小學龜 （勁爆長）

反叛嘅口水禧究竟係反啲乜野呢？駁嘴！當啲細路開始會諗野嘅時候，就正是我哋做父母準備接招之時。無理取鬧嘅駁嘴當然要丙，但包含邏輯嘅駁嘴，我唔想大石責死蟹一句喝埋去叫佢收聲就當解決問題。例如，成日會有啲時候你叫佢唔好做一樣野，佢會問返你：咁點解媽媽你又可以做呢？我唔耐煩嘅時候會答佢：因為我係大人，所以可以做，你係細路仔唔可以做。咁佢就會再駁 ：咁點解大人可以做，細路唔可以做呢?喺呢個時候，你啲火就會黎料，一句得埋去：總之我話唔可以就唔可以啦！但細心諗下，其實我根本就未解決問題，我只係解決左當前唔比佢做嗰樣野嘅問題而已，但其實佢仍然都唔明點解大人可以做，小朋友唔可以做。結果就會出現下一次嘅駁嘴，第二次嘅時候，佢會直接否認自己係細路，佢會話佢係大人。因為我話大人可以做，咁佢咪直接話自己係大人咪得囉。（當然，呢個行為超低能勁攪笑，但以佢呢個年紀黎講，係咁上下level架啦！）所以我只有一個方法去招呼佢，就係解釋清楚嗰件事小朋友做會點，有咩後果，等佢自己決定重要唔要做，通常口水禧都會揀做，唔危險的話，我比佢做，但要睇實佢囉。危險嘅話，梗係打死都唔比佢做啦。其實細路都識得分析，你試下話佢知放隻手指去門罅，一閂門會夾斷佢手指痛到爆炸，你睇下你講完叫佢放隻手指去嗰度佢睬唔睬你丫拿？ （拿，我講緊同口水禧咁大個嘅智力嘅細路講咋，你走去同個一歲嘅講呢番話梗係無用啦，佢可能真係聽你講會放架！) 

但無可否認，有時真係好趕時間嗰陣重遇著佢發花顛死都要同你糾纏確係好煩，真係好想打暈佢就算。所以近排帶佢出街真係時時都好勞氣！ 上面講左佢手多腳多，唉！去到邊都係咁。起腳踢人哋啲野，見野攞起手就掉落地下，「篤推撞搖吹抹摸聞摙揸扯」就唔洗講樣樣齊啦！有時真係好尷尬，鬧佢我又似顛婆，唔鬧佢，佢又似無家教。兩母子去到邊都有火花，真係 「我這晚熱辣辣E呀!」除左手多多腳多多之外，重有通街大叫都令人懊惱非常。基本上係你無時無刻都有野要丙，但你真係無得秒秒都丙，如果唔係的話，你好快就爆左血管啦。

呢幾日老師話某人喺學校開始黎料攪破壞，班房中大聲傾計啦、擅自離座去攪其他同學啲野啦、攞人野唔比返人啦、蓄意破壞野啦、追打同學、用手指扮槍指人重要整啲噪音、上堂掛住玩攪到堂課做錯晒、駁老師嘴、推同學，你諗得出嘅佢多數都有做。我喺班房佢都照做，我唔喺班房的話情況更嚴重。我明，攞注意力呀嘛，但呢啲係negative attention，攞到都唔會有好下場的。我而家唔比佢再玩任何angry bird嘅電腦遊戲或玩具，我估佢哋玩得太多射黎射去撞爛啲野嘅遊戲，現實生活中見野就想整爛佢撞跌佢。上次去同學屋企玩過個lego star war嘅電子遊戲機後，返到學校就用手指扮揸槍指同學個頭。功課上唔係畫貓就係畫angry bird啲炸蛋。曾經有份堂課叫佢哋畫乜野係和平，我個仔畫隻angry bird企喺個炸蛋上面，側邊重要雞那咁大隻字寫住BOMB!  老師攞比我睇時非常無奈。老師同意暫時唔比佢玩angry bird住，老師話佢個仔細個同口水禧而家差唔多年紀時都試過有一排好似顛左咁，做埋晒啲破壞性嘅野，激到呀媽紮紮跳。於是老師暫停唔比個仔睇卡通，因為佢覺得個仔嗰排睇得太多卡通，學晒裡面啲野，於是要佢停睇一排當係罰佢又好，等佢思想上成熟少少，識得分析佢做嘅野係唔啱嘅時候先比佢睇返。

