)咁坐喺飯枱前上網。上兩個禮拜﹐班中好幾隻病貓﹐又咳又打乞懥又流鼻涕又發燒﹐真係你想點都有﹐直覺覺得口水禧都好快會加入埋一份架喇﹐結果拖咗兩個禮拜﹐真係「得咗」﹐前晚開始發燒﹐尋日倒下請假喺屋企「痞登」。做個負責任嘅成年人﹐個仔發燒就要留喺屋企隔離﹐我唔會教個仔講大話扮無病夾硬去學校播菌嘅。
好幾次﹐D細路比老師問佢係咪病﹐細路搖頭話無﹐然後偷偷喺我耳邊爆比我知「my dad told me not to tell anyone that I’m sick. I’m actually sick today. But you don’t tell anyone, ok?」
(我其實真係病呀﹗但我老豆叫我唔好話比人知我病﹐你唔好話比其他人知呀﹗)
佢老豆就係教漏咗個仔﹐連上面同我講嘅嗰D都唔好同人講呀嘛﹗
我無爆小朋友大獲比老師知﹐小朋友無辜﹐老師知道佢講大話實鬧﹐況且我爆佢一次﹐佢以後就唔會再信我架喇。所以我只可以同小朋友講下次佢要教返佢老豆﹐學校規定發燒係一定要留喺屋企唔准嚟學校架。
教小朋友講大話嘅家長﹐以後佢就知味道。但好多時到個細路真係講大話呃父母時﹐D父母又打又鬧怪個細路講大話﹐我係個細路就真係R爆頭﹐當初係邊個教我講大話呃老師話自己無病架呢﹖
呢輯相影咗好耐﹐所以唔洗問幾時剪髮﹐而家D頭髮……更長﹗
好耐之前睇過一篇娛樂新聞﹐講陳慧琳個大仔嘅髮型似女仔。後來喺某個forum見到有D人話佢個仔個頭點樣唔好睇﹐男仔留咁長好核凸之類嘅說話﹐當時睇完覺得好反感﹐小朋友個髮型啫﹐唔洗講得咁盡呀嘛﹖又唔係佢哋個仔﹐人哋呀媽鍾意留幾長留咩樣又關佢哋事呢﹖或者人哋留嚟有原因架呢……遮疤痕﹑襯頭型﹑小朋友唔肯比人剪頭髮﹑屋企人覺得好睇…..
喺blog度講佢個頭似女仔我係唔介意嘅﹐因為我仔睇唔到亦唔方會明。但兜口兜面對住佢講話佢似女仔頭﹐核凸之類嘅說話呢﹐我接受唔到﹐我係會反擊的。
上個禮拜﹐班中有個女仔走埋嚟同我講話有個男同學話佢醜樣﹐講講下比老師聽到﹐老師好慶﹐走埋去省咗個男仔一獲﹐重叫佢去班房後面”get to the back of the classroom, I don’t want to see your face now!” (你即刻同我去班房後面呀﹐我而家唔想見到你﹗) 跟住轉身同個女仔講”don’t believe him, you’re really beautiful!” (唔好信佢講嘅野呀﹐你真係好靚架﹗) 然後老師就去咗班房後面感化個男同學﹐再要求佢即刻同個女同學道歉。
有D人迷信講反話嗰套﹐我唔信的。如果真係覺得唔應該讚﹐我會選擇唔講野或講其他野﹐我絕不會對住個細路話﹕「你好醜樣﹐你好曳﹗」我最多講過「抵打」﹐不過而家連呢個都唔講了。
你或許覺得我誇張﹐但欺凌行為的確要盡早教育﹐要被教育嘅唔止係小朋友﹐大人都要被教育。
老師細個喺比較多黑人嘅區讀書﹐佢話以前白人喺嗰區好少數﹐所以佢日日返學都比人打比人蝦。尤其佢細個身體好差﹐面色好難睇﹐佢日日返學都比同學比老師笑佢個樣﹐所以老師好憎人欺凌行為。
