外國嘅生活一向都比人覺得好悠閒，無拘無束，草地放狗曬太陽，咖啡室外嘆下午茶，名店shopping行到啲雪紡裙會飄起嗰隻咁他條……
咪傻啦
，呢啲情境最多係週末先有架咋，平時閒日，我哋同地球每一個角落嘅人類一樣，都係趕趕趕趕，裙拉褲甩咁架！
上班一族嘅忙碌，我已經無資格去講啦。不過家庭主婦嘅忙，我又無興趣講，因為明嘅人會明，唔明嘅講極都唔會明，重以為我喺度博同情添！所以我都係慳返啖氣暖肚好過。
自從泳隊再次開張後，每日放學趕返屋企，食野換衫然後去練水。練完返屋企一直忙到可以合埋眼，已經係半夜。
週末，放下所有野 （其實係早一晚做好晒啲野就真!)，三條友出去踩單車減下壓。唔好以為細路唔洗減壓，只要係動物都會有壓力架啦，所以小朋友都唔例外。
上星期六，我哋嗰區熱到溶咁濟，根據我嘅習慣，當然又係賴野啦。出門口前上網睇天氣報告話我哋去踩單車嗰區都有差唔多80 度華氏，於是我又好蠢咁信以為真，帶晒短袖衫褲去，重有我又愛又恨嘅太陽油啦梗係，要賴野點少得佢先！
去到目的地，佢哋兩父子開始上油 （我晨早喺屋企出門口前已經攪掂）。搽完油落車放單車嘅時候，E~~~咁涼嘅？重有啲凍添。望下側邊嘅人，又係咁？咁似曾相識嘅畫面又浮現…….長袖外套？我哋三個短袖? 唯一值得安慰嘅係當日的確係有太陽，所以防曬係一定要搽嘅。
上油上到好似支油唔洗錢買嘅口水禧喺到裝緊佢啲保護措施，佢係一個好安全嘅人黎架！
自從仆過一穫甘之後，佢每次去踩單車都非常有耐性咁著好佢嘅裝備。真係「仆一穫甘，一世小心！」
去邊都要帶佢嘅玩具，公仔、車仔，細細粒易唔見嗰啲佢就最鍾意帶。如果佢堅持要帶，我哋有得佢，但要佢自己負責收好，唔見左唔好旨意我哋會去幫佢揾或買返。要開始學懂後果自負嘅真正意思同感覺。試過唔見過野，我哋唔買返，佢領左野之後第二次就會學精啲，揾過個好啲嘅地方收好。（以後想揾下佢將啲錢收埋喺邊咪好難？)
即使唔係在水中央，我仍然可以照寫，「在路中央，有蛋散一雙」！
點解啲相多數都無我架呢？實情係我喺佢哋後面踩，相機喺我度，當然就係我負責影啦。係人都知我老公最鍾意將我影到鬼咁嘅樣，唔核凸嗰一秒佢都唔會㩒制影嘅。所以算把啦，都係我影佢哋，佢哋兩兄弟做我模特兒算啦。兩兄弟……
沿住海邊踩向小鎮嘅市中心，雖然有啲涼涼哋，不過總算有太陽射住都無咁凍。口水禧呢個年紀乜都要認叻行最前帶頭，不過去到每個燈位前佢都識停車落地推單車過左馬路先，然後再踩過。踩到最後條單車徑已經無得再去，變左做踩馬路，我哋覺得口水禧嘅速度會阻住其他人，所以都係三個齊齊落地去側邊嘅行人路推埋嗰段路安全啲。如果唔係怕佢阻住人哋，比佢試下踩馬路邊都OK,個度唔係真係好多車，其實唔算危險，不過馬路邊嘅單車徑只夠一架單車行，無理由要全部人慢落黎等你個仔慢慢踩架係咪先？
上面呢張相就係推緊單車去downtown食雪糕途中。
買左雪糕喺室外揾到個靚位坐低開工隊雪糕。口水禧成日打斜個杯，攪到啲雪糕漏晒出黎。好彩佢呀媽有百寶袋，濕紙巾、乾紙巾、水呀，乜鬼都有，真係唔驚你幾論盡，我都有架生招呼你！唔好講笑，我連膠布消炎葯膏都有帶，費事佢萬一PK跌穫甘好似上次咁無野急救，到時要四圍騰揾葯房。禧爸成日話唔明啲女人點解成日咩咁大個袋出街，點解唔係淨係袋銀包瑣匙就夠。哼！識咩呀啲男人！ 眼前呢個小小男人，杯雪糕食到通街滴咁，手又有，褲又有，地又有。無張濕紙巾黐立立好核凸架嘛！滴到成地都係，唔用水沖返乾淨咪會惹蛇蟲鼠蟻囉！條友手咁多周街摸，摸完又摸自己，一陣又賴野我咪大穫！消毒紙巾酒精樣樣齊，唔怕佢手多！
泳隊開返工，呢個髮型又係時候講bye bye啦。
食完雪糕正想踩返單車返去之際，咩事笑得咁開心呢？見到靚女？
事緣有個伯伯喺對面馬路放巨型泡泡，啲細路好似見到錢咁，顛左。莫講話佢哋，我見到啲泡泡都好開心。成個天都係，真係好靚好興奮。雖然掛住嘩個陣食左少少泡泡入口，但都覺得好好玩。其實我無份玩，不過見口水禧喪追啲泡好過癮而已。唔洗錢嘅娛樂，大人細路都鍾意。附近咖啡室外嘅父母可以暫時唞下，任得啲細路追泡，自己幾個大人圍埋傾計或靜靜飲下野叉下電，何其嘆！
