68

放飛機

Posted on by 禧媽

千其唔好誤會呀！我講緊係放真嗰啲呀，唔係甩人底嗰隻放飛機呀！Big Smile

 

講正經野之前，梗係要講返啲更加正經嘅野先啦。關於乜呢？眯就係關於呢個blog囉。開檔之後曾經收過幾個留言話啲相好細呀咁，有無人話我知其實你係用手機丫、電腦丫、定係用手板電腦咩ipad嗰啲之類嘅野睇架呢？因為我用過晒以上嘅工具上自己個blog做下實驗，但點都搵唔到個問題喎！最有可能覺得啲相細嘅應該係手機啦係咪，之但係手機放大畫面就睇到架啦喎，妖卯然話禾知典解會睇唔du相架呢？我真係就黎R頭R到同禧爸情侶裝都諗唔到典解!Confused ( 繼續狂R中……) 

 

好，講返放飛機先。呢期有人懶呀，話掛單車上架車出去踩好攰喎。其實好似都同我有啲關係嘅，鬼叫我上兩個禮拜去完學校開會賴左野咩！喉嚨痛咗兩日，跟住就猛流鼻涕，繼而多痰，跟住開始咳添。好彩可能平時有跑步咁，頂得住！不過就唔想踩單車咁粗勞囉，於是昆左嗰兩兄弟去散下步放下飛機咁啦。我唔想郁啫，但都要比嗰件精力旺盛嘅郁下放下電先得架。

話說早排睇完Planes之後，某人喺玩具店見到有Dusty賣，唔係玩具機而係可以當飛碟咁掉出去滑翔嗰種。唔記得係因為乜野事獎勵佢而買嘅，不過始終苦無機會正常咁玩，事關係屋企後園一來唔夠風力，二來唔夠空曠，真係得個「掉」字同埋個「執」字，一啲都唔過癮。睇佢咁樣掉完又執執完再掉，架飛機真係襟到嚇C人，咁都未爛喎，勁！

加上某個呀叔突然啲童年回憶返左黎，佢話細個玩過一種扭橡筋嘅飛機喎，好好玩喎，於是佢自己喺網上搵到，幾蚊雞買左隻黎玩，重話想教口水禧玩添。架野出師未節就先喺屋企比佢個仔揸爛個架機翼，繼而連個機尾都甩埋，有個蠱惑仔驚比老豆丙多鑊，索性自己偷偷哋用膠紙黐住，當然，好快就比佢老豆發現左啦。兩個都咁低B，真係難為左我。So Tired

咩叫有姿勢無實際呢？睇下呢條友示範啦。 本來應該係滑翔嘅，不過唔知係風唔夠勁定人為嘅問題，通常架機都係一個好細嘅拋物線然後就機頭直啄草地。啄左無數咁多次地都無穿無爛，之所以話架野抵就係咁嘅原因囉，做玩具最緊要pro，質素專業到比啲咁唔專業嘅蛋散掉左兩粒鐘都仍然未毀容，十幾蚊算係咁啦！初頭買嗰陣勁有比人昆水嘅感覺，十幾蚊買架塑膠玩具機？咪玩啦！又唔係遙控又無聲又唔講野又唔曉自己行，一架咁嘅爛鬼膠洗唔洗咁貴呀！而家先知貴係喺邊度！如果佢有幸可以喺口水禧手上活過一年，每個月都係一蚊幾毫嘅娛樂，你話係咪抵到爛先！Yeah... Sure

喺口水禧出盡力掉左無數次飛機而機頭又無數次啄草地之際，大家係咪好奇怪，究竟個爸爸去左邊呢？

佢一直都喺度，無離開過我哋，因為佢好忙，忙到唔得閒離開……

 

 

 

 

 

 

 

 

 

 

上鍊，上鍊，再上鍊！Big Smile

 

放一次就要扭一次條橡筋，而口水禧嗰架就就咁掉就得啦，難怪個仔放左幾廿穫，禧爸嗰隻都係飛左幾次咋，陰公！玩玩下連隻機尾都唔見埋，攪到要係一大片草地上四圍搵，證明呢啲幾蚊貨仔真係有啲昆水！

