口水禧人生第六個生日係喺一連串嘅節目中渡過﹐可謂節目豐富﹐無野爭佢喇。以一連串嘅節目替代生日會﹐我個人嚟講係OK嘅。
﹐我仍然未有心理準備幫佢搞生日會﹐平時喺學校對住咁多細路﹐我已經好飽好濟下﹐生日會要準備嘅功夫我實在係無能為力。或者要等佢再大D﹐唔止佢自己定D嘅時候﹐亦都係佢D朋友都定D嘅時候先搞個生日會招呼佢嘅朋友嚟打機食野喇﹐而家呢個年紀嘅朋友仔太細﹐周屋走周屋「爆破」﹐我心臟實在應付唔嚟咁大嘅挑戰﹗
就因為佢無生日會﹐於是根據佢嘅喜好﹐我哋都喺生日前後安排咗佢鐘意嘅活動比佢嘆。第一炮就係去動物園。嗰排睇咗Madagascar之後﹐佢就突然戚起條筋話要去睇長頸鹿同斑馬。
因為係閑日嘅關係﹐禧爸唔得閒同我哋顛﹐唯有將伴遊呢個重大任務交比我。兩母子喺屋企食好早餐就出發去動物園。對上一次得我同佢去動物園已經係佢重喺雞雞學校嘅時候﹐有一次同兩個同學仔一齊玩咗幾粒鐘。舊地重遊﹐又得返我哋兩母子﹐眼前嘅佢已經同上一次好唔同﹐以前會亂咁走﹐唔睇動物唔理人﹐完全唔知去動物園係「為咗睇動物」呢個簡單任務。帶住一個六歲嘅小朋友﹐感覺好得意﹐無奶粉袋﹐唔洗下下追住佢﹐唔洗下下問住佢去唔去廁所﹐完全覺得我自己都可以輕鬆逛下動物園四圍睇下﹐何其爽﹗
而家人哋影相要型﹐所以唔會輕易再笑。
終於喺六歲嘅時候搞清楚奧班馬同斑馬係唔同嘅野嚟嘅。以前帶佢去動物園一見到斑馬﹐佢就會指住大叫奧班馬呀﹗
成個動物園得呢度先可以真係好近距離咁接觸屋企無嘅動物﹐有人一見到D羊﹐即刻拔足逛奔﹐朝住D羊衝過去﹐羊仔即刻四散﹐快閃。
走淨呢隻唔好睬﹐焗住要應酬下隔離個傻佬﹐又比佢摸又比佢用梳梳頭﹐羊仔個樣好無奈。幾次想走﹐但都比隔利位人兄欄截﹐跟住又一輪毛手毛腳﹐D羊脾氣真係好﹐煩咁耐都無任何起勢想兇走口水禧嘅衝動。間唔中重要硬食口水禧個呀媽幾野周圍夾攻﹐可謂蝕底晒比我哋兩母子﹗
去完動物園嗰日嘅晚飯﹐我哋帶咗禧哥去banana leaf﹐自從呢位呀哥出咗世後﹐呢間野我同佢老豆淨係大時大節先去架咋﹐見係禧哥生日﹐一於同佢慶祝下﹐食好D喇。當然喇﹐對佢嚟講係無乜感覺的﹐有得玩先係最緊要。餐廳派咗D蠟筆比佢畫畫﹐佢就係唔會嘥咗人哋嘅心意﹐一於博晒命咁畫﹐一係就寫字﹐拿﹗隔離檯唔知可能以為我係虎媽﹐連出街食飯都要迫個仔寫字。
雞沙爹﹐成串咁嚟喇。呢條友唔知點解好鍾意食黃薑飯﹐有嗰碗野喺度﹐佢有本事齋食飯而嫌棄我哋夾比佢嘅餸。呢串沙爹﹐佢真係好比面食架喇。而家嘅小朋友大多好幸福﹐有飽飯食重要嫌棄地話「點解你要比咁多野我食架﹖」通常都有鬼佢食到幾多就幾多﹐因為發現迫佢食的話﹐佢會變成好憎食野。加上我喪驚佢飽過龍夜晚又嘔﹐要我清佢D嘔野﹗
佢而家識得決定自己要食幾多﹐我哋有得佢﹐要佢知道飽唔飽都後果自負。
唔知呢個生日節目佢幾時會覺得嚴呢﹖我哋一共去咗兩次。第一次去嗰日凍到PK﹐日頭得-5度﹐夜晚食飯時室外係-8度。我哋日頭去玩嘅時候重要喺落緊雪嘅室外排咗兩個鐘頭隊報滑雪班。我哋著晒架生嘅都凍都隻野咁﹐真係唔知嗰D就咁著條牛仔褲加件外套嘅人係點樣頂到咁凍嘅溫度之下喺室外排隊架呢﹖
