仍然有恙

尋日去醫生度再檢查﹐發現肺有痰﹐要食抗生素。我真係﹐上星期四開始咳嘅時候﹐我已即刻比咳藥佢食﹐只係幾日﹐重要係有藥物嘅對抗之下﹐D痰都咁容易走咗入去個肺度架呢﹖ 喂﹐老細﹐你個肺有無閘架﹖亂咁比人入去都得嘅﹖真係佢有痰入肺時﹐我比佢頂我個肺呀﹗ E呀﹗真係頂唔順要爆炸喇﹐我即時向醫生投訴﹐點解我比佢食嘅野咁健康﹐屋企又乾淨﹑作息定時又有運動﹑身高體重都合乎理想吖﹐成班同學仔中﹐佢都算頭幾個大舊衰﹐但點解佢得個殼﹐成鬼日都咁易領野架呢﹖ (突然諗起星爺套大內密探﹐口水禧外表係一件鐵布衫﹐但內裡完全係一件底衫﹗ 鐵布衫遇上病菌﹐即刻變咗件底衫﹗重要唔係雞仔嘜﹐係街邊雜牌嘜添﹗ ) 妖﹗ 佢D同學食嘅多數係垃圾食物﹐糖呀﹑薯片呀﹑微波爐野﹑超市嘅急凍食物包呀﹐周地滾﹐青色鼻涕日日咁流﹑咳到膶都飛出嚟﹑成日肚疴嘔吐﹐但佢哋無野架喎﹐一個禮拜就自然好返﹐我屋企呢件「豆腐花」真係好似火星落嚟探親戚咁﹐地球好危險架﹐快D返去火星喇﹗

醫生話無得解架喎﹐可能係天生抵抗力無人咁堅。就嚟花粉季節﹐我哋又要做好準備﹐噴鼻聞氣食藥﹐聽講今年會好甘﹐所以醫生叫而家開始準備聞氣食藥﹐等過咗花粉季節之後如果都係咁容易賴野﹐就要驗下血睇下個免疫系統搞乜東東唔返工﹗ 妖﹗ 你哋睇下佢個樣﹐完全估唔到佢會係金玉其外﹐「豆腐其中」﹗究竟係我過度誇﹐其實個個細路都係咁吖﹐定係佢真係骨格精奇﹐絕對係練武奇才﹐應該練定化骨綿掌﹐因為佢係一件豆腐花吖嘛﹗

係囉﹐等運到喇你﹗ 呢幾日無覺好瞓……我講緊我。佢可以咳住都唔醒嗰下勁﹗朝朝天未光就咳﹐嘈醒我但佢可以繼續瞓。因為醒咗再瞓係最容易瞓過龍嘅﹐所以我哋日日都係十一點幾十二點先醒。連打電話去學校請假都過晒鐘﹐學校日日打嚟追殺我。好彩﹐我日日人哋放晒學之後都有帶佢去學校攞功課揾佢個班主任見下佢﹐咪一陣學校以為我禁錮佢唔比佢返學揾警察上門拉我呀﹗ 

病咗成個禮拜嘅日子﹐我哋後園多咗D野。呢舊野當口水禧覺得悶時可以喺度消磨下時間。當佢有play date時可以用嚟招呼朋友。假如有朝一日﹐我有勇氣幫佢請D朋友仔嚟開派對﹐大家就唔洗齋困喺間屋裡面玩﹐可以出下去舒展筋骨喇。就算平時﹐我唔得閒同佢去公園﹐都可以放佢出去玩下。我繼續做下屋企野。

舊野係二手喺人哋屋企拆返嚟再裝﹐但D木仍然好硬淨﹐油下佢就得喇。唔好講笑﹐呢座野已經最少十年「樓齡」﹐賣家話佢都係同人哋二手買返嚟﹐佢用咗五年﹐之前嗰個應該係新買嘅﹐我估都用咗至少五年啩(因為新嘅要幾千蚊﹐好乸貴﹗)﹐所以我哋係第三手用家嚟架喇﹐呢座野已經陪伴咗唔少小朋友成長架喇﹗感覺佢好似一個呀媽呀﹗

當然喇﹐早少少買會更抵﹐因為佢年紀細開始玩就會玩得耐D。不過唔緊要﹐如果保養得好的話﹐佢唔玩嘅時候﹐呢座野重可以賣得返出去嘅﹐所以都唔怕嘥錢買舊野返嚟玩得嗰幾年就唔要。

問佢係咪唔洗再帶佢去公園喇以後﹐佢話﹕而家唔洗去住。男人都係貪新鮮﹗

頂﹗邊忽似病﹖

唔止娜姐會比人吊﹐我仔原來都好呢尾野﹗但人哋嗰D吊有錢收﹐我仔佢係自吊﹐幾後現代﹗

我係個有分寸嘅媽媽﹐唔會任何野都比佢亂嚟。玩都要睇有無危險性。呢個玩法已被禁止。

花園裡嘅桃樹開始有花﹐幾年喇﹐我未食過佢結嘅果﹐全部比唔知松鼠定浣熊食Q晒﹗呀婆叫我比肥料谷果實﹐我先無咁笨呀﹐谷多D果實餵飽班PK﹐然後食飽再喺我花園疴屎﹗ 嬲嬲哋每個搽D辣椒醬上去﹐我呢度無水池﹐重唔辣到佢哋PK﹖不過驚辣得制搞到佢哋肚疴﹐到時我咪賴晒野﹖

屋後嘅下水道成日有「拖友」喺度拍拖﹐佢哋永遠都公乸一對對咁出嚟玩架。今日同口水禧痞喺到睇鴨的睇咗一陣﹐DIY放假其實都幾無聊﹗  

一座play structure﹐一個小朋友﹐畫面好dry﹐我知。我識做架喇……

多D請佢D朋友嚟玩吖嘛﹐明解﹗ (咪諗錯隔離以為我要宣佈咩好消息呀﹗)

我有日再問佢洗唔洗多個細佬妹﹐佢開始有D唔耐煩叫我唔洗再問。收到晒﹐最緊要你keep住呢個態度﹐當我比人係咁問嗰時﹐我就將你推出去代答。我會喺後面陰陰嘴笑住支持你嘅。