有一日我坐喺課室做緊野﹐聽到班細路吹水﹐講緊口水禧鍾意貓嘅事。細路吹吹下開始亂講野﹐其中一個問口水禧﹕「你係咪成日食貓屎架﹖」比我同老師聽到﹐即刻比我哋重新教育。小朋友話係口水禧自己同人講佢食貓屎先﹐我諗條友係將cat food 同cat poop個音講得好似﹐同學聽咗做cat poop﹐所以以為口水禧話自己食貓屎。真係比佢激C﹗
我覺得而家呢個年齡先係開始真係體會咩叫教仔﹗ 佢哋識駁嘴﹐有獨立思想﹐識反抗﹐識攪對抗同玩野﹐真係個腦未瞓醒都唔係佢哋對手。我屋企嗰件就唔洗講喇﹐呢幾樣野都有齊﹐不過叫做重肯屈服喺我嘅淫威之下﹔但佢D同學就真係……我對佢哋嘅老師真係服到五體投地﹐日日對住班豆丁﹐真係人都顛﹗老師話隔離班D老師都話﹐對住班野﹐日日做得最多嘅就係yell(呼喝)﹐因為佢哋嘈到連老師講野都聽唔到。有時老師唔呼喝得D學生﹐就等我哋呢D義工家長嚟做衰人喇﹐但我哋唔係鬧佢哋﹐只係大聲叫quiet! shuuu!!! 我聲夠大﹐眼夠兇
﹐都鎮得住下﹐不過都唔可以成日做﹐如果唔係D細路以後都唔睬我或者吼我唔喺學校時恰我仔。
但總括一句﹐小朋友唔聽話都有原因﹐只係要睇下大人有無時間去研究點解個細路會有咁嘅行為﹐然後再睇下點教。我認我都有時會勁柄口水禧﹐尤其佢專吼我趕頭趕命嗰陣先嚟玩野的話﹐我會非常嬲兼大聲鬧佢。但點嬲都好﹐唔打細路係我嘅原則﹐底線﹐絕不超越呢條線﹗ 佢未返學之前﹐我好似試過一次打過佢個pat pat一下﹐唔記得因為咩原因﹐佢嗰下嘅眼神已經話咗比我知我無論咩事都唔可以打佢(個人覺得小朋友比人打同比人鬧嘅眼神好唔同﹐大家唔洗試嚟證明我講得啱唔啱嘅)。自嗰次之後無再打過佢﹐之後去咗雞雞學校﹐更加明白打係無用的。
上兩個禮拜﹐有人做電腦數學功課時發脾四﹐減數做得一遢糊塗。9-8﹐7-6嗰D叫最難做喎﹐重要撞答案添﹗ 激C我﹐慶得際熄咗佢部電腦叫佢無心機做咪鬼做﹐自己同老師解釋點解無做晒。有人喊住話想做喇﹐因為驚老師鬧佢唔做功課。呀媽丙佢﹐做功課唔係為咗同老師交代﹐如果係單單為咗驚老師鬧而做功課﹐唔好嘥我電費同時間﹐咪鬼做。功課做嚟係為咗要學野﹐唔想學野嘅話﹐第時乜都唔識﹐淨係想喺屋企玩同食的話﹐我唔會比佢喺度住﹐佢要搬出去。佢非常R底﹐係都話要開返機做功課﹐但有見佢已用晒D能量嚟喊﹐再開機做功課都無用。嗰日休息一天﹐但唔可以玩玩具﹐齋坐。
早排﹐呢條友仔話佢讀完小學就唔讀書喇。我以為佢有咩偉大理想﹐點知佢話淨係想喺屋企同mimi玩﹐咩都唔想做。我叫佢唔讀書返學就去揾工做賺錢喇。佢開頭連工都話唔做﹐齋玩過日子。豈有此理﹐想做蛀米大蟲﹖﹖﹖﹖﹖我話﹕「你唔讀書返學﹐又唔做野賺錢﹐淨係想玩的話﹐我唔可以比你喺度住﹐你要搬出去。因為我間屋唔可以住懶人。」但我好想知咩原因令佢話讀完小學就唔讀書﹐係唔鍾意間學校吖﹑唔鍾意老師同學吖﹑唔識做功課吖﹑定係咩原因呢﹖最後發現﹐佢話佢唔想學野﹐而佢所講唔想學嘅係我平時喺屋企叫佢學做嘅家務﹐例如佢唔想學洗食物盒﹐唔想學摺被摺衫等等。(頂佢吖﹗)同樣道理﹐唔幫手做家務﹐都唔可以喺度住﹐住得喺度﹐人人有責任做家務。
