開學一週

十點前去到學校﹐聽到鐘聲排好隊入課室﹐雖然成班友行到好似去行刑咁拖住腳步前進﹐但口水禧總算無喊苦喊忽唔肯入課室。有賴雞雞學校兩年嘅訓練﹐令到咁怕同我分開嘅口水禧每日都自動自覺行入課室上堂。有D同學到今日都重喊緊唔肯入課室﹐要呀媽半拖半扯咁拉入課室﹐其實小朋友要克服呢個心理障礙真係唔容易﹐唔係夾硬嚟就叫做好。我到而家仍然好興幸從來無用過夾硬嚟呢招去迫口水禧返學﹐因為我覺得大人必需先照顧小朋友嘅心理多過調返轉頭要小朋友先滿足我哋大人嘅心理先啱。唔同意嘅唔緊要﹐大家各自修行﹐總之我要求口水禧唔會帶住兩行眼淚入課室就得喇。

由於我同禧爸都唔係用桌上電腦﹐深知咁樣實會坐姿唔好搞到周身骨痛﹐於是口水禧嘅私人電腦支援人員已經幫大少裝好晒電腦﹐砌埋張書檯﹐調較好晒高度﹐等口水禧唔會整彎條腰骨(我有個表弟自細打機用電腦都坐姿唔好﹐結果條腰骨係S型的﹐太遲去醫﹐醫生話無得搞﹐呢世都係S腰人)﹐ 加上禧爸以前試過書檯同電腦唔啱高度﹐搞到手痛﹐有見及此﹐都係投資少少認真調好書檯同書檯凳嘅高度好D。唔知重以為全部野係買比我讀大學嘅仔用﹗好彩禧爸突然醒起佢書房部電腦唔多用﹐可以比口水禧用﹐咁就慳返買電腦幾錢﹐齋買書檯就得喇。由於只係暫時性放喺個客廳﹐所以亦都是但走去IKEA買檯買凳就算。其他郁下幾舊水美金嗰D真係留返佢大學先買喇﹗只係為咗佢做功課時我可以穿梳廚房邊煮飯邊教佢做功課而已﹐過多幾年張檯未爛就繼續搬入房用﹔爛咗就…..墊喺大脾做功課喇﹗

瞓檯底對五歲幾嗰個嚟講好過癮﹔對四十歲嗰個嚟講就周身痛喇﹗

幾咁父慈子孝﹐嫌個老豆未夠負擔﹐重要揾佢嚟晾埋腳先﹗

佢話要試機﹐啱喇﹐順便做下功課喇﹗(幾易「坤」﹗)

好認真咁做﹐好事嚟嘅﹐唔好搞到大家迫大家就唔好喇。校長話一個星期做兩﹑三次。最緊要唔好迫佢哋做﹐我最聽校長話架喇﹐問口水禧要唔要玩下電腦呀﹐佢話玩就開機﹔話唔玩嘅咪第日再問囉。到目前為止未試過拉鋸﹐佢肯做的話﹐都其實做得好認真好開心。keep住咁就好喇﹐做功課嘅野要你情我願先有用架嘛﹐勉強無幸福。

嘩﹗好難做咩﹖做到家頭都R亂晒﹖(實情係未出街﹐所以未梳頭。)

呀婆﹐我「虐待」你個孫呀﹗哈哈﹗叫佢自己咩書包拎食物袋。其實根本就應該係佢嘅份內事喇﹐而且呢度嘅書包都無書嘅﹐邊有我哋細個返學個書包咁重呀﹗咩嗰五分鐘﹐唔會S腰或甚至斷腰嘅。我用心良苦呀﹐為咗比機會佢同兩個袋培養感情呀﹗前幾日之嘛﹐放學嗰陣兩袖清風﹐乜鬼都無﹐原來將個書包同食物袋留低喺課室﹐就咁行出嚟放學都夠擔。嗰個顏色筆同筆袋已經化成空氣揾唔返喇。我都話架喇﹐好快又會唔見野﹐結果比我周到漏低書包食物袋﹐唉﹗

