我屋企有三個人好神奇﹐佢哋一日(被迫)瞓好少覺。
有一個夜晚九點幾睇睇下電視就會去會一會周公。但半夜一﹑兩點會起身﹐然後有時臨天光可以瞓返﹔有時可以一日都唔洗補瞓。
另一個夜瞓﹐但可以成日話自己成晚都無瞓著。一個星期可以連續幾日都係咁。
重有一個晚晚要兩三點先瞓得著﹐咁樣先可以一覺瞓到天光。一點前瞓的話﹐有時瞓兩三個鐘就會醒一醒。好彩嘅「煎一陣魚」(反嚟反去)會瞓得返﹐唔好彩嘅﹐臨天光就嚟要起身先開始眼瞓﹐但已經唔可以再瞓﹐焗住全日都
。
我就係第三個奇人喇。咁樣嘅睡眠習慣已經好多年。前幾年因為頸痛﹐瞓得重衰﹗ 而家無再頸痛﹐但瞓瞓下會醒呢樣就仍然纏擾住我。所以我成日同禧爸講﹐我係夜更看更嘅最好人材﹐因為我可以合埋眼瞓但少少聲或者無聲我都會醒。我屋企邊個半夜去廁所邊個行出廳﹐我全部都知。所以第時口水禧諗住半夜偷出街都好難過到我嗰關﹗
中學嘅時候﹐每晚我瞓四個鐘頭就要起身返學。課堂上唔會恰眼瞓。但我唔可以通頂﹐夠騎呢喇啩﹖
開始跑步後﹐我以為夜晚會好瞓D﹐點知無乜改善。朋友教過飲鮮奶飲茄汁﹐起身交水費重大獲﹗
瞓前拉下筋﹐都無乜改善睡眠質素。早排食隻會眼瞓嘅咳水﹐食完係好快想瞓﹐但持久力唔夠﹐瞓著一兩粒鐘後就會醒﹐因為之前藥力嘅問題引至嗰兩個鐘裡面出力咁瞓﹐結果叉足電醒咗後變咗半夜到天光都瞓唔返。
呢個禮拜口水禧唔洗返學﹐我變咗無得去跑步﹐唯有夜晚喺屋企拉完筋﹐再做sit up﹐嘩﹗終於意外揾破解我呢個多年嘅失眠問題﹗ 做完sit up﹐沖完涼上床聽一陣歌就自然想瞓覺﹐重可以一覺瞓天光﹐八粒鐘無乜點醒﹐八粒鐘呀﹗以前要兩日加埋先有咁多﹐而家一晚就有喇﹗
如果呢個真係破解失眠嘅密碼﹐咁我好快應該會有六舊腹肌。
下年可以去選美……去選亞洲先生﹐大show我周身嘅肌肉﹗