過咗幾日﹐佢又話讀完小學就去揾工賺錢。
今次我同佢講﹕「第一﹐無人會請咁細個嘅人做野﹐所以你唔會揾到工做。第二﹐你淨係識小學程度嘅野﹐唔會好多工你識做﹐你只有一D體力勞動嘅工作如幫人洗車﹑洗廁所倒垃圾嘅工﹐呢D工唔係犯法嘅工﹐你去做都無問題﹐只要你願意。但你唔好諗住做呢D工作﹐你就會有好多時間玩喎。」
佢聽完話﹕「我唔想洗廁所。我想醫動物揸直升機做太空人。」
我話﹕ 「你想做嗰D要識好多野﹐學好多野架喎。你唔識野點醫mimi呀﹖醫死咗佢點算呢﹖揸直升機都要識好多野﹐如果唔係架機唔飛架喎﹗做太空人要學好多野架﹐架太空船好多制要o禁﹐你唔識控制架野﹐你喺太空落唔返地球架喎﹗」
佢話﹕「咁……我讀埋middle school喇。」
我﹕ (頂﹗) 總之你讀幾多都要幫手做家務﹗ (我知你籠野……返學=學野=學做家務>>>返學=學做家務﹐唔返學=唔洗做家務
)
自嗰次感化完後﹐有人好咗少少﹐平日有時間嘅話﹐我會叫佢做15分鐘加減數電腦功課﹐佢自己星期六日會同佢佢老豆做45分鐘。結果呢個星期贏咗比賽﹐獎品係……可以同校長對食pizza。 校長為咗鼓勵學生們做多D數﹐呢兩個長週末搞咗個比賽﹐每級做得最多條數啱得最多條嘅學生就可以贏得同校長食pizza嘅機會。尋日同學嘅媽咪電郵通知我﹐我話比口水禧知佢贏咗比賽﹐佢陰陰嘴想笑又唔好意思個樣﹐我知道佢其實好開心﹐重話明日同校長對食pizza時會考下校長5-4等如幾多喎﹗ (仔﹐點解你會覺得減剩1嘅數係最難嘅呢﹖﹖﹖﹖﹖
)。佢今日重問住幾時再做D電腦數學功課﹐係咪想下次如果有得又同校長食pizza時問人9-8等如幾多呀大佬﹖
個個月都有party﹐嚟緊下個星期又到睡衣日﹐遲下又有唔知復活節同st. patrick’s day。我第時應該可以去開間PR公司專幫人搞party! 聽講下年一年班開始就唔會有咁多野搞﹐亦都唔需要成日揾人去課室幫手﹐希望我下年終於可以送咗佢返學後做自己想做嘅野。有時發現﹐學校嘅事用咗我好多時間﹐有時連屋企野都唔得閒做。口水禧日日都要做15分鐘嘅語言練習﹐有時放咗學返到屋企已經要煮晚飯﹐食完飯食生果跟住滾水淥腳要掃佢上床瞓覺都做唔到練習﹐莫講話幾桶衫未摺未洗未乾。
所以﹐下年我真係要好好做返自己野﹐例如去讀書﹐做屋企野﹐去做運動等等……除非校長出人工請我去做野喇﹐咁又唔同。
農曆新年party﹐呢D係老師幾廿年嘅存貨壁報板裝飾﹐係呀﹐外國人重停留喺呢隻style嘅中國新年佈置。禧婆婆同肥玲買咗D香港新式揮春比我攞去學校﹐老師唔明點解會有thomas and train同大口仔喺揮春上。
唔好講笑﹐其中一個盒裝住成疊陰司紙﹐老師話係以前有D家長比佢攞嚟新年整上壁報板裝飾喎﹗真係好重中國風口味喎﹗ 經我嚴重警告過之後﹐我諗佢呢世都唔敢喺農曆新年再攞疊野出嚟耀武揚威架喇﹗ 我以前去睇人哋D open house﹐真係見過有D外國人想將間屋佈置到好中國風﹐竟然喺床頭放幾疊溪錢同陰司紙喺度﹐重係原裝有條草繩成疊野紮住未拆嘅添﹗佢哋覺得好有中國風嘅特色喺度﹐我估九成都係唔知疊野其實係要嚟做乜嘅。
