放風箏

星期一至五，返工嘅返工，返學嘅返學；返工嗰個嗌唔想返工，返學嗰個嗌唔想返學，我哋屋企嘅風水係咪有問題呀？ 到左週末，長駐屋企嗰個就會好想衝出街，去邊都好啦，越遠越好啦，總之唔好再對住同樣嘅幾面牆就得架啦。踎喺屋企總會你有你攪你啲野，我有我做我嘅野，三個人未必有交滙嘅嗰點，食野時間除外。就算食野都會猛睇電話啦……有人！ 

搵啲活動等三個人可以齊齊參與嘅，喺屋企會借X遁，出左去就無得咁樣啦，係咪好無敵先！   上上個禮拜，諗唔到去邊度踩單車好，於是諗下不如搵個地方行下都好吖！諗起金門橋附近個海邊最近好似完成左啲工程，條「海濱走廊」（我作嘅名，因為真係唔知嗰忽野叫咩），叫乜都好啦，志在一家人出去有個地方hea吓啫。本來喺網上搵左間評分都唔錯嘅美色 式茶餐廳想去試下嘅，點知去到見到門口條長龍之後即時「dur皮」，嗰度睇落閒閒哋都要企成粒鐘以上，我哋喺屋企只係食左個包飲左杯野就出門口啦，應該支持唔到等咁耐，唯有去第二度求其食啲野填飽個肚就算。 

卒之去左漁人碼頭附近個Ferry Building改建而成嘅商場裡面求其搵啲野黎食。見有間麥西哥快餐就入去買左burrito同tortilla chip (粟米片) 點salsa醬就算。禧爸就喺隔離買左三文治然後入黎黐我哋位坐。

口水禧主攻一輪tortilla chip之後都要食埋佢個buritto，齋食粟米片點會飽呢！一陣重有啲出力野要佢做架嘛，唔食飽邊有力呢？

其實所有野食都麻麻哋，質素好過飛機餐少少而已。不過本來就無要求，但求唔臭就擺得入口架啦。

食完野正想行去停車場攞車嘅時候，喺街上見到有個貌似奧班馬嘅細路吹住喇叭，邊吹邊踏步，佢對鞋底鑲左鐵片，所以行嘅時候重會發出好似人哋跳的㗳舞咁嘅聲添。睇睇下發現佢唔止吹喇叭同跳舞，重口嗡嗡講緊野同埋唱歌，咁好睇真係唔駐足睇下都唔得啦。我超鍾意睇呢啲街頭賣藝 （唔係街頭行乞），尤其係小朋友。見到佢哋好有自信，舉首投足都十分投入表演，唔怕曬唔怕瘀唔怕攰唔怕無人睇，我覺得非常難得。呢個小奧班馬認真有魅力，唔係個衰人口水禧催催共，我可以企喺度睇半日都得！

我唔知佢有無家長喺附近睇住佢，不過能夠咁有自信咁一個人企喺嗰條大街上表演，真係好想行埋去話佢知我非常佩服佢又有才華又有勇氣！我同口水禧講如果有日佢都想咁樣的話，我絕對會支持佢架！

不過暫時，我諗佢只可以表演啲只有佢自己先知自己做緊乜嘅野啦，

沿途經過一個公園，口水禧想入去玩。但嗰度真係太多露宿者啦，所以我哋拒絕比條友去玩。大佬，個個細路入到公園少不免實顛左咁四圍走，橫衝直撞，又叫又跳架啦，但啲露宿一個二個訓晒喺度，有啲唔知訓喺啲暗角位，一個唔覺意一腳踩到佢嘅話，點知佢會唔會起身打人先！重有啲喺度自言自語，走黎走去唔知佢做緊乜嗰啲，如果一野推左個細路出馬路咪大鑊！個公園三面都係大街黎架喎，是但跌喺一條街都包你比人車扁啦，呢啲險我係唔會冒嘅！於是呢就有個人不斷喺度「EE訛訛」，發脾四話除左公園邊度都唔會喎。哎呀，食左豹子膽頂啦佢，要脅我？我同佢講如果佢邊度都唔想去嘅話，我哋可以即刻返屋企架，咁就大起佢啦！哈哈！唯有死死地氣跟住我哋行去停車場。點知經過呢舊唔知咩野，見有兩、三個小朋友喺入走黎走去，佢話想入去睇下，唉，好啦，望入去唔見有露宿者喺入面，就比佢入去睇下啦。當然要喺佢老豆陪同下先入得去啦。

