梗係唔係真係有獎嗰啲獎啦，我邊有咁好運呀？講緊嘅就係領咗口水禧嘢，佢好返時到我倒下。咁証明其實呢個病毒真係唔嘢小喎，連埋學校病咗嘅小朋友，都可能十個八個人中招，都未計佢哋嘅屋企人有無人領野.
前日開始有啲頭痛，繼而就係全身酸痛，心知不妙，怕且都係領咗野啦。於是前晚食咗兩粒樂迅感冒靈，諗住襯嗰病重未發生深厚嘅感情之前試吓可唔可以早啲出招剿滅佢，食完葯重特登提早瞓覺。點知朝早五點天都未光就醒鬼咗要去交水費。就係咁，再瞓返通常都會瞓過龍，遲咗起身，好彩返學無遲到唧。
一起身嗰吓feel 到啲葯幫唔到我，因為開始有啲沾寒沾凍又周身骨痛。心諗sh*t! 觀乎口水禧都攪咗個幾兩個禮拜而家都重咳緊，我咪都有可能攪成個禮拜先掂？佢病當然都好麻煩啦，但我病嘅話就更加PK 啦，因為對於我哋呢啲喺度無人無物嘅人嚟講，就算病咗都要自己攪掂啲野，家務照做，仔照送去返學，飯要照煮，衫要照洗。世界係唔會因為我病而行得慢啲等你唞吓。呢個病毒最賤嘅地方係你日頭好哋哋，但一到黃昏就開始燒，一路燒吓退吓又再燒。個人一時慶慶哋，一時又周身汗，好難捉摸呀！尤於瞓前食咳葯水嘅關係，我已經連續幾日朝早四五點會起身去交水費，總之係你唔去交就唔洗旨意瞓得返。咁樣醒一醒真係大件事，上一段咪講咗囉我，唉！精神錯亂！所以呢兩日完全送唔到口水禧去學校，要佢老豆遲返工送個仔去返學。我喺屋企暈到十二點幾夾硬起身去學校接放學。
前日食咗葯，懵吓懵吓，開咗兩個鐘頭水喉都唔知，唔怪之得個熱水爐猛喺度煲水啦。尋日重衰，煮完野唔記得熄火，好彩係同緊呀婆講電話唔係走咗去瞓覺，如果唔係真係屋都比我燒埋。
點解而家又有精神寫blog㗎呢？皆因中午呢個時間係全日最精神最好狀態㗎啦，只要係坐喺度唔洗行嚟行去嘅話就OK。行多兩行，又暈又嘔咁款，睇嚟真正嘅豆腐花係我而唔係口水禧喎！真係好堅呀隻菌，無人性㗎真係！
口水禧啲同學有啲都重病緊返唔到學，或者返一日放半日，何解會放半日呢？皆因條友仔病咗佢屋企人都夾硬送佢嚟返學，睇吓我咁肥C 大隻都唔掂，小朋友點頂呀？所以好多都上上吓堂要打電話叫屋企人嚟接返屋企囉。
講開呢樣野，前日喺我咳到人「月潤」」都飛出嚟嘅時候，重要收到學校寄嚟嘅信話口水禧自開學以嚟請咗多過十日假喎，又話咁樣會阻礙佢嘅學習進度影嚮社交生活等等。又話呢區啲學生通常一年都請少過十日假。真係火都嚟，又咳多兩錢重，舊「月潤」又少咗幾克! 又話我可以約校長傾吓乜乜物物。好啦，本來諗住瞓吓，局住要起身去學校揾個校長理論。
入到去比個書記擋住，見到我個造型，佢當堂都嚇咗一跳。怕且都好少有家長會以我尋日個look去學校。我費事一秒咳幾嘢要成日用手遮口，索性戴住個口罩衝入去就算。咁啱痰上頸，把聲沙過「昆」」重要頭幾隻字連我自己都聽唔清楚自己講緊乜！
又因為瞓唔夠嘅關係，對眼好醃，係咁標眼水，真係聞者心酸見者流淚！個書記聽咗好耐先知我嚟做乜，佢叫我唔洗理封野㗎喎，係出嚟提醒吓啲家長請少啲假。喂，大佬呀，你估我想㗎咩，咁個仔喺學校惹咗病，學校又規定連微燒都唔准返學，呢兩個禮拜佢日日反反復復燒吓退吓又燒返，我點比佢去返學呀？我而家都領埋嘢啦，我先知道隻病毒真係好堅喎，大人都頂唔順，細路燒到懵吓懵吓返到學校都無精神聽書啦！況且我每日都有去學校攞功課返屋企比佢做，每日都有做吓電腦功課㗎喎，我唔覺得佢有退步喎！有病嗰啲同學病都照返，又無戴口罩，咳同打乞黐都唔用手遮住，喂，你咁樣嘅話，我仔就算係鐵金剛都頂唔順會領嘢啦。我遵守校規，你就出信比我，咁係咪以後我仔病我都照送佢去學校播菌先？
個書記叫我唔洗理封嘢，學校唔會處分口水禧。我無擔心過呢樣，但我覺得要比學校知有好多人將病咗嘅細路照送去學校，甚至教佢哋呃老師話自己無病。係咪應該出信比呢啲自私精呀？重有嗰啲無啦啦帶咗個仔去玩，成個禮拜唔見人唔請假嗰啲，呢啲人先應該收信丫嘛！真係慶慶哋，又咳多兩咳，舊「月潤」又少咗幾克！
相信我明日應該夠資格去睇醫生啦，因為我已經開始feel 到有啲喉龍痛，兼夾就嚟多幾舊腹肌肌 事關咳咗兩日，肺中間嗰個凹位開始一咳就痛，好似做咗成千吓sit up 咁！呀婆早兩日叫我去睇醫生，太早去無用㗎，咪又係叫我去買成葯。呢度係你一日唔咳舊「月潤」出嚟」，醫生係唔會開醫生紙先買到嘅葯比你食。成葯只會拖症，盞拖長我嘅痛苦！我無咁多時間日瞓夜瞓嚟慢慢養病呀大佬，抗生素又好，特效咳葯水都好啦，最緊要快啲好。
