發霉blog又啟市啦喂！相信口水禧一日未比人踢出泳隊，我哋每年嘅暑假都會好似今年咁樣無得唞架啦。過去咁多個禮拜，最主要嘅節目都係練水比賽又練水比賽…… 正所謂入黎泳隊唔通比你黎hea咩，唔去比賽不如去游泳班啦。深明呢個大義之後，今年我幫口水禧報多左比賽，一來等佢多啲經驗，話時話呢件蛋散去多左比賽之後膽大左，游得好過之前（以前游到好似黎歎世界咁款！）；二來都真係要比個交代啲教練啦，人地訓練左你個仔，你唔去比賽咪嘥人心機？
就喺上幾個禮拜，口水禧參加左每年最大型嘅「籌旗」比賽，無錯，你絕對無睇錯，泳隊係要自己籌經費嘅。食粥食飯都睇重呢個比賽架啦，事關個賽事係幾個泳隊攪嘅，人哋黎我地隊個泳池游水要比錢，加埋小食部呀，黎賣野嘅商戶比租擺檔呀，呢樣嗰樣等等，每年都可以籌到幾皮野出糧、支付各樣泳隊嘅開支包括比賽用嘅儀器、佈置等等等等啦。所以泳隊係好緊張呢個項目嘅。每個家庭都要捐出10個鐘頭嘅時間做義工。我由一個義工都無嘅學校跳入一個突然太多義工嘅泳隊，真係唔習慣，所以搶野做當然唔夠人地快啦，啲好位好快就比人立晒，我只好揀返我一直以黎無論係雞雞學校或幼稚園都做開嘅工作啦……之唔係就係影相囉。
原以為「車，影左都三幾年咁細嘅小朋友都難唔到我丫，重有乜嘢比影小朋友難呢？」唔試過都唔知，原來影游水比賽係好Q難架大佬！我之前喺佢地練習嘅時候影過，第一次影完當堂無晒心機，自信心卯晒！
矇、亂、慢、歪、小就係當日所有相嘅效果！重要個召集人喺我地影完之後要睇下我哋影成點喎，我幾想即刻立埋部機走返屋企！
第一，室外烈日當空下，泳池反光，太陽喺頭殼頂同喺歪少少，影出黎嘅人面會好暗或太光，但如果諗住較光啲咪得囉，大穫，人面係光左少少 （真係好少！），但泳池水就會變左白色而唔係藍色。一條賽道，選手喺唔同嘅位就會有唔同嘅光暗效果，即頭先一秒前佢塊面影出黎好暗，但下一秒佢塊面會太光！唔好諗住邊影邊調較相機光暗，調得黎人地已經游完啦！重有，十歲同六歲嘅人游水嘅速度同動作爭好遠，細嘅游得慢啲，上水呼吸位會多啲，你要影到佢哋個頭上水嗰下要嘅機會會多少少，之但係佢地年資少，動作無咁專業，上水嗰下個頭會亂咁令，表情重好似遇溺嘅人咁樣添！就算影得好大個頭好清，但多數都會因為個表情太核凸而唔要得張相。大啲嘅細路，動作靚好多，游得快好好好好多！但上水換氣嘅時間又短又少，可能50米裡面，佢只上水四、五次，重要露出水面嘅時間好短，你要捉佢上黎嗰刻真係眼都唔可以眨，因為一迅即逝，50米的話，幾廿秒就完，好多時影出黎嘅相會係一攤水加好多泡泡，無人。
望住嗰幾日練習嘅相，我真係一啲信心都無，即使我已經用緊應該影到高速野嘅相機。點解咁R底？因為啲相係要收人錢嘅，試問你會唔會比錢人幫你個仔女影張見唔到樣，只見一攤泡嘅相丫？
好驚好驚，衰左唔知點交代好！