其實我諗夜晚都幾恐怖架呢度，周圍都有「尿壓」味，地下一灘二灘唔知係水定尿，幾驚口水禧鋪踩水癮發作一腳踩落去，我都唔知好唔好掉左佢對鞋好！行左一圈之後催促佢兩父子快啲離開，好臭呀大佬，越企越想嘔！ 去到本來話想去行下嘅「海濱長廊」時發現好大風呀！我個假髮呀！重有兩片織髮呀！三個髻！四條假眼睫毛呀！幾乎吹晒落海咁濟！撞啱呢排有風帆比賽，人多到呢！於是決定向前再行少少睇下有無一個地方好啲。點知原來噠地係無鋪磚或石屎水泥，淨係得沙路一條，風一吹一捲，揚起晒一片沙塵，真係己乎要高歌周杰倫首「龍捲風」.…..像一陣風，吹完它就走……來得太快就像龍捲風，不能承受我已無處可躲……

後來眼望前面方原X公里都係一條沙路，怕且一來一回行完返黎，我哋三個都變左兵馬佣咁嘅樣啦，索性搵塊草地放下風箏就算啦。其實如果唔大風呢，呢度係幾靚幾啱散步，跑步或踩單車。你睇，成座金門橋係你眼前，幾靚！

 

walmart貨仔，好似USD1！雖然咁平，但都飛到下喎，以口水禧呢啲亂咁扯亂咁放嘅「玩家」黎講，真係條線唔斷都偷笑啦！賣到咁平都係諗住比小朋友玩架啦，所以其實都唔可以放到好高，如果唔係，啲細路淨係識放唔識收，一尾有得條線係咁去，真係放到上外太空啄埋ET對眼隻風箏都未落得返黎！

 

越黎越有「闊太」嘅特質，唔好誤會，呢個稱號絕對同我嘅銀包毫無關係，闊者，解面型闊也。睇下我個頭，加埋個彌敦道9號髮型同塊面，等我以前重成日個朋友頭大過書包，呢鋪真係話人話返自己啦！

 

因為大風嘅緣故，除左放風箏之外，重好多熱愛玩「海上降落傘」（頂！突然唔記得左個名添！唉！）會聚集喺嗰度孭住個傘，著住潛水衣喺海面上上落落彈下飄下又落下海咁，頂得凍又識游水嘅人士，呢項運動應該幾好玩嘅。我覺得佢哋最利害嘅就係從未見過佢哋啲傘同人會炒埋一碟架喎，唔會你條繩勒住我條頸「kick」住我個傘咁。堅！

上門牙嘅乳齒開始越黎越細，大概係牙床開始預留位置比恆齒出黎啦。六歲九個月嘅口水禧面形亦開始轉變，面上已經無晒三、四歲嗰陣嘅「豬嘜」樣輪廓，轉而變左家陣嘅小男孩樣，雖然時時都仍然做緊啲低B野，講啲無厘頭無邏輯說話，但聲線亦都無左以前好小朋友嘅得意。唔知有一日佢變左老牛咁聲嘅時候，一開口叫媽媽嗰陣，我會唔會毛管棟，打尿震咁款呢！

 

一個字 –  Man!

不過放風箏唔係應該向上望架咩？何解成日望地下呢？唔通有金執？

又向下望？究竟係咪踩’fee’呀？定係無拉褲鍊？

叫佢自己收返個風箏，佢收收下攪到條線走去kick住人哋放喺地下個降落傘，個叔叔好無奈咁望住眼前個細路係咁「哎呀，kick 住左呀，哎呀！」，扯下扯下，越扯越甩唔到，結果要老豆出手幫佢拆返開先得。呀大哥，如果拆唔返開嘅話，我都唔知點算好？賠錢比人攞走個傘呀？架車邊度放得落呀？唔通要口水禧孭住個傘綁喺車尾，好似人哋用快艇咁拉住佢，佢飄返屋企？