所有野都有好有唔好。佢對於唔係好認識嘅野或者新學嘅野會成日提成日做，直至到佢覺得厭為止。我知道新學嘅野梗係興香啲嘅，但有啲野唔係咁適合當街當巷比佢自由發展的話就真係要同佢講清楚點解喺街唔做得。時聽時唔聽啦，睇佢心情同大家嘅精神狀態。大家都唔攰嘅時候即使佢犯錯都有心機啲教佢，引開佢啲注意力等；但父母都係人呀嘛，點可能下下都在狀態先得架！但如果明白六歲嘅細路呢個階段嘅特質，有啲野隻眼開隻眼閉啦盡量，我已經出盡力咁忍架啦，雖則好多時都比佢破解晒我啲功力攪到喺街都會剷到佢上天咁濟…… 

六歲開始嘅小朋友會突然變左做屎忽鬼，sorry，但我真係諗唔到一個可以洩我心頭之恨而又對於佢哋啲麻煩野有更貼切嘅形容詞。脾氣上行為上大把野可以令平時唔爆粗嘅人都失守的！有啲六歲嘅大哥大姐會好鍾意扭屎忽花，上一秒話要A 唔要B, 下一秒突然要B唔要A，重要發老脾話人比錯野佢添。小則就嘈下就算，衰起上嚟可以係發顛扭計嘅好籍口，玩到大人謝咁濟。通常呢啲如果有多過一個細路以上就會引發開片爭野繼而就係大吵大鬧，眼淚漣漣。好彩我得一個喺屋企，呢個情況唔會發生。但口水禧嘅班房係爭野嘅戰場，我有理由相信我已經夠料去做調解員。通常我會睇下係邊個話要A 先，然後要佢肯定要定唔再要之後就比第二個揀。一定要好肯定同所有人講揀左就唔可以再改。呢個係學習後果自負嘅機會。咪以為佢哋呢個年紀唔識咩叫後果自負，如果唔係的話，你睇佢哋絕對唔會揀個惡人黎蝦，點都揀個無脾氣嘅黎蝦啦，唔驚比人丙咩！所以學校講得最多嘅就係consequence，即係「後果」咁解。所有嘅事無論好同唔好都有後果，我哋比佢哋自己揀要好嘅後果定唔好嘅後果，訓練佢哋嘅判斷能力同承擔後果嘅勇氣。

因為呢個扭pat pat 花嘅特質，六歲嘅細路好容易會成日調轉啲字黎寫，口水禧或佢啲同學都有呢個情況，莫講話功課會咁，有啲連寫自己個名都會將啲字母或數字調轉黎寫。所以即使老師見到都唔會即刻斷定個細路有讀寫障礙，佢哋會等多年睇下個細路有無改善先再決定個細路需唔需要接受治療。

呢個年紀好好好好好好硬頸，大事情一係揸唔定主意，但一決定左就蛇咬都唔肯改。瑣碎嘅事情例如食咩味嘅雪糕呢啲就轉黎轉去，但對佢哋黎講嘅大事情就唔洗旨意可以改變佢哋。就好似上面講話口水禧決定一定要喺星期二做功課，你唔洗旨意叫佢星期三、四先做，佢話要星期二做就星期二做。食飯一定要先食白飯，食完先食餸，唔可以調轉或兩樣野同時食。唔好問佢點解，因為佢解左你都未必明。我唯一可以做就係有佢，只要佢知道後果會係點而又接受個後果的話，我睇唔到我有咩理由要同佢堅持。