個比賽共分兩日，第一日熱到X街! 差唔多攝氏40度，我哋工作時間係中午12:30 – 4:00。除左睇有無犯規嗰兩個家長之外，全場暴曬得最多嘅應該就係影相嘅人啦。不過幾熱都無所謂啦，事關對隔肋底已經比人嚇到濕晒，已經feel唔到有太陽曬住啦。編排混亂，加上比賽個個出盡力鬥快，比起我練習嗰陣嘅速度更快，如果話練習都跟唔到嘅話，比賽嘅情況係超級大檸樂！我哋只有靠事前家長嚟比錢影相嗰陣填嘅資料認人架咋，但最慘係個個條泳褲泳衣唔係黑就係藍，其實除左肯定唔會攪錯性別之外，我哋有無影錯人，根本無人知。
由於個比賽邀請左十幾隊泳隊黎，即係話總共有上千位選手參加，人多到佔據成間學校（我哋泳隊個池係喺一間中學入面）。影自由式重慘，影之前重要先去問個細路佢習慣個頭向邊邊換氣，咁我就去嗰邊standby。但最好笑係啲細路有啲唔肯定自己係邊一邊；有啲就同我講左邊，但到比賽嗰陣發現佢其實係右邊，咁就真係大穫，邊度走得切去泳池嘅另一邊呢？可想而知，嗰堆相影出黎嘅效果肯定好震撼！
但我真係盡晒人事啦大佬，安排混亂嘅結果就係咁囉！
正當之前一日熱到想剝皮咁濟，第二日竟然凍到要著外套！係呀，我呢邊嘅溫差就係咁玩野架啦。所以我哋執衫換季一定要留幾件冬天衫喺衣櫃裡面以便萬一突然溫度下降嘅話都有衫著。
以口水禧嘅身型同體力，佢游水其實好快，但可惜係佢成日都做唔啱動作，所以浪費好多時間左扭右扭，加上佢起跳嗰陣永遠都望隔離左右，人哋跳左入水，佢重未跳，所以一同其他隊比賽，人哋快狠準嘅話，口水禧就真係食泡！咩叫食泡？佢哋啲選手好鍾意喺身上寫 “Eat My Bubble”，即係串你游得慢，跟喺佢後面食佢撥水撥出黎嘅泡啦咁解。
睇下！佢就係咁樣成日好唔專心咁望隔黎，人哋個個喺度準備聽指示隨時跳水，口水禧就……
呢！邊有人咁樣跳水架呢？難道佢自己學左輕功水上飄呢招？但我同禧爸都唔識應該點教佢，有得佢個教練慢慢泡製佢啦。起步因為咁樣跳，基本上佢只係直線向下跳，落係塊跳台前，所以假如對手係一跳飛左出去三尺以外，加上人地動作好游得快，口水禧就會好難追。但點解我話佢其實游得快呢，係因為有時真係比佢追到，或者本來包尾，但追追下變第二第三，所以你話如果佢所有嘅動作都啱嘅話，係咪應該會好快先？不過我哋只可以鼓勵佢再做得好啲同埋讚佢等佢自信心再強啲，希望可以克服跳水嘅恐懼啦。至於點樣可以做好啲就留返教練去頭痕啦。
講完游水點解又係水呢？因為天氣熱，我哋週末要揾地方避暑囉！有時當我地屋企嗰區熱到就快40度嘅同時，三藩市係夠膽有啲地方由我哋度揸個幾鐘車就到，個度可以涼到你要著外套，重唔係薄嗰隻而係冬天著嗰啲喎，問你服未！通常我哋都會去嗰啲地方玩下行下踩下單車，夜晚食埋飯先返屋企。咁又可以唔洗咁悶三條友困喺屋企，又可以慳返電費唔洗由朝到晚開冷氣呀嘛！（我認我係cheap!