老師重有D著住越南人衣著嘅紙人﹐戴住尖頂嘅藤帽﹐著D深啡呀﹑深藍嘅衫﹐個樣苦口苦面咁款﹐我叫老師丟Q咗佢喇﹐佢重問﹕「乜唔係中國人新年嘅look嚟咩﹖」我話「嗰D係越南人嘅服裝嚟架﹐重有呀﹐中國人新年嘅人物係唔會苦口苦面﹐嘴角向下架﹗睬﹗」跟手指比佢睇上面壁報板同燈籠嘅公仔佢睇﹐我話「你睇下﹐D公仔要肥﹐塊面紅當當﹐笑笑口﹐D衫七彩咁先係中國人新年嘅公仔look呀﹗」
雖然唔係龍年﹐但外國人對龍嘅迷戀仍然係好重嘅。點都要整條龍架喇。佢哋重以為舞獅條野係龍﹐叫dragon dance﹗
嗰兩個禮拜﹐因為平時同我一齊做野嘅媽咪病咗﹐所有關於個party嘅事﹐包括去揾餐廳贊助食物﹑全部細路嘅剪貼工作由我一人承擔﹐朝早去學校做﹐夜晚喺屋企繼續開工做工廠妹至半夜﹐連續cher咗兩個禮拜後﹐飽受催殘同食得好滋味嘅強烈對比﹐成個party﹐我半粒飯都無機會食到。
捱多幾個月就脫苦海喇﹐下年真係唔得咁捱法喇﹐年紀大喇﹐唔保養好快收皮﹗
禧婆婆寄咗兩件呢D類似綿立嘅衫嚟﹐如果唔係因為個party﹐往年都唔會特登買嚟著。唔夠暖又唔會平時攞嚟著﹐著得嗰一次半次﹐唔好嘥錢。有個同學媽咪問我會唔會煮D特別野慶祝新年﹐我話我得三兜友﹐煮個大茶飯忙到一頭煙把鬼咩﹗第二日重要返工返學﹐咪搞我好過。以前未有口水禧時﹐我同禧爸夠膽大年初一放工返屋企唔想煮飯﹐一人一個公仔麵食咗就算﹐問你服未﹗
學校最近買咗ipad比學生用﹐一個禮拜輪到一日比班野學phonics﹐而家D細路真幸福﹐個個都未教已經識用。呢套學phonics嘅遊戲﹐我都有興趣學﹐以前真係無學過﹐完全唔知咩叫vowels同consonant﹐重有好多其他野都唔識。有時口水禧問我點解個字開頭係Ch﹐發音會係chi而唔係「卡」音架呢﹖我真係唔識解喎﹐我淨係識讀咋喎。原來英文字最前面嘅發音未必只有來自第一個字母﹐有時係將頭兩個字母撈埋發咗另一個音。一係我無聽書﹐一係老師無教。其實以前我嗰個年代﹐唔係個個老師會教拼音﹐學英文生字係死串死記﹐所以有得溫嗰D就100分﹐課外讀默即刻P晒K﹐就係因為唔識拼音﹐完全唔知隻字點串。口水禧而家可以憑個字頭加少少中間嘅字母估到一D佢未學過嘅英文字讀法。有時佢會自己嘗試拼D生字﹐雖然係串錯﹐但都差唔多音﹐例如個graph字﹐佢會拼做graf﹐其實都好近架喇﹐只係佢未學ph都可以發fu音啫。
所以佢哋學英文字係唔洗死記﹐用拼音就可以拼到D字出嚟架喇。
旁邊係三年班嘅姐姐教佢哋點用部野同教佢哋做練習。
上年我哋去香港嘅時候﹐有朋友問﹕「你哋三條友喺外國無親人朋友又唔多﹐好似放逐咁﹐唔悶架咩﹖」早六年我會答你都幾悶﹔不過而家我會答你何止唔會悶﹐重嫌太多野搞添喇﹗
週末﹐我哋通常都會去D地方行下﹐有時係我跑步佢「兩兄弟」踩單車(諗起兩兄弟個講法就想打人﹗
)。沿住海邊跑都咪話唔爽﹐不過逆風時就跑得辛苦D。但當你辛勞咗五日﹐整一日去下D風景靚嘅地方輕鬆下﹐其實係好C服架﹐充晒電星期一又博殺過﹐我哋已經唔知幾多年無行商場喇。
