語言治療師叔叔：禧禧呀，學校最近有無啲咩得意野講比我知呀?
口水禧：我做數學功課，學校比左張紙我呀。
叔叔：下？比張咩紙你呀？
口水禧：咪就係一張紙囉。
上星期五，學校頒左獎狀比數學有進步(Math Award) 嘅小朋友。台下家長見到自己嘅小朋友上台攞獎，紛紛舉機影相拍video，企高坐低紮馬訓身乜pose都有，重忙過台上頒獎嘅校長或小朋友。有啲細路企喺台上興奮無比，手舞足蹈，有啲呆約木雞無乜表情。我屋企嗰個當然係後者，好似已經攞過無數獎，想學啲歌星攞夠獎以後都唔再攞咁款！
攞完落黎就咁比左我同佢老豆，不帶一點感情。等我重以為佢唔知係唔係唔舒服。點知入到課室鬼打都無咁精神同同學玩起上黎。
目空一切，大人眼中嘅榮耀獎狀在呢班小朋友嘅心中只不過係一張紙而已，重係阻住佢玩嘅障礙物。
我羨慕佢哋嘅簡單，呢啲就係真智慧，邊個話細路唔識諗野？論睇事物，好多時大人都唔夠細路心水清。
追追趕趕營營役役，為左一份見得人嘅profile，其實講到尾，只係一疊紙而已。
共勉之！
