口水禧每日返學前會食一碗牛奶溝粟米片或者朱古力醬搽麵包﹐加杯奶同雞蛋。十點半茶點食生果﹑芝士條同乳酪。放學返到屋企﹐因為已經下晝兩點幾﹐距離晚飯時間只有三幾個鐘頭﹐所以我哋通常都會食麵包﹐飲杯野就算。晚飯六點幾開始食﹐食完食埋生果就要沖涼準備瞓覺。九點前就要去揾周公喇。
望落好似無咗午餐﹐其實嗰餐麵包咪就係午餐囉。有時會夾芝士火腿﹐有時就咁搽朱古力醬就算。其實好飽肚﹐佢食完去游水游成粒鐘返嚟都未覺肚餓。正餐唔係一定要粥粉麵飯先算係正餐﹐飽肚又唔會係垃圾食物就好。
我哋好耐無食飯類﹐通常都係一人一份碟頭餸﹐例如燒魚或焗雞加燈籠椒﹑菰﹑豆﹑菜之類。準備時間短又快又方便。其實營養唔會少過三餸一湯。食完清潔容易﹐唔係洗一大輪廚房﹐又可以準時踢佢去瞓。呢個好重要呀﹐佢瞓咗之後就係我耳根清靜之時﹐好爽﹗好重要架﹐比佢煩咗一日﹐確係需要一D時間嚟平靜繁忙嘅一日。
放假唔洗趕返學接放學﹐變相食早餐食幾粒鐘﹐橫誇埋午餐時間。下晝兩三點先覺肚餓﹐唔想食麵包又費時煮野﹐決定焗個brownies﹐一人一杯野就算。咁大個人﹐佢第一次食棉花糖溝奶。嘩﹗原來放棉花糖落啱啱焗好嘅brownies係幾好食架喎。兩三舊﹐飽到晚餐。
隻公仔真係好樣衰﹗
