校園欺凌

上星期﹐當我坐喺課室幫手做緊野嘅時候﹐放緊小息嘅口水禧突然走入嚟﹐高速「嶄眼」﹐呢個動作表示佢即將要流馬尿。細問之下﹐原來又係同一班同學倒佢食物盒入面D生果落地。於是我去捉咗嗰三條友入嚟「拷問」﹐三個當然否認﹐正當我迫供嘅時候﹐老師駕到﹐oh oh!結果嗰三條友被罰三日無小息。

放學嘅時候﹐口水禧話佢個水樽唔見咗﹐因為比隔離班個老師收咗。至於點解要收﹐口水禧話唔知。於是我同佢個班主任一齊去隔黎班度問個老師攞返個水樽﹐嗰個老師話﹕「啊﹗係呀﹐我收咗佢個水樽呀﹗因為頭先小息嗰陣我見到佢用水潑人﹐所以我收咗佢水樽同埋time out佢。」當時嗰個課室有另外一個家長同嗰個老師講緊野﹐所以我哋無再傾落去﹐攞咗個水樽就走。

返屋企嘅路上﹐問口水禧點解要用水潑人﹐佢話因為同學倒佢D野食落地﹐佢停唔到D同學﹐所以用水潑人。

越諗越火滾﹐一腳油踩返返去學校。係呀﹐去揾嗰個老師算賬。

怒火沖沖﹐心中諗﹕「你老闆個八婆(PG指引)吖﹐我個仔比人老恰﹐你罰我個仔﹖已經無野食比人倒晒落地﹐你重要唔比水佢飲﹗」 (angry)

行到差唔多到個課室﹐好彩突然一個冷風吹醒咗就快想同老師開拖嘅呀媽。結果我無入嗰個老師嘅課室﹐我去咗口水禧個課室同佢個班主任講咗先。無嘅﹐點都要比返D面個班主任﹐等佢去處理好D。我去﹐咪盞搞到call警察﹐揚名立萬﹐我個仔即刻失學喇。

班主任見我行返轉頭氣沖沖都有D愕然﹐心中有數我唔係嚟傾計﹐係嚟算賬嘅。我心諗﹐你班人唔好好比個交待我﹐以後所有野唔好叫我幫手做。我即刻home school我仔﹐唔Q讀。

老師以為我嬲嗰三條細路﹐因為佢哋已經唔係第一次倒口水禧D野食﹐而我又警告過佢哋。其實我無嬲嗰三個細路﹐唉﹗得嗰六歲人﹐貪玩好出奇咩﹖我預咗佢哋會再倒架喇。但我最嬲嘅係隔離班個老師﹗ 不論係一個老師又好﹐蛋散又好﹐唔好淨係憑你對眼睇到就當係事實嘅全部。問都唔問發生咩事就當郁手嗰個係錯。我唔係幫住我個仔講野﹐變咗做怪獸家長﹐我叫老師查清楚究竟點解同學要倒口水禧嘅野食而唔去倒其他同學嘅野食﹐如果比我知道係口水禧先撩人嘅話﹐我會罰我個仔。但我覺得作為一個老師﹐你唔幫手解決同學間欺凌問題已經係好錯﹐重罰個比人欺凌嘅受害者就超錯﹗ 好彩係幼稚園﹐欺極都唔會離譜到去邊﹐如果係小學﹐中學呢﹖ 我點同我仔解釋好呢﹖ 明明係老師錯﹐同學錯﹐但點解只得我仔受罰﹖ 如果係大家一齊罰﹐我條氣都順D。我同口水禧講﹐下次再係咁樣﹐唔好潑水(我相信我仔潑水係有原因﹐可能係嗰三個同學郁手郁腳)﹐快D走去報串比大人知就得架喇。

班主任話一定會好好處理呢件事﹐因為佢覺得欺凌問題一定要從小開始教育﹐因為細個唔教﹐大大下D細路就會覺得欺凌同學係理所當然嘅事﹐無乜唔妥。到十幾歲嗰陣你先想教返好佢哋就難過登天喇﹗

結果第二日﹐班主任話隔離班個老師知道真相大講sorry。我心諗﹕超﹐又唔係親自嚟同口水禧解釋。不過算喇﹐最緊要係口水禧知道老師同我有做野﹐以後佢再遇到呢D問題要自己主動去解決喇﹐呀媽唔可以下下都幫佢出頭架﹗

至於嗰個老師﹐我見到佢時我面上仍然有笑容 (smile)