上個星期去咗Sausalito﹐周圍都係船﹐重見到船屋添。我諗住船屋都幾得意﹐如果唔係因為怕海蕭的話﹐我都想試下。不過呢D係唔郁得嘅﹐間屋下面鑲住石屎﹐所以架野係唔會郁架。
有少少似大澳﹐不過無鹹魚無麥芽糖賣﹐重有一種野唔記得叫咩﹐白色嘅﹐用好似葉包住嘅﹐要蒸嚟食嘅﹐叫乜話﹖
帶佢睇下住喺水上面嘅人間屋係點﹐讀千卷書不如行萬里路。有D野唔親眼睇﹐齋睇書唔會明。
去到一個海皮地方﹐有D人坐喺草皮上瞓覺﹐有D喺海邊傾計飲下咖啡幾咁嘆﹗
口水禧完全唔理我哋兩個﹐佢自己有佢自己嘅世界。都好嘅﹐而家開始習慣下第時個仔大咗﹐得返我哋兩個老野互相依靠嘅日子係點過嘅。
猛嗌住要踢波﹐點踢啫喺海邊﹖省咗個波落海﹐唔通叫你老豆呀媽跳海咩老細﹗
海邊前係石灘﹐因為背光﹐所以我要跨過條路邊﹐踏出去D石堆上坐低先影到。有人又要跟住爬出嚟﹐我個人覺得無問題﹐邊有咁易PK吖佢﹐四隻手捉到實呀﹗呢個年紀﹐成日都問點解你做得我又唔做得呢﹖真係一日比佢問N次。有時無耐性會答佢「我係大人﹐我唔會整爛。」佢會駁你﹐「你係大人都係人﹐都可能會整爛﹗」你可以話佢無大無細駁大人嘴﹐但諗深一層佢邏輯上係無錯嘅﹐只係我真係要多好多耐性先可以拆得掂佢嘅問題。趕時間嘅話﹐真係會一句喝埋去叫佢唔好再駁嘴。但其實心裡面知道咁樣係唔得嘅﹐於是等得閒少少嘅時候﹐再捉返佢過嚟解一次佢知點解頭先喺鋪頭唔比佢搞人哋D玻璃碟。今日明唔等如下次會唔問點解佢唔可以掂喎﹐佢下次都仍然會再問架喎。
呢個係大人對小朋友嘅信心遊戲﹐你驚佢會打爛﹐佢又未必真係會打爛。你比佢試﹐佢又可能會打爛。但你唔比佢試﹐你唔知佢幾時先學識唔打爛野。買咗隻招財貓比佢﹐諗住都好快要掃玻璃架喇﹐好彩﹐隻野暫時重健在。我知佢每次都好小心咁攞住﹐因為佢驚打爛咗我以後都唔會再買。屋企我有得佢﹐但喺街外﹐我暫時未有勇氣去接受萬一佢打爛玻璃﹐我要眾目睽睽之下幫人掃玻璃﹗
得償所願夾佢老豆同佢踢波。老豆無運動一段時間﹐追兩野就索氣。大家可曾記得口水禧學踩單車時﹐佢老豆追住個仔單車跑嗎﹖如今不復當年勇喇﹗
結果由我出馬﹐唔好講笑﹐我細個都成日同D男仔踢波﹐當然唔係正式有龍門咁踢﹐不過追嚟追去搶波都難唔到我嘅。禧爸話我有跑開步﹐應該會比佢「襟」跑D﹐觀乎我嗰日嘅狀態都應該係比佢跑得。
我哋係好八嘅……見人哋有個碼頭仔﹐好奇心驅使下走落去睇下有咩。無喇﹐老豆又未發到有能力買遊艇﹐去踩下人哋個碼頭仔﹐見識下都好喇。
細路仔好奇心真係好勁﹐盡可能都唔好阻止佢連舊屎都想研究嘅心。
我認我好鍾意影佢哋兩個水中嘅倒影﹐因為咁樣﹐我先可以喺張相下面加上﹕
在水中央﹐有蛋散一雙~~~~
有無人識睇下呢個人嘅面相﹐將來會唔會買架遊艇過佢老豆呀媽坐下咁呢﹖
口水禧以為係呢支柱喺度郁﹐實情係個碼頭仔因為海浪而郁緊。佢走去摸下支柱要證實下我有無昆佢。
上返碼頭邊條橋﹐諗住度位影張合照﹐無意中影到兩父子呢張相。即刻浮出一句~~~在木橋上有蛋散一雙~~~
我最叻就係借人哋嘅身軀嚟遮我嘅身軀﹗雖則已經無咗十磅八磅﹐但慣咗影相揾人遮呢個習慣﹐戒唔甩喇。