完全好難影相﹐因為每次喺手套伸對手出嚟唔洗三秒﹐D骨凍到痛﹐痛到揸機都有困難。影完戴返手套都良久無晒知覺。後來發現戴mitten(無分開D手指位嘅嗰種手襪)會暖好多。結果因為太多人排隊﹐搞到我哋報嘅堂都過晒時間﹐只有口水禧可以學半粒鐘﹐我同禧爸就喺雪中食風。頂﹗
-8度嘅餐廳外﹐地下結咗冰﹐好易「撲街」﹗我都整咗幾野半字馬﹗
嗰晚最低溫度係-21度。但我哋無過夜就走咗﹐超運吉﹗
後來有人唔訓氣無得學﹐決定第二個禮拜再去﹐今次要過夜﹐因為如果真係想學識滑雪的話﹐得嗰幾粒鐘係唔夠喉的。
2011年無乜雪﹐搞到D滑雪場要噴人造雪頂當。2012年D雪多到﹗
第二次去無第一次咁凍。日頭都有返0度。第一晚同呢兩父子同床﹐救命﹗中間嗰件蛋散踢到我飛起﹐重要間唔中大巴大巴咁車埋嚟。張床褥「林」到我要扶住側邊個床頭櫃先勉強唔會跌落地。嗰兩件粉皮重要訓到有鼻鼾﹐對於一個成晚都瞓唔著﹐秒秒都喺度扶住個櫃頂住等自己唔會跌落地下﹐背後有個「葉問」猛咁起腳起手當我木人X咁打嘅可憐嘅我﹐眼光光望天光﹗我想去梳化瞓﹐但唔知邊度有其他被﹐於是嗰晚我就係喺被前後夾攻之下擘大對眼過嘅﹐一直至到第二日全日我都瞓唔著﹐黐線﹗嗰兩個梳乎咗一晚嘅兩父子第二日瞓得好飽咁去咗上堂。我諗住留喺酒店補瞓。中間好似有瞓著過一下﹐點知突然有班人喺出面走廊嘈到爆炸﹐跑嚟跑去﹐就係咁我就無再瞓過﹐火滾都爆炸﹗
當晚我打死都唔再同嗰兩件蛋散一齊瞓﹐我決定搬幾張梳化合埋變一張單人床位﹐人有劏房﹐我有劏床﹐問你服未﹗
兩個熱戀中嘅父子高床軟枕……
唔好講笑﹐好瞓好多﹐至少唔洗比「葉問」打獲甘﹗我唔洗再遮住個頭瞓﹗禧爸話佢可以瞓梳化我瞓床﹐我梗係唔制喇﹐黐線﹐我先唔同口水禧瞓﹗雖然無瞓超過三十個鐘﹐但都唔係真係瞓得好好﹐不過好過無。唔知瞓咗幾耐聽到鬧鐘響﹐重諗﹕「嘩﹗咁快天光架喇﹐好似瞓咗唔係好耐咁嘅﹐不過可能係瞓得好﹐所以都唔知過咗咁耐﹗」由於口水禧未起身﹐我費時喺梳化嗌過去叫禧爸開返暖少少個暖氣﹐於是我就whatsapp禧爸喇﹐但等咗一輪都唔見佢郁嘅﹖明明頭先鬧鐘響見佢攞咗個電話嚟睇架喎﹗正當我想再whatsapp佢問佢做乜重唔起身時﹐我比我眼前嘅野嚇咗一跳……
唔洗講都應該知係邊個粉皮嘅傑作喇﹗真係由細都有鋪較鬧鐘嘈醒人嘅癮﹗
後來先知﹐原來12:30am嗰個係倒數﹐個衰仔喺餐廳撻咗佢老豆個電話靜雞雞較幾粒鐘倒數﹐結果倒數到12點半就響喇﹗
第二日﹐連埋我都要去上堂。其實我真係有陰影﹐如果你曾經跌過重裂埋骨的話﹐你會明白點解我咁驚。但無計喇﹐我唔想以後都企喺山腳望住佢哋﹐唯有頂硬上喇。一個導師負責教佢兩個﹐另一個就負責教我。
一開波喺平地暗斜上練下點剎制﹐真係超唔掂﹐我係唯一一個會企喺度都會慢慢自己sir咗去炒圍欄嘅人。
內心有無數嘅粗口喺度燃點﹐好想即刻除鞋上車瞓覺呀我﹗但錢已經比咗﹐炒完欄企都企唔到起身﹐真係上將自己個頭埋入去D雪度。再炒咗幾獲之後(我有理由相信再炒多幾野﹐我要賠錢比人﹗)﹐個導師話要搭嗰D吊車上去山腰sir落嚟。真係唔好講笑﹐腳都軟﹗
sir仆sir仆sir仆變sir仆滾sir仆滾……整整兩粒鐘裡面﹐我不定重複呢幾個動作。導師教我轉左轉右﹐我開頭係轉到右轉唔到左﹐後落學識咗轉左又變返轉唔到右﹐仆到隻橇都飛咗去﹐佢重要我唔准扶野就咁起身﹐大佬呀﹗你面前嗰個人就快四張野架喇﹐你估我有輕功咩﹐點就咁起身呀﹖我當時重身處山腰上喎﹐斜架喎﹐點起呀﹖