玩夠泡泡，見啲風越黎越大，太陽唔頂得幾耐，拿拿臨踩返單車返去。路上經過一個大草源，旁邊有啲遊樂設施，有條友棄單車話要玩下滑梯。踩左一輪單車，又推左一輪單車，都重有力爬高爬低，氣都唔喘下，呢啲咪叫後生囉！
。
平時家頭細務我頂無問題，但呢啲場面啦喎，爸爸自己識做啦。口水禧好醒，呢啲粗重野會自動波搵佢老豆陪，佢知道個呀媽無乜運動細胞。（但我唔明點解我老公要全情都戴住個單車頭盔架呢？明明都唔係踩緊單車？）
口水禧已經換左兩隻下門牙啦。當日縮喺後面嗰兩隻恆齒真係自己走返出黎喎。每日都要提佢好好刷牙，恆齒蛀左就無。上次去檢查牙齒兼洗牙，發現有一隻大牙有少少蛀，頂！ 所以交個仔比啲老公要豁出去，實會有啲野會失去。不過，有人肯同你一齊分擔已經叫好好架啦，自己一個人點做得晒所有野。加上呢個年紀鍾意老恰媽媽或平時湊開佢嗰個人，將佢交比另外一個，自己會激少啲，唔洗成日都係我做衰人。
兩兄弟……我有啲想
！
呢篇野講減壓，放假一齊去做下運動或出去搵啲地方去行下係我哋減壓嘅方法。爸爸工作有壓力要減壓；媽媽一個禮拜勞碌要減壓；呀仔返左幾日學要減壓。減完大家心情回復平靜又開始新一個禮拜嘅忙碌。我同禧爸頂唔順一日走幾場應酬節目嘅生活模式，放假係用黎休息，唔應該重攰過平日。口水禧一星期四日練水，星期五學鐵拳道（聽落個名好似懶勁，實則睇佢好似顛佬咁亂打！），星期日學網球。聽落忙到爆炸，不過好彩係樣樣都係運動。盡可能留返個星期六唔做任何野唔上任何堂，留返我哋出去家庭樂。
以前佢會追動物，但通常係佢未追到去，人哋都走晒。而家學精左，靜雞雞慢慢行埋去，企好叫我幫佢影合照。嘩，好似企左幾個G4喺佢後面咁！
啲鵝都有三份二個口水禧咁高架！H7N9? 無人叫你去摸丫！
最近每個星期我哋三個都會食沙律，可能係加塊燒雞或豬扒咁。除左因為練完水已經黃昏要開飯之外，亦都因為想口水禧開始食下生嘅蔬菜。早排老師攪左個沙律派對，班上有啲細路唔肯食沙律，老師話美國人家庭嘅小朋友食得唔夠多菜好普遍。其實唔淨止美國人啦，唔食菜嘅人乜人都有啦。好彩口水禧自細嘅燉飯裡面有好多菜，以前比佢食嘅baby food亦都有揀好多有菜嘅比佢試，之後到食大人野食時都食好多菜，所以菜對佢黎講唔係問題。從來都無拒絕食任何野。
不過咁大個就真係未比過生嘅菜佢食，唔知佢個肚頂唔頂得順。所以一路都係食熟嘅蔬菜。間唔中以前雞雞學校都有比生甘筍佢哋食，見佢都肯食喎。所以喺個沙律派對前幾日同佢試下喺屋企食下沙律，係真正嘅菜沙律，唔係我哋細個用雜果薯仔卡夫奇妙醬個隻沙律呀！佢竟然好鍾意食喎，唔好講笑，我都係近呢幾年先食，我細個好怕生嘅菜嘅味道，覺得自己似食緊泥！
好啦，既然佢OK的話，就每個禮拜食下啦，生嘅蔬菜裡面有種enzymes （唔知中文叫咩！）可防癌兼提高免疫力，細路大人都應該食。不過美國成日都有沙律菜中毒事件，所以我會揀有機同某幾種菜，波菜西洋菜一定係熟食，因為年年夏天都有關於波菜賴野嘅新聞。
兩隻狗……事緣人哋狗狗個主人同隻狗狗玩拋波，口水禧在旁一副準備就緒嘅樣要去同隻狗爭波，不過次次未跑到去個波度，隻狗已經將個波擔左返黎比個主人。口水禧得個跑字，個叔叔開心，定一個波出去，有兩隻傻狗去追。
「媽媽，我想養多隻狗狗。」今日口水禧同我講。
你照顧到你自己，又幫到我手做家務，又唔嫌執狗屎臭先啦。
我仍然覺得小朋友成長過程係要有動物相伴嘅。但未必一定係要同一屋簷下，有接觸就好。唔好為無聊嘅原因養，亦都唔好為無聊嘅原因養左又放棄，因為你影響緊小朋友對生命嘅睇法。我要口水禧做好上面嘅事係要佢知道照顧另一條生命係一個責任，唔好諗住唔好玩就掉比呀媽攪掂。當你願意為另一條生命付出嘅話，你就係真心愛呢條生命。
我都係做到晒上面嘅事先生你架咋，衰仔！
玩完狗，同人爭完波，繼續踩返去停車場上車閃人，因為開始凍啦。食完野返屋企沖涼訓覺。佢訓左，間屋靜晒，就係我減壓之時。重整自己，大戰學校。