終於都可以父子兩個一齊起飛啦！老嗰件紮晒馬步，R少少腰，準備要將架機飛返香港咁款；睇下細嗰件幾咁鬆容，將架機打直揸，當火箭升空咁放，後果係……

我覺得下次TVB如果要拍個衝上雲霄嘅攪笑版可以搵呢兩件蛋散去。Yeah... Sure

禧爸又上緊鍊……So Tired

計飛行里數同駕駛經驗，口水禧應該比佢老豆早廿年升做captain。我估計到個仔做左captain禧嗰陣，我老公應該仍然喺度上緊鍊！Big Smile

 

Captain禧

殘機與我

無幾耐，呢位人兄隻機正式宣告打柴，因為連條橡筋都比佢上到斷埋，見唔見機尾有條野？幾黯然無奈嘅一張相呀！Crying

「老豆，你買架cheap野嗰陣有無諗過屋企有個拆野王架？」最好笑係個老豆諗住自己細個有玩呢種意，好想將呢樣野介紹比個仔，點知口水禧一手揸隻飛機時，已經一野揸爛左隻機翼啦。激到佢老豆欲哭無淚，邊黐邊話個仔點解咁粗魯揸隻機…… Doubt it!

為表我嘅誠意，以及要做到公平公正公開，假如有一日，captain禧真係學識揸飛機嘅話，我做阿媽嘅拍心口第一個上機試佢手勢。大家唔洗擔心我，最多同我準備多幾個嘔吐袋甚至係嘔吐桶就得架啦。無野嘅，最多咪嘔左個胃出黎當減肥囉！無野嘅！

講開話佢最近轉左佢個志願，課堂上佢話比老師聽佢第時大個想做helicoptor driver同animal doctor。Yeah... Sure因為佢唔識得pilot同vet呢兩個字，於是用佢有限嘅英文整左兩個新字喺佢自己本「禧禧字典」裡面。但佢嘅英文能力唔算差，以一個返學先開始接觸英文嘅人黎講，佢嘅閱讀能力都算係咁，甚至佢識嘅字會比部份嘅美國人同學多，只係講嗰方面未可以好似啲同學咁講好快。但我同禧爸都非常滿意佢嘅進度。

無帶腳架嘅後果就係要臨場用鞋或手袋墊高部相機影，而大家可能會唔見左個頭殼頂囉。

無敵人字拖係我夏天嘅良伴。成個夏天，如果唔係去跑步或要行大量嘅路的話，呢對人字拖就係我每日出街時身體嘅一部份。基於佢著同除嘅方便，我有時跑完返嚟除左對波鞋後，都會上身運動裝下身踢住拖去買餸。 造型確係詼諧但勝在夠方便舒服涼爽，尤其係去人哋屋企嗰陣，唔洗「半彈跳式」除鞋丫嘛。我早兩日去口水禧幼稚園個班主任屋企探佢都係踢拖去，好彩呢邊嘅人衣著真係求其到暈，就算你著住睡褲出街都唔會有人理你…… (不過亦都唔會有人埋黎溝你就梗架啦！除非你件睡衣……Baffle)

放完飛機，我哋去左附近嘅地方行下。萬聖節就快到啦，四圍都係南瓜啦！完全唔知點解啲人可以種到咁大個南瓜！係食左激素定變左種呀大佬？口水禧同其他小朋友一樣，非常期待萬聖節嘅來臨，原因唔係因為有糖食，而係佢有機會扮鬼扮馬。今年扮咩？佢個個禮拜講嘅答案都唔同，好彩未同佢買衫啫。今年有槍手黎，口水禧件衫要睇下槍手肯唔肯幫手同佢整啦。

夜晚食拉麵 ，麵未黎，有人話要自己整一本書。哇！佢畫嘅人類終於都有手有腳重有埋個身呀!重記唔記得喺雞雞學校嗰陣，有份問卷要佢畫人，條友畫左個頭之後，再喺個頭四邊加左四條線就話畫完。問佢嗰四條野係咩，佢話係手同腳。當時佢畫嘅人係無身嘅。老師話只要畫多過五條線就當OK。有理由懷疑佢抄左怪獸公司條喬！