第一日攞返嚟嘅堂上功課﹐一半比老師間開咗﹐因為有人亂Q咁畫野。我諗都唔係特登嘅﹐純粹係唔識聽英文指令啫。點知……

嘩﹗第二日重堅﹐滿江紅﹖老師重寫住要我返屋企同佢再做添。好彩第二日放學可以捉住老師傾兩句。我問口水禧係咪聽唔明老師講乜﹐(其實心諗老師會答”oh,he’s doing great! He’s fine, no worries”〔無野野嘅﹐佢幾OK吖﹗)﹐因為以前喺雞雞學校老師都係咁講口水禧架喇。)點知老師話oh, he doesn’t understand almost all the instructions!”(佢大部份嘅指令都聽唔明架﹗)

下﹖咁大獲﹖

之後嗰日攞返嚟嘅野又OK喎﹐無乜大錯漏啫﹐咁點解老師會話口水禧聽唔明大部份嘅指令呢﹖

幾時都話﹐呢D野唔好估估下﹐最好親身去睇下先。今日我去咗學校幫手做義工﹐喺課堂上幫老師剪剪貼貼﹐篤住D細路做野。我完全明白發生緊咩事﹐亦都好肯定口水禧唔係老師講得咁大獲嘅﹐算係做得快手快腳又無乜錯架喇。唔係因為佢係我個仔﹐係我睇到班上有好多比口水禧更多唔識聽或者係唔聽指令嘅小朋友喺度。今日我全日都無時間理口水禧喺課堂上嘅功課﹐佢自己都搞得掂﹐重有大把時間同側邊兩個靚女搭訕添﹐不亦樂乎呀衰仔﹗其實D小朋友未習慣幼稚園嘅模式﹐佢哋成日都喺度浮游擔天望地﹐老師教緊佢哋做野﹐佢哋就望第二度或者同隔離嗰個玩。到落手落腳做嗰陣就一舊雲咁﹐做得慢跟唔上自然就無心機再跟﹐寧願繼續浮游。老師一個睇十幾廿個亦都無時間個個都跟得緊﹐所以浮游嗰D繼續浮﹐跟到就跟﹐跟唔到老師就寫低叫家長喺屋企自己教返。要揾好似雞雞學校嗰D咁有耐性嘅老師﹐能夠將上堂嘅流程安排得咁順暢真係唔容易揾。結果就會好似外邊嘅人傳間呢間谷成績學校嘅老師只管成績好嘅學生﹐成績唔好嗰D就有佢自生自滅。老師需要一個義工係事實﹐多個大人睇住篤住班友仔做功課﹐當然係好過有得佢哋自己救自己喇。咁鬼細個﹐識鬼去學校返學係嚟學野咩﹐hea夠鐘就想返屋企架喇。

有個細路上上下堂吼老師同我講緊野時想用較剪剪自己個鼻﹐跟手又隊把較剪入鼻窿。坐隔離嗰個直情用把較剪隊住自己條腰添﹗好彩比我睇到﹐我都嚇到講唔出野齋指住個細路﹐老師見到先即刻收咗佢哋把較剪。嚇到我哋鼻窿都無肉咁濟﹗如果我睇唔到﹐老師又唔得閒﹐咁嗰個細路呢世可能得返一個鼻窿(因為打通咗兩個單位﹗)而另外嗰個可能五歲開始呢世都得返一個腎﹗

可以嘅話﹐我會每個星期最少都去幫手一次﹐禧婆婆問我可唔可以日日去(佢驚口水禧比人用較剪隊﹗)﹐下﹖咁又唔得﹐我都有大把家務要做架嘛﹐學校又無出糧比我﹗況且我日日咁去會影響到口水禧﹐個呀媽日日棟喺學校﹐超唔型囉﹐係咪﹖ 呀婆重話一係家教會嗰陣講出嚟﹐嘩﹗唔好啩﹐口水禧重有幾年喺嗰度痞架喎﹐得罪老師無運行架喎。我寧願多D去幫手重好喇﹐起碼老師感激之餘都會比下面﹐唔好虧待口水禧吖﹗ (死﹐我幾時變成咁功利架﹖)我以前喺度就係得罪得人多﹐結果成日比人丙﹐而家學精咗﹐雞脾打人牙「較」軟﹐凡事都係做人圓滑D好﹗

