前幾日，口水禧做緊學校嘅數學練習，當日做嘅係文字題。題目：小明有三把間尺，紅色長10cm，藍色比紅色長2cm，黃色比紅色短5cam。請問黃色係幾長？
有人無心機做，我教佢嗰陣佢重亂Q咁答我問題，唔識做的話我可以原諒，但亂Q咁做就真係火都黎！
慶到我火上腦，熄鬼左佢部電腦叫佢唔好做，齋坐就算。實情係我覺得再勉強做落去盞將我度火焰推至頂峰兼佢又比我嚇到怕左唔敢做，於是喺佢齋坐嘅時候我去左吸塵。我最鍾意吸塵，一來吸完屋企乾淨，二來係我鍾意喺吸塵嘅時候諗野。我由幼稚園開始，數學呢一科已經係數一數二差架啦！嗰個境界係無敵嘅，禧婆婆教我做數學功課係幾乎要嘔十幾「兩」血咁濟，所以我細個比佢請食佢嘅獨門藤條炆豬肉有一半係因為數學。我好怕亦好討厭數學，特別係文字題，每次睇完成段字連標點之後，都令我對自己閱讀能力有所懷疑，明明係隻隻字都識，但合埋一齊又會唔知點解架喎，真係好匪疑所思！
漸漸呀婆放棄佢嘅執著，獨門藤條炆豬肉呢尾餸亦都隨住我同肥玲嘅年齡增長而失傳左啦。
吸完塵我哋出左去一陣街，揸車途中左諗右諗，決定返屋企後好好再教佢一次，一定要忍住度氣好好教。攞埋塊白板出黎寫比佢睇。初初都還ok，後尾佢又黎亂答我問題，今次我選擇忍，起身去吸塵（又吸？）有得佢自己做。我想睇下佢究竟係依賴我睇住，所以先唔用佢自己個腦諗定真係唔識，因為佢已經做左好多題，題題都差唔多，只不過係數字轉一轉而已，但佢都好似題題都未試過咁款。結果喺我唔坐佢隔離嘅時候，佢自己係識做嘅，當然唔係全部都啱，但比起我喺隔離嗰陣好啲。
未做完成個練習，我叫佢熄機去玩。因為做左大半個鐘，熱情已經退減，佢只係喺度糾纏同浪費精力，再勉強磨多兩粒鐘都唔會做得完。點解唔叫佢做晒先准佢去玩呢？原因係啲題目其實條條差唔多，我覺得既然佢有啲做得啱有啲做錯，唔係因為佢唔識，而係因為佢無心機再做落去。無心機但被迫做落去會變左苦差，苦差令興趣大減，磨落去完全無意思，只會增加佢對呢科嘅厭惡。舉一個例，一首我完全識彈嘅歌，每次練琴，我只會彈佢兩三次，第三次無論彈成點我都唔會再彈第四次，因為你會發現通常只會係第一次彈得最好，第二次差少少，第三次再錯多少少，第四次你係帶住前面彈錯嘅壓力黎練，去到每個之前錯嘅哋方你會窒一窒，就算唔窒，你都會煞有介事咁一係彈快左，一係彈大力左，一係彈慢左，一係彈得唔夠力，每況愈下。
當晚訓前諗下當日下晝我其實唔應該喺唔夠eq嘅情況下教佢做功課嘅，既幫唔到佢亦傷害左我哋之間嘅關係。媽媽本來應該係最愛佢嘅人，點知突然變左種，教人做功課又「惡屎能登」咁款，叫人點安心做安心問功課呢？好，我決定第二日同口水禧道歉。諗完舒服晒，訓覺。
第二朝，佢訓醒過黎爬上我床搵我，我向佢道歉嘅時候，佢傷心咁喊左幾廿秒，我應承佢以後教佢做功課要盡量忍住啲火，一句都唔會再鬧佢，如果我唔記得，就請佢提醒媽媽唔好教人做功課嗰陣發脾四。
點解會咁好死呢我？一個好簡單嘅原因，當日佢被罰齋坐嘅時候，我吸塵經過佢隔離，眼尾掃左佢一下，發現佢靜靜坐喺度，面上有一條淚痕。因為嗰條淚痕，我想起我自己細個做數學功課做錯左被請食「呀媽牌獨門炆豬肉」，食完之後，「行兇者」
去左廚房喊，而我都好似口水禧咁坐喺度望住啲功課，面上有新鮮嘅眼淚，亦有乾左嘅淚痕，腦裡好多問號，最大嘅問題係點解唔識做功課要接受「酷刑侍候」架呢?
我而家明白當時呀婆係幾咁嬲，因為當口水禧亂答我問題時我都好慶，比著未生仔之前嘅脾氣，我諗我嘅獨門炆豬肉肯定比呀婆o個碟更甘！
我時時教口水禧一句話「己所不欲，勿施於人」，今日應該輪到我自己教自己呢番說話嘅真理。我雖然無打佢，但我相信我鬧佢時都唔會比打佢好得去邊。
當唔夠eq嘅時候，理智會脫鈎，所有講同做嘅反應都唔會再有邏輯。重記得之前有篇野叫「迷失自己」嗎？間唔中我都會發作，只係無咁嚴重了。我知道為細路嘅功課勞氣係我哋生活嘅一部分，但唔識做功課或溫唔識書確係無理由要接受酷刑對待嘅，況且都無補於事，幫唔到啲咩，盞大傷元氣。
做極都唔識點算？
好簡單：遲D 先做囉。
