近排係咪傻左猛更新個blog，失驚無神突然有時間架呢？搾咪有囉。
而家每日放左學返屋企即刻食啲野就要出去練水。（前幾個blog咪講左囉，又提！）ok ok，唔係想講呢樣。臨近學期尾，要剪要貼嘅學校野已經接近尾聲，下個星期學校開放日，老師會喺班房展出呢個學年班細路做過嘅野，所以呢個星期已經係進入埋尾嘅狀態，無乜好多要加。話實個開放日我都唔知去黎做乜，嗰堆野根本就係我同另外一個媽咪整嘅，見到都想嘔咁濟！
不過比下面老師，去下支持下啦。
所以呢排無乜野要工廠女工夜晚開野黎做，正所謂由穿膠花嘅狀態進入做黐膠花嘅境界，所以已經唔知自己講乜。
而家最令人月經失調嘅就係個年尾畢業派對。令人失調嘅並唔係工作量，而係人事上嘅鬥爭問題。今次唔係我去惹火呀，我都係旁觀者咋。話說隔離兩班都各有一個好鍾意話事嘅媽咪。但係一個鍾意攪世紀婚禮，一個鍾意攪天檯的婚禮，南轅北轍天生一對冤家！攪世紀婚禮嗰個完全唔睇價錢；天檯婚禮嗰個乜都講錢，所以兩個成日開會都有火花。夾喺中間嘅我同我哋班另外個個媽咪就最慘，一話要投票都唔知點算。企左邊又怕得罪右邊嗰個，相反企右邊又驚左邊嗰個唔高興，一個唔happy直頭唔黎開會，攪到乜都決定唔到，開左三次會都係得個吉！
計我話，點解唔拆返開每班自己攪掂佢啫？還掂點攪我哋班都無人黎幫手架啦，是Q 但攪左佢跟住放暑假囉。無謂要我哋呢啲無辜嘅人做炮灰丫！下年分分鐘重要同佢哋一班，到時未開學先結怨，仇家滿天下，日子點過？
口水禧示範比呀媽睇：
揸頸就命