六歲嘅小朋友最鍾意玩謝佢呀媽或平時主要湊佢嗰個。佢哋一方面覺得呢個人對佢好重要，好想討好佢，但又最鍾意有乜都搵佢黎出氣。五歲時，媽媽係佢哋嘅全世界，但六歲開始會以自己為中心。最想自己做最叻嗰個，用最好嘅野，乜野都要做第一個。可惜同時又知道其實重好依賴媽媽照顧佢，想獨立又獨立唔到住，對媽媽又愛又恨，所以會一時話最愛媽媽，一時又話最唔鍾意媽媽。因為呢種向左走向右走嘅特質，呢個年紀嘅細路對於一啲小事都會好情緒化，仆損少少喊到好似斷骨咁慘，驚天地泣鬼神！叫佢訓覺變左難事，就算上左床大半個鐘都重聽到佢喺度高談闊論。食野唔合作。 ~~~未完但無晒影~~

如果你正面對緊以上各樣問題，喂！埋黎比個五我先啦，因為就算口水禧就黎七歲咁濟，但我每日都重遇到以上某啲seafood鬼野，如果我嘅上圍一比佢激完就會谷氣變大，怕且我已經心口孭住兩個爆左嘅西瓜四圍行啦！ A~~~~不過到左七歲聽講話又會變返好啲，我非常期待嗰一刻嘅降臨。之前佢同班有個同學大過口水禧大半年左右，佢媽咪當時話見到口水禧就好似見返佢個仔六歲幾個陣咁樣，又係激到佢紮紮跳，但佢話佢個仔過左七歲之後就好啲啦喎。望就咁望啦大佬，

好啦，既然都開左學個幾月，寫下關於口水禧返學嘅野啦咁。一年班開始，每日都有功課派返黎做。通常老師開學嗰陣都會每人派個folder，用黎裝住新功課、已比老師批改過嘅功課或堂課、通告、回條、默字或測驗等等。放學返到屋企後，口水禧會第一時間攞佢個folder出黎比呀媽「打簿」，因為佢好鍾意將裡面野一一咁向「上級」匯報。每個禮拜都會有一張抄寫生字嘅工作紙，約莫八個生字，每個要寫三次；一份讀書報告；數學工作紙；閱讀（學拼音同生字）呢個係老師用黎記錄每個學生嘅閱讀程度嘅。逢星期五就默個八隻生字。

功課嘅事，佢自己包攪掂，唔識就問我或老豆。佢一定會記得執佢個書包，但肯定唔記得要執好張書檯。咁耐以黎，我成日都係佢派返張默字紙返黎我先醒起佢嗰日原來要默字！（咁嘅呀媽都有，真係C唔C丫你話！） 所以學業上嘅野如果佢自己唔攪掂，個呀媽又成日失憶，咁就真係可以提早收工嘞。

學習負責任

但咁樣並唔代表我完全唔理佢嘅學業喎，我只係覺得應該比佢一個學習負責任嘅機會。無論讀書又好，將來出黎社會做事又好，到以後有佢自己嘅家都好啦，一個負責任嘅人幾時都唔會黑人憎嘅。我見過好多細路返學遲到又賴呀媽、唔記得做/帶功課或任何野又賴呀媽、明明係自己做錯左都係賴呀媽！佢哋重會大聲講” It’s not my fault, it’s my mom.” (唔係我嘅錯呀，係我媽咋！）邊講重邊戚眉戚眼，嘴角向下彎，縮起個膊頭，攤開兩手，一副「關我鬼事呀！」咁嘅神情。放學出黎，一個唔該都無就將個書包、外套、飯盒袋就咁掉喺地下，等呀媽呀婆呀嫲老豆彎晒腰同佢逐樣孭上身，然後走左去玩，一個星期五日都漏低唔係衫就係飯袋喺學校，甚至係裝功課個folder都漏喺學校唔知邊度，要媽媽行暈成間學校同佢四圍搵。喺香港我唔知發生呢啲事會點，但喺美國，你嘅事就係你自己嘅事，無人會幫你做，你要自己攪掂佢。你喺屋企係王子又好公主都好，sorry，喺學校人人都一樣，無專人會服侍你。更加唔會有專人服侍家長啦梗係。唔好諗住叫老師幫，我十分肯定，老師會飛你飛到顛，但會更加嚴厲對待你個仔，所以去求老師幫你個仔做工人，你個仔成年都唔洗旨意有運行啦！佢會長期都黐喺課室嘅天花板度，皆因家長好帶歇，比麻煩個老師結果攪到個仔日日因為做錯野而比老師剷到上天花板。（你要老師幫丫嘛，佢咪咁樣去幫囉！）

