嘅資料同歷史等等﹐呢D都要錢架﹐係咪先﹖
入口處有個姐姐擺咗檔喺度介紹入面有D乜野生物
口水禧都係第一次摸鹿角。呢條角係自然脫落﹐唔係「鑒生」比人切落嚟嘅﹐聽講D鹿定時定候會甩角﹐然後第二年又會生返對新嘅出嚟架喎。相中嘅鹿角﹐望落應該可以叉四條腸或魚蛋呀雞翼呀然後去BBQ架喎﹗
講開BBQ ﹐一入到去就見肚餓﹐嗰度有個小小嘅cafe﹐賣三文治熱飲等等。
接近六歲嘅口水禧開始進入非常多意見嘅階段﹐佢D意見除咗同佢自己有關嘅野之外﹐連埋我點揸車﹐cut邊條線入邊個路口﹐去買乜餸等等都要比佢過問。比著我哋細個咁樣﹐晨早就比大人一係掌嘴﹐一係比人喝爆喇﹐係咪先﹖但諗深一層﹐其實佢都無惡意咁做﹐佢之所以咁多問題問﹐都係因為佢重未達到大人嘅思維程度﹐所以好多時都唔明點解大人做一D事背後嘅動機而已。只要佢唔係態度差﹑嘈住我揸車﹑或喺我趕到PK嘅時候問野﹐我多數都會答佢。但有時佢擺明係無理取鬧的話﹐咁就唔好意思喇﹐受靶喇細路﹗邊個叫你問野都問得咁串又無禮貌啫﹗
公園內大部份係紅木﹐呢個山頭嘅紅木已經有150,000,000年歷史。(嘩﹐D 「0」頭多到﹗)根據網上揾到嘅資料話呢度曾經係20世紀嘅時候比人大量砍伐﹐後來有對夫婦為咗要保住D樹﹐喺砍伐樹木間公司手上買咗611畝嘅地。多得呢對夫婦﹐我哋呢D 21世紀嘅人先有機會睇到D咁靚嘅紅木﹐吸到咁新鮮嘅空氣﹗
點解棵樹會變咗孖條架呢﹖根據資料告示牌上講呢﹐原來D樹會無喇喇自己生多舊野出嚟﹐舊野大大下就會變咗一棵樹﹐所以有D樹會變孖條﹐有D好似呢棵咁個仔就會生喺呀媽個身上邊﹐第時大咗棵樹就會喺樹身上又多咗棵樹架喇。係咪好神奇呢﹖
↑開枝散葉講解圖↑
頭先講咗喇﹐呢度棵棵樹閒閒哋都老我幾百萬倍﹐有D經過千年仍然可以屹立不倒﹔有D可能飽瀝滄桑後不支倒下﹐相入面呢棵就係倒下咗之後比植物園攞嚟研究棵樹究竟有幾老﹐好似最中間嗰度係寫住A.D.
﹐所以呢棵野係古董嚟架﹗
未受任何污染嘅人間樂土﹐世外桃源﹗無論係地上或河水都唔會揾到垃圾。
太耐之前去﹐已經唔記得資料寫住呢棵樹係幾時倒下架喇。淨係知道棵野好大棵﹐一頭影唔到去另一頭。
好哋哋一個年青人﹐做乜個樣咁憤世嫉俗架呢﹖我懷疑有人喺月圓之夜嘅時候係會變人狼四圍咬人。
園內不時都會見到有牛乸咁大棵樹打橫瞓喺度。呢個比人掏空咗個樹身比人匿入去影相。呢兩父子終於都揾到佢哋嘅藏身之所﹐咁我同婆婆自己揸車返屋企喇﹐你兩個喺度落地生根喇﹗
呀婆有句名言﹐「七歲八歲狗也嫌」﹐即係話D細路大到咁上下就會開始令人覺得佢哋唔可愛兼有D黑人憎添。雖然未有耐到七歲﹐但口水禧家陣已經成日(嚴格D講應該係日日先啱﹗)挑戰我哋嘅EQ﹐之所以話「我哋」﹐當然係包埋愛佢愛到發晒顛嘅婆婆喇﹗
多手多腳周身郁無時停已經唔係佢嘅武器﹐佢最殺食嘅係佢把口。除咗駁嘴呢門口藝之外﹐當然重有佢最堅嘅問問題同發出擾人嘅聲浪。前幾日帶佢山長水遠塞車塞到火滾重幾乎比人抄牌嘅時候﹐坐後面嘅口水禧非常唔識趣哋喺我哋等緊警察泡制我哋嘅時候猛問「點解要抄牌嘅﹖」問咗N次﹐問到婆婆都見勢色唔對要叫佢收聲﹐驚我喺警察面前家暴比人拉去差館。其實佢想知都唔係錯﹐但當你心情煩燥之時重不停喺耳邊傳嚟一把非常騷擾嘅聲音追問你一D你當時都唔想答嘅問題之時﹐確係考驗我嘅EQ最高難度嘅一項﹗
鬧得佢多咩又驚佢第時做人無自信﹐同父母關係疏離。唔鬧佢咩又真係谷氣都谷到爆咁濟。唯有有時自己間歇性耳聾或者眼盲﹐忍得幾多得幾多﹐如果唔係好容易會錯手打咗佢或者錯口爆咗粗鬧爆佢。
真係唔該上天保佑﹐忍唔到乜都好﹐體罰同爆粗對待自己仔女呢樣野千其唔好發生喺我身上﹐我未開過齋架大佬﹗
去邊都要帶D玩具旁身﹐連食完晚飯去散下步都唔例外﹐點都要帶玩具去行。
大個仔喇﹐已經唔可以控制佢嘅思維﹐更何況係佢對眼珠呢﹗預料今後至某人十幾歲青春期期間我哋嘅全家幅都係見唔到某人眼珠正常放喺對眼嘅中間﹐反而「逗雞」
同「射lay」
嘅應該會幾多下。
