某個週末(個blog家陣變咗脫期style﹐所有嘅日子都只可以用「某個」喇。
)﹐熱到華氏100度﹐呔媽話想帶D細路去玩沙﹐問我呢頭有無沙池。沙池唔係無﹐不過100度喎﹐我驚三隻野玩完沙跟住中晒暑呀﹗咁啱聽到口水禧D同學話嗰個禮拜會去Contra Loma﹐重話帶埋D玩沙嘅玩具去添。起初我重以為係個沙灘﹐於是話比呔媽知有個地方有沙玩時重有水游﹐唔怕齋曬會中暑﹐一於帶嗰三條友仔去玩喇咁。
)
兩點幾去到﹐泊車嘅時候摸下塊車頭玻璃﹐嘩﹗熱到「辣手」﹐真係打隻蛋都唔洗反就已經熟喇﹗
我哋各自泊好車之後就入去玩﹐原來嗰個唔係一個沙灘﹐而係一個有沙玩嘅泳池﹗乜都好喇﹐淨係想快D跳落水咋我﹗早前一日重左諗右諗好唔好帶個帳蓬去好呢﹖問下呔爸識唔識起好個蓬﹐佢話應該無問題﹐於是買咗個11尺X11尺嘅諗住帶去。點知禧婆婆話我去游水帶間屋咁大嘅帳蓬去真係誇咗D(其實我自己都覺得有D誇﹗)﹐最後放棄﹐用咗呔爸帶去嘅沙灘遮就算。呔爸可能都覺得好彩唔洗幫我呢個顛婆起間屋喺個泳池邊﹐如果唔係﹐人哋可能以為我諗住喺嗰度過埋我嘅下半世﹗
話說回來﹐其實口水禧平時泳隊比賽嗰陣﹐D人真係帶咁大個帳蓬嚟用架﹐重帶埋睡袋添﹗所以我諗住有樣學樣之嘛。當日喺泳池都有人用﹐不過無我買嗰個咁誇重有埋蚊帳之嘛。
相片撻自呔爸面書
)﹐救生員都唔准佢哋掂水﹐一定要全部退到去草地上先算數。車呔禧三個雖然唔多想上水﹐但望見戴咗黑超嘅救生員叔叔望住佢哋做晒手勢指佢哋上水﹐三個都無乎唯有聽話上水係喇。真係想叫救生員叔叔幫我錄幾段video﹐叫口水禧食飯﹑執玩具﹑跟實我行街呀嗰D﹐唔洗我嘥氣日哦夜哦吖嘛﹗
繼續偷相
上水後質佢哋食brownies﹐細佬手揸一件﹐望到盒中重有好多﹐佢邊食邊指住個盒話﹕「嘩﹗正野﹗」我開頭重以為自己聽錯﹐點知細佬一連講咗兩三次﹐我肯定我無聽錯﹐佢的而且確係講「嘩﹗正野﹗」說時個樣重要望住個盒﹐對眼笑到咪晒咁款。大家幻想下一個細嘅呔爸笑到見牙唔見眼咁講就會知道當時個情景係幾咁搞笑架喇﹗
食完野重未落得水﹐唯有喺草地坐住玩。大家都蠢蠢欲動﹐救生員突然宣佈可以落水﹐D細路就頓時好似「搶灘」咁衝落水(人哋搶灘係衝上水﹐但佢哋係落水﹗)我哋驚三個猛男比人踩扁﹐所以等大部份人落晒水之後先准三個猛男落水。反正我哋都係喺池邊玩架啫。
其實而家話佢似其他東南亞國家嘅人都有人信喇﹗
你哋可唔可以話比姨姨知道點樣可以令到條事業線咁勁架呢﹖我夜晚沖涼前對住塊鏡點都做唔到你哋呢個效果喎﹐過兩招嚟好喎哥仔們﹗
玩玩下﹐就見呔爸好勤力咁喺岸上開始吹水泡同浮艇仔比D大少玩﹐你話係咪實在唔話得呢﹗一心諗住比兩個仔出去「公海」玩下﹐點知呔仔未熱身﹐唔肯去水深少少嗰度。(大概四﹑五尺左右)細佬先出咗去﹐口水禧都跟埋出去﹐淨低我同呔仔喺岸邊繼續玩沙同表演佢拿手嘅「深水炸蛋」。玩玩下﹐我諗住引呔仔出去﹐點知行到一半比佢拉返轉頭。初頭重諗住「嘩﹗呔哥當咗我係佢個friend﹗」原來係佢想有人陪佢喺岸邊玩﹐唔好出「公海」。
