十月中寫過呢pat野……
估唔到揾到時間寫blog之時就正正係口水禧賴咗野要痞喺屋企嘅時候﹐有無咁配合呀大佬﹗話說尋晚近黃昏嘅時候都覺條友靜過平時咁多唔多對路﹐個樣重謝過前日返完學游完水返嚟﹐但我以為佢可能喺學校同同學玩得顛得濟而已啫。點知臨瞓摸下佢個頭﹐E~~~好似熱熱哋咁喎﹐都係唔好估估下﹐度下體溫最實際。98.7度﹐宣告發燒賴野。唉﹗上星期五隔離兩班過晒嚟我哋課室一齊上堂﹐我望見有個細路﹐一邊鼻窿有條青鼻涕﹐另一邊鼻窿有條透明鼻涕﹐兩條都蠢蠢欲動咁嘅款﹐都心知不妙。諗住口水禧坐喺佢附近唔知會唔會賴佢野。點知個細路成日揾我教佢寫字﹐我都掂佢隻手一次洗一次手﹐但都唔能夠避過佢D菌﹐第二日口水禧就嘔咗兩次﹐架車後座連同佢個car seat﹑波鞋﹑衫褲鞋襪變左重災區﹐要即刻停喺街邊「清場」﹐好彩有帶後備衫褲比佢替換﹐如果唔係都唔知點樣有得佢著住堆臭衫坐大半個鐘頭車返屋企﹗ 實不相瞞﹐我怕清嘔野多過清屎尿(我知﹐我天生就係一個倒夜香嘅材料吖嘛﹗)。清咗成粒鐘﹐兩公婆痞喺街邊洗呢樣嗰樣﹐真係好「浪漫」呀﹗頂﹗
嗰浸酸縮味伴隨住架車一直包圍住我哋﹐真係連呼吸大力D都驚輪到我想嘔﹗
(寫於10月17號)
(10月18號繼續﹐問你服未﹗
) 嘔咗兩次之後又無乜事喇喎﹐星期日重可以去上網球班﹐走走笛笛﹐郁足個半鐘。喺佢嘔完嗰晚開始﹐我就搬咗佢過我房孖鋪﹐瞓咗幾晚﹐踢足我咁多晚﹐有晚半夜重自己夢見個仔向我揮拳﹐擘大眼見到有人真係舉起咗隻手正準備向我施展佢拿手嘅「還原靚靚拳」﹐好彩我醒瞓反應快﹐即刻用被遮面﹐如果唔係﹐嗰拳應該都幾應﹗
連續幾晚都無覺好瞓﹐諗住見佢都無乜事﹐所以星期三朝早搬返佢D野返去佢房喇。點知夜晚佢瞓前發燒﹐跟住我咪又繼續呢幾晚成惶成恐咁瞓下醒下咁囉﹐唔係驚佢發燒呀﹐係驚我「中頭獎」呀﹗
有朝重食咗佢幾野「佛山無影腳」﹐佢踢完自己都醒咗﹐重話頭先發夢我唧佢﹐所以佢向我起飛腳喎﹗
好彩我個肚得D 肥腸肥膏﹐如果有個BB喺度的話﹐怕且經已比口水禧由個肚踢咗佢上我喉龍準備嘔出嚟喇﹗
喺屋企打咗成日凳嘅口水禧原則上已經無事﹐只係淨返D咳同痰而已。因為佢之前勁多鼻涕﹐食咗隻藥會幫佢「製造」D咳出嚟等佢咳晒D痰(唔知mucus係咪叫痰﹐是但喇﹐總之係喉龍同鼻哥之間上上落落﹐黏黏滑滑嗰篤野喇﹗)出嚟﹐不過條友唔識吐痰﹐所以D痰都重喺喉龍﹐有時咳都聽到有痰嘅聲﹐不過已經少咗好多。
跟住無再寫﹐因為寫嗰個都瀨咗野……