與其心痛要小朋友對自己所有嘅事負責太辛苦，覺得咁樣對佢哋太苛求，我寧願由我自己去訓練我個仔，好過有得佢乜鬼都唔理然後比老師鬧。大家嘅小朋友係屋企嘅寶貝，就係因為佢係我嘅寶貝，我更加唔想佢比老師鬧，而唯一唔會比老師鬧嘅辦法，咪就係教佢哋要做好自己囉。口水禧託賴咁耐以黎都無試過唔記得做功課、做錯功課、帶漏野。今年重日日都記得帶返自己件外套返黎添！學生比得越少麻煩老師，老師唔需要為學生頭痛，試問咁樣嘅學生點會無老師錫架？

英文進度

而家口水禧不單止同同學完全可以溝通到，聽老師講課亦無問題。連我哋睇新聞，佢都聽得明部份內容。睇讀寫同好多佢啲美國人同學已經差唔多，聽完一段大若三十字嘅內容之後可以接近一字不漏講返出黎。有時同我哋講野會頭幾個字係廣東話，跟住後面幾個字專台。有時會將英文文法當廣東話文法，例如踩單車爬人哋頭，佢會講成「爬頭人哋」，即英文直譯” take over him”。笑爆嘴。但喺屋企，我哋都仍然係同佢講廣東話。唔知佢會唔會變全英文，但只要嗰種語言曾經係母語而屋企每日都有人講嘅話，即使佢用英文同我哋講野都唔會唔記得廣東話，就好似我細個母語係國語，返左學就轉晒台去廣東話，但唔會唔記得左點講國語丫，因為婆婆同公公講野用國語丫嘛。

成日聽人講話香港有啲家長會喺日常生活中無啦啦同小朋友爆兩隻英文字但文法同用字都錯，攪到唔拖唔水，我就聽過有個爸爸同手推車上嘅小朋友講「你『試』唔『試』leepy呀？」(sleepy）。如果真係想教好小朋友嘅英文，可以每日讀英文故事書比佢聽。發音唔準都好過錯文法同用錯字第時比人笑丫嘛！最慘就係學錯左之後又要從頭再學，比未學過由頭學更難。讀故事書真係好有用，好快小朋友就會學識自己讀，好快佢就會記低生字，然後記得點寫點用。

最近睇緊本書，關於美國公立小學（幼稚園至五年級）嘅課程。話晒我同禧爸都唔係喺美國長大，完全無受過呢度嘅教育，對於學校運作，考試模式，修讀科目等等一概唔知。你話就算去問其他家長或老師，人哋解得幾多比你聽丫，直頭唔知要由邊度開始講起啦。所以求人不如求自己，始終仔女嘅學業應該係作為父母嘅去主動關心，唔好旨意人哋會「餵入你口裡面」。

以我所知大部份加州嘅公校而家都好著重閱讀同寫作，尤其係閱讀，根據調查所得，從小有閱讀習慣嘅學生長大後可以完成大學課程嘅人數比無閱讀習慣嘅人數為多，因此而家學校非常鼓勵學生睇多啲書，等佢哋可以從中學多啲字。學完字，梗係要開始學寫啦。

同雞雞學校一樣，口水禧佢地都有一隻全班同學輪住帶返屋企嘅公仔。每個人都要以公仔嘅身份寫一篇日記關於嗰日同小朋友做左啲乜野然後第二日交比老師。

據知有啲同學係口述，大人幫佢寫；有啲係大人小朋友各寫一半；有啲同學就自己寫。老師唔捉文法，佢哋覺得呢啲係靠睇書或日常生活聽人講野學嘅，所以我舊年問口水禧個先生洗唔洗教佢英文文法時個老師都話唔洗。有得佢自自然然學識。（香港嘅小朋友就可能未必適合咁學，因為平時同同學傾計唔係用純英文丫嘛。）