題外話：

有見放飛機咁好玩，於是我哋第二個禮拜又去左同一個地方放。去到撞正有人攪緊籌款，有好多攤位比小朋友玩。見有檔野有啲驢仔比小朋友騎下，咁就一於試啦，反正口水禧哦左好耐話想試下騎馬。騎完馬，隔離有檔野，圍欄裡面有好多動物比小朋友摸下睇下，於是口水禧梗係唔執輸要入去玩下。我同禧爸就企喺欄外睇住啲小朋友玩。突然聽到有把女人聲大叫「XX，望住呢度！喂 XX，望媽咪呢度呀！」無錯，純正廣東話，所以份外親切有feel。眼前係一個約莫2-3歲嘅小妹妹靠住一個圍住guniea pig嘅圍欄比佢媽咪影相，但小妹妹面部表情同身體語言顯示佢想同啲動物玩多過影相。所以佢無乜表情望媽媽部相機影完相之後就繼續望住面前嘅動物。此時，嗰個媽媽睇返張相，頗大聲向佢女講：「車！都唔笑嘅，邊有人影相唔笑架，再係咁唔比飯你食丫拿！」

Ugh!Ugh!Ugh!咁都得？

 

 

 

 

 

禧媽

More Posts

68 Comments

  1. Such a fun day running around outdoor… when will HK ever be cold enough to let us enjoy the outdoor? I have list of places to go to and enjoy the green lawn but everytime we got there, B&B were melted and after an hour, they demand to go to the car and blast up the air con… it’s too hot mummy…which we can tell from their hair and 2 sets of fresh clothing.
    I love the little story about taking photo, it’s so ‘chinese’ to demand silly things like this to your child and it is actually a form of bully if you look closely to that behavior. No food if you don’t smile, if you don’t call everyone’s name at the round table with 12 grown up – all relatives but the child may only seen them once or twice, you do not get any toy, no TV, no food! RIDICULOUS!!!!

    • 香港嘅夏天室外活動，除左水上活動舒服少少，我都諗唔到重有咩選擇好。尤其當你已經習慣左喺乾爽嘅地方生活過之後，要你再去比較濕熱嘅地方住，真係需要一短頗長嘅時間先可以適應到。不過去游水都好嘅，正如我哋呢邊熱到爆嘅時候，我哋都會避免去室外。咩時候做咩活動真係要睇天氣溫度做人。 :whistle:

      嗰個女人講完句：「再唔笑唔比飯你食丫拿！」突然望到我望住佢，佢自己都即刻望第二度。其實影細路仔，尤其是佢地好唔得閒嘅時候根本係無可能會望鏡頭，佢地又唔係模特兒出身，點會望鏡頭丫！ :wacko:

    • 秘決就係自己安排部相機擺嘅角度，同埋影到自己滿意為止，包唔會有核凸相出現！ :yahoo:

    • 佢係左手人黎架，佢淨係揸筆先係右手架咋（本來都係用左手，因為聽見其他人話佢唔好用左手，佢變左右手揸筆），其他都係用左手。

      • Did he decide for himself to use his right hand?

        Just curious since both my children are left-handed.

        • 一般話小朋友三、四歲左右就會開始自己決定邊隻手做主力手（呢度啲人叫dominant hand)，好多人會用揸筆嗰隻黎定小朋友係唔係左手人，不過口水禧學校啲老師話睇用邊隻手揸餐具食野黎定主力手喎。無論左定右，千其唔好迫佢變用另外一隻手，小朋友有壓力，會導致口吃。

  4. 喂, 幟哥, 幾年搬番啲舊blog過嚟, 我不時都會睇番口水禧BB時啲blog, 嗰時佢唔識搏咀, 仲得意嘛! :wacko:

  7. 真係好鬼鍾意睇禧媽個blog,絕無悶場 :good: 仲有咁多靚相睇!!
    btw,有張相我笑左好耐,就係禧爸想跳起送隻機起飛個張 :yahoo: (Sorry禧爸:p)
    仲有仲有,禧媽你影d相真係好有feel!!! :-)

    • 試過有人話太多字睇到想訓。 :-(

      嗰張相，莫講話你啦，我每次睇都想笑啦，兩個嘅姿勢實在太騎呢啦！唔知附近睇住佢哋兩個玩嘅人有無覺得佢哋好低B呢？ :wacko:

      多謝你，我揸住機亂Q咁影架咋，影幾廿幅實有幾幅較為好啲，核凸嗰啲會比我消滅，哈哈！

  8. You know how when people play golf, they have a caddy to take the bag etc. Your husband should find a caddy to wind the plane for him!
    How often do you jog? Your face is much ‘V-shaped’ than before! Did you get rid of your belly too? My body is not very fat, but i can’t get rid of my belly. I ride bike for 30 mins per day. Did your husband buy a new bike yet?