後來又再次被叫上水休息﹐之後再落水嘅時候﹐我向住公海行去﹐諗住呔仔無人陪喺岸邊就會跟住出嚟﹐結果佢比佢老豆帶咗出去坐艇﹐喺公海玩得不亦樂乎。
成功呃咗呔仔落水。
點幾兩點玩到人哋散場先走﹐足足曬咗幾粒鐘﹐曬咗幾個月嘅口水禧已經黑到分唔出嗰日有無曬黑咗喇。而我呢﹐怕且下次喺超市都係繼續會比人以為我係南亞人士架喇。走嘅時候﹐都重係100度﹐好彩泊到個樹陰位﹐不過車廂內都係熱到焗爐咁﹐真係大人細路都不能避免變身小狐仙﹗為免成村人一窩風衝返去爭廁所沖涼太震撼(寒舍可憐只得一個廁所咁大把﹗)﹐我同口水禧先返屋企﹐無人性嘅我哋賴低呔媽同車呔三母子喺泳池門口等呔爸駛返架車落嚟接載。返屋企嘅路途上面咁啱遇著人哋炒車﹐塞咗少少先返到屋企。拿拿林同口水禧沖咗涼先﹐一陣呔家到就可以任得佢哋一家大沖特沖喇。同時亦都開始要準備BBQ嘅野﹐透下爐執定枱呀﹑餐具呀﹑飲品等等。
搞咗一大輪都未見呔家蹤影﹐心諗梗係大塞車搞到佢哋被困公路上喇。隔咗一陣諗住佢哋應該都差唔多到﹐於是指派我屋企個BBQ服務員開始燒﹐等到呔家嚟到沖好涼就食得唔洗餓住等喇嘛。禧爸燒呀燒﹐燒完雞上脾就燒雞翼﹑腸仔﹑豬扒﹑蔬菜等等。直到燒完晒﹐都重未見呔家嗰四條友仔﹖
塞車塞到嬲得濟返咗屋企﹖﹖﹖﹖唯有將D野食放入焗爐保溫繼續等喇。
過咗幾個字﹐終於嚟到。三母子喺途中同周公打咗幾圈﹐呔爸揸到無晒表情落車搬野入嚟。可憐嘅呔爸﹐又鼻敏感發作﹐呻咗成晚﹐藥又食咗﹐鼻又洗咗﹐噴劑都用埋﹐一樣呻到佢鼻都甩﹐眼又腫又標眼水。見到佢都覺辛苦。好彩佢哋唔係住我呢區﹐如果唔係﹐我諗呔爸個鼻肯定腫到大過成龍個鼻都似﹗
個個都沖好晒涼之後﹐因為時間嘅關係已經燒好晒其餘嘅野兼開埋枱﹐不過呔家嘅少爺眼中只有玩具﹐於是佢哋嘅雙親把握時機餵飽咗自己先﹐車呔兩兄弟就繼續沉醉喺玩具當中。(原來車上已被佢哋呀媽一人塞咗半個包﹐唔怪之得喇﹗)雖則話呔爸媽乘機餵飽自己先﹐不過自己食嘅時候都不忘猛咁剪呀剪﹐切呀切﹐準備好車呔二人嘅晚餐。而口水禧當然係一隻眼望住D野食﹐另一隻眼就望住被玩具包圍嘅車呔兄弟﹐非常羨慕佢哋可以咁自由奔放咁玩玩具。
分別係兩歲幾﹑三歲幾同五歲幾嘅車呔禧而家已經可以互相流利咁交談。佢哋D對答都幾搞野﹐不過我已經唔記得佢哋講過D乜搞笑野喇。有時淨係聽佢哋是但一個問﹕「呔仔呀﹐你架車xxxxx架﹖」﹐跟住呔仔就會答︰「係呀﹐xxxxx架﹗」咁樣已經覺得好過癮﹗以前重未識交流嘅時候﹐佢哋係各自玩﹐背對背或者面對面都唔會講野﹐而家好似個小大人咁會吹水﹐細路仔嘅變化真係好神奇﹗
因為已經隔咗太耐﹐我嘅老人痴呆真係令我諗唔起當晚嘅其他細節野﹐淨係記得個甜品creme brulee又累呔爸返屋企肚疴(真係無陰公﹐又鼻敏感又肚疴﹗)﹐禧婆婆已經比咗D私伙止疴藥過呔爸看門口。不過呔爸話留返下次過嚟打邊爐嗰陣試藥﹐佢話嚟親我度打完邊爐返屋企都實疴﹐所以下次要試下隻藥掂唔掂喎。(嘩﹗我有洗乾淨D野食架喎﹗)
當日車呔玩到十一點就返屋企﹐終於都無話要留低過夜﹐自願返屋企喇﹗