 

事先聲明，白板上寫嘅野並不代表口水禧嘅真正為人！呢個年紀嘅小朋友係會成日都講啲暴力嘅野；加上最近我哋個後園又比浣熊纏擾，將我接近一半嘅草皮起晒再挖爛，口水禧都為左呢件事嬲左啲浣熊喎！

自幼稚園開始，啲學生就要開始學寫完整句子，然後再學成段咁寫。口水禧不知不覺間亦都開始寫到比較長嘅句子出黎。全部都係靠拼音、睇電視或睇書學嘅。未必識串晒所有字，但都算串得幾接近架啦。

呢塊板真係好駛好用。我哋平時用黎教口水禧做功課或互相寫啲野比對方睇。不知不覺，口水禧已經可以寫到五個字以上嘅句子啦。雖然會因為未掌握好讀音而拼錯字，文法亦未識，但總算叫做表達到自己想講乜。

 

嗰隻浣熊個樣幾惡 ！相信隻浣熊見到呢幅野都唔認得嗰個就係佢自己。 

口水禧重加左啲象聲詞比隻浣熊添！有睇過風雲漫畫嘅人應該對呢啲象聲詞好熟啦，係咪？

 

 

嗰日口水禧帶左隻Bobby Bear返黎，正當我同呀婆講緊電話嗰陣，口水禧已經自己攪掂左份功課，嗰次重係佢第一次自己寫咁大篇野添。

10-8-13 各位同學，我今日跟左Colin屋企。首先，我地去左牙醫度，我口入面有蟲。(笑C，寫寫下唔記得左佢扮緊熊仔，講左自己個口有蟲！）跟住我哋去左Wholefoods 市場買左啲豆。跟住我哋返左屋企，我教Colin做功課。跟住我哋一齊睇Shrek 2。跟住我哋食晚飯同睇書。我喺度過夜。晚安Colin。

Boby Bear

口水禧近期迷上左玩scrabble。我預科先第一次見呢個玩意，全因為比老師叫左去參加比賽，臨急臨忙叫隔離位個同學教我玩兼日日陪我玩。玩左一個禮拜就去同隔離班三個同學「鍊過」。比賽完就無再玩過呢尾野。屋企都無人同我玩，買返屋企等封塵咩。

條友邊玩邊抄低啲字，佢話係mimi嘅證書喎！完全理解唔到佢係咩意思，R晒頭！不過佢自己要抄咪有佢囉……可能前世未抄過生字呢！

夜晚當口水禧去左訓覺之後，我就會喺佢塊白板鬼畫符啲野等佢第二朝起身睇。無乜教育性但佢睇左會好開心。「了」幾隻字就可以幫佢每日有個開心嘅開始，物有所值啦，係咪？

到目前為止，我最自豪嘅仍然係口水禧有一夥上進嘅心，呢個年紀嘅佢最想做最叻嗰個。佢對有興趣嘅野會好用心去自學。例如有個週末早上，佢自己起左身之後，唔知佢喺邊度搵到我好耐之前買返黎嘅英文文法教學紙版。其實我嗰陣買黎係比自己睇嘅，因為我啲文法真係唔掂，我驚第時唔識教佢。但我買返黎之後就將張紙板塞左唔知去邊，老人痴呆發作後連買過呢樣野件事都唔記得埋。嗰朝，口水禧食早餐嘅時候問我：「媽媽呀，咩野字係verb ( 動詞)，咩字係noun ( 名詞）呀？」我舉左幾個例子比佢，佢自己又講多幾個。跟住佢問：「咁beautiful係咪verb呀？」我話：「嗰個係形容詞，叫adjective。不過呢個你先生個應該未教架喎。」佢話：“呀，我今朝睇到你買嗰張野上面有寫。我想快啲學晒全部呀！」正當我同禧爸深感安慰之際，口水禧突然爆左句：「因為快啲學完，全部識晒，咁我咪唔洗再返學囉！」我同佢老豆>>>>  算啦，都叫做起碼有心想學，總好過話乜都唔想學丫，係咪先！