    • 佢個助手咪係智商同佢差唔多嘅口水禧囉！兩個互相幫對方執飛機，幾忙呀兩個！ :wacko:

      我自從早兩個禮拜賴左野之後就無跑過，真係懶！今日要迫自己出去跑下啦。如果唔偷懶嗰陣，我會一個禮拜跑最少3日，冬天就快到，希望堅持到啦。我其實真係無瘦，不過係角度影落好似塊面好V咋，上一個blog先笑完我係「闊太」，塊面闊到！肚腩從來無離開過我，即使之前晚晚有拉筋同做sit up (而家懶晒啦，唉！係腰痛嗰陣迫住先拉下做下sit up咋！）你有恆心每日踩30分鐘真係好勁呀！堅呀！ :good:

    • 完全比我個pose呃左啦你哋全部！咁樣烏前再屈埋個膊梗係有瑣骨啦……

      嗰張相係咪捕足得好好呢？完全將佢兩個嘅低B喺鏡頭前表露無遺！ :yahoo:

  11. Captain Hey Hahaaa~~:))
    佢依家嘅髮型又眞系有d似Chilam wor~~如果再gel下佢…..就不得了喇
    [前果條打錯字咪鬼理佢]

  12. Captain Hey Hahaaa~~:))
    佢依家過髮型又眞系有d似Chilam wor~~如就果再gel下佢…..就不得了喇

  14. 禧禧好enjoy喎，禧爸就… 你形容得好正呀！！上鍊，上鍊，上鍊……XD
    “殘機與我”張相想笑c人咩:p
    草地張相禧媽你好靚呀～少女味～～

    • 禧爸嗰日確係忙於幫架機上鍊，啲相全部都係分幾次影架，唔係一張黎架，重有好多無upload上黎咋，你話佢係咪「巧」忙呢！XDDDD

      多謝你呀，實驗証明，第時無論點都好，幾大都唔好叫啲老公揸機幫自己影相，那怕要除個罩出黎墊高部機都好啦，只有自己調較嘅角度同㩒制嘅時間先會影到自己個人樣出黎架咋！XDDDDD 不過話時話，對我呢啲就黎四張嘅大嬸，比人叫少女味又確係有啲自己都想嘔嘅自然反應……極其量都只係一個少嬸而已！哈哈！

  15. 禧媽…一路都有睇開你個BLOG…亦都好鍾意睇你個BLOG…今次忍唔住要留言~
    因為張相影得你好靚呀!!
    真心的 :)

  16. 禧爸可以裝 「lightbox」或「fancybox」…可以將圖片彈出一個框框方便電腦將圖片放大瀏覽。
    留言區的字體係css 由14px轉為16px (電腦望上去會自然d)
    可以安裝 Akismet 防大量廣告留言….
    安裝埋DB Cache Reloaded Fix …資料庫唔洗查詢咁多….
    ========================================
    回禧媽….ipad同手機都無問題….XD…

    • 一次過醒我幾招，真係多謝哂！攪掂左！得閒又過黎幫襯下啦！

    • 呀…仲有樣野想請教你，如果想加emotion到comment，有乜好plugin介紹呢？謝謝！

    • 又攪掂…我用左wp_monalisa個plugin做comment emotion，都算okay啦。又有問題問你：如想做私人回複，你有無野介紹？謝謝！

      • Wp好少…私人回應…之前有一個…不過有bug…之後作者都無更新…

          • 所謂限制就係收取美金0.1 per Gb。佢地既storage非常穩陣既。
            點解唔用root path? 無特別原因架，係Ubuntu既default installation 係咁我就照用，不過我就加左redirect route將root轉哂去/wordpress囉

          • 管理員AC…唔會係admin啊下…@@ B-)
            裝埋 Limit Login Attempts ，睇下有無人用admin撞入後台.. :mail:

          • 如果有phpMyAdmin或其他…改左個「admin」個名…如果唔係…一定有好多人撞入入來…

          • 我都知呀…我個database係第二部機…又無phpmyadmin，所以都okay既

        • 你兩個外星人果然係啱傾啲！無乜人撬得開我屋企個電車公把口，而你竟然可以聊起佢嘅「欲火」，真係要寫個服字比你呀，小管！勁！ :good:

          • 難得我屋企呀電車公搵到人同佢吹水，我又點會攝入黎做「電燈膽」呢！哈哈！不過電車公公司尋晚爆穫，今朝唔知有無時間比佢龜速打中文留言……

Leave a Reply

Your email address will not be published. Required fields are marked *

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)