總之都係嗰句喇﹐上幼稚園前真係要放手喇﹐教定D基本野﹐唔好玩門﹑唔好喺好高跳落地(今日有D細路食完茶點竟然上檯﹐一檯跳去第二檯﹐慌C唔「福佳」﹗)揸較剪揸刀要點揸﹐行緊嗰陣刀頭較剪頭向地﹐唔係嘅話﹐一PK就插瓜自己架喇﹗唔好幫佢做野喇﹐因為幼稚園係無人會貼身服伺D公主王子架﹗今日有個妹妹無帶茶點﹐好彩口水禧帶多咗一條芝士﹐比咗個女仔﹐佢先有野食﹐如果唔係要捱餓到成點幾鐘架喇。(係﹐我其實應該有佢餓﹐下次佢就會記得提佢屋企幫佢準備茶點。但﹐唔忍心囉大佬﹐餓佢唔死嘅﹐食少一餐半餐﹐但見佢都識開口揾人幫咯﹐一次半次就算喇。下次再係咁﹐我真係唔會再比野食佢喇。話咗我唔係好人。)

總算理解咗口水禧上堂嘅情況﹐安落晒﹗以英文半桶水都未有嘅小朋友嚟講﹐我覺得算OK架喇﹐應該唔會令老師覺得討厭嗰隻。之前接放學﹐老師同其他同學家長都有講下佢哋小朋友上堂嘅情況﹐唯獨口水禧老師就無同我講任何野﹐唔係我主動問﹐老師都唔會講話口水禧聽唔明大部份指令。我重以為口水禧梗係D英文大獲得濟﹐老師直情無心機教添。原來老師無野同你講關於你個細路係好事嚟嘅﹐咁無野要講就無野講架喇﹐即代表自己個仔唔係阻住個地球轉嗰個囉。

星期三「街度癱瘓日」﹐我放學時間一粒鐘前去學校﹐嘩﹗竟然都無位泊要泊對面﹐甘拜下風﹗等我重以為最早應該係我喇﹐點知……不過泊到對面﹐接放學都係行過對面馬路﹐唔洗周街競步已經好好好好架喇﹐算喇。

每日送咗返學﹐我就返家做野。接佢放學返嚟一齊食簡單嘅午餐。烤芝士火腿三文治加杯奶都幾飽肚。食完已經要開始準備晚飯。係呀﹐三﹑四點要開始準備喇﹐有時五點幾就食飯﹐最遲唔過七點就要食。

放棄煮幾餸一湯喇﹐太麻煩﹐又要切又要洗又要抹﹐周圍油煙﹐無咁多時間做呢D喇。食野啫﹐飽肚味道又唔太差咪得囉﹐碟頭最好﹗

點解咁趕﹐因為而家就嚟冬天﹐天黑得好早。七點半前要出去散步﹐如果唔係太黑﹐遲D重會好凍添﹗所以我寧願將所有野都簡單D﹐規律D﹐唔好因為煮飯搞到過晒鐘﹐影響跟住落嚟嘅其他活動同口水禧嘅瞓覺時間。八點散完返到屋企﹐禧爸同佢沖涼﹐沖完出嚟食生果玩一陣﹐九點上床。快嗰日可以八點半或更早推後口水禧去瞓我回氣嘅時間嚟喇。下年就真係要七點半八點瞓喇﹐因為要返早﹐八點到學校﹐唔夠瞓變咗課室浮游生物﹐返屋企一大堆功課要我跟就慘喇。所以我鍾意有規律少少﹐至少咁樣我自己都會好D﹐唔洗下下都趕頭趕命。我好D﹐成屋人都好D喇﹐唔洗聽我鬧人﹗