近排嘗試淨比口水禧飲荳漿代替牛奶﹐睇下對佢嘅敏感症狀有無改善。由於我條脷衰格非常﹐我唔飲超市賣嘅荳漿﹐顏色唔妥﹑味道唔對﹐我都唔會飲。家中荳漿機因為磨好荳漿後要煮熱先可以飲﹐成日飲落覺得有燶味﹐所以都唔飲得。最後喺網上揾到唔洗用荳漿機都可以整到荳漿嘅方法﹐係就係麻煩D嘥時間D﹐不過整出嚟嘅荳漿好飲喎﹗呢攤野大概要搞成粒鐘先飲得﹐只要你唔嫌渣到手斷咁濟的話……整一次夠我哋三個飲三日。
D荳渣本來我用嚟洗面﹐後來領咗野搞到面發炎﹐禧婆婆話攞去做肥料一流。不過我未有時間整理我嘅花園呀。
呢個係口水禧假日嘅早餐﹐生果+麥皮+合桃+杏仁+flaxseed(唔知中文叫咩﹐不過個樣好似胚芽)﹑另外有荳漿一杯﹑麵包兩個﹑一隻蛋。閒日唔會比佢食麥皮堅果同生果嗰樣﹐因為條友食得太慢﹐真係食到人哋放學佢都未食完咁濟﹗
條友嘅抵抗力話堅唔堅(一樣賴野照病)話差又唔係最差 (已經比班中大部份嘅同學好)。聽D同學媽咪講﹐佢哋有比D細路每日食probiotics同維他命C補充劑﹐所以佢哋D細路唔多病。但我覺得不如喺食物裡面吸收重好過日日食幾種藥丸喇﹐總覺得食藥丸唔知有無副作用(因為食藥丸嗰位同學超hyper﹐日日都喺課室彈跳郁手郁腳停唔到落嚟)。所以我都係用返天然少少嘅方法放心D。
一月返去醫生度做一年一度嘅檢查﹐口水禧當時有51磅﹐身高四尺。美國嘅percentile都有80%。當然﹐呀婆仍然話太瘦太un。<<<<呢句野連醫生都識背返出嚟﹗
久違了嘅pancake﹐而家好少食喇﹐出街先有得食﹐條友整蠱做怪﹐要同塊米奇老鼠pancake嚟個法式濕吻打下招呼先。
完全唔掂﹐對蛋黃熟晒﹐扣晒分。
個汁鹹到PK﹐嗰日食完飲咗好多水﹗
寫咗幾日嘅blog差唔多喇。係時候去做運動減去我頭先口痕食咗件自家cheesecake喇。呢D野出得嚟行﹐預咗要還。食咗落去係要揾辦法嘔返出嚟。因為去學校做野兼口水禧病咗三日﹐我呢個禮拜完全無跑過步。上個星期六去抽血驗身﹐人哋話明12粒鐘前唔可以食野﹐我一時唔記得﹐食咗件cheesecake(又cheesecake!)﹐醫生話照抽﹐如果驗出嚟唔準嘅話就要再抽多次。頂﹐真係禍從口入喇今次﹗
你想知我跑咗幾個月步加夜晚做運動嘅結果﹖哈哈﹗ 高峰時期本人嘅體重係132磅﹐而家係118磅﹐食飽會變120磅。但我發覺體重少咗唔代表外型會有好大改變﹐肥嘅地方可能會細返少少﹐但本來唔肥嘅地方係無變過。所以望落成個人都係咁上下樣。不過眼壓減咗﹐體能好咗﹐精神好咗係真嘅。都三十幾歲﹐外型已經唔係最重要﹐內在健康先係最緊要﹐老咗副計可以行幾耐就係靠我而家努力。
放心﹐上面個egg benedict唔係成日食﹐對上一次食係舊年嘅事。
重有一樣野﹐破解失眠密碼證實係work嘅。自從我開始瞓前拉筋做sit up後﹐我夜晚睡眠質素好咗好多﹐唔會再個個鐘咁醒。就算間唔中醒咗都好快會瞓得返。一上床就眼瞓﹐唔似以前﹐煎幾個鐘頭魚﹐反嚟反去都瞓唔著。sit up唔係好多下﹐100野咁喇。慢慢逐日加﹐加到可以做到100下為止。可能你做20下已經想瞓呢﹗