記得之前一日禧爸佢哋上完第一堂返嚟講我知有個細路喺山上直線落嚟撞柱﹐搞到我幾驚D柱呀﹐但偏偏個導師要我喺D柱之間轉左轉右﹐頂﹐我對腳唔受控制﹐導師嘅智利英文又唔係咁流利﹐所以我到差唔多落堂先知佢想我轉彎嗰陣對腳要點擺﹗唉﹗真係﹗
一個殘忍嘅事實 – 當你發現你失控然後撲街重要滾落山﹐打咗N個白鴿轉之後先曉停﹐過咗幾十秒你個導師先嚟救你的話﹐即係你已經對佢嚟講係「長輩入門級」。即係咩呢﹖即係你已經對佢嚟講唔係妙齡少女﹐無晒吸引力﹐佢都費事理你死活。假如你十幾廿歲﹐青春卜卜脆的話﹐莫講話你會撲街喇﹐你直頭唔會跌落地喇﹐你個導師直頭想攬住你嚟sir喇﹐係咪先。
我﹐唉﹗我個導師係……當我滾完係曱甴反肚掙紮嘅時候都唔會第一時間拉我起身。跌咗N次之後﹐佢直頭係慢慢sir過嚟話我頭先邊度做得唔好﹐講嘅時候﹐我重喺度抹緊我一面都係嘅雪。WTF﹗
算﹗我下次要揾個60歲嘅教我呀﹐咁樣我對於佢嚟講重係超索架﹗
我唔要揾後生仔教呀﹗頂佢﹐我導師話我似佢呀媽﹐因為佢呀媽學嗰陣都係E嘩鬼叫喎﹗禧爸個導師話以為禧爸同口水禧係兩兄弟喎﹗頂佢呀﹗我就似呀媽﹐我老公同我個仔似兩兄弟﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖﹖
我要發射導彈去智利呀﹗
唔係我嚟嘅﹐係嗰「兩兄弟」呀﹗
佢哋sir嘅位置就係我學sir落嚟嘅位置﹐而呢兩兄弟係喺右手邊再高D嗰度sir落嚟嘅。
放完假後﹐口水禧就係star of the week﹐即係嗰個月生日嘅小朋友要做一張關於自己嘅海報介紹自己。呢張野係我同嗰「兩兄弟」一齊咗做嘅。原來我個仔嘅我的志願已經由倒垃圾變咗獸醫或直昇機師。老師好鍾意張野﹐因為其他D同學做得好是但﹐空空哋﹐得幾粒字兩三張相。口水禧係傾家蕩產咁黐晒佢D貼紙落去﹐幾乎想連D字都貼埋﹗
通常都會叫家長嚟學校﹐因為同學仔會寫出對生日嗰位同學嘅感想﹐老師會叫家長讀出嚟﹐然後讀下故事書咁。口水禧都算有晒飛屎喇﹐唔單止個呀媽出席﹐連佢個「呀哥」都有出席呀﹐之前都唔係個個同學嘅家長會嚟﹐莫講話父母都會嚟添。物質定精神上嘅支持﹐我揀後者。我見過媽媽話嚟但之後又無嚟嗰一刻﹐小朋友面上失望嘅表情真係好殘忍﹐佢哋唔應該受呢D罪﹗
佢要我讀一本叫if you give a cat a cupcake比佢D同學聽﹐好彩喺雞雞學校訓練咗兩年﹐讀故事書兼要控制班友唔好失控﹐對我而家嚟講﹐無難度。讀完每人派個cupcake仔佢哋食﹐皆大歡喜﹐小朋友應該就係咁過日子。
見到個個同學都畫貓比口水禧﹐證明佢喺班入面都唔係無朋友﹐至少同學都知佢鍾意乜野。對我嚟講﹐呢幾個月嘅幼稚園生涯﹐口水禧應該係過得幾開心嘅﹐做呀媽嘅﹐就係想咁簡單啫﹐小朋友開心就好喇。
唔洗估我係咪返咗HK喇﹐因為我哋今年唔會喺香港發財喇﹐因為學校唔比無喇喇放假。我潛水係因為咩﹐你有睇開的話﹐無理由唔知架﹖
嘩﹗唔掂﹐要去瞓喇大佬﹗我唔想下年真係要揾個80歲嘅嚟教我滑雪呀﹗頂﹗諗起我似呀媽﹐嗰兩個似兄弟真係重有D慶慶哋﹗