）
當岸上都有廿幾度時，海水可以好似冰水咁凍，企多幾秒都腳痛！但細路係無感覺，呢條友連底橫都濕透，仍然樂在其中。
當你個細路同你影相會展現呢啲樣嘅時候，即佢已經大個仔，唔再係小小朋友啦。而家重肯同你影，再遲啲就會無晒影，你有你影，佢有佢去玩。飛你飛到顛！
有睇新聞可能都知呢個星期加州熱到癡左線，星期六我哋帶埋單車去左避暑。因為呢個禮拜係國慶，好多人放大假入去露營，超塞車！去到目的地已經下晝兩點幾，排埋隊買埋野食已經就快四點！嗰度近海，最出名係海鮮啦。但唔好以為海鮮就會好似西貢咁喎，呢度所謂嘅海鮮黎黎去去都係嗰幾樣野架咋。最多人排嘅就係炸魚薯條檔。排左幾個字先買到！
炸魚薯條最緊要係啲炸粉又香又脆，太厚粉炸得太硬就唔好食。
頂！唔知乜鬼叫crab louie，上網睇啲相以為係炸蟹肉，叫左一客，車！蟹肉沙律咋嘩？咁點解唔索性就咁叫crab salad呢大佬？改個咁嘅名令人有暇想架嘛！
因為條街嘅人流太澎湃，想搵個位喺街邊食都無位，索性捧上車慢慢食。
隻狗好慘，望住我哋食……
食飽就開工！
一個好靚嘅地方，沿住海邊踩，人唔算多，無得頂！
最近學識自己起步變得更串嘅口水禧，同佢去踩單車有啲勞氣！（我地明明係黎玩架嘛大哥！）點解會勞氣呢？事緣呢條友呢個年紀有啲唔聽洗，自我中心強大，乜都要贏要爭。（如果你屋企嗰個都係咁，放心，遲下應該會好啲，但家陣唔等如唔洗教。）一條小徑有人散步，有人踩單車，有人企喺度發呆或吹水。無論如何，踩單車嘅見到人一定要讓，如果唔係，你又爭我又爭的話就會好危險。我哋踩單車嘅除左唔小心會撞到人之外，亦有可能比其他單車撞，所以大家都好有默契識得幾時爬頭幾時要讓。唯獨是我哋呢位少爺，技術未係好到家但重心急過人哋專業嗰啲。遇見前面有人，我哋減速係會比口水禧怪責嘅，如果減速減到佢PK的話重大穫，佢係會賴我哋整跌佢，然後發脾四咆吼。天理何在？
明白佢係咁多人面前PK係好瘀，但都唔可以搵我地黎出氣架，自己技術唔好咪繼續練習囉，做乜賴人啫！
婆婆話佢重細，唔識分危唔危險。但我覺得佢識分又好唔識分都好，我唔會放過佢呢啲行為！我唔想將來萬一佢踩單車或揸車撞到人，我哋要傾家蕩產咁賣屋幫佢賠人哋湯藥費呀！重有佢呢隻自己錯但賴人發人脾四咆吼父母嘅習慣必須要殲滅！我今朝陪佢去練水嗰陣，隔離一對母女嗌交，個女(十二三歲）好大聲喝佢呀媽兼用手上個樽狂敲張凳，重大喝個呀媽shut up 添！
如果第時我個仔咁樣同我講野，我驚我會搶佢個樽黎爆佢！
所以即使我知道而家正處於發顛期嘅口水禧有時都控制唔到自己，但正正就係因為咁樣，我哋更加要教佢，壞習慣一旦上左癮就好難改，其實六歲幾知道大人唔鍾意佢做啲咩鍾意佢做啲咩嘅，如果真係唔知，咁就更加要比佢清楚明白知道有啲行為係唔啱唔可以繼續。
好想一人中一拳！
踩踩下遇見有人騎馬，之後重係我哋回程嘅時候見到主人泊左隻馬係餐廳出面，我同口水禧梗係要過去玩下啦！
呢啲野有伴真係好，如果得我一個大人去睇馬，人哋分分鐘以為我想偷走隻馬！
西人嘅皮唔知係咪真係厚啲，熱又唔怕凍又唔怕！我肯定水溫有如冰水，但呢位人兄可以打大赤肋水上飄，勁！佢爬左塊滑板好耐先出到去，點知啲浪走晒。好不容易比佢等到一個小浪，佢照殺，好過無！
我哋踩到黃昏六七點先散水去搵食。泊好車我重問禧爸啲單車就咁掛怕唔怕比人偷，佢話食飯嗰區都ok，於是我哋就去左隔離街食飯。就係咁，食完飯，我哋就唔見左一架單車啦，重係頭先對嗰個區充滿信心嘅先生比人偷單車添！唉！好區唔好區都有壞人架老細！
